Pagpangamuyo kag Pagpamalandong—Kinahanglan sang Makugi nga mga Ministro
1. Ano ang nakabulig kay Jesus para indi matublag sa iya panguna nga hilikuton?
1 Naghinguyang si Jesus sina nga gab-i sa pagpang-ayo sa mga tawo kag pagpagua sang mga demonyo. Pagkaaga, sang nakita sia sang iya mga disipulo, nagsiling sila: “Ang tanan nagapangita sa imo,” nga nagapalig-on sa iya nga ipadayon ang iya gamhanan nga mga binuhatan. Pero, wala nagpatublag si Jesus sa iya panguna nga hilikuton—ang pagbantala sang maayong balita. Sia nagsabat: “Makadto kita sa iban nga duog, sa malapit nga mga banwa, agod makabantala man ako didto, kay sa sini nga katuyuan nagkari ako.” Ngaa nahuptan ni Jesus ang iya panguna nga katuyuan? Aga pa sia nagbangon sa pagpangamuyo kag pagpamalandong. (Mar. 1:32-39) Paano ang pangamuyo kag pamalandong makabulig sa aton nga mangin makugi nga mga manugbantala?
2. Ano ang aton pamalandungan nga makabulig para mahuptan ang aton kakugi sa ministeryo?
2 Ano ang Pamalandungan? Naobserbahan ni Jesus nga ang mga tawo ‘ginpanitan kag nag-alaplaag kaangay sa mga karnero nga wala sing manugbantay.’ (Mat. 9:36) Sing kaanggid, hunahunaon man naton nga kinahanglan gid sang mga tawo ang maayong balita. Mahimo naton pamalandungan ang pagkahilingagawon sang tion. (1 Cor. 7:29) Binagbinagon naton ang mga binuhatan kag kinaiya ni Jehova, ang aton pribilehiyo subong Saksi ni Jehova, kag ang hamili nga espirituwal nga bahandi nga aton natun-an sa Pulong sang Dios nga wala pa nahibaluan sang mga tawo sa aton teritoryo.—Sal. 77:11-13; Isa. 43:10-12; Mat. 13:52.
3. San-o kita mahimo mamalandong?
3 San-o Mamalandong? Subong sang ginhimo ni Jesus, ang pila nagabangon sing aga pa bangod malinong ini nga tion. Ang iban naman nagapamalandong sa gab-i antes magtulog. (Gen. 24:63) Bisan pa masako kita, dapat may tion kita sa pagpamalandong. Ang iban naman samtang nagabiyahe. Sa tion sang ila pagpanyaga, ang iban nagahinguyang sing tion para mamalandong. Nasapwan sang madamo nga ang pagpamalandong antes makigbahin sa ministeryo, bisan sing makadali lang, nakabulig sa ila sa pagbantala sing mas makugi kag masidla.
4. Ngaa dapat kita mamalandong?
4 Ang pangamuyo kag pamalandong makapabakod sang aton handum nga alagdon si Jehova, masentro pirme ang aton kabuhi sa espirituwal, kag mangin determinado pa gid sa pagpadayon sa pagbantala. Si Jesus, ang Puno nga Ministro sang Dios, nakabenepisyo gid sa pagpamalandong, gani amo man kita.