Ang Pagtuon sa Mangin Suod kay Jehova Magasugod sa Semana sang Enero 6
1. Sugod sa semana sang Enero 6, paano kita mangin suod pa gid kay Jehova?
1 Luyag ni Jehova nga mangin suod kita sa iya. (Sant. 4:8) Agod mabuligan kita sa sini, tun-an naton ang Mangin Suod kay Jehova sa Pagtinuon sang Kongregasyon sa Biblia sugod sa semana sang Enero 6. Parte sa katuyuan sini nga libro, ang nagabukas nga pahina nagasiling: “Magasuod pa kita sa Dios kon binagbinagon naton kon paano ginpakita ni Jehova ang tagsa sang iya mga kinaiya, kon makita naton kon paano ini himpit nga ginpadayag ni Jesus, kag kon mahangpan naton kon paano man naton ini mapalambo.” Ini nga libro ginbinagbinag na anay sa mga kongregasyon sang 2004 kag 2005. Pero, para sa mga duha ka milyon nga manugbantala nga nakatuon sing kamatuoran sugod sadto, amo ini ang una nga tion nga mabinagbinag nila sing maid-id ang dalayawon nga mga kinaiya ni Jehova. Sa mga nakatuon na sini nga libro, ang pagrepaso makabulig nga mapadalom pa gid ang ila apresasyon sa mga kinaiya ni Jehova.—Sal. 119:14.
2. Paano tun-an ang Mangin Suod kay Jehova?
2 Paano Ini Tun-an?: Ang konduktor magasugod paagi sa malip-ot nga introduksion, ayhan isa ukon duha ka dinalan. Wala ginapakita sa libro kon ano nga mga teksto ang dapat basahon, gani pilion niya ang yabi nga mga teksto nga basahon. Mahimo magpautwas sing isa ukon duha ka pamangkot sa katapusan sang kada pagtuon bilang repaso. Kon ang materyal nagalakip sang kahon nga “Mga Pamangkot Para sa Pagpamalandong,” amo ini ang gamiton bilang repaso. Kon ginatugot sang tion, mahimo ipabasa sang konduktor ang pila ka teksto sa kahon kag magpautwas sing mga pamangkot agod makakomento ang tumalambong.
3. Samtang ginabinagbinag ang libro, ano ang dapat mo himuon kag ngaa?
3 Magbenepisyo sing Bug-os: Maghanda sing abanse bisan pa natun-an mo na ini nga libro. Makigbahin sa pagkomento, kay makahatag ini sing kadayawan kay Jehova, makabulig sa imo nga madumduman ang impormasyon, kag makabenepisyo sa sini ang tumalambong. (Sal. 35:18; Heb. 10:24, 25) Samtang ginapamalandungan mo ang dalayawon nga mga kinaiya ni Jehova, mas magasuod ka sa iya. (Sal. 77:11-13) Bilang resulta, mangin determinado ka pa gid nga tumanon ang iya mga sugo kag isugid sa iban ang imo natun-an parte sa iya.—Sal. 150:1-6.