Iluga ang mga Manalagna—Habacuc
1. Ngaa nahangpan naton ang ginbatyag ni manalagna Habacuc?
1 Bangod sang madamo nga kalainan nga nagakatabo sa palibot naton, mahimo nga mabatyagan naton ang ginbatyag ni Habacuc, nga namangkot kay Jehova: “Ngaa ginahimo mo ako nga saksi sa kalautan? Kag ngaa ginapabay-an mo lang ang pagpamigos?” (Hab. 1:3; 2 Tim. 3:1, 13) Ang pagpamalandong sa mensahe ni Habacuc kag sa iya matutom nga halimbawa makabulig sa aton samtang ginahulat naton ang adlaw sang paghukom ni Jehova.—2 Ped. 3:7.
2. Paano naton mapakita nga nagakabuhi kita karon tungod sa pagtuo?
2 Magkabuhi Tungod sa Pagtuo: Sa baylo nga magpaluya si Habacuc bangod sang malain nga kahimtangan, nagpabilin sia nga alisto kag aktibo sa pag-alagad sa Dios. (Hab. 2:1) Ginpasalig ni Jehova ang manalagna nga ang Iya pulong matuman sa gintalana gid nga tion kag “ang matarong nga tawo magakabuhi tungod sa iya katutom [pagtuo, footnote].” (Hab. 2:2-4) Ano ang kahulugan sini para sa mga Cristiano nga nagakabuhi sa tion sang katapusan? Sa baylo nga hibaluon kon san-o maabot ang katapusan, mas importante nga kumbinsido kita nga maabot gid ini. Ang pagtuo magapahulag sa aton nga magpabilin nga nagabantay kag unahon ang aton ministeryo.—Heb. 10:38, 39.
3. Ngaa dapat naton huptan ang aton kalipay sa pag-alagad kay Jehova?
3 Maghugyaw Tungod kay Jehova: Kon salakayon sang Gog sang Magog ang katawhan ni Jehova, matilawan ang aton pagtuo. (Ezeq. 38:2, 10-12) Ang inaway magaresulta sa kabudlayan, bisan sa magadaug. Mahimo magaiwat ang pagkaon, madula ang mga propriedad, kag mangin pigado ang pangabuhi. Ano ang aton himuon kon may mga kabudlayan? Si Habacuc nakahibalo nga may mga kabudlayan nga matabo, gani determinado sia nga huptan ang iya kalipay sa pag-alagad kay Jehova. (Hab. 3:16-19) “Ang kalipay ni Jehova” makabulig man sa aton nga mabatas ang mga kabudlayan sa ulihi.—Neh. 8:10; Heb. 12:2.
4. Ano ang makalilipay nga hilikuton naton karon kag sa palaabuton?
4 Ang pagaluwason ni Jehova sa adlaw sang iya paghukom padayon nga tudluan sa pagkabuhi suno sa dalanon sang Dios. (Hab. 2:14) Ang mga banhawon magatuon man parte kay Jehova. Kabay pa nga panginpuslan naton karon ang tanan nga kahigayunan sa paghambal parte kay Jehova kag sa iya makatilingala nga mga binuhatan!—Sal. 34:1; 71:17.