Mga Pamatan-on, Padayon nga Mag-uswag Pagkatapos sang Inyo Bawtismo

1. Ano na ang mga nahimo sang madamo nga pamatan-on?

KADA tuig, linibo ka pamatan-on ang ginabawtismuhan. Isa ka bala sa ila? Nalipay ang imo mga kauturan sa imo desisyon, kag nalipay man si Jehova. (Hulu. 27:11) Hunahunaa kon ano na ang imo mga nahimo. Halimbawa, gintun-an mo sing maayo ang Biblia nga posible naglawig sing pila ka tuig. Bangod sini, nakumbinsi ka nga Pulong gid sang Dios ang Biblia. Pero ang mas importante, nakilala mo ang Awtor sang Biblia kag ginpalangga mo sia. Sang ulihi, mas ginpalangga mo pa gid si Jehova, gani gindedikar mo ang imo kabuhi sa iya kag nagpabawtismo ka. Maayo gid ang ginhimo mo nga desisyon.

2. Ano ang binagbinagon naton sa sini nga artikulo?

² Antes ka nabawtismuhan, nakaeksperiensia ka sang mga problema nga nagtilaw sang imo pagtuo. Pero samtang nagaedad ka, makaeksperiensia ka sang bag-o nga mga problema. Tinguhaan ni Satanas nga madula ang imo gugma kay Jehova kag mag-untat ka sa pag-alagad sa Iya. (Efe. 4:14) Indi pagpabay-i nga matabo ina sa imo. Ano ang makabulig sa imo para mangin matutom ka kay Jehova kag para matuman mo ang imo promisa sa iya? Dapat padayon ka nga mag-uswag ukon dapat ka “magpanikasog” para mangin hamtong ka nga Cristiano. (Heb. 6:1) Paano mo ini mahimo?

ANO ANG HIMUON MO PARA MANGIN HAMTONG KA NGA CRISTIANO?

3. Ano ang dapat himuon sang tanan nga Cristiano pagkatapos sang ila bawtismo?

³ Dapat iaplikar sang tanan nga bawtismado nga Cristiano ang ginlaygay ni apostol Pablo sa iya mga kauturan sa Efeso. Ginpalig-on niya sila nga mangin “hamtong gid” nga Cristiano. (Efe. 4:13) Buot silingon, dapat ‘padayon sila nga mag-uswag.’ Ginkumparar ni Pablo ang aton pag-uswag bilang Cristiano sa pagdaku sang isa ka bata. Kon mabun-ag ang isa ka bata, nalipay gid ang iya mga ginikanan kag ginapabugal gid nila sia. Pero indi puede nga magpabilin sia nga isa ka bata asta san-o. Magaabot ang tion nga dapat niya bayaan “ang paggawi sang bata.” (1 Cor. 13:11) Amo man sini ang dapat himuon sang mga Cristiano. Pagkatapos sang aton bawtismo, dapat padayon kita nga mag-uswag. Binagbinagon naton ang pila ka panugda nga makabulig sa aton nga mahimo ini.

4. Ano ang isa ka paagi para mag-uswag ka? Ipaathag. (Filipos 1:9)

⁴ Palanggaa pa gid si Jehova. Palangga mo gid si Jehova subong. Pero may puede ka pa himuon para mas palanggaon mo pa gid sia. May ginsambit si apostol Pablo nga isa ka paagi sa Filipos 1:9. (Basaha.) Nangamuyo si Pablo nga kabay pa nga “magbugana sing labi pa gid” ang gugma sang mga kauturan sa Filipos. Ginapahangop sini nga puede pa naton dugangan ang aton gugma kay Jehova. Mahimo naton ini paagi sa pagkuha sang “sibu nga ihibalo kag bug-os nga paghantop.” Samtang nagadamo ang aton nabal-an parte kay Jehova, mas ginapalangga pa gid naton sia kag mas ginapabaloran pa gid naton ang iya mga kinaiya kag mga ginahimo. Mas ginapanikasugan pa gid naton nga malipay sia sa aton, kag ginalikawan gid naton nga maghimo sang bisan ano nga makapasubo sa iya. Ginahimo naton ang aton bug-os nga masarangan para mabal-an naton kon ano ang gusto niya nga himuon naton, kag kon paano naton ini himuon.

