Ano ang Nagapahulag sa Aton nga Magbantala?
1. Ano ang kaangtanan sang gugma sa aton ministeryo?
1 Ang pagbantala sang maayong balita sang Ginharian sang Dios amo ang pinakaimportante nga hilikuton naton subong. Paagi sini, mapakita naton nga ginatuman naton ang duha ka labing daku nga sugo, ang paghigugma kay Jehova kag ang paghigugma sa aton isigkatawo. (Mar. 12:29-31) Ang gugma amo ang nagapahulag sa aton nga mangin makugi nga mga ministro.—1 Juan 5:3.
2. Paano ang aton pagbantala nagapakita sang aton gugma kay Jehova?
2 Gugma kay Jehova: Ang gugma para sa aton pinakasuod nga Abyan, si Jehova, nagapahulag sa aton nga pangapinan sia. Mga 6,000 na ka tuig nga ginapasipalahan sia ni Satanas. (2 Cor. 4:3, 4) Gani, nagapati ang mga tawo nga ang Dios nagapaantos sa mga makasasala sa kalayuhon nga impierno, nga sia isa ka misteryoso nga Trinidad, kag wala sia nagaulikid sa mga tawo. Madamo pa gani ang nagapati nga wala sia nagaluntad. Indi bala nga kinahanglan gid naton isugid ang kamatuoran parte sa aton Amay sa langit? Ang aton kapisan sa ministeryo nagapahalipay sa Iya kag nagapaakig kay Satanas.—Hulu. 27:11; Heb. 13:15, 16.
3. Paano ang aton ministeryo nagapakita sang aton gugma sa aton isigkatawo?
3 Gugma sa Aton Isigkatawo: Ginapakita naton ang aton gugma sa mga tawo paagi sa pagpanaksi sa ila. Kinahanglan gid nila mabatian ang maayong balita sa sining makahalanguyos nga mga tion. Madamo sa ila ang kaangay sa mga taga-Ninive sang adlaw ni Jonas nga “indi makakilala sang ila kamut nga too kag sang ila kamut nga wala.” (Jon. 4:11) Ang aton ministeryo nagatudlo sa mga tawo kon paano makatigayon sing maayo kag makalilipay nga kabuhi. (Isa. 48:17-19) Nagahatag ini sing paglaum sa ila. (Roma 15:4) Kon mamati sila kag manghikot suno sa ila natun-an, “maluwas” sila.—Roma 10:13, 14.
4. Ano ang indi gid malipatan ni Jehova?
4 Ang maayo nga mga kabataan wala lamang nagapakita sang gugma sa ila mga ginikanan kon may okasyon lang. Nagatinguha sila nga ipakita ini sa tanan nga tion. Sing kaanggid, ang aton tudok nga gugma sa Dios kag sa aton isigkatawo magapahulag sa aton nga mangin alisto sa mga kahigayunan nga makapanaksi sa tanan nga tion, indi lamang sa iskedyul sang aton pagbantala. (Binu. 5:42) Ini nga gugma indi gid malipatan ni Jehova.—Heb. 6:10.