Mga Pamangkot gikan sa mga Bumalasa

Ano ang buot silingon ni apostol Pablo sang nagsiling sia: “Paagi sa kasuguan napatay ako sa kasuguan”?—Gal. 2:19.

Nagsulat si Pablo: “Paagi sa kasuguan napatay ako sa kasuguan, agod mabuhi ako sa Dios.”—Gal. 2:19.

Ginsulat ini ni Pablo sa mga kongregasyon sa Galacia, nga isa ka probinsia sang Roma, para ipaathag ang gusto niya nga itudlo sa ila. May pila ka kauturan didto nga naimpluwensiahan sang butig nga mga manunudlo. Ginatudlo nila nga para maluwas ang isa ka tawo, dapat niya tumanon ang Mosaikong Kasuguan, ilabi na ang pagpatuli. Pero kabalo si Pablo nga wala na ginapatuman sang Dios ang pagpatuli. Maayo gid ang pagpaathag ni Pablo kag ginpamatud-an niya nga sala ang ginatudlo sang butig nga mga manunudlo. Ginpabakod man niya ang pagtuo sang iya mga kauturan sa halad-gawad ni Jesucristo.—Gal. 2:4; 5:2.

Maathag nga ginasiling sang Biblia nga kon mapatay ang isa ka tawo, wala na gid sia sing nahibaluan kag indi na sia maapektuhan sang bisan ano nga nagakatabo. (Man. 9:5) Gani sang nagsiling si Pablo: “Napatay ako sa kasuguan,” buot niya silingon nga indi na niya kinahanglan tumanon ang Mosaikong Kasuguan. Sigurado si Pablo nga paagi sa iya pagtuo sa halad-gawad, ‘nabuhi sia sa Dios.’

“Paagi sa kasuguan,” nagbag-o ang sitwasyon ni Pablo. Paano? Antes niya ini ginsiling, ginpaathag niya nga “ang isa pakamatarungon, indi paagi sa mga buhat sang kasuguan, kundi paagi lamang sa pagtuo kay Jesucristo.” (Gal. 2:16) May importante gid nga nahimo ang Kasuguan, kag ginpaathag niya ini sa mga taga-Galacia. Nagsiling sia: “Gindugang ini agod mapadayag ang mga paglapas, tubtob mag-abot ang kaliwat nga ginsaaran.” (Gal. 3:19) Paagi sa Kasuguan, nangin maathag sa indi perpekto nga mga tawo nga indi gid nila masunod sing bug-os ang Kasuguan, gani kinahanglan nila ang isa ka perpekto nga halad. Gani paagi sa Kasuguan, nahangpan sang mga tawo nga si Jesus amo “ang kaliwat.” Kon magtuo ang isa ka tawo kay Jesucristo, mahimo sia ipahayag nga matarong sang Dios. (Gal. 3:24) Amo ini ang natabo kay Pablo. Paagi sa Kasuguan, ginbaton niya si Jesus kag nagtuo sia sa iya. Gani ‘napatay si Pablo sa kasuguan’ kag ‘nabuhi sia sa Dios.’ Wala na sing gahom ang Kasuguan sa iya, kag ang Dios na ang may gahom sa iya.

Pareho man sa sini ang ginsulat ni Pablo sa mga taga-Roma. “Nahilway kita sa Kasuguan bangod wala na ini sing gahom sa aton.” (Roma 7:6) Gani sa Galacia 2:19, wala ginapahangop ni Pablo nga nagakadapat sia silutan sang kamatayon kay isa sia ka makasasala nga tawo kon basihan ang Kasuguan. Sa baylo, ginapahangop niya nga ginhilway na sia. Wala na sing gahom ang Kasuguan sa iya kag sa iban pa nga pareho sa iya, ukon sa mga ginhilway man bangod sa ila pagtuo sa halad-gawad sang Cristo.