5-6. Ano ang himuon naton para mas palanggaon pa gid naton si Jehova? Ipaathag.

⁵ Perpekto nga gin-ilog ni Jesus ang personalidad sang iya Amay. Gani kon kilalahon pa gid naton sing maayo si Jesus, mas palanggaon pa gid naton si Jehova. (Heb. 1:3) Ang pinakamaayo nga paagi para makilala sing maayo si Jesus amo ang pagtuon sa apat ka Ebanghelyo. Kon wala ka pa sang iskedyul sa pagbasa sang Biblia adlaw-adlaw, puede mo ini umpisahan subong paagi sa pagbasa sa sini nga mga Ebanghelyo. Samtang ginabasa mo ang mga kasaysayan sa kabuhi ni Jesus, magpokus sa iya mga kinaiya. Mahapos sia palapitan, kag ginhakos niya ang mga bata. (Mar. 10:13-16) Wala natahap sa iya ang iya mga disipulo, kag ginsugid nila sa iya ang ila ginahunahuna. (Mat. 16:22) Kabalo kita nga gin-ilog ni Jesus ang iya Amay sa langit, gani masiling man naton nga mahapos gid palapitan si Jehova. Makapalapit kita sa iya paagi sa pagpangamuyo sa iya. Kon nagapangamuyo kita, puede naton masugid sa iya ang tanan naton nga ginahunahuna kag ginabatyag. Makasalig kita nga indi gid niya kita pagpakalainon. Palangga niya kita, kag nagaulikid sia sa aton.—1 Ped. 5:7.

⁶ Naluoy si Jesus sa mga tawo. Si apostol Mateo nagsiling: “Sang makita niya ang mga tawo, naluoy sia sa ila kay ginpanitan sila kag nag-alaplaag kaangay sang mga karnero nga wala sing manugbantay.” (Mat. 9:36) Kag ano naman ang ginabatyag ni Jehova? Si Jesus nagsiling: “Indi luyag sang akon Amay sa langit nga malaglag ang bisan isa sining mga kubos.” (Mat. 18:14) Makapalig-on gid ini sa aton. Kon makilala pa gid naton sing maayo si Jesus, mas palanggaon pa gid naton si Jehova.

7. Paano makabulig sa imo ang pag-upod sa hamtong nga mga kauturan?

⁷ Kon mag-upod ka sa hamtong nga mga kauturan sa inyo kongregasyon kag kon kilalahon mo sila sing maayo, makabulig man ini sa imo nga mas palanggaon pa gid si Jehova kag mangin hamtong nga Cristiano. Talupangda kon daw ano sila ka malipayon. Wala gid nila ginhinulsulan ang ila desisyon nga alagaron si Jehova. Pamangkuta sila parte sa pila nila ka eksperiensia sa pag-alagad kay Jehova. Kon may dapat ka himuon nga importante nga desisyon, mangayo sing laygay sa ila. Tandai nga “may kadalag-an kon madamo sing manuglaygay.”—Hulu. 11:14.

