Ang Mensahe sang Dios sa Aton Paagi kay Jeremias
1. Ano nga publikasyon ang ginpagua sang 2010 nga distrito nga kombension, kag sa ano naton ini gamiton?
1 Nalipay gid kita sang ginpagua ining bag-o nga libro sang 2010 nga Distrito nga Kombension nga “Magpabilin nga Suod kay Jehova!” Ginapadaku sini nga publikasyon ang mga leksion nga matun-an naton sa tulun-an sang Jeremias kag Panalambiton. (Roma 15:4) Gindesinyo ini para gamiton sa Pagtinuon sang Kongregasyon sa Biblia sugod sa semana sang Nobiembre 5, 2012.
2. Ngaa makabenepisyo kita sa pagbinagbinag sang tulun-an sang Jeremias kag Panalambiton?
2 Mapuslanon Subong: Si Jeremias, ang manunulat sini nga tulun-an, nagpanagna sa mabudlay nga tion sa Juda. Sang primero, nagbatyag sia nga indi niya masarangan ang iya asaynment. (Jer. 1:6) Ginhingabot man sia sang iya mga kaupdanan kag ayhan sang iya mga paryente sa ila lugar sa Anatot. (Jer. 11:21, 22) Amo nga kon kaisa naluyahan sia. (Jer. 20:14) Kaangay ni Jeremias, sa masami mabatyagan man naton kag maeksperiensiahan ang mga kabudlayan samtang ginatuman naton ang sugo nga “maghimo sang mga disipulo sa mga tawo sang tanan nga pungsod.” (Mat. 28:19) Ang pagbinagbinag sa iya mga sinulatan makabulig sa aton nga matuman ang aton ministeryo nga may kaisog kag kakugi.
3. Ano ang mga kaundan sang libro nga Jeremias?
3 Mga Kaundan: Ang mga teksto nga dapat basahon sa tion sang pagtinuon nagahilay. Sa katapusan sang pagtinuon kada semana, may isa ukon duha ka pamangkot nga nasulat sing madukot nga nagapadaku sa panguna nga mga punto sang leksion. Dapat ipamangkot ini sa mga tagpalamati bilang repaso. May matahom man nga mga piktyur nga mahimo komentuhan.
4. Paano ka makabenepisyo sing maayo sa pagbinagbinag sang libro nga Jeremias?
4 Magtuon sing abanse para makabenepisyo ka sing maayo. Usisaa ang mga punto nga makabulig sa imo kag sa imo ministeryo. Tinguhai nga magkomento pirme. Malipayon nga natuman ni Jeremias ang iya asaynment bangod sa pagpakamaayo ni Jehova. (Jer. 15:16) Kabay nga ang aton pagbinagbinag sini nga libro makabulig man sa aton nga matuman ang aton ministeryo.