Ang Gugma kag ang Pagpasalamat kay Jehova ang Magapalig-on sa Imo nga Magpabawtismo

1-2. Base sa Binuhatan 8:27-31, 35-38, ano ang nagpalig-on sa opisyal sang Etiopia nga magpabawtismo?

GUSTO mo bala magpabawtismo bilang disipulo sang Cristo? Madamo ang napalig-on nga magpabawtismo bangod sang ila gugma kay Jehova kag nagapasalamat sila sa tanan nga ginhimo niya para sa ila. Binagbinaga ang halimbawa sang isa ka opisyal sang rayna sang Etiopia.

² Nagpabawtismo dayon ang Etiopianhon sang natun-an niya sa Kasulatan nga dapat niya ini himuon. (Basaha ang Binuhatan 8:27-31, 35-38.) Ano ang nagpalig-on sa iya? Maathag nga ginapabaloran niya ang Pulong sang Dios bangod nagabasa sia sang pila ka bersikulo sa libro ni Isaias samtang nagasakay sia sa kangga. Kag sang gin-istorya sia ni Felipe, nahunahuna niya nga dapat niya pasalamatan ang ginhimo ni Jesus para sa iya. Pero ngaa nagkadto ini nga opisyal sa Jerusalem? Bangod sang iya gugma kay Jehova. Ngaa masiling naton ini? Kay man, nagkadto sia sa Jerusalem para magsimba kay Jehova. Ginbiyaan niya ang iya gindak-an nga relihion kag nag-upod sia sa nagaisahanon nga pungsod nga nadedikar sa matuod nga Dios. Ini nga gugma kay Jehova amo man ang nagpalig-on sa iya nga magpabawtismo kag mangin disipulo sang Cristo. Importante ini nga sugo nga dapat gid tumanon.—Mat. 28:19.

3. Ano ang mahimo magpugong sa isa nga magpabawtismo? (Tan-awa ang kahon nga “Ano nga Klase sang Duta ang Imo Tagipusuon?”)

³ Ang gugma kay Jehova amo ang magapalig-on sa imo nga magpabawtismo. Pero ang gugma mahimo man magpugong sa imo nga himuon ini. Paano? Binagbinaga ang pila ka halimbawa. Mahimo nga palangga mo gid ang imo pamilya kag mga abyan nga indi Saksi, kag nabalaka ka nga basi dumtan ka nila kon magpabawtismo ka. (Mat. 10:37) Ukon basi may mga butang nga kabalo ka nga ginapakamalaut sang Dios pero nanamian ka nga himuon, kag nabudlayan ka nga untatan ini. (Sal. 97:10) Ukon basi may mga selebrasyon nga may labot sa butig nga relihion ang ginaselebrar mo halin sang bata ka pa, kag nalipay ka kon madumduman mo ang masadya ninyo nga mga selebrasyon. Bangod sini, nabudlayan ka nga untatan ang pagselebrar sang mga selebrasyon nga wala nahamut-an ni Jehova. (1 Cor. 10:20, 21) Gani dapat ka magdesisyon, “Sin-o ukon ano gid ang pinakaimportante sa akon tagipusuon?”

ANG PINAKAIMPORTANTE NGA GUGMA

4. Ano dapat ang panguna mo nga rason para magpabawtismo?

⁴ Madamo nga butang nga may labot sa imo mga ginapatihan ang ginapabaloran mo gid. Halimbawa, bisan sang wala ka pa ginatudluan sang mga Saksi ni Jehova, mahimo nga ginapabaloran mo na ang Biblia. Kag mahimo nga ginahigugma mo na si Jesus. Subong nga nakilala mo na ang mga Saksi ni Jehova, mahimo nga nanamian ka mag-upod sa ila. Pero indi buot silingon nga kon may amo ka sini nga mga balatyagon mapalig-on ka na nga magdedikar kay Jehova kag magpabawtismo. Ang imo dapat panguna nga rason para magpabawtismo amo ang imo gugma kay Jehova nga Dios. Kon mas labaw ang imo gugma kay Jehova sangsa bisan sin-o ukon sangsa bisan ano, wala sing may makapugong sa imo nga mag-alagad sa iya. Ang gugma kay Jehova amo ang magapalig-on sa imo nga magpabawtismo kag magabulig sa imo nga magpabilin nga matutom sa pag-alagad sa Dios.

