Maayo Gid Kon Suod Kita sa Aton mga Kauturan

1-2. Ano ang isa ka butang nga importante kay Jehova, kag ano ang gusto niya nga himuon naton?

IMPORTANTE gid kay Jehova kon paano naton ginatratar ang iban. Gintudluan pa gani kita ni Jesus nga dapat naton higugmaon ang aton isigkatawo pareho sang aton kaugalingon. (Mat. 22:​37-39) Nalakip sa sini ang pagpakita sing kaayo bisan sa mga wala nagaalagad kay Jehova. Kon himuon naton ini, ginailog naton si Jehova. Ang Biblia nagasiling: “Ginapabutlak niya ang iya adlaw sa mga malauton kag sa mga maayo. Ginahatagan niya sing ulan ang mga matarong kag mga indi matarong.”​—Mat. 5:45.

² Palangga ni Jehova ang tanan nga tawo, pero mas palangga niya ang mga nagatuman sa iya. (Juan 14:21) Gusto niya nga ilugon naton sia. Gani gusto niya nga ‘higugmaon naton sing tudok’ ang aton mga kauturan kag ‘palanggaon’ sila. (1 Ped. 4:8; Roma 12:10) Ini nga gugma kag pagpalangga daw pareho sa ginapakita naton sa aton pamilya ukon suod nga abyan.

3. Ano ang dapat naton dumdumon parte sa gugma?

³ Ang gugma daw pareho sa isa ka tanom nga kinahanglan atipanon para magtubo. Ginalaygayan kita ni apostol Pablo: “Padayon ninyo nga ipakita ang inyo utudnon nga gugma.” (Heb. 13:1) Gusto ni Jehova nga pabakuron naton ang aton gugma sa iban. Binagbinagon sa sini nga artikulo kon ngaa dapat mangin suod pa gid kita sa aton mga kauturan kag kon paano naton ini padayon nga mahimo.

KON NGAA DAPAT MANGIN SUOD PA GID KITA SA ATON MGA KAUTURAN

4. Suno sa Salmo 133:​1, ano ang dapat naton himuon para padayon naton nga mapabaloran ang aton paghiusa? (Tan-awa man ang mga piktyur.)

⁴ Basaha ang Salmo 133:1. Nagaugyon kita sa ginsulat sang salmista nga kon palangga naton ang mga nagapalangga kay Jehova, ‘maayo’ ini kag ‘matahom.’ Pero posible mabalewala naton ang aton paghiusa. Ngaa? Imadyina ang isa ka tawo nga nagalabay pirme sa isa ka dalan nga may daku nga kahoy. Sa ulihi, daw sa wala na lang sa iya kon daw ano ini kadaku. Amo man sina sa aton mga kauturan. Bangod pirme naton sila makita kada semana, posible nga indi na naton sila mapabaloran. Ano ang himuon naton para indi ina matabo? Dapat kita magpain sang tion para pamalandungan kon daw ano ka importante sa aton kag sa kongregasyon ang aton mga kauturan. Kon himuon naton ini, mas palanggaon pa gid naton sila.

5. Kon makita sang iban ang aton gugma sa isa kag isa, ano ang posible nga epekto sini sa ila?

⁵ Sang nagtambong sa aton miting ang pila ka interesado, nagdayaw gid sila sa aton gugma sa isa kag isa. Kag base lang sa sini, posible nga makasiling sila nga kita ang matuod nga relihion. Nagsiling si Jesus: “Paagi sini mahibaluan sang tanan nga mga disipulo ko kamo, kon nagahigugmaanay kamo.” (Juan 13:35) Binagbinaga ang eksperiensia ni Chaithra nga nagaeskwela sa isa ka unibersidad. Nag-Bible study sia sa mga Saksi ni Jehova kag gin-agda sia nga magtambong sa rehiyonal nga kombension. Pagkatapos sang una pa lang nga adlaw, ginsilingan niya ang naga-Bible study sa iya: “Wala gid ako ginahakos sang akon mga ginikanan. Pero sa inyo nga kombension, 52 ka beses ako nga ginhakos sa isa lang ka adlaw. Nabatyagan ko gid ang pagpalangga ni Jehova paagi sa inyo. Gusto ko man mangin bahin sang inyo pamilya.” Naghimo si Chaithra sang mga pagbag-o sa iya kabuhi kag nabawtismuhan sia sang 2024. Gani kon makita sang mga interesado ang aton maayo nga mga buhat, lakip na ang aton gugma sa isa kag isa, mapalig-on sila nga alagaron man si Jehova.​—Mat. 5:16.

6. Ngaa maamligan kita kon suod kita sa aton mga kauturan?

⁶ Maamligan kita kon suod kita sa aton mga kauturan. Ginlaygayan ni Pablo ang iya mga kauturan: “Padayon kamo nga magpalig-unay kada adlaw . . . agod wala sing isa sa inyo nga magtig-a bangod sa madaya nga gahom sang sala.” (Heb. 3:13) Kon grabe ang pagluya sang aton buot kag daw nagapalayo na kita sa matarong nga dalanon, mahimo gamiton ni Jehova ang isa ka utod nga nakatalupangod sang aton problema para buligan kita. (Sal. 73:​2, 17, 23) Indi bala nga maayo gid kon makabaton kita sini nga bulig?

