Direkta nga Pag-agda

1. San-o masugod ang kampanya sa pagpanagtag sang imbitasyon para sa kombension?

¹ Kon nagaplano ka sing espesyal nga sinalusalo upod sa imo pamilya kag mga abyan, kag kinahanglan ini pangabudlayan kag gastuhan, mangin mapagsik ka gid sa pagpangagda. Sing kaanggid, ginpangabudlayan gid ang paghanda sang espirituwal nga pagkaon sa aton nagahilapit nga kombension. Tatlo ka semana antes magsugod ang aton kombension, ginhatagan kita ni Jehova sing pribilehiyo nga mangagda sa iban nga magtambong. Ano ang makabulig sa aton nga mangin mapagsik sa pagpangagda?

2. Ano ang magapahulag sa aton nga magpakigbahin sing bug-os sa kampanya?

² Kon pamalandungan naton ang benepisyo nga matigayon naton sa makapalig-on nga mga instruksion nga ginaaman ni Jehova sa mga kombension, mapahulag kita nga magpakigbahin sing bug-os sa kampanya. (Isa. 65:13, 14) Dumdumon man naton nga ang aton kampanya kada tuig may maayo nga mga resulta. (Tan-awa ang kahon nga “May Maayo nga mga Resulta.”) Ang iban sa aton inagda magatambong sa kombension pero ang iban indi. Matambong man sila ukon indi, ang aton makugi nga mga pagpanikasog sa tion sang kampanya nagahatag sing kadayawan kay Jehova kag nagapakita sang iya kaalwan.—Sal. 145:3, 7; Bug. 22:17.

3. Paano ipanagtag ang mga imbitasyon?

³ Dapat pat-uron sang hubon sang mga gulang nga madamo ang mahatagan sing imbitasyon, kag kon bala ibilin ang imbitasyon sa mga balay nga wala sing tawo ukon ipanagtag ini sa pagpanaksi sa publiko. Kon Sabado kag Domingo, itanyag ang mga magasin lakip ang imbitasyon kon nagakaigo. Kon matapos na ang kampanya, malipay gid kita kay nakigbahin kita nga may kapagsik kag madamo kita sing naagda agod makabenepisyo sa espirituwal nga sinalusalo nga ginhanda ni Jehova!

May Maayo nga mga Resulta

Mga pila na ka tuig ang nagligad, ang isa ka sister nagpakigbahin sa pagpanagtag sang imbitasyon kag nagpamensar sia kon bala may maayo nga resulta ang pagpangagda. Naghunahuna sia, ‘May matambong gid man bala sa mga gin-agda namon sa kombension?’ Sang Sabado sang aga sa kombension, nakita niya ang isa ka lalaki nga Sikh nga nagapungko, kag ginpangilala niya ini. Nahibaluan niya nga nagtambong ang lalaki sa kombension bangod nakabaton sia sing imbitasyon. Madamo sia sing pamangkot kag ginsabat ini sang sister. Nanamian gid sia sa programa kag nagdayaw sa panagway kag paggawi sang mga delegado. Sa sina man nga adlaw, gin-istorya sang sister ang mag-asawa nga nagapungko malapit sa iya. Nakabaton man sila sang imbitasyon kag nagsakay sila sa bus agod makatambong sa kombension. Nanamian gid sila sa kombension kag gusto man nila magtambong sa Domingo. Gani, narealisar sang sister kon daw ano ka importante ang aton kampanya kada tuig.
Sining bag-o lang nga kombension, ang mag-asawa nga regular payunir nagpakilala sa isa ka mag-asawa nga mas magulang sangsa ila. Ginpaathag sang mag-asawa nga amo ini ang una nila nga pagtambong. “Sin-o ang nag-agda sa inyo?” pamangkot sang mga payunir. “Sang isa ka adlaw pag-abot namon sa balay, nakita namon ang imbitasyon sa idalom sang puertahan,” sabat nila. Ginbasa nila ang imbitasyon kag ginsulatan pa gani nila ang kupon sa likod. Ginhatagan sang iban nga delegado sing palanyagahon ini nga mag-asawa. Nanamian gid sila sa programa gani nagplano sila nga magbalik pagkasunod nga adlaw. Naghimo sing kahimusan agod maduaw ang mag-asawa kag mapalambo ang ila interes.