Indi Malip-ot ang Kamot ni Jehova

1. Paano ginpakita ni Moises nga nagasalig sia kay Jehova sang ginpangunahan niya ang mga Israelinhon pagua sa Egipto?

GINSAMBIT sa libro sang Hebreo ang mga alagad ni Jehova nga may mabakod nga pagtuo, kag talalupangdon gid sa ila si Moises. (Heb. 3:​2-5; 11:​23-25) Nagpakita sia sing pagtuo sang ginpangunahan niya ang mga Israelinhon pagua sa Egipto. Wala sia nahadlok sa Paraon kag sa iya mga soldado. Nagsalig sia kay Jehova, kag ginpangunahan niya ang katawhan sa pagtabok sa Pula nga Dagat kag sa kamingawan sang ulihi. (Heb. 11:​27-29) Nadula ang pagsalig sang kalabanan nga Israelinhon sa ikasarang ni Jehova nga amanan sila, pero padayon nga nagsalig si Moises sa iya Dios. Husto gid ang ginhimo ni Moises. Kay man, paagi sa milagro, gin-amanan sang Dios ang mga Israelinhon sing pagkaon kag tubig sang ara sila sa kamingawan.a—Ex. 15:​22-25; Sal. 78:​23-25.

2. Ngaa ginpamangkot sang Dios si Moises: “Malip-ot bala ang kamot ni Jehova”? (Numeros 11:​21-23)

² Mabakod ang pagtuo ni Moises. Pero pagligad sang mga isa ka tuig pagkatapos ginpagua ni Jehova ang mga Israelinhon sa Egipto, ginduhaduhaan ni Moises ang ikasarang ni Jehova nga amanan sila sang karne. Indi niya maimadyin kon paano amanan ni Jehova sang bastante nga karne ang minilyon ka tawo nga ara sa kamingawan. Gani, ginpamangkot ni Jehova si Moises: “Malip-ot bala ang kamot ni Jehova?” (Basaha ang Numeros 11:​21-23.) Ang ekspresyon nga “kamot ni Jehova” nagapatuhoy sa balaan nga espiritu sang Dios, ukon sa gahom nga iya ginagamit para himuon ang iya kabubut-on. Daw pareho lang nga ginpamangkot ni Jehova si Moises, ‘Sa banta mo, indi ko mahimo ang akon ginsiling?’

3. Ngaa importante nga pamalandungan naton ang natabo kay Moises kag sa mga Israelinhon?

³ May tion bala nga nabalaka ka kon amanan ka gid man ni Jehova kag ang imo pamilya sang inyo materyal nga mga kinahanglanon? Naeksperiensiahan mo man ini ukon wala, binagbinagon naton kon ngaa nadula ang pagsalig ni Moises kag sang mga Israelinhon sa ikasarang sang Dios nga amanan sila. Binagbinagon man naton ang mga prinsipio sa Biblia nga makabulig sa aton nga magsalig pa gid nga indi malip-ot ang kamot ni Jehova.

ANG MATUN-AN NATON KAY MOISES KAG SA MGA ISRAELINHON

4. Ngaa nagduhaduha ang madamo nga Israelinhon sa ikasarang ni Jehova nga amanan sila sang ila mga kinahanglanon?

⁴ Binagbinagon naton ang natabo. Ara sa kamingawan ang mga Israelinhon kag “ang madamo nga dumuluong” nga naggua sa Egipto, kag madugay na sila nga nagapanglakaton pakadto sa Ginsaad nga Duta. (Ex. 12:38; Deut. 8:15) Nagreklamo ang madamo nga dumuluong kay natak-an na sila magkaon sang manna, kag nagreklamo man ang madamo nga Israelinhon. (Num. 11:​4-6) Ginhandum nila ang mga pagkaon sa Egipto. Nagreklamo ang katawhan kay Moises, gani posible nahunahuna niya nga dapat sia mangita sing paagi para amanan sila sang karne.​—Num. 11:​13, 14.

5-6. Ano ang matun-an naton sa kon paano naimpluwensiahan sang mga dumuluong ang mga Israelinhon?