7. Ano ang kaangtanan sang gugma kag sang paghiusa? (Colosas 3:​13, 14)

⁷ Nagapanikasog gid kita nga pakitaan sang gugma ang aton mga kauturan, gani madamo kita sang nabaton nga pagpakamaayo. (1 Juan 4:11) Halimbawa, bangod sa aton gugma, ‘padayon naton nga ginabatas ang isa kag isa.’ Kag bangod ginahimo naton ini, nagabakod ang aton paghiusa. (Basaha ang Colosas 3:​13, 14; Efe. 4:​2-6) Gani nalipay gid kita kon ara kita sa aton mga miting. Wala na sang iban pa nga grupo sang mga tawo ang makatupong sa kalipay nga aton nabatyagan.

PADUNGGAN NATON ANG ISA KAG ISA

8. Paano kita ginabuligan ni Jehova para mahiusa kita sa aton mga kauturan?

⁸ Bisan pa indi kita perpekto, nahiusa kita sa aton mga kauturan sa bilog nga kalibutan. Nangin posible ini bangod sa bulig ni Jehova. (1 Cor. 12:25) Suno sa Biblia, ‘ginatudluan kita sang Dios nga maghigugmaanay.’ (1 Tes. 4:9) Ginapahangop sini nga ginagamit ni Jehova ang Biblia para tudluan kita kon ano ang aton himuon para mangin suod kita sa isa kag isa. Gani ano ang dapat naton himuon para matudluan kita sang Dios? Dapat naton tun-an sing maayo ang iya mga ginatudlo kag iaplikar ini. (Heb. 4:12; Sant. 1:25) Kag amo gid sina ang ginahimo naton bilang mga Saksi ni Jehova.

9. Ano ang matun-an naton sa Roma 12:​9-13 parte sa pagpadungog sa isa kag isa?

⁹ Ano ang ginasiling sang Pulong sang Dios nga himuon naton para mangin suod kita sa isa kag isa? Talupangda ang ginsiling ni Pablo parte sa sini nga mabasa sa Roma 12:​9-13. (Basaha.) Nagsiling sia nga “sa pagpadungog sa isa kag isa, manguna kamo.” Ano ang buot silingon sini? Dapat manguna kita sa pagpakita sing ‘pagpalangga’ sa iban. Halimbawa, mapakita naton ini kon mapinatawaron kita, maabiabihon, kag maalwan. (Efe. 4:32) Indi na naton paghulaton nga ang aton utod amo ang magpanikasog para mangin suod sa aton. Kita dapat ang “manguna” sa paghimo sini. Kon himuon naton ini, mabatyagan gid naton ang ginsiling ni Jesus nga “mas malipayon ang nagahatag sangsa nagabaton.”​—Binu. 20:35.

10. Paano naton mapakita nga mapisan kita “sa pagpadungog sa isa kag isa”? (Tan-awa man ang piktyur.)

¹⁰ Pagkatapos nagsiling si Pablo nga dapat manguna kita sa pagpadungog sa isa kag isa, nagsiling sia dayon nga ‘magmapisan kita kag indi magtinamad.’ Kon mapisan ang isa ka tawo, ginahimo niya dayon ang ginapahimo sa iya. Ginalaygayan kita sang Hulubaton 3:​27, 28: “Indi pag-idingot ang maayo sa mga dapat mo hatagan sini, kon masarangan mo ang pagbulig.” Gani kon may kinahanglan buligan, nagabulig kita dayon. Kag wala kita nagapensar nga may mabulig man guro sa ila.​—1 Juan 3:​17, 18.

11. Ano ang makabulig sa aton para mangin suod kita sa isa kag isa?

¹¹ Paano pa gid naton mapakita ang pagpadungog sa isa kag isa? Paagi sa pagpatawad dayon sa mga nakasakit sa aton. Ang Efeso 4:26 nagasiling: “Indi pagpatunuri sang adlaw nga akig kamo.” Ngaa? Kay kon indi naton ini paghimuon, ang bersikulo 27 nagasiling nga ‘ginahatagan naton sing kahigayunan ang Yawa.’ Paagi sa Biblia, pirme kita ginapalig-on ni Jehova nga magpatawad. Halimbawa, ginalaygayan kita sang Colosas 3:13 nga ‘padayon nga magpinatawaray sing kinabubut-on.’ Kon ginapatawad naton ang iban, isa ini sa pinakamaayo nga paagi para mangin suod kita sa ila. Kon himuon naton ini, ‘nagapakighidait kita sa isa kag isa, kag ginatipigan naton ang paghiusa nga nabaton naton paagi sa balaan nga espiritu.’ (Efe. 4:3) Ginapakita sini nga kon nagapatawad kita, nagabulig kita para indi maguba ang aton paghiusa kag indi madula ang aton paghidait.

