“Magpili Kamo . . . Kon Sin-o ang Inyo Alagaron”

1. Ano ang dapat naton himuon para mangin matuod kita nga malipayon, kag ngaa amo ini ang dapat naton himuon? (Isaias 48:​17, 18)

PALANGGA gid kita sang aton Amay sa langit, kag gusto niya nga mangin malipayon kita subong asta sa palaabuton. (Man. 3:​12, 13) Sang gintuga niya kita, ginhatagan niya kita sang dalayawon nga mga ikasarang. Pero, wala niya kita ginhatagan sang ikasarang nga gamhan ang aton kaugalingon ukon magdesisyon kon ano ang husto kag sala. (Man. 8:9; Jer. 10:23) Kabalo sia nga para mangin matuod kita nga malipayon, dapat naton sia alagaron kag dapat naton tumanon ang iya mga kasuguan.​—Basaha ang Isaias 48:​17, 18.

2. Ano ang gusto ni Satanas nga patihan naton, kag ano ang ginhimo ni Jehova para pamatud-an nga butigon si Satanas?

² Gusto ni Satanas nga magpati kita nga indi kinahanglan nga mag-alagad kita kay Jehova para mangin malipayon kita kag masarangan naton nga gamhan ang aton kaugalingon. (Gen. 3:​4, 5) Para pamatud-an nga butigon si Satanas, ginhatagan ni Jehova sang tion ang mga tawo nga gamhan ang ila kaugalingon. Maathag naton nga makita subong nga indi gid maayo ang resulta sang paggahom sang tawo. Pero mabasa naton sa Biblia ang madamo nga halimbawa sang mga tawo nga nangin malipayon bangod gin-alagad nila si Jehova. Ang pinakamalipayon sa ila amo si Jesucristo. Sa sini nga artikulo, tun-an naton kon ngaa si Jehova ang ginpili ni Jesus nga alagaron. Dayon binagbinagon naton kon ngaa dapat naton simbahon ang aton Amay sa langit. Kag repasuhon naton ang pila ka rason kon ngaa si Jehova ang ginpili naton nga alagaron.

KON NGAA SI JEHOVA ANG GINPILI NI JESUS NGA ALAGARON

3. Ano ang gintanyag ni Satanas kay Jesus, pero ano ang sabat ni Jesus?

³ Sang ari si Jesus sa duta, kinahanglan niya magpili kon sin-o ang iya alagaron. Wala madugay pagkatapos mabawtismuhan si Jesus, nagsiling si Satanas nga ihatag niya kay Jesus ang tanan nga ginharian sa duta kon magsimba sia sa iya bisan isa lang ka beses. Ginsilingan sia ni Jesus: “Palayo ka, Satanas! Kay nasulat na: ‘Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.’” (Mat. 4:​8-10) Ngaa si Jehova ang ginpili ni Jesus nga alagaron? Binagbinagon naton ang pila ka rason.

4-5. Ano ang pila ka rason kon ngaa si Jehova ang ginpili ni Jesus nga alagaron?

⁴ Ang panguna nga rason kon ngaa si Jehova ang ginpili ni Jesus nga alagaron amo ang iya daku nga gugma sa iya Amay. (Juan 14:31) Ginaalagad man ni Jesus si Jehova bangod amo ini ang husto nga himuon. (Juan 8:​28, 29; Bug. 4:11) Kabalo sia nga si Jehova ang naghatag sa aton sang kabuhi, kag masaligan Sia kag maalwan. (Sal. 33:4; 36:9; Sant. 1:17) Pirme matuod ang ginasiling ni Jehova kay Jesus, kag halin kay Jehova ang tanan nga ara kay Jesus. (Juan 1:14) Pero lain si Satanas, kay sia ang rason kon ngaa nagakapatay ang mga tawo. Butigon man sia, makagod, kag kaugalingon lang niya ang iya ginapensar. (Juan 8:44) Kilala gid ni Jesus si Jehova kag si Satanas, gani wala gid niya ginhunahuna nga ilugon si Satanas kag magrebelde kay Jehova.​—Fil. 2:​5-8.

⁵ Ang isa pa ka rason kon ngaa si Jehova ang ginpili ni Jesus nga alagaron amo nga nagpokus sia sa maayo nga mga resulta sang iya matutom nga pag-alagad. (Heb. 12:2) Kabalo sia nga kon magpabilin sia nga matutom, mapakabalaan niya ang ngalan sang iya Amay kag madula ang tanan nga halit nga ginhimo sang Yawa.