⁵ Wala gid naapresyar sang mga dumuluong ang tanan nga gin-aman ni Jehova sa ila, kag naimpluwensiahan nila ang mga Israelinhon. Sing kaanggid, puede man kita maimpluwensiahan sang mga tawo nga indi mapinasalamaton. Bangod sini, posible indi man kita makontento sa mga ginaaman ni Jehova. Matabo ina kon ginahandum naton ang mga butang nga ara sa aton sang una ukon nahisa kita sa kon ano ang ara sa iban. Pero ano man ang aton sitwasyon, mangin mas malipayon kita kon kontento kita.

⁶ Dapat gindumdom sang mga Israelinhon ang ginpromisa ni Jehova sa ila. Nagpromisa sia nga amanan niya sila sang sobra pa sa ila mga kinahanglanon kon mag-abot na sila sa Ginsaad nga Duta, indi samtang ara pa sila sa kamingawan. Sing kaanggid, imbes nga magpokus kita sa kon ano ang wala sa aton sa sini nga sistema, mas maayo nga magpokus kita sa mga promisa ni Jehova sa bag-ong kalibutan. Puede man naton pamalandungan ang mga teksto nga makabulig sa aton nga magsalig pa gid kay Jehova.

7. Ngaa makasalig kita nga indi malip-ot ang kamot ni Jehova?

⁷ Pero, posible nagapalibog ka kon ngaa ginpamangkot sang Dios si Moises: “Malip-ot bala ang kamot ni Jehova?” Mahimo gusto niya nga marealisar ni Moises ang duha ka butang: (1) Wala sing limitasyon ang iya gahom. (2) Makalab-ot ang iya gahom bisan diin. Masarangan sang Dios nga amanan sang madamo nga karne ang mga Israelinhon bisan pa ara sila sa kamingawan. Ginpakita sang Dios ang iya gahom paagi sa iya ‘makusog nga kamot kag inuntay nga butkon.’ (Sal. 136:​11, 12) Gani kon makaeksperiensia kita sang mga kabudlayan, makasalig kita nga mabuligan kita ni Jehova bisan diin man kita.​—Sal. 138:​6, 7.

8. Paano naton malikawan ang sala nga ginhimo sang madamo nga alagad ni Jehova sa kamingawan? (Tan-awa man ang piktyur.)

⁸ Gintuman ni Jehova ang iya promisa paagi sa pag-aman sang madamo nga pitaw sa iya katawhan. Pero, wala gid nagpasalamat ang mga Israelinhon sa milagro nga ginhimo sang Dios. Sa baylo, madamo sa ila ang nangin sakon, ukon sobra sa ila kinahanglanon ang ginkuha nila nga mga pitaw. Wala untat sila nga nagpangdakop sang pitaw sa sulod sang isa ka adlaw kag tunga. Naakig gid si Jehova sa “dalokdalok nga mga tawo nga naghandum sing pagkaon,” kag ginsilutan niya sila. (Num. 11:​31-34) May matun-an kita sa ila halimbawa. Dapat gid kita maghalong para indi kita mangin sakon. Imol man kita ukon manggaranon, dapat naton unahon ang pagtipon sing ‘mga bahandi sa langit’ paagi sa pagpanikasog nga mangin suod pa gid kay Jehova kag kay Jesus. (Mat. 6:​19, 20; Luc. 16:9) Kon himuon naton ini, makasalig kita nga amanan kita ni Jehova.

9. Ano ang masaligan naton parte sa pagbulig sang Dios?

⁹ Handa man si Jehova nga buligan ang iya katawhan subong. Pero, indi buot silingon sini nga indi gid kita makaeksperiensia sang kapigaduhon ukon gutom.b Pero, indi gid kita pagpabay-an ni Jehova. Buligan niya kita ano man nga kabudlayan ang aton maeksperiensiahan. Paano naton mapakita nga nagasalig kita nga iaman ni Jehova ang aton mga kinahanglanon? Binagbinagon naton ang duha ka sitwasyon: (1) kon kinahanglan naton sang kuarta para sa aton pamilya, kag (2) kon nabalaka kita parte sa aton mga kinahanglanon sa palaabuton.