12. Paano kita ginabuligan ni Jehova nga magpatawad?

¹² Posible nabudlayan kita magpatawad. Pero mahimo naton ini sa bulig sang espiritu sang Dios. Pagkatapos magsiling ang Biblia nga ‘magpinalanggaanay kita’ kag ‘mangin mapisan,’ nagsiling ini: “Tungod sa balaan nga espiritu magmakugi kamo.” Ginapakita sini nga mabuligan kita sang balaan nga espiritu sang Dios nga mangin makugi sa paghimo sing husto. Nalakip sa sini ang pagpakita sang pagpalangga kag pagpatawad sing kinabubut-on. Gani hanuot kita nga nagapangamuyo kay Jehova nga buligan kita.​—Luc. 11:13.

“INDI KAMO MAGBINAHINBAHIN”

13. Ano ang posible magpabahinbahin sa aton?

¹³ Lainlain ang gindak-an kag kultura sang “tanan nga sahi sang tawo” sa sulod sang kongregasyon. (1 Tim. 2:​3, 4) Gani, posible mabahinbahin kita kay lainlain ang aton desisyon parte sa pamayo, estilo sang buhok, pagpabulong, ukon kalingawan. (Roma 14:4; 1 Cor. 1:10) Pero bangod gintudluan kita sang Dios nga maghigugmaanay, indi naton dapat pag-iinsister nga mas maayo ang aton personal nga mga desisyon sangsa iban.​—Fil. 2:3.

14. Ano ang dapat panikasugan naton pirme nga himuon, kag ngaa?

¹⁴ Kon panikasugan naton pirme nga mangin makapaumpaw kag makapalig-on, makabulig man kita para indi mabahinbahin ang kongregasyon. (1 Tes. 5:11) Sining karon lang, madamo nga indi aktibo ukon ginsikway sa kongregasyon ang nagbalik kay Jehova. Nalipay gid kita nga nagbalik sila. (2 Cor. 2:8) Talupangda ang eksperiensia sang isa ka sister nga nangin indi aktibo sing napulo ka tuig. Amo ini ang ginsiling niya nga natabo sang nagtambong sia liwat sa miting, “Ginkamusta ako sang tanan kag nalipay ako nga makita ang ila mga yuhum.” (Binu. 3:19) Ano ang epekto sini sa iya? Nagsiling sia, “Pamatyag ko daw ginadapit ako ni Jehova para buligan ako nga mangin malipayon liwat.” Kon panikasugan naton nga mangin makapalig-on sa iban, mahimo kita gamiton sang Cristo para paumpawan ang mga “ginabudlayan kag ginabug-atan.”​—Mat. 11:​28, 29.

15. Ano ang isa pa ka paagi para makabulig kita sa aton paghiusa? (Tan-awa man ang piktyur.)

¹⁵ Ang isa pa ka paagi para makabulig kita sa aton paghiusa amo ang paghalong sa aton mga ginahambal. Ang Job 12:11 nagasiling: “Indi bala ginapamatian sang dulunggan ang mga tinaga subong nga ginatilawan sang dila ang pagkaon?” Binagbinaga ang isa ka kusinero nga maayo magluto. Antes niya iserbe ang iya ginluto, ginatilawan niya ini anay para masigurado niya nga manamit ini. Sing kaanggid, dapat anay naton hunahunaon sing maayo ang aton inughambal. (Sal. 141:3) Kay man, gusto naton siguraduhon nga ang aton ihambal makapalig-on, makapaumpaw, kag ‘makahatag sing maayo sa mga nagapamati.’—Efe. 4:29.

16. Sin-o gid ang dapat magpanikasog nga maghambal sing makapalig-on?

¹⁶ Dapat panikasugan gid sang mga bana kag mga ginikanan nga maghambal sing makapalig-on. (Col. 3:​19, 21; Tito 2:4) Dapat makapaumpaw man kag makapalig-on ang mga gulang bilang mga manugbantay sang panong ni Jehova. (Isa. 32:​1, 2; Gal. 6:1) Ang Biblia nagsiling: “Ang tinaga nga ginhambal sa husto nga tion—tuman gid kaayo!”—Hulu. 15:23.

MAGHIGUGMA “PAAGI SA SINSERO NGA BINUHATAN”

17. Ano ang himuon naton para mangin sinsero ang aton gugma sa aton mga kauturan?

¹⁷ Ginapalig-on kita ni apostol Juan nga “maghigugma kita, indi paagi sa hambal ukon sa dila, kundi paagi sa sinsero nga binuhatan.” (1 Juan 3:18) Gani, gusto naton nga tuodtuod gid ang aton gugma sa mga kauturan. Paano naton ini mahimo? Kon pirme naton kaupod ang aton mga kauturan, mangin suod pa gid kita sa ila kag mas palanggaon naton sila. Gani panikasugan naton nga magpakig-upod sa ila sa aton mga miting kag sa pagbantala. Kag bisitahon man naton sila. Kon himuon naton ini, ginapakita naton nga ‘gintudluan kita sang Dios nga maghigugmaanay.’ (1 Tes. 4:9) Kag maeksperiensiahan naton pirme nga “tuman kaayo kag tuman katahom kon ang mag-ulutod magkabuhi nga may paghiusa!”—Sal. 133:1.