KON NGAA DAPAT NATON SIMBAHON SI JEHOVA

6-7. Ngaa madamo subong ang wala nagaalagad kay Jehova, pero ngaa sia lang ang dapat naton simbahon?

⁶ Madamo subong ang wala nagaalagad kay Jehova bangod wala sila kabalo sang iya dalayawon nga mga kinaiya kag sang tanan niya nga ginhimo para sa ila. Amo gid sina ang mga taga-Atenas nga ginbantalaan ni apostol Pablo.​—Binu. 17:​19, 20, 30, 34.

⁷ Ginpaathag ni Pablo sa ila nga ang matuod nga Dios amo ang “nagahatag sa tanan nga tawo sang kabuhi kag sang ginhawa kag sang tanan nga butang.” Nagsiling pa sia: “Paagi sa iya, may kabuhi kita kag nagahulag kag nagaluntad.” Ang Dios amo ang aton Manunuga kag “ginhimo niya halin sa isa ka tawo ang tagsa ka pungsod sang mga tawo,” gani sia lang ang dapat naton simbahon.​—Binu. 17:​25, 26, 28.

8. Ano ang indi gid paghimuon ni Jehova? Ipaathag.

⁸ Bilang aton Manunuga kag Soberano sang uniberso, puede kuntani piliton ni Jehova ang mga tawo nga mag-alagad sa iya. Pero indi gid niya ina paghimuon. Sa baylo, ginhatagan niya kita sang madamo nga pamatuod nga nagaluntad sia kag palangga gid niya ang kada isa sa aton. Gusto niya nga madamo nga tawo ang mangin abyan niya asta sa wala sing katapusan. (1 Tim. 2:​3, 4) Gani, ginhanas kita ni Jehova para isugid sa iban ang iya mga katuyuan kag ang maayo nga mga butang nga himuon niya para sa mga tawo. (Mat. 10:​11-13; 28:​19, 20) Kag nag-aman sia sang kongregasyon para masimba naton sia kag para mabuligan kita sang mahigugmaon nga mga gulang.​—Binu. 20:28.

9. Paano ginapakita ni Jehova nga palangga niya ang tanan nga tawo?

⁹ Ginapakita ni Jehova nga palangga niya ang tanan nga tawo paagi sa paghatag sang maayo nga mga butang bisan sa mga wala nagapati sa iya. Binagbinaga ini: Halin pa sang una, binilyon na ka tawo ang wala nagatuman kay Jehova kag sila ang nagadesisyon kon ano ang husto kag sala. Bisan pa sini, ginahatagan sila ni Jehova sang mga kinahanglanon nila sa ila kabuhi para mangin malipayon sila. (Mat. 5:​44, 45; Binu. 14:​16, 17) Ginhatagan niya sila sang mga abyan kag pamilya nga nagapalangga sa ila, sang ikasarang nga makabata, kag sang ikasarang nga mangin malipayon sa ila pinangabudlayan. (Sal. 127:3; Man. 2:24) Gani maathag nga palangga sang aton Amay sa langit ang tanan nga tawo. (Ex. 34:6) Binagbinagon naman naton ang pila ka rason kon ngaa si Jehova ang ginpili naton nga alagaron kag kon paano niya kita ginapakamaayo.

KON NGAA SI JEHOVA ANG GINPILI NATON NGA ALAGARON

10. (a) Ano ang panguna nga rason kon ngaa nagaalagad kita kay Jehova? (Mateo 22:37) (b) Sa imo bahin, paano ginpakita sa imo ni Jehova nga handa sia magpatawad? (Salmo 103:​13, 14)

¹⁰ Pareho kay Jesus, ang panguna nga rason kon ngaa nagaalagad kita kay Jehova amo ang aton daku nga gugma sa Iya. (Basaha ang Mateo 22:37.) Sang nabal-an naton ang iya mga kinaiya, gusto naton mangin suod sa iya. Halimbawa, handa si Jehova nga patawaron kita. Sang nagrebelde sa iya ang mga Israelinhon, ginpangabay niya sila: “Bayai ninyo, palihug, ang inyo malain nga dalanon.” (Jer. 18:11) Kabalo si Jehova nga yab-ok lang kita ukon indi kita perpekto. (Basaha ang Salmo 103:​13, 14.) Kon pamalandungan naton ang kahanda ni Jehova sa pagpatawad sa aton kag ang iban pa niya nga mga kinaiya, mapalig-on gid kita nga alagaron sia asta sa wala sing katapusan.

