**Pagpauswag sang Aton mga Ikasarang sa Ministeryo—Pagtanyag sang Ginatudlo sang Biblia nga Libro**

Kon Ngaa Importante: Ang Ginatudlo sang Biblia nga libro amo ang aton panguna nga ginagamit sa pagtudlo. Para matun-an ini sang interesado, dapat may kopya sia sini. Gani, tinguhaan naton tanan nga mangin sampaton sa pagtanyag sang Ginatudlo sang Biblia nga libro. (Hulu. 22:29) Madamo sang mga pamaagi sa pagtanyag, kag dapat gamiton sang mga manugbantala ang epektibo para sa ila.

Kon Paano Ini Himuon:

Pamangkuta ang tagbalay sing makapahunahuna nga pamangkot nga ang sabat makita sa isa ka kapitulo sang libro. Puede mo gamiton ang isa sa mga pamangkot sa umpisa sang kada kapitulo. Kon makasabat na ang tagbalay, basaha ang nagakaigo nga teksto kag ipakita sa iya ang parapo sa sina nga topiko kag mahimo ninyo ini istoryahan sing makadali.
Ang isa pa ka paagi amo ang paggamit sang mga pamangkot sa umpisa sang libro para makuha ang atension sang tagbalay kag ipakita sa iya ang kapitulo sa libro nga nagapaathag sang sabat sang Biblia. Halimbawa, mahimo mo isambit ang masubo nga hitabo nga ginbalita sining karon lang kag ipaathag nga madamo ang nagapalibog sang sabat sa mga pamangkot sa pahina 3. Ukon mahimo ka magsiling nga nagabisita ka para ipaambit ang maayo nga balita nga matabo sa palaabuton. Dayon ipakita ang mga piktyur sa pahina 4-5 kag mamangkot, “Sa diin sa sini nga mga promisa ang gusto mo nga matuman?” Mahimo ka man magsiling nga nagabisita ka para buligan ang mga tawo nga makita ang sabat sa importante nga mga pamangkot sa kabuhi. Dayon ipakita sa tagbalay ang mga pamangkot sa pahina 6, kag pamangkuta sia kon diin sa sini ang gusto niya mahibaluan ang sabat.
Magtanyag sing direkta nga pagtuon sa Biblia. Mahimo ka magsiling: “Ini nga libro ginagamit sa pagtuon sa Biblia. Nakakita ka na sini? [Tuguti sia nga magsabat.] Ipakita ko sa imo kon paano ini gamiton upod sa imo Biblia. Mga pila lang ini ka minuto.”

Tilawi Ini sa sini nga Bulan:

Magpraktis sa tion sang inyo pangpamilya nga pagsimba.
Sa tion sang pagministeryo, isugid sa iban nga manugbantala ang imo presentasyon. (Hulu. 27:17) Isli ini kon indi epektibo.