1921—Sang Nagligad nga Isa ka Gatos ka Tuig

“ANO ang dapat naton himuon sa sini nga tuig?” Amo ini ang pamangkot para sa mga Estudyante sang Biblia nga mabasa sa The Watch Tower sang Enero 1, 1921. Bilang sabat, ginkutlo sini ang Isaias 61:1, 2, nga nagpahanumdom sa ila sang ila hilikuton nga magbantala. “Si Jehova naghaplas sa akon sa pagbantala sing maayong balita sa mga mahagop . . . , sa pagbantala sang tuig sang maayong kabubut-on ni Jehova kag sang adlaw sang pagtimalos sang aton Dios.”

MAISOG NGA MGA MANUGBANTALA

Para makabantala ang mga Estudyante sang Biblia, dapat mangin maisog sila. Ngaa? Bangod dapat nila ibantala ang “maayong balita” sa mga mahagop kag ang “adlaw sang pagtimalos” sa malain nga mga tawo.

Si Brother J. H. Hoskin, nga taga-Canada, maisog nga nagbantala bisan pa may mga pagpamatok. Sang 1921, may naistorya sia nga ministro sang Methodist Church. Si Brother Hoskin nagsiling: “Indi naton kinahanglan magbais parte sa Biblia. Kag bisan pa indi pareho ang aton pagpati sa pila ka topiko, wala man sing rason nga maglainay ang aton buot.” Pero indi amo sini ang natabo. Si Brother Hoskin nagsiling: “Mga pila ka minuto pa lang kami nga nagaistoryahanay, ginsumbag niya dayon ang puertahan. Grabe gid kakusog sang iya pagsumbag nga abi ko mabuka ang kristal sini.”

Dayon nagsinggit ang ministro, “Istoryaha ’to ang mga indi Cristiano!” Wala magsabat si Brother Hoskin. Pero samtang nagalakat sia, nahunahuna niya, ‘Daw indi man gani Cristiano ang bag-o ko lang naistorya.’

Pagkasunod nga adlaw, nagwali ang ministro sa iya simbahan kag ginpakalain niya si Brother Hoskin. Si Brother Hoskin nagsiling, “Ginpaandaman niya ang iya mga miembro nga butigon kuno ako, kag dapat ako patyon.” Pero wala nag-untat si Brother Hoskin sa pagbantala, kag madamo sia sing naistorya nga mga tawo. Nagsiling sia: “Malipayon gid ako sa akon pagbantala. May pila pa gani ka tawo nga nagsiling, ‘Kabalo ’ko nga ginatuman mo ang sugo sang Dios.’ Dayon ginapamangkot nila ako kon ano ang akon mga kinahanglan.”

PERSONAL KAG PANGPAMILYA NGA PAGTUON

Para mabuligan ang mga interesado nga mag-uswag, ginlakip sang mga Estudyante sang Biblia sa The Golden Agea ang seksion nga Juvenile Bible Study. May mga pamangkot ini nga puede binagbinagon. “Ipamangkot ini sang mga ginikanan sa ila mga kabataan, dayon buligan nila sila nga pangitaon ang sabat sa Biblia.” Simple lang ang pila ka pamangkot, pareho sang “Pila ka libro ang ara sa Biblia?” May pila naman ka pamangkot nga nagahanda sa mga pamatan-on para mangin maisog sila sa pagbantala, pareho sang “Makaeksperiensia gid bala sang paghingabot ang matuod nga Cristiano?”

May ara man seksion nga Advanced Studies in the Divine Plan of the Ages. May mga pamangkot ini para sa mga madamo na sing nabal-an sa Biblia. Ang mga sabat sa sini makita sa una nga volume sang Studies in the Scriptures. Madamo sing natun-an ang madamo nga bumalasa sa sini nga seksion. Pero ginpabalo sang The Golden Age sang Disiembre 21, 1921, nga untaton na ining duha ka seksion. Ngaa?

ISA KA BAG-O NGA LIBRO!