8. Ano ang puede mo himuon kon nagaduhaduha ka sa ginasiling sang Biblia?

⁸ Panikasugi nga madula ang imo mga pagpangduhaduha. Ginsambit sa parapo 2 nga tinguhaan ni Satanas nga punggan ang imo pag-uswag. Posible may himuon sia para magduhaduha ka sa pila ka ginasiling sang Biblia. Halimbawa, posible nga piliton ka sang iban nga magpati sa ebolusyon ukon sa panudlo nga wala kita gintuga sang Dios. Nagapakahuya gid sa Dios ini nga panudlo. Sang bata ka pa, posible nga wala mo ginhatagan sang atension ini nga panudlo. Pero subong, posible nga amo ini ang ginatudlo sa inyo eskwelahan. Base sa mga ginatudlo sang imo mga maestro kag maestra parte sa ebolusyon, posible maghunahuna ka nga daw husto ini kag mapatihan. Pero, posible nga wala pa gid nila mabinagbinag sing maayo ang mga ebidensia nga may ara Manunuga. Dumduma ang prinsipio sa Hulubaton 18:17: “Ang una nga nagasugid sang iya kaso daw husto gid, tubtob mag-abot ang iya kontra kag usisaon sia.” Gani imbes nga patihan lang dayon ang tanan nga ginatudlo sa inyo eskwelahan, tun-i sing maayo ang mga kamatuoran sa Pulong sang Dios, ang Biblia. Mag-research sa aton mga publikasyon. Istoryaha ang mga kauturan nga nagapati sadto sa ebolusyon. Pamangkuta sila kon ano ang nagkumbinsi sa ila nga may ara Manunuga nga nagapalangga sa aton. Ini nga mga pag-istoryahanay makabulig sa imo nga magpokus sa mga ebidensia nga may ara Manunuga.

9. Ano ang natun-an mo sa eksperiensia ni Melissa?

⁹ Nakabenepisyo gid ang isa ka sister nga si Melissa sang nag-research sia parte sa pagpanuga.b Nagsiling sia: “Sa eskwelahan, daw mapatihan gid ang ebolusyon kon ginapaathag ini sang mga maestro kag maestra. Gani ginduhaduhaan ko ang parte sa pagpanuga. Sang primero, indi ko gusto mag-research kay nahadlok ako nga basi mas patihan ko ang ebolusyon. Pero kabalo ako nga gusto ni Jehova nga kumbinsido kita sa aton mga ginapatihan bangod sa mga ebidensia. Gani nag-research ako. Ginbasa ko ang libro nga Is There a Creator Who Cares About You? kag ang mga brosyur nga Gintuga Bala ang Kabuhi? kag The Origin of Life—Five Questions Worth Asking. Nakabulig gid ini sa akon. Tani nag-research na lang ako dayon sadto.”

10-11. Ano ang makabulig sa imo para indi ka madaug sang pagsulay? (1 Tesalonica 4:3, 4)

¹⁰ Sikwaya ang sala nga mga buhat. Kon nagasinultero ka ukon nagadinalaga, posible makabatyag ka nga nagabaskog ang imo handum nga mag-sex, kag posible piliton ka sang iban nga maghimo sang imoral. Gusto ni Satanas nga magpadala ka sa imo mga handum. Ano ang makabulig sa imo para indi ka madaug sang pagsulay? (Basaha ang 1 Tesalonica 4:3, 4.) Mangamuyo kay Jehova. Isugid sa iya kon ano gid ang imo ginabatyag, kag pangabaya sia nga pabakuron ka. (Mat. 6:13) Tandai nga gusto ni Jehova nga buligan ka, indi nga pakalainon ka. (Sal. 103:13, 14) Makabulig man sa imo ang Biblia. Sa bahin ni Melissa, nga ginsambit kaina, nabudlayan sia nga sikwayon ang imoral nga mga panghunahuna. Nagsiling sia: “Ang pagbasa sang Biblia adlaw-adlaw amo ang nakabulig sa akon nga sikwayon ang malain nga mga handum. Ginpahanumdom ako sini nga si Jehova ang nagapanag-iya sa akon kag gusto ko nga alagaron sia.”—Sal. 119:9.

¹¹ Indi pagsuluha ang imo mga problema. Istoryaha ang imo mga ginikanan parte sa sini. Indi mahapos nga istoryahan ang parte sa personal nga mga butang, pero importante nga himuon mo ini. Si Melissa nagsiling: “Nangamuyo ako nga hatagan ako sang kaisog. Dayon gin-istorya ko si Papa parte sa akon problema. Pagkatapos sini, nagtawhay gid ang akon pamatyag. Kabalo ako nga nalipay si Jehova sa akon.”