5. Ano ang binagbinagon naton sa sini nga artikulo?

⁵ Nagsiling si Jesus nga dapat naton higugmaon si Jehova sa bug-os naton nga tagipusuon, kalag, hunahuna, kag kusog. (Mar. 12:30) Ano ang makabulig sa imo nga higugmaon si Jehova sing bug-os? Kon pamalandungan naton ang gugma ni Jehova sa aton, mapalig-on kita sini nga higugmaon man sia. (1 Juan 4:19) Binagbinagon naton sa sini nga artikulo ang pila ka panugda para mapabakod mo ang imo gugma kay Jehova kag mapalig-on ka nga magpabawtismo.b

6. Suno sa Roma 1:20, ano ang isa ka paagi nga makatuon ka parte kay Jehova?

⁶ Kilalaha si Jehova paagi sa pagtuon sa iya mga tinuga. (Basaha ang Roma 1:20; Bug. 4:11) Hunahunaa ang mga tanom kag mga sapat nga gintuga ni Jehova kag kon paano sini ginapakita ang iya kaalam. Tun-i ang makatilingala nga pagtuga sa imo lawas. (Sal. 139:14) Binagbinaga man ang aton adlaw. Isa lang ini sa binilyon ka bituon, pero hunahunaa ang enerhiya nga ginbutang ni Jehova sa sini.c (Isa. 40:26) Kon himuon mo ini, mas dayawon mo pa gid si Jehova. Importante nga mabal-an mo nga si Jehova maalam kag gamhanan. Pero, para magbakod ang imo gugma kay Jehova kag mangin suod mo sia nga abyan, dapat mo dugangan ang imo nabal-an parte sa iya.

7. Para magbakod ang imo gugma kay Jehova, sa ano ka dapat kumbinsido?

⁷ Dapat kumbinsido ka nga palangga ka gid ni Jehova. Nabudlayan ka bala magpati nga kilala ka sang Manunuga sang langit kag sang duta kag nagaulikid sia sa imo? Dumduma nga si Jehova ‘indi malayo sa tagsa sa aton.’ (Binu. 17:26-28) “Ginausisa [niya] ang tanan nga tagipusuon,” kag nagapromisa sia sa imo, pareho sa ginsiling ni David kay Solomon, nga “kon pangitaon mo sia, makita mo sia.” (1 Cron. 28:9) Ang matuod, nagsiling si Jehova: “Ginpapalapit ko ikaw sa akon.” (Jer. 31:3) Amo ini ang rason kon ngaa nagatuon ka sang Biblia subong. Samtang nagadamo ang imo nabal-an parte sa tanan nga ginhimo ni Jehova para sa imo, mas magabakod ang imo gugma sa iya.

8. Paano mo mapakita nga ginapasalamatan mo ang gugma ni Jehova?

⁸ Ang isa ka paagi para mapakita mo nga ginapasalamatan mo ang gugma ni Jehova amo ang pag-istorya sa iya paagi sa pangamuyo. Kon isugid mo sa Dios ang imo mga kabalaka kag pasalamatan mo sia sa tanan nga ginhimo niya para sa imo, mas higugmaon mo pa gid sia. Kag kon makita mo kon paano ginasabat ni Jehova ang imo mga pangamuyo, mas magabakod ang inyo pag-abyanay. (Sal. 116:1) Mangin kumbinsido ka pa gid nga nahangpan ka niya. Pero para magsuod ka pa gid kay Jehova, dapat mahangpan mo ang iya panghunahuna. Kag dapat mo hibaluon kon ano ang mga ginapatuman niya sa imo. Ang paagi lang para mabal-an mo ini amo ang pagtuon sang iya Pulong, ang Biblia.

9. Paano mo mapakita nga ginapabaloran mo ang Biblia?

⁹ Pabalori ang Pulong sang Dios, ang Biblia. Sa Biblia lang mabasa ang kamatuoran parte kay Jehova kag ang iya katuyuan para sa imo. Mapakita mo nga ginapabaloran mo ang Biblia paagi sa pagbasa sini kada adlaw, paghanda sing abanse sa topiko nga pagatun-an ninyo sang nagatudlo sang Biblia sa imo, kag pag-aplikar sang imo mga natun-an. (Sal. 119:97, 99; Juan 17:17) May iskedyul ka bala sa pagbasa sang Biblia? Ginasunod mo bala ang imo iskedyul para mabasa mo ang Biblia kada adlaw?