Ang libro nga *The Harp of God*

Bookmark nga may nasulat kon ano nga mga pahina ang dapat basahon

Card nga may nasulat nga mga pamangkot

Narealisar sang nagapanguna nga mga utod nga dapat naorganisar sing maayo ang mga topiko nga pagatun-an sang bag-o nga mga Bible study. Gani ginpabalo sang Nobiembre 1921 nga may ara bag-o nga libro nga amo ang The Harp of God. Kon ang isa ka interesado magbaton sini nga libro, ginalakip man sia sa programa sa pagtuon nga ginatawag The Harp Bible Study Course. Personal nga magatuon ang interesado, kag buligan sia sini nga mahangpan ang parte sa “katuyuan sang Dios nga hatagan sing kabuhi nga wala sing katapusan ang mga tawo.” Paano ini ginahimo?

Kon batunon sang isa ka tawo ang libro, hatagan man sia sang isa ka gamay nga card nga may nasulat kon ano nga mga pahina ang dapat niya basahon. Pagkasunod nga semana, hatagan sia sang bag-o nga card nga may nasulat nga mga pamangkot nga ginbase sa mga ginpabasa sa iya. Nasulat man sa sini nga card kon ano naman nga mga pahina ang masunod niya nga basahon.

Kada semana sa sulod sang 12 ka semana, makabaton sia sang bag-o nga card nga ginapadala sang kongregasyon nga malapit sa iya. Sa masami, ang mga nagapadala sang card amo ang mga kauturan nga tigulang na ukon indi makahalin sa ila balay. Halimbawa, si Anna K. Gardner, nga taga-Millvale, Pennsylvania, U.S.A., nagsiling: “Nabudlayan sa paglakat ang akon magulang nga si Thayle. Pero sang ara na ang libro nga The Harp of God, masako gid sia sa pagbantala kada semana paagi sa pagpadala sang mga card nga may mga pamangkot.” Kon matapos na sang isa ka interesado ang pagtuon sa sini nga paagi, kadtuan sia sang isa ka utod sa kongregasyon para tudluan sia parte sa Biblia.

ANG DAPAT PA HIMUON

Sang manugtapos na ang tuig, nagpadala sing sulat si Brother J. F. Rutherford sa tanan nga kongregasyon. Nagsiling sia nga “mas madamo nga tawo ang aton nabantalaan kag natudluan parte sa Ginharian sa sini nga tuig sangsa nagligad nga mga tinuig.” Dayon nagsiling sia: “Madamo pa kita sang dapat himuon. Palig-una ninyo ang iban nga himuon man ining dalayawon nga hilikuton.” Gintuman gid sang mga Estudyante sang Biblia ang iya ginsiling. Sang 1922, mas nangin maisog pa gid sila sa pagbantala parte sa Ginharian.

Maisog nga mga Abyan

Palangga sang mga Estudyante sang Biblia ang ila mga kauturan, kag nagabuligay sila. Ari ang isa ka eksperiensia nga nagapakita nga maisog sila nga mga abyan kag “masaligan sa tion sang kalisdanan.”—Hulu. 17:17.

Sang Martes, Mayo 31, 1921, ginpriso ang isa ka itom nga lalaki sa siudad sang Tulsa, Oklahoma, U.S.A. Gin-akusahan sia nga ginhimuan niya kuno sing malain ang isa ka puti nga babayi. Pagkatapos sini, nag-inaway ang sobra 1,000 ka puti nga mga tawo kag ang mas gamay nga grupo sang itom nga mga tawo. Madasig nga nakalab-ot ang inaway sa Greenwood nga madamo sing nagaistar nga mga itom. Sobra 1,400 ka balay kag mga balaligyaan ang ginkawatan kag ginsunog. Suno sa opisyal nga report, 36 ang napatay. Pero posible nga mga 300 ang napatay. Ini nga hitabo gintawag sang ulihi nga Tulsa Race Massacre.

