Iluga ang mga Manalagna—Miqueas
1. Ano ang mahimo nga ginpamangkot ni Miqueas, pero ngaa indi walay pulos ang iya pagbantala?
1 ‘San-o matapos ining garuk nga sistema sang mga butang?’ Mahimo amo man sini ang ginpamangkot ni manalagna Miqueas sang ginpahayag niya ang mensahe sang paghukom ni Jehova sa ginharian sang Israel kag Juda. Pero indi walay pulos ang pagbantala ni Miqueas. Sang 740 B.C.E., sang panahon ni Miqueas, natuman ang mga pinamulong ni Jehova batok sa Samaria. (Miq. 1:6, 7) Sang ulihi, nalaglag ang Jerusalem sang tuig 607 B.C.E. (Miq. 3:12) Paano naton mailog si Miqueas samtang ginahulat naton ang paghukom ni Jehova sa aton tion?
2. Ngaa kag paano naton mapakita ang pagpailob samtang ginahulat naton ang adlaw ni Jehova?
2 Mangin Mapailubon: Si Miqueas nagsulat: “Magabantay ako nga nagahulat kay Jehova. Magahulat gid ako sa Dios nga magaluwas sa akon.” (Miq. 7:7, NW) Siempre, wala lang nagpatawhay si Miqueas samtang ginahulat ang katapusan. Nagpabilin sia nga masako bilang manalagna ni Jehova. Samtang ginahulat naton ang adlaw ni Jehova, dapat man kita makigbahin sa “balaan nga paggawi kag sa mga buhat sang diosnon nga debosyon.” (2 Ped. 3:11, 12) Bangod sa pagpailob ni Jehova madamo pa ang mahatagan sing kahigayunan nga maghinulsol. (2 Ped. 3:9) Gani, tumanon naton ang laygay sang Biblia nga ilugon ang pagpailob sang mga manalagna.—Sant. 5:10.
3. Ngaa dapat naton pangabayon ang balaan nga espiritu ni Jehova?
3 Magsalig sa Kusog ni Jehova: Mabudlay ang asaynment ni Miqueas, gani nangayo sia sing kusog kay Jehova para mahimo ini. (Miq. 3:8) Gani, ginapalig-on man kita sang Biblia nga magsalig sa kusog sang Dios. Maalwan nga ginahatagan niya sing kusog ang mga ginakapoy agod matuman nila ang ila teokratiko nga mga responsibilidad. (Sal. 84:5, 7; Isa. 40:28-31) Naeksperiensiahan mo bala ini? Regular mo bala nga ginapangabay kay Jehova nga buligan ka sang iya gamhanan nga balaan nga espiritu?—Luc. 11:13.
4. Ano ang maayo nga halimbawa ang ginpahamtang sa aton ni Miqueas?
4 Sa bug-os nga kabuhi ni Miqueas, ang paghimo sang kabubut-on sang Dios amo ang pinakaimportante sa iya. Determinado sia nga magpabilin nga matutom bisan pa madamo sing malauton sa iya palibot. Ginatilawan man ang aton integridad kada adlaw. Gani, dapat mangin determinado pa gid kita nga ‘maglakat sa ngalan ni Jehova nga aton Dios tubtob sa wala sing katubtuban.’—Miq. 4:5, NW.