Pamangkot

◼ Antes aprobahan ang isa ka di-bawtismado nga manugbantala para sa bawtismo, daw ano kalawig na sia dapat nga nagatambong sa mga miting sa kongregasyon kag nagapakigbahin sa ministeryo?

Ang pagpabawtismo amo ang pinakaimportante nga desisyon nga pagahimuon sang isa. Gani, antes aprobahan ang indibiduwal para sa bawtismo, kinahanglan may bastante sia nga paghangop sa mga ginapatuman sang Dios. Dugang pa, dapat makita na sa iya pagkabuhi nga determinado sia nga sundon ang mga ginapatuman sang Dios.

Ang mga Cristiano ginsugo nga indi pagpabay-an ang pagtilipon, gani ang isa ka di-bawtismado nga manugbantala dapat pirme na nagatambong sa mga miting sa kongregasyon. (Heb. 10:24, 25) Kinahanglan nagapakigbahin man sia sa pagkomento. Mahimo nakapaenrol na sia sa Teokratikong Eskwelahan Para sa Ministeryo, bisan pa indi man ini isa ka kalipikasyon.

Dugang pa, bangod ang mga Cristiano ginsugo nga magbantala sing maayong balita kag maghimo sing mga disipulo, ang isa ka di-bawtismado nga manugbantala dapat regular man nga nagapakigbahin sa ministeryo antes sia bawtismuhan. (Mat. 24:14; 28:19, 20) Pila ka bulan sia dapat nga nagapakigbahin sa ministeryo antes sia bawtismuhan? Makatarunganon lamang nga hatagan sia sing bastante nga tion para ipakita nga determinado gid sia nga mangin regular kag makugi sa pagpakigbahin sa ministeryo kada bulan. (Sal. 78:37) Pero indi man kinahanglan nga tama gid ini kalawig, ayhan pila ka bulan sugod sang nagpakigbahin sia sa ministeryo, para makalipikar sia sa bawtismo. Pila ka oras sa pag-alagad ang dapat niya ireport? Wala sing espesipiko nga pagsulundan sa sini. Dapat binagbinagon sang mga gulang ang mga kahimtangan sang manugbantala kag mangin rasonable kag balanse.—Luc. 21:1-4.

Dapat dumdumon sang mga gulang (ukon mga ministeryal nga alagad sa mga kongregasyon nga diutay lang ang mga gulang) nga magapakig-istorya sa kandidato sa bawtismo nga lainlain ang kada indibiduwal, kag dapat binagbinagon nila sing maayo kon bala kalipikado ini sa bawtismo. Dapat makita nila sa iya nga handum gid niya nga mangin isa sa mga Saksi ni Jehova kag ginapabaloran niya ang pribilehiyo nga makapakig-upod sa organisasyon ni Jehova kag makapakigbahin sa ministeryo. Dapat mahangpan sang mga gulang nga indi pa sia hamtong sa espirituwal ukon wala pa sia sing ikasarang pareho sang eksperiensiado nga mga ebanghelisador. Kon makita sang mga gulang nga indi pa sia kalipikado sa bawtismo, dapat mainayuhon nila nga ipahibalo sa iya ang mga rason sang ila desisyon suno sa Kasulatan kag hatagan sia sing espirituwal nga bulig.