Si Brother Richard J. Hill, nga isa ka itom nga Estudyante sang Biblia kag nagaistar sa Greenwood, nagsiling: “Sang gab-i nga nagginamo, may miting ang amon kongregasyon. Pagkatapos sang miting, nabatian namon ang tiniruhay sa sentro sang Tulsa. Nagahigda na kami, pero sige gihapon ang tiniruhay.” Pagka-Mierkoles sang aga, Hunyo 1, naglala pa gid ang sitwasyon. “May pila ka tawo nga nagkadto sa amon kag nagsiling nga dapat kami magkadto sa Convention Hall para maamligan kami.” Gani dalidali nga nagkadto sa Convention Hall sang Tulsa si Brother Hill, ang iya asawa, kag ang ila lima ka kabataan. Mga 3,000 ka itom nga lalaki kag babayi ang ato didto kag ginaamligan sila sang National Guard. Mga soldado sila sang gobierno nga ginpadala didto para mauntat ang ginamo.

Sa amo man nga tion, nagpakita sang kaisog si Brother Arthur Claus nga isa ka puti nga brother. “Sang nabalitaan ko nga may mga tawo nga nagapangawat kag nagapangsunog sang mga balay sa Greenwood, nagdesisyon ako nga kadtuan ang akon pinalangga nga abyan nga si Brother Hill.”

Gintudluan ni Arthur Claus ang 14 ka kabataan parte sa Biblia, kag gingamit niya ang The Harp of God

Pag-abot niya sa balay ni Brother Hill, naabtan niya ang isa ka puti nga tawo nga may ginauyatan nga armas. Kaingod kag abyan ni Brother Hill ini nga tawo. Abi niya isa man si Arthur sa mga nagapanggamo. Gani ginsinggitan niya sia, “Ngaa ari ka di?”

“Kon wala ko sia nakumbinsi sa akon sabat, siguro gintiro niya na ako,” siling ni Arthur. “Ginpaathag ko sa iya nga abyan ko si Brother Hill kag madamo nga beses na ako nga nakakadto sa iya balay.” Gin-amligan ni Arthur kag sang sini nga tawo ang propiedad ni Brother Hill.

Sang ulihi, nabal-an ni Arthur nga ara sa Convention Hall si Brother Hill kag ang iya pamilya. Ginsilingan si Arthur nga indi puede makagua ang mga itom sa Convention Hall magluwas lang kon may sulat nga ginpirmahan ni General Barrett. Si Arthur nagsiling: “Mabudlay gid nga makita kag maistorya ang heneral. Sang ginsugiran ko sia sang akon plano, ginpamangkot niya ako: ‘Puede bala nga ikaw na lang ang mag-amlig kag mag-atipan sa sini nga pamilya?’ Siempre, nalipay gid ako nga nagsabat sing huo.”

Dalidali dayon nga nagkadto si Arthur sa Convention Hall dala ang sulat. Ginhatag niya ini sa isa ka opisyal. Daw indi makapati ang opisyal kag nagsiling sia: “Baw! May pirma ni heneral ba! Kabalo ka bala nga ikaw ang pinakauna nga may paguaon sa sini nga lugar?” Sang ulihi, nakita ni Arthur si Brother Hill kag ang iya pamilya. Nagsakay sila tanan sa salakyan ni Arthur, kag nagpauli sila sa balay ni Brother Hill.

Ginsigurado ni Brother Claus nga naamligan si Brother Hill kag ang iya pamilya. Gindayaw sang iban ang kaisog ni Brother Claus kag ang pagpalangga niya sa iya mga kauturan. Si Arthur nagsiling: “Nagdayaw gid sa mga Saksi ni Jehova ang kaingod ni Brother Hill nga nagbulig sa pagbantay sang iya propiedad. Kag madamo nga tawo ang nangin interesado sa kamatuoran, bangod nakita nila nga nahiusa ang katawhan sang Dios bisan pa lainlain ang ila rasa. Kag bilang katawhan sang Dios, alalangay ang aton pagtan-aw sa isa kag isa.”

a Ang ngalan sini nga magasin gin-islan sing Consolation sang 1937 kag Awake! sang 1946.