KON KINAHANGLAN NATON SANG KUARTA

10. Ngaa posible mabudlayan kita mangita sang kuarta?

¹⁰ Samtang nagalapit na gid ang katapusan, mapaabot naton nga magalala pa gid ang ekonomiya. Bangod sa kinagamo sa pulitika, inaway, kalamidad, ukon bag-o nga mga pandemic, mahimo madulaan kita sang obra, pagkabutang, ukon ilistaran, kag posible mabudlayan pa gid kita mangita sang kuarta. Mahimo kinahanglan naton mangita sang bag-o nga obra ukon magsaylo sa lain nga lugar upod ang aton pamilya. Ano ang makabulig sa aton para mapakita naton sa aton mga desisyon nga nagasalig kita kay Jehova?

11. Ano ang makabulig sa imo kon may problema ka sa kuarta? (Lucas 12:​29-31)

¹¹ Ang pinakaimportante nga dapat mo himuon amo ang pagsugid kay Jehova sang imo mga ginakabalak-an. Makabulig gid ini sa imo. (Hulu. 16:3) Mangayo sa iya sing kaalam para makahimo ka sang maayo nga mga desisyon, kag pangabaya sia nga buligan ka nga mangin kalmado para indi ka ‘tuman nga mabalaka’ sa imo sitwasyon. (Basaha ang Lucas 12:​29-31.) Pangabaya sia nga buligan ka nga mangin kontento sa kon ano lang ang imo mga kinahanglanon. (1 Tim. 6:​7, 8) Mag-research sa aton mga publikasyon parte sa mga puede mo himuon kon may problema ka sa kuarta. Parte sa sini, madamo ang nabuligan sang mga video kag artikulo nga makita sa jw.org.

12. Ano nga mga pamangkot ang dapat binagbinagon sang isa ka Cristiano para makahimo sia sang pinakamaayo nga desisyon para sa iya pamilya?

¹² May pila nga nagbaton sang obra sa lugar nga malayo sa ila pamilya, kag madamo sa ila ang nagsiling sang ulihi nga indi gid ini maayo nga desisyon. Antes mo batunon ang isa ka obra, binagbinaga anay indi lang ang sueldo kundi pati man ang epekto sini sa espirituwalidad sang imo pamilya. (Luc. 14:28) Pamangkuta ang imo kaugalingon: ‘Kon malayo ako sa akon asawa ukon bana, ano ang mahimo mangin epekto sini sa amon pag-asawahay? Ano ayhan ang epekto sini sa akon pagtambong sa mga miting, pagbantala, kag pagpakig-upod sa mga kauturan?’ Kon may kabataan ka, importante man nga pamangkuton mo ang imo kaugalingon: ‘Paano ko mapadaku ang akon kabataan “sa disiplina kag laygay ni Jehova” kon malayo ako sa ila?’ (Efe. 6:4) Kon nagahimo ka sang desisyon, sunda ang panghunahuna ni Jehova, indi ang ginasiling sang imo mga paryente ukon abyan nga wala nagapati sa ginasiling sang Biblia.c Binagbinaga si Tony nga nagaistar sa nakatundan sang Asia. Madamo nga obra nga may daku nga sueldo ang gintanyag sa iya sa iban nga pungsod. Pero, pagkatapos niya ini ginpangamuyo kag ginbinagbinag upod sa iya asawa, nagdesisyon sia nga indi pagbatunon ang mga gintanyag sa iya. Dayon, ginpamensaran niya kon paano sila makakinot. Nagsiling si Tony: “Bangod sa amon desisyon sadto, nabuligan ko ang pila ka tawo nga makilala si Jehova, kag palangga gid sang amon kabataan si Jehova. Natun-an sang amon pamilya nga kon iaplikar namon ang ginasiling sang Mateo 6:​33, amanan gid kami ni Jehova sang amon mga kinahanglanon.”

KON NABALAKA KITA PARTE SA ATON MGA KINAHANGLANON SA PALAABUTON

13. Ano ang puede naton himuon subong para may magamit kita nga kuarta kon tigulang na kita?

¹³ Matilawan man ang aton pagsalig kay Jehova kon ginahunahuna naton ang aton sitwasyon kon tigulang na kita. Ginapalig-on kita sang Biblia nga mangin mapisan para may magamit kita nga kuarta sa ulihi. (Hulu. 6:​6-11) Depende sa imo kahimtangan, maayo man kon makasupot ka para may magamit ka sa palaabuton. Kay man, makaamlig man ang kuarta. (Man. 7:12) Pero, indi dapat mangin pinakaimportante sa aton kabuhi ang pagpangita sang kuarta.

