Gamita ang Aton Web Site sa Ministeryo—“Sabat sa mga Pamangkot sa Biblia”

Ang seksion sa jw.org/hil nga “Panudlo sa Biblia” may bahin nga “Sabat sa mga Pamangkot sa Biblia.” Kon pamilyar kita sa sini nga mga pamangkot, mahimo naton ipakita sa tagbalay ang mga sabat sang Biblia sa aton Web site. Ini nga mga pamangkot magamit man subong introduksion agod makaumpisa sa paghambalanay sa ministeryo. Mahimo kita magpili sing pamangkot nga makapainteres sa mga tawo sa aton teritoryo, pamangkuta ang tagbalay kon ano ang iya opinyon, dayon ipakita sa iya kon ano ang ginasiling sang Biblia, nga ginagamit ang pangatarungan nga makita sa jw.org/hil. Pagkatapos, mahimo naton ipaathag ukon ipakita sa iya kon diin makita ang impormasyon. Ukon mahimo naton ipabasa sa iya ang sabat sa aton Web site. Ginhimo ini sang asawa sang nagalakbay nga manugtatap paagi sa pagsiling: “Madamo nga tawo ang nagapalibog, ‘Ang Dios bala ang balasulon sang aton pag-antos?’ Luyag mo bala mabal-an ang sabat sa sulod lang sang 51 segundos?” Dayon ginapabati niya ang audio nga bersion sang sabat nga gin-download niya sa iya mobile device. Antes sia maghalin, ginapakita niya kapitulo 11 sang Ginatudlo sang Biblia nga libro.