Ang Kaumhan Maputi Na Agod Anihon
1. Ano ang importante nga hilikuton karon?
1 Pagkatapos mapanaksihan ang Samaritana, ginsilingan ni Jesus ang iya mga disipulo: “Tuluka ninyo kag tan-awa ang kaumhan, nga maputi na ini agod anihon.” (Juan 4:35, 36) Magapadayon ang espirituwal nga pagpangani, kag abanse nga nakita ni Jesus nga magalapnag ini sa bug-os kalibutan. Bisan didto sia sa mga langit, nadalahig gihapon si Jesus sa pagpangani. (Mat. 28:19, 20) Ano ang nagapakita nga ginadalian gihapon ini nga hilikuton bisan pa madali na lang ini matapos?
2. Ano nga mga pag-uswag ang nagapakita nga ginadalian ang bug-os kalibutan nga pagpangani?
2 Bug-os Kalibutan nga Pagpangani: Sang 2009 nga tuig sang pag-alagad, nag-uswag sing 3.2 porsiento ang kadamuon sang manugbantala sa bug-os nga kalibutan. Sa mga pungsod nga ginadilian ang pagbantala, may 14 porsiento nga pag-uswag. Ang kadamuon sang pagtuon sa Biblia kada bulan naglab-ot sing 7,619,000—mas madamo ini sangsa mga manugbantala kag halos tunga sa milyon ang kataason sini sangsa nagligad nga tuig. Samtang nagauswag ang hilikuton sa madamo nga lugar, mas madamo ang nagapangabay sing nahanas sa Gilead nga mga misyonero. Nagauswag man ang dumuluong sing lenguahe nga mga teritoryo sa iban nga pungsod. Nagapakita ini nga ginapadali ni Jehova ang hilikuton sa sining tion sang katapusan sang pagpangani. (Isa. 60:22) Positibo bala ang inyo pagtamod sa inyo “kaumhan”?
3. Ano ang mahimo ihinakop sang pila parte sa ila teritoryo?
3 Pagpangani sa Inyo Lugar: “Ang amon teritoryo indi mabungahon,” mahimo isiling sang iban. Matuod, ang pila ka teritoryo indi mabungahon pareho sa iban ukon pareho sang una. Gani, mahimo maghinakop ang pila ka Saksi nga halos nagbaton na ang tanan nga interesado sa sina nga teritoryo kag ang ila hilikuton karon amo na lang ang pagpangita sang nabilin nga mga interesado. Matuod bala ini?
4. Anong nagakaigo nga panimuot sa ministeryo ang dapat naton palambuon, kag ngaa?
4 Sugod sa umpisa asta matapos, ginadalian ang pagpangani. Talupangda ang pagkahilingagawon sang ginsiling ni Jesus: “Ang alanyon bugana, apang pila lamang ang mamumugon. Busa, pakiluoy kamo sa Agalon sang alanyon nga magpadala sia sang mga mamumugon sa iya alanyon.” (Mat. 9:37, 38) Si Jehova amo ang Agalon sang alanyon, kag sia ang responsable kon san-o kag kon diin ang dapat anihon. (Juan 6:44; 1 Cor. 3:6-8) Ano ang aton asaynment? Ang Biblia nagsabat: “Sa kaagahon isab-ug ang imo binhi, kag sa kahaponon dili pagpunggi ang imo kamut.” (Man. 11:4-6) Huo, bisan nahimo na ang tanan sa pagpangani, indi gihapon ini ang tion para punggan naton ang aton kamot!
5. Ngaa dapat kita magpadayon sa pagbantala sing makugi sa daw indi mabungahon nga teritoryo?
5 Magpadayon sa Pagpangani: Bisan pa pirme matuptupan ang aton teritoryo kag daw wala sing mga interesado, may maayo kita nga rason nga mangin makugi kag magbatyag sing pagkahilingagawon. (2 Tim. 4:2) Ang grabe nga kinagamo sa kalibutan amo ang rason sang pagbag-o sa panimuot sang mga tawo kag mahimo nga hunahunaon nila sing serioso ang palaabuton. Samtang nagadaku ang mga kabataan, mahimo sila magbatyag nga kinahanglan nila ang kalig-unan kag kalinong sa hunahuna. Mahimo dayawon sang iban ang aton pagkamapinadayunon. Huo, mahimo nga mamati karon ang mga wala namati sang una. Bisan pa ang mga hungod nga nagasikway sa aton mensahe kinahanglan paandaman.—Ezeq. 2:4, 5; 3:19.
6. Kon mabudlay ang aton teritoryo, ano ang makabulig sa aton para mahuptan ang kakugi?
6 Kon mabudlay ang aton teritoryo, ano ang makabulig sa aton nga mahuptan ang kakugi? Luwas sa pamalaybalay, mahimo naton sugdan ang iban nga bahin sang pagministeryo, subong sang pagpanaksi sa duog sang negosyo ukon sa telepono. Ukon mahimo naton bag-obag-uhon ang aton presentasyon agod mangin bag-o ang aton pamaagi. Mahimo naton bag-uhon ang aton iskedyul kag manaksi sa gab-i ukon sa iban pa nga tion nga ang mga tawo yara sa ila balay. Ayhan matuon kita sing iban nga lenguahe para mabantalaan ang madamo nga tawo. Mahimo kita magregular payunir para mapasangkad ang aton ministeryo. Ukon mahimo kita magsaylo sa iban nga lugar nga may diutay lang nga mangangani. Kon may husto kita nga panimuot sa alanyon, tinguhaan gid naton nga makigbahin sing bug-os sa sining importante nga hilikuton.
7. Tubtob san-o kita magpadayon sa aton hilikuton?
7 Malip-ot lang ang tion sang mga mangunguma sa pagtipon sang patubas, gani masako gid sila ukon wala nagapabuyanbuyan tubtob matapos ang pagpangani. Amo man sini sa espirituwal nga pagpangani. Tubtob san-o kita magpadayon sa aton hilikuton? “Tubtob sa katapusan sang sistema sang mga butang.” (Mat. 24:14; 28:20) Kaangay sang panguna nga Ministro ni Jehova, luyag naton tapuson ang hilikuton nga gintulin sa aton. (Juan 4:34; 17:4) Gani padayon kita sa pagtuman sang aton ministeryo nga may kakugi, kalipay, kag positibo nga panimuot tubtob sa katapusan. (Mat. 24:13) Wala pa matapos ang pagpangani!
[Blurb sa pahina 2]
Sugod sa umpisa asta matapos, ginadalian ang pagpangani