Iluga ang mga Manalagna—Nahum
1. Ano ang matun-an naton sa tulun-an sang Nahum?
1 Ang kagulub-an sang dumaan nga Ninive nagapamatuod nga subong sang gintagna ni Nahum, timalusan ni Jehova ang Iya mga kaaway kag bisan ang pinakagamhanan nga kaaway wala gid sing mahimo sa Iya. (Nah. 1:2, 6) Kon binagbinagon naton sing maayo ang tagna ni Nahum makatuon kita sing mga leksion nga magamit naton sa ministeryo.
2. Paano naton mahuptan nga positibo ang aton mensahe?
2 Maghatag sing Paumpaw kag Paglaum: Sa una nga pagbasa, ang tulun-an sang Nahum daw tuhoy lang sa mensahe sang kalaglagan batok sa Ninive, ang bugalon nga kapital sang dumaan nga Asiria. (Nah. 1:1; 3:7) Pero ini nga mensahe isa ka maayo nga balita sa katawhan ni Jehova. Ang ngalan ni Nahum nga nagakahulugan sing “Manuglugpay,” nagpasalig sa iya masigka-Judiyo nga sa indi madugay laglagon ang ila kaaway! Dugang pa, nagpasalig si Nahum nga si Jehova “pamakud sa adlaw sang kalisud.” (Nah. 1:7) Kon nagabantala kita ginapaambit man naton ang maayong balita sa iban kag ginapalig-on sila nga magdangop kay Jehova.—Nah. 1:15.
3. Paano naton mailog si Nahum sa paggamit sing mga halimbawa ukon ilustrasyon?
3 Maggamit sing mga Halimbawa kag Ilustrasyon: Gin-inspirar ni Jehova si Nahum nga ipaanggid ang kalaglagan sang Ninive sa Thebes (No-amon), ang siudad sang Egipto nga ginlaglag mismo sang Asiria. (Nah. 3:8-10) Kon nagabantala kita tuhoy sa katapusan sining malaut nga sistema sang mga butang, mahimo naton padakuon ang mga tagna sa Biblia nga nagapamatuod nga ginatuman ni Jehova ang tanan nga detalye sang iya pinamulong. Halimbawa, sang ginsalakay sang Babilonianhon kag Medianhon ang Ninive sang 632 B.C.E., nag-awas ang Suba Tigris bangod sa mabaskog nga ulan, gani narumpag ang bahin sang mabakod nga pader sang siudad. Madasig nga nalutos ang Ninive, subong sang gintagna ni Jehova.—Nah. 1:8; 2:6.
4. Paano mangin maathag kag madali mahangpan ang aton pagbantala kag pagtudlo?
4 Mangin Maathag kag Madali Mahangpan: Detalyado kag makapahulag ang paagi sang pagsulat ni Nahum. Maathag ang iya mga punto. (Nah. 1:14; 3:1) Sing kaanggid, dapat man kita maggamit sing mga tinaga nga madali mahangpan. (1 Cor. 14:9) Sa una nga pagduaw, ipaathag sa ila ang rason sang imo pagduaw. Samtang ginatun-an mo sa Biblia ang mga tawo, buligi sila nga mapalambo ang ila pagtuo kay Jehova kag sa iya Pulong kag makita kon paano nila iaplikar ang ila natun-an.—Roma 10:14.
5. Ano ang ginpasalig sa aton sa tagna ni Nahum?
5 Ang pagsalig ni Nahum sa pat-od nga katumanan sang pinamulong ni Jehova makita gid sa tulun-an sang Biblia nga ginhingalanan sa iya. Samtang nagahilapit ang katapusan sang sistema ni Satanas, makapaumpaw gid sa aton ang ginsiling sang Dios: “Ang kapipit-an indi magtindug sing makaduha.”—Nah. 1:9.