Padayon Kami nga Ginatudluan sang Aton Daku nga Instruktor

MAAYO GID NGA HALIMBAWA ANG AKON MGA GINIKANAN

Taga-Italy ang akon mga ginikanan. Pero sang 1957, nagsaylo sila sa Kindersley sa Saskatchewan, Canada. Wala madugay, natun-an nila ang kamatuoran kag nangin pinakaimportante ini sa amon kabuhi. Nadumduman ko sang bata pa ako, pirme gid nagabantala ang amon pamilya. Gani nagalahog ako nga nagasiling, “walo pa lang ’ko ka tuig, auxiliary payunir na ’ko.”

Pigado ang amon pamilya. Pero maayo gid nga halimbawa ang amon mga ginikanan sa pagsakripisyo para kay Jehova. Halimbawa, sang 1963, ginbaligya nila ang madamo nila nga pagkabutang para makatambong sila sa internasyonal nga kombension sa Pasadena, California, U.S.A. Dayon sang 1972, nagsaylo kami sa Trail, British Columbia, Canada nga mga 1,000 ka kilometro ang kalayuon para magbulig sa pagbantala sa mga nagahambal sang Italian. Nag-janitor si Tatay, kag wala niya ginbaton ang ginatanyag sa iya nga mas mataas nga posisyon para makapokus sia sa pag-alagad kay Jehova.

Nagapasalamat gid ako kay nangin maayo nga halimbawa ang amon mga ginikanan sa amon nga apat ka mag-ulutod. Amo ina ang una nga paghanas nga nabaton ko sa pag-alagad kay Jehova. Kag may gintudlo sila sa akon nga indi ko gid malipatan sa bilog ko nga kabuhi: Kon unahon ko ang Ginharian, indi gid ako pagpabay-an ni Jehova.​—Mat. 6:33.

NAGSUGOD AKO SA BUG-OS TION NGA PAG-ALAGAD

Sang 1980, nagpakasal kami ni Debbie. Matahom sia nga sister nga nakapokus gid sa pag-alagad kay Jehova. Gusto gid namon nga mag-alagad sing bug-os tion, gani nagpayunir si Debbie pagligad sang tatlo ka bulan pagkatapos sang amon kasal. Dayon sang mga isa ka tuig na kami nga nag-asawahay, nagsaylo kami sa gamay nga kongregasyon kag updanay na kami nga nagpayunir.

Pagligad sang pila ka tion, naluyahan kami kag gusto na namon maghalin didto. Pero gin-istorya anay namon ini sa circuit overseer. Mapinalanggaon pero prangka niya kami nga ginsilingan: “Kamo man ang nagapabudlay sang inyo sitwasyon. Nagapokus kamo abi sa negatibo nga mga butang. Tinguhai bala ninyo nga magpokus sa positibo.” Amo gid yadto nga laygay ang kinahanglan namon. (Sal. 141:5) Ginsunod dayon namon ang iya laygay, kag madamo gid kami sing nakita nga positibo nga butang sa amon asaynment. May mga utod gali sa amon kongregasyon nga gusto pa dugangan ang ila pag-alagad kay Jehova, lakip na ang mga pamatan-on kag ang mga utod nga may bana ukon asawa nga indi Saksi. Natun-an namon ang importante gid nga leksion nga magpokus sa positibo kag magsalig nga buligan kami ni Jehova nga mabatas ang mabudlay nga mga sitwasyon. (Miq. 7:7) Bilang resulta, nangin malipayon kami liwat sa amon asaynment kag nangin maayo na ang amon sitwasyon.

Nag-eskwela kami sa pinakauna nga tion sa eskwelahan para sa mga payunir. Ang amon mga instruktor nakaalagad sa iban nga pungsod, kag ginpakita nila sa amon ang ila mga piktyur. Ginsugid man nila sa amon ang mga kabudlayan nga ila naeksperiensiahan kag ang mga pagpakamaayo nga ila nabaton. Bangod sini, nangin handum namon nga mag-alagad bilang mga misyonero kag amo na ini ang nangin tulumuron namon.

Para malab-ot namon ini nga tulumuron, nagsaylo kami sa Quebec sang 1984, nga mga 4,000 ka kilometro halin sa British Columbia. Ang mga tawo didto nagahambal sang French. Buot silingon, kinahanglan namon magtuon sang bag-o nga lenguahe kag mag-adjust sa bag-o nga kultura. Ang isa pa namon ka problema amo nga ginakulang kami pirme sa pinansial. May tion nga para makakaon kami, nagapanaghaw kami sang bilin nga mga patatas sa isa ka uma. Maayo lang kay ginapasugtan kami sang tag-iya. Maayo gid kay sarisari nga luto sang patatas ang ginahimo ni Debbie. Bisan mabudlay ang amon sitwasyon, malipayon kami nga nagabatas. Kag nakita gid namon kon paano kami ginbuligan ni Jehova.​—Sal. 64:10.