12. Paano ka makahimo sang maayo nga mga desisyon?

¹² Magpagiya sa mga prinsipio sa Biblia. Samtang nagaedad ka, amat-amat ka nga pasugtan sang imo mga ginikanan nga maghimo sang imo desisyon. Pero kulang pa ang imo mga eksperiensia sa kabuhi. Ano ang himuon mo para malikawan mo ang paghimo sang sala nga makaguba sang imo kaangtanan kay Jehova? (Hulu. 22:3) Ginpaathag sang isa ka sister nga si Kari kon ano ang nakabulig sa iya nga makahimo sang maayo nga mga desisyon. Nahangpan niya nga kon hamtong ka nga Cristiano, indi mo kinahanglan mangita sang kasuguan sa kada sitwasyon. Nagsiling sia: “Dapat ako maghunahuna base sa mga prinsipio sa Biblia, indi lang base sa mga kasuguan.” Kon nagabasa ka sang Biblia, pamangkuta ang imo kaugalingon: ‘Ano ang ginatudlo sini nga teksto parte sa panghunahuna ni Jehova? Ano ang mga prinsipio sa sini nga teksto nga makabulig sa akon nga himuon ang husto? Ano ang benepisyo kon iaplikar ko ini?’ (Sal. 19:7; Isa. 48:17, 18) Kon basahon mo ang Biblia kag pamalandungan mo ang mga prinsipio sa sini, makahimo ka sang mga desisyon nga makapahalipay kay Jehova. Samtang nagahamtong ka, matalupangdan mo nga indi mo kinahanglan ang kasuguan sa kada sitwasyon bangod nahangpan mo na ang panghunahuna ni Jehova sa sini.

13. Paano makabulig sa imo ang maayo nga mga abyan? (Hulubaton 13:20)

¹³ Pilia ang mga abyan nga nagapalangga kay Jehova. Ginsambit kaina nga may daku nga epekto ang imo ginapili nga mga abyan sa imo pag-uswag bilang Cristiano. (Basaha ang Hulubaton 13:20.) Binagbinaga ang eksperiensia ni Sara. Wala na sia nalipay sa iya pag-alagad. Pero may nakabulig sa iya nga mangin malipayon liwat. Si Sara nagsiling: “Nakakita ako sang maayo nga mga abyan sa husto gid nga tion. Kada semana, may isa ka pamatan-on nga sister nga nagaupod sa akon para tun-an sing abanse ang Lalantawan. Ginbuligan naman ako sang isa ko pa ka abyan nga magkomento sa mga miting. Bangod sang bulig sang akon mga abyan, ginserioso ko ang personal nga pagtuon kag ang pagpangamuyo. Gani nagbakod ang akon kaangtanan kay Jehova, kag nangin malipayon ako liwat.”

14. Paano nakakita si Julien sang maayo nga mga abyan?

¹⁴ Paano mo mangin abyan ang mga tawo nga makapalig-on sa imo? Si Julien, nga isa na ka gulang subong, nagsiling: “Sang pamatan-on ako, nakakita ako sang maayo nga mga abyan sa mga nakaupod ko sa pagbantala. Mapisan sila magbantala, kag nakita ko nga malipayon gid sila. Bangod sini, ginhandum ko nga magpayunir. Narealisar ko man nga pila lang gali ang akon maayo nga mga abyan bangod mga kaedad ko lang ang akon ginapili. Sang ulihi, nakakita man ako sang maayo nga mga abyan sa Bethel. Ang ila halimbawa amo ang nagbulig sa akon nga pilion ang maayo nga mga kalingawan, gani nagsuod pa gid ako kay Jehova.”

15. Ano ang ginpaandam ni Pablo kay Timoteo parte sa pagpili sang kaupdanan? (2 Timoteo 2:20-22)

¹⁵ Ano abi kon marealisar mo nga indi gali maayo nga abyan ang isa ka utod sa kongregasyon? Kabalo si Pablo nga may pila ka utod sa kongregasyon sang unang siglo nga daw indi mga Cristiano kon basihan ang ila panimuot ukon ginahimo, gani ginpaandaman niya si Timoteo nga magpalayo sa ila. (Basaha ang 2 Timoteo 2:20-22.) Hamili gid ang aton kaangtanan kay Jehova. Nagpanikasog gid kita para mangin suod kita sa aton Amay sa langit, gani indi kita dapat magpakig-abyan sa mga tawo nga makaguba sang aton kaangtanan sa iya.—Sal. 26:4.

