Mga Pahanumdom Para sa Rehiyonal nga Kombension

Iskedyul sang Programa: Mabukas ang tilipunan sa 7:00 sa aga. Ang musika sa tatlo ka adlaw magasugod sa 8:20 sa aga. Sa sina nga tion, tanan kita mapungko na para makasugod ang programa sing mahim-ong. Ang nagatakop nga ambahanon kag pangamuyo sa Biernes kag Sabado 3:55 sa hapon kag sa Domingo 2:45 sa hapon.

‘Dayawon si Jehova Paagi sa Ambahanon’: Ang katawhan sang Dios sang una nagadayaw kay Jehova paagi sa ambahanon, kag ang musika importante gihapon nga bahin sang matuod nga pagsimba subong. (Sal. 28:7) Ang kada sesyon sang aton rehiyonal nga kombension nagasugod paagi sa musika. Ginhimo ini nga mga musika para mahanda ang aton kaugalingon sa pagtuon tuhoy kay Jehova kag masimba sia, indi lang agod may pamatian kita. Gani, kon ipahibalo sang tsirman nga masugod na ang musika, kinahanglan magpungko na kita kag magpamati sing maayo sa musika. Kon himuon naton ini, ginapakita naton nga ginaapresyar naton ang mga panikasog sang mga miembro sang orkestra sang Watchtower. Duha ka beses kada tuig, ini nga mga brother kag sister nagagamit sang ila kaugalingon nga kuarta kag nagakadto sa Patterson, New York agod maghimo sing musika nga manami pamatian. Pagkatapos makapamati sing maayo sa musika, ang tanan dapat magbuylog sa pagdayaw kay Jehova paagi sa pag-amba sang aton mga ambahanon sang Ginharian.

Palarkingan: Ang pagparking sa duog sang kombension first-come, first-served. Bangod masami nga limitado ang palarkingan, mas maayo kon magtingob sa isa lang ka salakyan. Dapat pat-uron sang naasayn nga mga utod nga ang mga salakyan lamang nga may pasahero nga may kasablagan ang makaparking sa duog nga ginreserba para sa ila.

Pagreserba sing Pulungkuan: Kada aga, kon bukas na ang tilipunan, palihug indi magpadag-asanay sa pagkadto sa pulungkuan nga gusto ninyo, nga daw nagapalumba kita sa iban nga tumalambong. Palihug magpakita sing konsiderasyon sa iban, kag mangin handa nga isakripisyo ang aton kaayuhan para sa aton mga utod. Ang masinakripisyuhon nga espiritu nagapakilala sa aton bilang matuod nga mga Cristiano kag nagapahulag sa iban nga dayawon ang Dios. (Juan 13:34, 35; 1 Cor. 13:4, 5; 1 Ped. 2:12) Mahimo magreserba sing mga pulungkuan para lamang sa kaupod ninyo sa salakyan ukon sa balay ukon para sa inyo mga ginatun-an sa Biblia. Palihug indi magbutang sing mga gamit sa mga pulungkuan nga wala man ninyo ginareserba. Ang inyo kooperasyon makabulig agod makita sang iban nga bakante ini nga mga pulungkuan. May ginatigana nga mga pulungkuan para sa mga tigulang kag may kasablagan. Bangod limitado lamang ini, isa ukon duha lang ka manugtuytoy ang puede magtupad sa ila.

Maugdang nga Pamayo: Ang aton pamayo sa tion sang kombension dapat nagakaigo kag maugdang, wala nagasunod sa estilo nga uso sa kalibutan. (1 Tim. 2:9) Kon nagabiyahe pakadto sa kombension ukon nagabalik sa dalayunan ukon nagalagawlagaw antes kag pagkatapos sang sesyon, indi kita magsuksok sing sobra ka kaswal ukon baraghal nga pamayo. Sa amo indi kita mahuya nga isuksok ang aton badge kag makahatag sing panaksi kon may kahigayunan. Ang aton panagway kag maayo nga paggawi samtang nagatambong sa aton kombension makapainteres sa mga tawo sa nagaluwas sing kabuhi nga mensahe sang Biblia kag makahatag sing kalipay kay Jehova.—Sof. 3:17.

Nagakaigo nga Paggamit sang Gadyet: Mapakita naton ang maayo nga pamatasan sa tion sang programa kon siguraduhon naton nga ang aton mga cell phone kag mga gadyet indi makadisturbo sa iban. Kon nagagamit sing kamera, video recorder, tablet, kag iban pa nga pareho sini, magpakita kita sing konsiderasyon nga indi madisturbo ukon malipdan ang iban. Maayo man nga pamatasan ang indi pag-text ukon pag-email sa tion sang programa kon indi man kinahanglan.

Panyaga: Palihug magbalon kamo imbes nga maggua agod magbakal sing pagkaon. Puede kamo magdala sing gamay nga bulutangan sang pagkaon nga mabutang sa idalom sang inyo pulungkuan. Apang ang dalagku nga mga suludlan kag mga kagamitan nga mahimo mabuka wala ginatugutan sa pasilidad sang kombension.

Donasyon: Mapakita naton ang aton apresasyon sa mga kahimusan sang kombension paagi sa paghatag sing boluntaryo nga mga amot para sa bug-os kalibutan nga hilikuton sa duog sang kombension. Kon luyag ninyo mag-amot paagi sa tseke, isulat sa sini ang “Watch Tower.” Mahimo man maghatag sing donasyon paagi sa debit ukon credit card.

Bulong: Kon nagatomar ka sing bulong nga nagakinahanglan sing reseta, palihug magdala sing bastante nga suplay kay indi ini matigayon sa duog sang kombension. Ang mga indyeksion para sa diabetes dapat ihaboy sa basurahan para sa hazardous waste, kag indi ini pag-ihaboy sa mga basurahan sa duog sang kombension ukon hotel.

Paghalong: Palihug maghalong gid agod malikawan nga madanlog ukon masandad. Kada tuig, madamo ang nagakaaksidente bangod sa sapatos, ilabi na ang mga sapatos nga mataas ang takon. Mas maayo nga magsuksok sing maugdang kag indi halog ukon gutok nga sapatos agod malikawan ang aksidente kon nagalakat sa nagapasaka nga alagyan, hagdanan, kag iban pa.

May Problema sa Palamatin-an: Sa pila ka kombension, ang programa iwaragwag sa duog sang kombension paagi sa FM frequency. Agod mabatian ini, kinahanglan ka magdala sing gamay nga de-baterya nga FM receiver kag earphone.

Please Follow Up (S-43) nga Pormas: Ang Please Follow Up nga pormas dapat gamiton kon may interesado nga masapwan sa di-pormal nga pagpanaksi sa tion sang kombension. Ang napil-apan nga pormas mahimo ihatag sa Book Room ukon sa sekretaryo sang inyo kongregasyon sa imo pagpauli.

Restawran: Padunggi ang ngalan ni Jehova paagi sa maayo nga paggawi sa mga restawran. Magsuksok sing bayo nga nagakaigo para sa isa ka Cristiano nga ministro. Maghatag sing tip kon kinabatasan sa inyo lugar.

Pagboluntaryo: Ang bisan sin-o nga luyag magboluntaryo dapat magreport sa Volunteer Service Department. Ang mga kabataan nga wala pa mag-16 anyos mahimo man magboluntaryo upod sa ila ginikanan, guardian, ukon iban pa nga adulto nga ginsaligan sang ila ginikanan ukon guardian.