Isa ka adlaw, may nagtawag sa amon. Gin-agda kami nga mag-alagad sa Bethel sa Canada. Pero bangod naka-aplay na kami nga mag-eskwela sa Gilead, daw nasubuan man kami. Bisan pa sina, ginbaton namon ini nga asaynment. Pag-abot namon sa Bethel, ginpamangkot namon ang isa ka miembro sang Branch Committee nga si Brother Kenneth Little: “Ti, ano ang himuon namon kay naka-aplay na kami nga mag-eskwela sa Gilead?” Siling niya: “Bal-an ta lang ’na galing kon makabaton na kamo sing imbitasyon nga mag-eskwela.”

Pagligad sang isa ka semana, nabaton namon ni Debbie ang imbitasyon nga mag-eskwela sa Gilead. Gani kinahanglan namon magdesisyon. Ginsilingan kami ni Brother Little: “Bisan ano man ang inyo pilion, may mga adlaw gid nga magpensar kamo nga tani lain lang ang inyo ginpili. Pero bisan ano man ang inyo pilion subong, pakamaayuhon gid kamo ni Jehova.” Nagdesisyon kami nga mag-eskwela sa Gilead. Kag sa sulod sang mga tinuig, nakita namon nga insakto gid ang ginsiling ni Brother Little. Ang iya ginsiling amo man ang pirme namon ginahambal sa mga utod nga nabudlayan magdesisyon kon ano nga asaynment ang ila batunon.

ANG AMON KABUHI BILANG MGA MISYONERO

Nalipay gid kami kay nalakip kami sa 24 ka estudyante nga nag-eskwela sa ika-83 nga klase sang Gilead. Ginhiwat ini sa Brooklyn, New York, sang Abril 1987. Sanday Brother Ulysses Glass kag Brother Jack Redford ang panguna namon nga mga instruktor. Daw kadasig lang nagligad sang lima ka bulan, kag naggradweyt kami sang Septiembre 6, 1987. Gin-asayn kami sa Haiti, upod sanday John kag Marie Goode.

Sugod sang 1962, wala na sang mga misyonero halin sa Gilead nga ginpadala sa Haiti kay ginpagua sa sini nga pungsod ang nabilin nga mga misyonero didto. Tatlo ka semana pagkatapos kami naggradweyt, nag-abot kami sa Haiti. Gin-asayn kami sa isa ka gamay nga kongregasyon sa bukid nga may 35 ka manugbantala. Bataon pa kami sadto kag wala pa sing eksperiensia sa pagmisyonero, kag kami lang ni Debbie ang nag-istar sa isa ka missionary home. Pigado gid ang mga tawo didto kag ang kalabanan indi kabalo magbasa. Sadto nga mga tion, may mga kinagamo, kudeta, mga barikada nga nagakalayo, kag mga bagyo.

Madamo kami sing natun-an sa kabakod kag kalipay sang mga kauturan sa Haiti. May mga kabudlayan man ang kalabanan sa ila, pero palangga nila si Jehova kag importante sa ila ang ministeryo. May isa ka tigulang nga sister nga indi kabalo magbasa, pero saulado niya ang mga 150 ka teksto. Kada adlaw, mas determinado kami nga padayon nga ibantala ang mensahe sang Ginharian nga amo lang gid ang solusyon sa problema sang mga tawo. Nalipay gid kami kay ang pila sa una namon nga mga Bible study nangin mga regular payunir, espesyal payunir, kag mga gulang.

Sang sa Haiti pa kami, nakilala ko ang isa ka pamatan-on nga misyonero sang Mormon nga si Trevor. Makapila ka beses kami nga nag-istoryahanay parte sa Biblia. Pagligad sang mga tinuig, nakibot gid ako kay nakabaton ako sang sulat halin sa iya. Nagsiling sia: “Mapabawtismo na ako sa masunod namon nga asembleya. Gusto ko magbalik sa Haiti, kag mag-alagad bilang espesyal payunir sa lugar nga nangin misyonero ako sang Mormon sang una.” Kag amo gid sina ang ginhimo niya upod sa iya asawa.

HALIN SA EUROPE PAKADTO SA AFRICA

Amat-amat na nga ginatugutan ang aton mga hilikuton sa Europe, kag gin-asayn kami nga mag-alagad didto. Sang 1992, nag-abot kami sa Ljubljana, Slovenia. Malapit ini sa lugar nga gindak-an sang akon mga ginikanan antes sila nagsaylo sa Italy. Padayon pa sadto ang inaway sa mga lugar nga bahin sang Yugoslavia. Ang branch sa Vienna, Austria, kag mga opisina sa Zagreb, Croatia, kag Belgrade, Serbia amo pa ang nagadumala sang pagbantala sa sini nga mga lugar. Pero subong, may Bethel na sa sini nga mga lugar.