11. Ano ang iban pa nga rason kon ngaa ginpili naton nga mag-alagad sa aton Amay sa langit?

¹¹ Ari ang isa pa ka rason kon ngaa si Jehova ang ginpili naton nga alagaron: Amo ini ang husto nga himuon. (Mat. 4:10) Kabalo man kita sang maayo nga mga resulta kon mainunungon kita sa iya. Mapakabalaan sini ang ngalan ni Jehova, mapamatud-an sini nga butigon ang Yawa, kag mapahalipay naton ang aton Amay. Kag kon magdesisyon kita nga alagaron si Jehova subong, may paglaum kita nga alagaron sia asta sa wala sing katapusan.​—Juan 17:3.

12-13. Ano ang natun-an naton sa eksperiensia ni Jane kag ni Pam?

¹² Samtang bata pa kita, matun-an na naton nga higugmaon si Jehova. Kag samtang nagaedad kita, mas nagabakod ini nga gugma. Binagbinaga ang halimbawa sang duha ka mag-utod nga si Jane kag si Pam.a Nagsugod sila sa pag-Bible study sang 11 anyos si Jane kag 10 anyos si Pam. Bisan pa indi interesado magtuon ang ila mga ginikanan, ginpasugtan nila si Jane kag si Pam nga mag-Bible study sa mga Saksi ni Jehova basta mag-upod man sila sa ila pamilya sa pagsimba sa simbahan. Nagsiling si Jane: “Ang ginatudlo sa akon sang mga Saksi halin sa Biblia amo ang nakabulig sa akon nga mabatuan ang mga pagsulay sang akon mga kaedad nga mag-droga kag mag-sex.”

¹³ Pagligad sang pila ka tuig, nabawtismuhan ining duha ka mag-utod. Sang ulihi, nagpayunir sila. Padayon sila nga nagpayunir bisan pa kinahanglan nila atipanon ang ila nagatigulang na nga mga ginikanan. Ari ang ginsiling ni Jane parte sa tanan nga ginhimo ni Jehova para sa ila: “Natun-an ko nga wala gid ginapabay-an ni Jehova ang iya mga abyan, kag matuod gid ang ginasiling sang 2 Timoteo 2:19 nga ‘kilala ni Jehova ang mga ginapanag-iyahan niya.’” Maathag nga wala gid ginapabay-an ni Jehova ang mga nagdesisyon nga higugmaon sia kag alagaron.

14. Paano naton mapangapinan ang ngalan ni Jehova paagi sa aton mga ginahambal kag ginahimo? (Tan-awa man ang mga piktyur.)

¹⁴ Gusto naton nga mabal-an sang iban ang kamatuoran parte kay Jehova. Binagbinaga ini nga sitwasyon: May suod ka nga abyan nga mabuot, maalwan, kag mapinatawaron. Isa ka adlaw, nabatian mo ang isa ka tawo nga nagsiling nga mapintas kuno kag butigon ang imo abyan. Ano ang himuon mo? Indi bala nga pangapinan mo ang imo abyan? Sing kaanggid, kon ginaguba ni Satanas kag sang iban nga tawo ang reputasyon ni Jehova paagi sa pagpalapta sang kabutigan parte sa Iya, ginapangapinan gid naton ang ngalan ni Jehova paagi sa pagsugid sang kamatuoran parte sa Iya. (Sal. 34:1; Isa. 43:10) Paagi sa aton mga ginahambal kag ginahimo, ginapakita naton nga gusto naton alagaron si Jehova sing bug-os kalag.

15. Sang naghimo sang daku nga mga pagbag-o si apostol Pablo sa iya kabuhi, ano ang maayo nga resulta sini sa iya? (Filipos 3:​7, 8)

¹⁵ Handa kita maghimo sang mga pagbag-o sa aton kabuhi para malipay sa aton si Jehova ukon para madugangan pa gid naton ang aton pag-alagad sa iya. Halimbawa, prominente si apostol Pablo sa relihion sang mga Judiyo, pero gintalikdan niya ini para mangin disipulo sia sang Cristo kag maalagad niya si Jehova. (Gal. 1:14) Ano ang resulta? Nangin malipayon sia sa iya pag-alagad kay Jehova kag isa sia sa mga magagahom sa langit upod ang Cristo. Wala gid niya ginhinulsulan ang iya desisyon nga mag-alagad kay Jehova. Indi man naton ini paghinulsulan.​—Basaha ang Filipos 3:​7, 8.

