Husto kag Sala: Ang Biblia—Isa ka Masaligan nga Giya

Indi kita makasigurado kon mangin maayo ang resulta sang aton mga desisyon sa moral kon ibase lang naton ini sa aton ginabatyag ukon sa ginabatyag sang iban. Ginasugid sang Biblia ang rason kon ngaa, kag may ginasugid pa gid ini. Ginabuligan kita sini nga mahibaluan kon ano ang husto kag sala, para mangin malipayon ang aton kabuhi.

KINAHANGLAN NATON ANG GIYA HALIN SA DIOS

Sa Biblia, si Jehovaa nga Dios nagsiling nga kinahanglan sang mga tawo ang iya bulig, kag indi nila mahimo ang tanan sa ila lang kaugalingon. (Jeremias 10:23) Gani naghatag sia sang mga kasuguan sa moral nga mabasa sa Biblia. Palangga niya ang mga tawo kag indi niya gusto nga makahimo kita sang malain nga mga desisyon nga makasakit sa aton kag magpabudlay sa aton kabuhi. (Deuteronomio 5:29; 1 Juan 4:8) Dugang pa, bilang aton Manunuga, may kaalam sia kag ihibalo para maghatag sa aton sang pinakamaayo nga laygay. (Salmo 100:3; 104:24) Pero, wala ginapilit sang Dios ang mga tawo nga sundon ang iya mga kasuguan.

Ginhatagan ni Jehova ang una nga lalaki kag babayi, nga si Adan kag Eva, sang tanan nila nga kinahanglanon para mangin malipayon sila. (Genesis 1:28, 29; 2:8, 15) Ginhatagan man niya sila sang simple nga mga instruksion kag ginpaabot niya nga tumanon nila ini. Pero, sila ang ginpadesisyon niya kon tumanon nila ini nga mga instruksion ukon indi. (Genesis 2:9, 16, 17) Kasubo gid kay ginpili ni Adan kag Eva nga sundon ang ila gusto imbes ang mga kasuguan sang Dios. (Genesis 3:6) Ano ang resulta? Nangin malipayon bala ang mga tawo kay ginhimo nila ang sa pensar nila nga husto? Wala. Ginapamatud-an sang kasaysayan nga kon balewalaon naton ang mga kasuguan sang Dios, indi ini magresulta sa permanente nga paghidait kag kalipay.—Manugwali 8:9.

Ang Biblia nagahatag sa aton sang giya para makahimo kita sang maayo nga mga desisyon nga makabulig sa aton bisan ano man ang aton ginhalinan. (2 Timoteo 3:16, 17; tan-awa ang kahon nga “Isa ka Libro Para sa Tanan nga Tawo.”) Hibalua kon paano ini ginahimo sang Biblia.

Tun-i pa gid kon ngaa ang Biblia dapat tawgon nga “pulong sang Dios.”—1 Tesalonica 2:13. Tan-awa ang video nga Sin-o ang Awtor sang Biblia? sa jw.org.

KON NGAA ANG IBAN WALA NAGAPATI SA BIBLIA

Nagasiling ang iban nga ang Biblia indi makahatag sang maayo nga giya. Posible amo ini ang ila mga rason.

Siling sang iban: “Wala nagasantuanay ang mga ginasiling sang Biblia.”

Ang matuod: Sa umpisa, abi mo daw wala nagasantuanay ang pila ka teksto sa Biblia. Pero kon matun-an mo kon paano kag san-o ini ginsulat, makita mo nga nagasantuanay gid ini nga mga teksto.

Para makita mo ang pila ka halimbawa, basaha ang artikulo nga “May Pagsumpakilay Bala sa Biblia?” sa jw.org.

Siling sang iban: “Ang mga tawo nga nagasiling nga ginasunod nila ang Biblia nagahimo man sang malain, gani indi ini maayo nga giya.”

Ang matuod: Ang Biblia indi balasulon sa malain nga ginahimo sang mga tawo nga wala nagasunod sa mga panudlo sini. Gintagna sini nga madamo nga tawo, pati na ang mga lider sang relihion, ang magasiling nga ginasunod nila ang Biblia pero lain ang ila ginahimo sa ginasiling sini. Nagasiling man ini nga bilang resulta, ang mga panudlo sang Biblia pakalainon.—2 Pedro 2:1, 2.

