Ang Serye nga Makabulig sa Aton Ministeryo

1. Ano ang duha ka katuyuan sang serye nga “Pag-istoryahanay Parte sa Biblia”?

¹ Kon kaisa, ang publiko nga edisyon sang Ang Lalantawan may serye nga “Pag-istoryahanay Parte sa Biblia.” May duha ini ka katuyuan—para ipresentar ang mga panudlo sang Biblia sa makagalanyat nga paagi kag ipakita kon paano kita mangatarungan sing mataktikanhon sa pila ka topiko. (1 Ped. 3:15) Paano naton magamit sing maayo ini nga mga artikulo?

2. San-o naton magamit ini nga serye sang mga artikulo sa aton ministeryo?

² Gamita Ini sa Ministeryo: Mahimo ka magtipig sing ekstra nga kopya sang Lalantawan nga may amo sini nga serye. Kon ang pamangkot ukon pagpamatok sang tagbalay, interesado nga tawo, ukon estudyante sa Biblia ginabinagbinag sa sina nga serye, hatagi sia sing kopya kag binagbinaga ninyo nga duha. Kon wala ka sini nga kopya, mahimo ka mag-download sa jw.org.

3. Paano naton mabinagbinag ini nga mga artikulo sa tagbalay?

³ Paano naton ini mabinagbinag sa tagbalay? Ginapangabay sang iban nga basahon sang tagbalay ang papel sang indi Saksi, kag sila naman ang mabasa sang papel sang Saksi. Epektibo ini nga paagi bangod nagahatag ini sing kahigayunan nga mausisa sang isa ang aton mga pagpati sa paagi nga indi tama ka personal.—Deut. 32:2.

4. Paano naton magamit ang mga artikulo sa sini nga serye para mahanas ang aton kaugalingon?

⁴ Hanasa ang Imo Kaugalingon kag ang Iban: Samtang ginabasa mo ini nga mga artikulo, talupangda ang mga teksto, ilustrasyon, kag paagi sa pagpangatarungan. Talupangda man kon paano ginapresentar ang materyal. Dayon tilawi ini nga paagi sa imo ministeryo. (Hulu. 1:5; 9:9) Ang isa ka sister nagsiling, “Ang pagbasa sini nga mga artikulo daw pareho sa pagtuon gikan sa isa ka ‘himpit’ nga payunir nga partner—nga nakahibalo gid pirme kon ano ang husto nga ihambal!”

5. Paano naton mabuligan ang aton estudyante sa Biblia nga maghanda para sa ministeryo?

⁵ Mahimo mo man gamiton ini nga mga artikulo para buligan ang imo estudyante sa Biblia sa paghanda para sa ministeryo. Basaha ninyo ang mga artikulo, kag pangabaya sia nga tungdan ang papel sang manugbantala. Paagi sini, mapabutyag sang estudyante ang iya mga pagpati sa mataktikanhon nga paagi. (Col. 4:6) Ini nga mga artikulo isa sa mga paagi nga ginatudluan kita ni Jehova para ‘matuman naton sing bug-os’ ang aton ministeryo.—2 Tim. 4:5.