PAANO MAKABULIG ANG MGA TULUMURON PARA MANGIN HAMTONG KA?

16. Ano nga mga goal ukon tulumuron ang dapat mo panikasugan?

¹⁶ Panikasugi ang mapuslanon nga mga tulumuron. Pilia ang mga goal ukon tulumuron nga makapabakod sang imo pagtuo kag makabulig sa imo nga mangin hamtong. (Efe. 3:16) Halimbawa, puede mo tinguhaan nga pauswagon ang imo personal nga pagtuon kag pagbasa sang Biblia. (Sal. 1:2, 3) Puede mo man panikasugan nga magpangamuyo pirme kag himuon ini sing tinagipusuon. Basi kinahanglan mo nga pauswagon ang imo pagpugong sa kaugalingon kon nagapili ka sang kalingawan kag kon paano mo ginagamit ang imo tion. (Efe. 5:15, 16) Kon makita ni Jehova nga nagapanikasog ka gid para mangin hamtong ka, malipay sia sa imo.

17. Ano ang benepisyo kon nagabulig ka sa iban?

¹⁷ Kon nagabulig ka sa iban, makabulig ini sa imo nga mangin hamtong nga Cristiano. Nagsiling si Jesus: “Mas malipayon ang nagahatag sangsa nagabaton.” (Binu. 20:35) Mangin malipayon ka gid kon gamiton mo ang pila sang imo tion kag kusog para buligan ang iban. Halimbawa, puede mo himuon nga tulumuron ang pagbulig sa mga tigulang kag nagamasakit sa inyo kongregasyon. Puede mo sila buligan sa pagpanindahan ukon tudluan sila sa paggamit sang ila gadyet. Kon isa ikaw ka brother, himua nga tulumuron nga mangin isa ka ministeryal nga alagad para mas makabulig ka pa gid sa imo mga kauturan. (Fil. 2:4) Mapakita mo man ang gugma sa mga indi bahin sang kongregasyon paagi sa pagsugid sa ila sang maayong balita sang Ginharian. (Mat. 9:36, 37) Kag kon posible, himua nga tulumuron ang pagpayunir.

18. Paano makabulig ang pagpayunir para mag-uswag ka sa imo pag-alagad kay Jehova?

¹⁸ Ang pagpayunir makahatag sa imo sang madamo nga kahigayunan para mag-uswag ka sa imo pag-alagad kay Jehova. Kon payunir ka, puede ka makaeskwela sa School for Kingdom Evangelizers. Puede ka man mag-alagad sa Bethel ukon sa mga konstruksion sang mga pasilidad sang organisasyon. Si Kaitlyn, nga isa ka pamatan-on nga payunir, nagsiling: “Ang pagbantala upod sa hamtong nga mga kauturan amo ang nakabulig sa akon sing daku para mag-uswag ako sa akon pag-alagad kay Jehova pagkatapos ako mabawtismuhan. Bangod sang ila halimbawa, napalig-on ako nga tun-an sing maayo ang Biblia kag pauswagon ang akon paagi sang pagtudlo sa iban.”

19. Samtang nagauswag ka sa imo pag-alagad kay Jehova, ano nga mga pagpakamaayo ang maeksperiensiahan mo?

¹⁹ Samtang nagauswag ka sa imo pag-alagad kay Jehova, hatagan ka niya sang madamo nga pagpakamaayo. Malikawan mo ang paggamit sang imo kusog sa wala pulos nga mga tulumuron. (1 Juan 2:17) Malikawan mo ang masakit nga mga resulta sang indi maayo nga mga desisyon. Sa baylo, mangin madinalag-on ka gid kag malipayon. (Hulu. 16:3) Ang imo maayo nga halimbawa magapalig-on sa imo mga kauturan, bata man ukon tigulang. (1 Tim. 4:12) Kag ang pinakaimportante, mangin malinong ang imo hunahuna kag mangin malipayon ka bangod kabalo ka nga nalipay sa imo si Jehova kag may suod ka nga kaangtanan sa iya.—Hulu. 23:15, 16.