Ano ang Mabulig sa Imo sang Pangamuyo?

Sang nagmasakit sing malubha si Pamela, nagpabulong sia sa mga doktor. Pero nangamuyo man sia sa Dios nga hatagan sia sing kusog nga mabatas ang iya mabudlay nga sitwasyon. Nakabulig bala sa iya ang pangamuyo?

“Sang nagapabulong ako sang akon kanser, grabe gid ang akon kahadlok,” siling ni Pamela. “Pero kon nagapangamuyo ako kay Jehova nga Dios, mabatyagan ko nga nagakalma ako kag makapamensar sing maayo. Wala madula ang sakit nga ginabatyag ko, pero ang pangamuyo nakabulig sa akon nga padayon nga mangin positibo. Kon ginakamusta ako sang mga tawo, nagasiling ako, ‘Indi maayo ang pamatyag ko, pero malipayon ako!’”

Siempre, indi na naton paghulaton nga mabutang pa sa katalagman ang aton kabuhi antes kita mangamuyo. Tanan kita may mga kabudlayan, daku man ini ukon gamay, kag kinahanglan gid naton sing bulig para maatubang ini. Makabulig bala ang pangamuyo?

Ang Biblia nagasiling: “Itugyan ang imo lulan kay Jehova, kag sia magaalay-ay sa imo. Indi gid sia magtugot nga mapukan ang isa nga matarong.” (Salmo 55:22) Makapaumpaw gid ina! Ti, paano ka mabuligan sang pangamuyo? Kon mangamuyo ka sa Dios sa insakto nga paagi, ihatag niya ang imo kinahanglan para maatubang mo ang imo mga kabudlayan.—Tan-awa ang kahon nga “Ano ang Mahatag sang Pangamuyo sa Imo?”

Ano ang Mahatag sang Pangamuyo sa Imo?

Kalinong sang hunahuna

“Ipahibalo sa Dios ang inyo mga pangabay; kag ang paghidait sang Dios nga labaw sa tanan nga paghangop magabantay sang inyo tagipusuon kag ikasarang sa paghunahuna paagi kay Cristo Jesus.” (Filipos 4:6, 7) Kon ipautwas mo ang imo mga kabalaka sa Dios, buligan ka niya nga makapabilin nga kalmado kag makadesisyon sing maayo bisan pa gina-stress ka.

Kaalam halin sa Dios

“Kon may isa sa inyo nga kulang sang kaalam, padayon sia nga magpangayo sa Dios kag ihatag ini sa iya, kay maalwan Sia nga nagahatag sa tanan kag wala nagapangtamay.” (Santiago 1:5) Kon gina-stress kita, indi kita pirme makahimo sing pinakamaayo nga desisyon. Kon mangamuyo ka sing kaalam, pahanumdumon ka sang Dios sang mga prinsipio halin sa iya Pulong, ang Biblia, nga makabulig sa imo.

Kusog kag paumpaw

“Sa tanan nga butang may kusog ako paagi sa isa nga nagapabakod sa akon.” (Filipos 4:13) Si Jehova ang labing gamhanan nga Dios, gani mahatag niya sa imo ang kusog nga kinahanglan mo para maatubang ang mga kabudlayan ukon mabatas ang mga pagtilaw. (Isaias 40:29) Sa Biblia, ginatawag man si Jehova nga “Dios nga nagahatag sang tanan nga sahi sang lugpay.” Malugpayan niya kita “sa tanan naton nga mga pagtilaw.”—2 Corinto 1:3, 4.

MANGAMUYO SA DIOS!

Wala ka ginapilit ni Jehova nga mangamuyo sa iya. Kundi mahigugmaon nga ginaagda ka niya nga magpangamuyo. (Jeremias 29:11, 12) Pero ano abi kon sang una pamatyag mo wala gid ginasabat ang imo mga pangamuyo? Indi maluyahan sing buot ukon mag-untat. Sarisari ang paagi sang mahigugmaon nga mga ginikanan sa pagbulig sa ila kabataan, kag kon kaisa, indi sa paagi nga gusto sang kabataan ukon sa tion nga ginapaabot nila. Mahimo nga may mas maayo nga solusyon ang mga ginikanan. Pero isa lang ang sigurado: Ginabuligan sang mahigugmaon nga mga ginikanan ang ila kabataan.

Si Jehova nga Dios ang pinakamahigugmaon sa tanan nga ginikanan kag gusto gid niya nga buligan ka. Kon tun-an mo sing maayo ang mga paagi nga ginbinagbinag naton halin sa Biblia kag sundon ini, sabton sang Dios ang imo mga pangamuyo sa pinakamaayo nga paagi!—Salmo 34:15; Mateo 7:7-11.