Iluga ang mga Manalagna—Jonas
1. Ano ang maayo nga mga kinaiya ni Jonas?
1 Ano ang nagasulod sa imo hunahuna kon madumduman mo ang manalagna nga si Jonas? Para sa iban, matalaw sia ukon wala sing balatyagon. Pero, nagpakita sia sing pagkamapainubuson, kaisog, kag pagsakripisyo sa kaugalingon. Paano naton ‘mahimo nga sulundan’ ang maayo nga mga kinaiya ni Jonas?—Sant. 5:10.
2. Paano naton mailog ang pagkamapainubuson ni Jonas?
2 Pagkamapainubuson: Sang primero, naglikaw si Jonas sa teritoryo nga gin-asayn sa iya. Indi ini katingalahan bangod ang mga Asirianhon mapintas katama, kag ang Ninive gintawag nga “banwa nga madugo.” (Nah. 3:1-3) Pero, gindisiplina ni Jehova si Jonas, nga nangin mapainubuson paagi sa pagbaton sang asaynment sang ginhatag ini liwat sa iya. (Hulu. 24:32; Jon. 3:1-3) Bisan pa nagpalagyo sia sang primero, ginhimo niya sang ulihi ang kabubut-on ni Jehova. (Mat. 21:28-31) Determinado man bala kita nga ibantala ang maayong balita, bisan pa gindisiplina kita ukon mabudlay ang aton teritoryo?
3. Sa ano nga mga bahin sang imo ministeryo kinahanglan mo ang kaisog kag pagsakripisyo sa kaugalingon?
3 Kaisog kag Pagsakripisyo sa Kaugalingon: Sang narealisar ni Jonas nga nabutang sa katalagman ang kabuhi sang mga marinero, handa sia nga isakripisyo ang iya kabuhi. (Jon. 1:3, 4, 12) Para tumanon ang ginsugo sa iya, nagsulod sia sa pinakasentro sang Ninive, ayhan para mangita sing maayo nga lugar agod mapahayag ang paghukom ni Jehova. Indi ini mahimo sang isa ka matalaw, kundi sang isa ka maisog nga manalagna sang Dios! (Jon. 3:3, 4) Kamusta naman sa aton bahin? Kinahanglan ang kaisog halin sa Dios para makapanaksi bisan pa may mga pagpamatok. (Binu. 4:29, 31) Ang pagsakripisyo sa kaugalingon kinahanglanon para mahatag naton ang aton tion kag pagkabutang sa ministeryo.—Binu. 20:24.
4. Ngaa dapat kita maghatag sing tion nga binagbinagon ang maayo nga sulundan sang mga manalagna ni Jehova?
4 Samtang ginabasa mo ang kasaysayan sang isa ka manalagna ni Jehova, makabenepisyo ka kon ibutang mo ang imo kaugalingon sa iya kahimtangan. Pamangkuta ang imo kaugalingon: ‘Ano ayhan ang himuon ko? Paano ko mailog ang iya maayo nga mga kinaiya?’ (Heb. 6:11, 12) Binagbinagon sa masunod nga mga artikulo sa Ang Aton Ministeryo sa Ginharian ang dugang pa nga mapuslanon nga mga leksion gikan sa matutom nga mga manalagna ni Jehova.