10. Ano ang isa ka rason ngaa pinasahi gid ang Biblia?

¹⁰ Pinasahi gid ang Biblia. Ang isa ka rason amo nga mabasa sa sini ang mga hitabo nga ginsugid sang mga tawo nga nakaupod mismo ni Jesus. Ini lang ang libro nga sibu nga nagapaathag sang ginhimo ni Jesus para sa imo. Kon tun-an mo ang mga ginsiling kag ginhimo ni Jesus, mahimo gid nga mapalig-on ka nga magpakig-abyan sa iya.

11. Ano ang makabulig sa imo nga magbakod ang imo gugma kay Jehova?

¹¹ Higugmaa si Jesus, kag magabakod ang imo gugma kay Jehova. Ngaa? Bangod gin-ilog gid ni Jesus ang mga kinaiya sang iya Amay. (Juan 14:9) Gani samtang nagadamo ang imo nabal-an parte kay Jesus, mas mahangpan mo ang panghunahuna ni Jehova kag mas magasuod ka pa gid sa iya. Hunahunaa ang kaluoy nga ginpakita ni Jesus sa mga tawo nga ginapakanubo sang iban bangod imol sila, masakiton, ukon maluya. Hunahunaa man ang mga ginalaygay niya sa imo kag kon paano nangin maayo ang imo kabuhi sang ginsunod mo ini.—Mat. 5:1-11; 7:24-27.

12. Samtang nagadamo ang imo nabal-an parte kay Jesus, mapalig-on ka sini nga himuon ang ano?

¹² Magabakod ang imo gugma kay Jesus kon pamalandungan mo ang iya ginsakripisyo para mapatawad ang aton mga sala. (Mat. 20:28) Kon mahangpan mo nga kinabubut-on nga ginhatag ni Jesus ang iya kabuhi para sa imo, mapalig-on ka sini nga maghinulsol kag mangayo sang kapatawaran kay Jehova. (Binu. 3:19, 20; 1 Juan 1:9) Kag samtang nagabakod ang imo gugma kay Jesus kag kay Jehova, mapalig-on ka sini nga mag-upod sa iban nga nagahigugma man sa ila.

13. Paano ka buligan ni Jehova?

¹³ Higugmaa ang mga nagahigugma kay Jehova. Mahimo nga indi mahangpan sang imo pamilya kag mga abyan nga indi Saksi kon ngaa gusto mo magdedikar kay Jehova. Posible nga pamatukan ka pa gani nila. Pero buligan ka ni Jehova paagi sa mga kauturan sa kongregasyon kay makabig mo na sila nga pamilya. Kon magpabilin ka nga suod sa sini nga pamilya, mabatyagan mo ang gugma kag suporta nga kinahanglan mo. (Mar. 10:29, 30; Heb. 10:24, 25) Sa ulihi, mahimo nga mag-alagad man kay Jehova ang mga miembro sang imo pamilya kag sundon man nila ang iya mga ginapatuman.—1 Ped. 2:12.

14. Base sa 1 Juan 5:3, ano ang natun-an mo parte sa mga ginapatuman ni Jehova?

¹⁴ Pabalori kag iaplikar ang mga ginapatuman ni Jehova. Antes mo nakilala si Jehova, mahimo nga may ginasunod ka nga mga prinsipio parte sa kon ano ang maayo kag malain, pero nahangpan mo na subong nga mas maayo ang mga prinsipio ni Jehova. (Sal. 1:1-3; basaha ang 1 Juan 5:3.) Hunahunaa ang mga laygay sang Biblia para sa mga bana, mga asawa, mga ginikanan, kag kabataan. (Efe. 5:22–6:4) Sang gin-aplikar mo ini nga mga laygay, nangin mas malipayon bala ang imo pamilya? Sang gintuman mo ang laygay ni Jehova parte sa pagpili sang maayo nga mga abyan, nabuligan ka bala sini nga mapakita ang maayo nga pamatasan? Nangin mas malipayon ka bala? (Hulu. 13:20; 1 Cor. 15:33) Mahimo gid nga huo ang imo sabat.

