Pamangkot

◼ Ano ang dapat matun-an sang mga kabataan para maghamtong sila sa espirituwal?

Dapat manikasog gid ang mga ginikanan para mapadaku nila ang ila kabataan “sa disiplina kag nagatuytoy nga panghunahuna ni Jehova.” (Efe. 6:4) Halimbawa, nakita nila nga mapuslanon ang pagbinagbinag sang teksto kada aga upod sa ila kabataan. Sa tion sang pangpamilya nga pagsimba kag sa iban nga okasyon, mahimo tan-awon kag binagbinagon sang bilog nga pamilya ang isa ka video, istoryahan ang espesipiko nga materyal sa mga artikulo sang Pamangkot sang mga Pamatan-on, idrama-drama ang isa ka kasaysayan sa Biblia, ukon maghimo sing mga pag-ensayo. Pero, agod “magpanikasog [ang kabataan] padulong sa pagkahamtong,” dapat man sila tudluan sing madalom nga kamatuoran sa Biblia.—Heb. 6:1.

Binagbinaga kon ano ang aton ginatudlo sa mga tawo sa aton teritoryo. Sa una nga paghambalanay ukon sa pagduaw liwat, ginatinguhaan naton nga masugdan ang pagtuon sa Biblia paagi sa libro nga Ano Gid ang Ginatudlo sang Biblia? Kon matapos na ini, ginagamit naton ang “Magpabilin Kamo sa Gugma sang Dios.” Ngaa? Ang Ginatudlo sang Biblia nagahatag sa estudyante sing panguna nga ihibalo sa Kasulatan. Ang “Gugma sang Dios” naman nagatudlo sa ila kon paano iaplikar ang mga prinsipio sa Biblia. Ang pagbinagbinag sa sining duha ka libro magabulig sa mga bag-uhan nga ‘manggamot’ kay Cristo kag ‘magbakod sa pagtuo.’ (Col. 2:6, 7) Makabulig man bala ini sa aton mga kabataan? Dapat man sila tudluan parte sa gawad, Ginharian, kag kahimtangan sang patay. Dapat man nila mahibaluan kon ngaa ginatugutan sang Dios ang pag-antos kag kon ano ang pamatuod nga yari na kita sa katapusan nga mga adlaw sining sistema sang mga butang. Dapat sila mangin kumbinsido nga kamatuoran ang ginatudlo sang mga Saksi ni Jehova. Dapat man nila mahangpan ang mga prinsipio sa Biblia kag kon paano hanason ang “ila mga ikasarang sa paghantop.” (Heb. 5:14) Siempre pa, dapat hatagan sang igtalupangod sang mga ginikanan ang edad kag ikasarang sa paghangop sang ila kabataan. Pero, madamo nga kabataan ang may ikasarang nga mahangpan ang madalom nga mga kamatuoran sa Biblia bisan bata pa sila.—Luc. 2:42, 46, 47.