Para makita ang mga halimbawa nga wala ginasunod sang madamo nga lider sang relihion ang ginatudlo sang Biblia, basaha ang artikulo nga “Isa Lang Bala ka Negosyo ang Relihion?” sa jw.org.

Siling sang iban: “Ang mga tawo nga nagasunod sa Biblia wala nagarespeto sa iban nga lain sa ila.”

Ang matuod: Ginatudlo sang Biblia nga respetuhon ang iban nga mga tawo. Wala ini nagatudlo nga. . .

kabigon ang kaugalingon nga labaw sa iban.—Filipos 2:3.
pakalainon ang mga tawo nga lain ang prinsipio ukon ginapatihan.—1 Pedro 2:17.
piliton ang iban nga sundon ang aton ginapatihan.—Mateo 10:14.

Ginapakita sang Biblia nga pirme ginatratar sang Dios sing maayo kag palareho ang mga tawo kag gusto sang Dios nga amo man sini ang aton himuon.—Roma 9:14.

Para sa dugang nga impormasyon, basaha ang artikulo nga “Pagrespeto sa Sarisari nga mga Tawo—Kon Paano Makabulig ang Biblia” sa jw.org.

GINASUGID SANG BIBLIA KON ANO ANG GUSTO SANG DIOS NGA HIMUON NATON

Ginasugid sang Biblia sa aton ang mga ginhimo kag ginhambal ni Jehova sa mga tawo halin pa sadto. Ginabuligan kita sini nga maintiendihan kon ano ang husto kag sala ukon ang mapuslanon kag makahalit sa pagtan-aw sang Dios. (Salmo 19:7, 11) Ang mga leksion nga aton matun-an wala gid nagadaan kag makabulig gid sa aton nga makahimo sang maayo nga mga desisyon sa aton kabuhi kada adlaw.

Halimbawa, binagbinaga ang laygay sa Hulubaton 13:20: “Ang tawo nga nagaupod sa maalamon mangin maalamon man, apang ang tawo nga nagaupod sa mga buangbuang mapahamak.” Ini nga prinsipio nakabulig sa mga tawo sang una kag makabulig man ini sa aton subong. Ang Biblia puno gid sang makabulig kag importante nga mga prinsipio pareho sini.—Tan-awa ang kahon nga “Ang Wala Nagadaan nga Kaalam sang Biblia.”

Pero basi mamangkot ka, ‘Ngaa makasigurado ako nga makabulig gid sa akon subong ang laygay sang Biblia?’ Binagbinagon sa masunod nga artikulo ang pila ka matuod gid nga mga halimbawa.

a Si Jehova ang personal nga ngalan sang Dios.—Salmo 83:18.

ANG WALA NAGADAAN NGA KAALAM SANG BIBLIA

Bisan halos 2,000 ka tuig na nga nasulat ang Biblia, makabulig ini gihapon sa aton subong. Gusto gid pirme sang mga tawo nga mangin malipayon kag may maayo nga kabuhi. (Manugwali 1:9) Ang wala nagadaan nga kaalam sang Biblia makabulig sa aton para mangin amo sina ang aton kabuhi.

Pagka-honest

“Luyag namon magkabuhi sing bunayag sa tanan nga butang.”—Hebreo 13:18.
“Ang kawatan indi na magpangawat; sa baylo magpangabudlay sia.”—Efeso 4:28.

Relasyon sa Iban

“Ang tagsatagsa indi dapat maghunahuna sang iya kaugalingon nga kaayuhan, kundi sang kaayuhan sang iban.”—1 Corinto 10:24.
“Padayon nga batasa ninyo ang isa kag isa kag magpinatawaray kamo sing kinabubut-on.”—Colosas 3:13.

Paghimo sang mga Desisyon

“Ang tawo nga mapinatihon, nagapati sa bisan ano nga mabatian niya, apang ang tawo nga maalamon nagabinagbinag sang tagsa niya ka tikang.”—Hulubaton 14:15.
“Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulubaton 22:3.