15. Ano ang puede mo himuon kon nabudlayan ka nga iaplikar ang mga prinsipio sa Biblia?

¹⁵ Kon kaisa, mahimo nga nabudlayan ka nga iaplikar ang imo mga natun-an sa Biblia. Amo ini ang rason kon ngaa ginagamit ni Jehova ang iya organisasyon para hatagan ka sang mga publikasyon nga nabase sa Biblia nga makabulig sa imo nga mabal-an ang maayo kag malain. (Heb. 5:13, 14) Kon basahon mo kag tun-an ini nga mga publikasyon, mabal-an mo kon sa diin nga bahin sang imo kabuhi maaplikar ang mga prinsipio sa Biblia kag kon paano ka makabenepisyo sa sini. Bangod sini, mahimo gid nga mapalig-on ka nga mangin bahin sang organisasyon ni Jehova.

16. Paano gin-organisar ni Jehova ang iya katawhan?

¹⁶ Higugmaa kag sakdaga ang organisasyon ni Jehova. Gin-organisar ni Jehova ang iya katawhan sa mga kongregasyon. Kag ang iya Anak, nga si Jesus, amo ang ulo sang tanan nga kongregasyon. (Efe. 1:22; 5:23) Nagtangdo si Jesus sang isa ka gamay nga grupo sang hinaplas nga mga lalaki para pangunahan ang pag-organisar sang hilikuton nga ginapatuman niya subong. Gintawag ni Jesus ini nga grupo nga “matutom kag mainandamon nga ulipon,” kag ginahimo gid nila ang ila responsibilidad para buligan ka nga mangin suod sa Dios kag maamligan ang imo kaangtanan sa iya. (Mat. 24:45-47) Ang isa ka paagi nga ginabuligan ka sang matutom nga ulipon amo ang pagtangdo sa kalipikado nga mga lalaki nga mangin gulang para atipanon ka. (Isa. 32:1, 2; Heb. 13:17; 1 Ped. 5:2, 3) Handa ang mga gulang nga himuon ang ila bug-os nga masarangan para paumpawan ka kag buligan nga magsuod pa gid kay Jehova. Pero ang isa sa pinakaimportante nga mahimo nila amo ang pagbulig sa imo nga tudluan ang iban parte kay Jehova.—Efe. 4:11-13.

17. Suno sa Roma 10:10, 13, 14, ngaa ginabantala naton sa iban ang parte kay Jehova?

¹⁷ Buligi ang iban nga higugmaon si Jehova. Ginsugo ni Jesus ang iya mga sumulunod nga tudluan ang iban parte kay Jehova. (Mat. 28:19, 20) Posible nga nagatuman lang kita bangod ginsugo kita nga himuon ini. Pero samtang nagabakod ang aton gugma kay Jehova, masiling man naton ang ginsiling nanday apostol Pedro kag Juan: “Indi kami mag-untat sa paghambal tuhoy sa mga butang nga amon nakita kag nabatian.” (Binu. 4:20) Malipay gid kita kon may mabuligan kita nga higugmaon si Jehova. Imadyina ang kalipay sang ebanghelisador nga si Felipe sang nabuligan niya ang Etiopianhon nga matun-an ang kamatuoran sa Kasulatan kag magpabawtismo! Kon ginailog mo si Felipe kag ginatuman mo ang sugo ni Jesus nga magbantala, ginapakita mo nga gusto mo mangin isa ka Saksi ni Jehova. (Basaha ang Roma 10:10, 13, 14.) Dayon mahimo mamangkot ka man pareho sa Etiopianhon: “Ano ang nagapugong sa akon sa pagpabawtismo?”—Binu. 8:36.

18. Ano ang binagbinagon naton sa masunod nga artikulo?

¹⁸ Nagahimo ka sang pinakaimportante nga desisyon kon gusto mo na magpabawtismo. Bangod serioso gid ini, dapat mo binagbinagon sing maayo kon ano ang buot silingon sini. Ano ang dapat mo mabal-an parte sa bawtismo? Ano ang dapat mo himuon antes kag pagkatapos sang bawtismo? Sabton ini nga mga pamangkot sa masunod nga artikulo.