14. Paano makabulig ang Hebreo 13:5 kon nabalaka kita sa aton kinahanglanon sa palaabuton?

¹⁴ Ginpakita ni Jesus sa isa niya ka ilustrasyon nga kon nagatipon sang kuarta ang isa ka tawo pero indi sia “manggaranon sa Dios,” kabuangan ang iya ginahimo. (Luc. 12:​16-21) Wala kita kabalo kon ano ang matabo buas. (Hulu. 23:​4, 5; Sant. 4:​13-15) Nagsiling man si Jesus nga bilang iya mga sumulunod, dapat handa kita nga ‘biyaan’ ang tanan naton nga pagkabutang. (Luc. 14:33) Naeksperiensiahan ini sang mga Cristiano sa Judea sang unang siglo. Malipayon sila gihapon bisan pa ginpanguha ang ila mga pagkabutang. (Heb. 10:34) Subong, madamo nga kauturan ang nadulaan sang obra bangod indi sila magsuporta sa partido sa pulitika. (Bug. 13:​16, 17) Ano ang nakabulig sa ila? Bug-os gid ang ila pagsalig sa sining promisa ni Jehova: “Indi ko gid kamo pagbayaan, kag indi ko gid kamo pagpabay-an.” (Basaha ang Hebreo 13:5.) Ginahimo gid naton ang aton bug-os nga masarangan para may magamit kita sa palaabuton. Kag kon may matabo nga wala naton ginapaabot, nagasalig gid kita nga buligan kita ni Jehova.

15. Paano dapat tamdon sang Cristiano nga mga ginikanan ang ila kabataan? (Tan-awa man ang piktyur.)

¹⁵ Sa pila ka kultura, nagabata ang mga mag-asawa para may maatipan sa ila kon magtigulang na sila. Ang Biblia nagasiling nga dapat iaman sang mga ginikanan ang mga kinahanglanon sang ila kabataan. (2 Cor. 12:14) Siempre, posible kinahanglan man sang mga ginikanan ang bulig kon magtigulang na sila, kag madamo nga kabataan ang nalipay sa pagbulig sa ila mga ginikanan paagi sa paghatag sa ila sang kuarta kag sang iban pa nila nga kinahanglanon. (1 Tim. 5:4) Pero sa bahin sang Cristiano nga mga ginikanan, ginapadaku nila ang ila kabataan indi para hatagan sila sang ila kabataan sang kuarta sa ulihi, kundi para buligan sila nga mangin alagad ni Jehova. Kabalo ang mga ginikanan nga mangin mas malipayon sila kon himuon nila ini.​—3 Juan 4.

16. Paano mabuligan sang mga ginikanan ang ila kabataan nga masuportahan ang ila kaugalingon? (Efeso 4:28)

¹⁶ Paagi sa imo halimbawa, tudlui ang imo kabataan nga magsalig kay Jehova samtang ginabuligan mo sila kon paano nila masuportahan ang ila kaugalingon. Samtang bata pa sila, tudlui sila nga importante nga mangin mapisan sila. (Hulu. 29:21; basaha ang Efeso 4:28.) Samtang nagadaku sila, buligi sila nga mag-eskwela sing maayo. Puede mag-research ang Cristiano nga mga ginikanan sang mga prinsipio sa Biblia nga makabulig sa ila kabataan nga makahimo sang maayo nga mga desisyon parte sa edukasyon. Makabulig ini sa ila kabataan nga masuportahan ang ila kaugalingon kag magbantala sa bug-os nila nga masarangan.

17. Sa ano kita sigurado?

¹⁷ Makasalig gid ang mainunungon nga mga alagad ni Jehova sa iya ikasarang nga amanan sila sang ila mga kinahanglanon, kag gusto gid niya nga himuon ini. Samtang nagalapit na gid ang katapusan, matilawan gid ang aton pagsalig kay Jehova. Pero bisan ano pa ang matabo, nagasalig gid kita nga gamiton ni Jehova ang iya gahom para amanan kita sang aton mga kinahanglanon. Sigurado kita nga bisan diin man kita, indi malip-ot ang kamot ni Jehova sa pagbulig sa aton.