16. Ano ang natun-an naton sa eksperiensia ni Julia? (Tan-awa man ang mga piktyur.)

¹⁶ Kon unahon naton ang pag-alagad kay Jehova, pakamaayuhon niya kita subong kag sa palaabuton. Binagbinaga ang eksperiensia sang isa ka sister nga si Julia. Halin sang bata pa sia, nagakanta sia sa ila simbahan. Maayo sia magkanta, gani ginhanas sia sang isa ka propesyonal nga singer. Sang ulihi, nangin bantog si Julia kag nagkanta sia sa kilala nga mga lugar. Samtang nagaeskwela sia sa isa ka kilala nga eskwelahan sa music, gin-istoryahan sia sang iya classmate parte sa Dios kag ginsugiran sia nga ang ngalan sang Dios amo si Jehova. Wala madugay pagkatapos sini, nag-Bible study si Julia sing duha ka beses kada semana. Sang ulihi, nagdesisyon sia nga unahon ang pag-alagad kay Jehova imbes nga mangin isa ka bantog nga singer. Indi mahapos ang ginhimo niya nga desisyon. Nagsiling sia: “Madamo nga tawo ang nagsiling sa akon nga kanugon lang sang akon talento. Pero, gusto ko nga alagaron si Jehova sing bug-os.” Ano ang ginabatyag niya subong parte sa ginhimo niya nga desisyon sobra 30 ka tuig na ang nagligad? Nagsiling sia, “Nalipay gid ako kay si Jehova ang ginpili ko nga alagaron, kag kabalo ’ko nga ihatag niya sa palaabuton ang tanan ko nga handum.”​—Sal. 145:16.

PADAYON NGA MAG-ALAGAD KAY JEHOVA

17. Bangod malapit na lang gid ang katapusan sini nga sistema, ano ang dapat mabatyagan sang mga nagaalagad sa Dios kag sang mga wala nagaalagad sa iya?

¹⁷ Malapit na lang gid ang katapusan sini nga sistema. Si apostol Pablo nagsulat: “Kay sa ‘malip-ot na lang nga tion,’ kag ‘ang isa nga nagakari magaabot kag indi maatrasar.’” (Heb. 10:37) Ano ang buot silingon sini? Para sa mga wala pa nagaalagad kay Jehova, ginapakita sini nga malip-ot na lang ang tion para magdesisyon sila. (1 Cor. 7:29) Pero para sa aton nga nagaalagad na kay Jehova, ginapakita sini nga “malip-ot na lang ang tion” nga dapat naton batason.

18. Ano ang gusto ni Jesus kag ni Jehova nga himuon naton?

¹⁸ Ginpalig-on ni Jesus ang iya mga disipulo nga magsunod sa iya kag padayon ini nga himuon. (Mat. 16:24) Gani kon tinuig na kita nga nagaalagad kay Jehova, indi gid kita dapat mag-untat. Gusto ni Jehova nga padayon kita nga mag-alagad sa iya. May mga tion nga indi ini mahapos himuon. Pero kon panikasugan naton ini, mangin malipayon gid kita kag makabaton kita sang madamo nga pagpakamaayo bisan subong pa lang.​—Sal. 35:27.

19. Ano ang natun-an naton sa eksperiensia ni Gene?

¹⁹ Para sa iban, madamo sing dapat isakripisyo kon mag-alagad sila kay Jehova. Kon isa ikaw ka pamatan-on, nagabatyag ka bala nga indi ka mangin malipayon kon mag-alagad ka kay Jehova? Ang isa ka pamatan-on nga brother nga si Gene nagsiling: “Pamatyag ko sadto daw kadamo sang indi ko puede himuon bangod Saksi ako. Daw kasadya sang iban nga pamatan-on kay maka-party sila, maka-date, ukon makahampang sang bayolente nga mga video game. Pero ako ’ya ara sa mga miting kag naga-preaching.” Ano ang epekto sini kay Gene? Nagsiling sia: “Nagaalagad ako kay Jehova, pero ginahimo ko man ang malain nga ginahimo sang mga pamatan-on. Daw nasadyahan man ’ko, pero indi ako matuod nga malipayon. Ginpamalandungan ko ang mga pagpakamaayo kon tumanon ko ang ginasiling sang Biblia, kag nagdesisyon ako nga alagaron si Jehova sing bug-os tagipusuon. Sugod sadto, pamatyag ko ginsabat gid ni Jehova ang tanan ko nga pangamuyo.”

20. Ano ang dapat naton himuon?

²⁰ Ang isa ka salmista nag-amba kay Jehova: “Malipayon ang tawo nga ginapili mo kag ginaagda nga magpalapit sa imo agod magpuyo sa imo mga luwang.” (Sal. 65:4) Kabay pa nga ilugon naton ang determinasyon ni Josue sang nagsiling sia: “Ako kag ang akon panimalay magaalagad kay Jehova.”​—Jos. 24:15.