Buot silingon, kinahanglan naman namon magtuon sang bag-o nga lenguahe kag mag-adjust sa bag-o nga kultura. Ang mga tawo didto nagasiling: “Jezik je težek,” buot silingon “Kabudlay tun-an sang amon lenguahe.” Kag matuod gid ini. Nagdayaw kami sa pagkamainunungon sang mga kauturan. Handa sila nga batunon ang mga pagbag-o sa aton organisasyon kag ginpakamaayo gid sila ni Jehova. Sa liwat, nakita namon nga mahigugmaon gid pirme nga ginatadlong ni Jehova ang mga butang sa husto gid nga tion. Madamo gid kami sing natun-an sa tinuig namon nga pag-alagad sa Slovenia. Kag ang mga natun-an namon sa nagligad namon nga mga asaynment nakabulig sa amon nga makabatas sa amon pag-alagad didto.

Pero madamo pa sing natabo nga mga pabag-o. Sang tuig 2000, gin-asayn kami sa Côte d’Ivoire, sa West Africa. Dayon sang Nobiembre 2002, nagbakwit kami sa Sierra Leone bangod sa inaway. Naglawig ang inaway sing 11 ka tuig. Mabudlay gid ang paghalin dayon sa Côte d’Ivoire. Pero ang mga natun-an namon nakabulig sa amon nga magpabilin nga malipayon.

Nagpokus kami sa madamo nga tawo nga gusto magtuon sang kamatuoran kag sa mga utod nga tinuig nga nagbatas sang inaway. Pigado lang sila pero ginapaambit pa nila sa iban kon ano ang ara sa ila. Ginhatagan sang isa ka sister si Debbie sang mga bayo. Indi pa kuntani ini pagbatunon ni Debbie, pero nagsiling ang sister: “Sang tion sang inaway, ginbuligan kami sang mga utod sa iban nga lugar. Ti subong, amon naman ini tion sa pagbulig.” Gintinguhaan gid namon nga ilugon ang ila halimbawa.

Sang ulihi, nagbalik kami sa Côte d’Ivoire. Pero bangod sa problema sa pulitika, nagkinagamo na naman sa pungsod. Gani sang Nobiembre 2004, ginpasakay kami sa helikopter para makahalin didto. Tag-isa lang ka bag ang amon dala nga tag-10 ka kilo ang unod. Didto kami nagtulog sa salog sang kampo sang mga soldado sang France. Dayon gindala kami sa Switzerland pagkasunod nga adlaw. Tungang gab-i na kami nag-abot sa branch, pero ginhulat gid kami sang mga miembro sang Branch Committee kag sang mga instruktor sa Ministerial Training School pati na sang ila mga asawa. Ginhakos gid nila kami, ginpakaon, kag ginhatagan sing madamo nga tsokolate sang Switzerland. Nabatyagan gid namon ang ila pagpalangga.

Gin-asayn anay nila kami sa Ghana dayon ginbalik kami sa Côte d’Ivoire sang naghaganhagan na ang kinagamo. Ang kaayo sang mga kauturan nakabulig sa amon nga mabatas ang mga kabudlayan sa sini nga mga asaynment. Nagsugtanay kami ni Debbie nga bisan pa normal lang sa katawhan ni Jehova ang pagpalanggaanay, dapat pabaloran gid namon ini pirme. Ang matuod, narealisar namon nga ang mabudlay nga mga sitwasyon bahin sang paghanas sa amon.

GIN-ASAYN KAMI SA MIDDLE EAST

Sang 2006, nakabaton kami sang sulat halin sa world headquarters nga i-asayn kami sa Middle East. Buot silingon, bag-o na naman nga mga kabudlayan, lenguahe, kag kultura. Madamo gid kami sing natun-an sa sini nga lugar nga madamo sing problema bangod sa pulitika kag relihion. Lainlain ang lenguahe sang mga kongregasyon, pero nakita namon ang ila paghiusa bangod ginasunod nila ang instruksion sang organisasyon. Napalig-on gid kami sa mga kauturan kay nabatas nila ang pagpamatok sang ila mga pamilya, schoolmate, upod sa obra, kag mga kaingod.

Sang 2012, nagtambong kami sa espesyal nga kombension sa Tel Aviv, Israel. Ini nga kombension amo ang una nga daku nga pagtilipon sang katawhan ni Jehova sa sini nga lugar halin pa sang Pentecostes 33 C.E. Indi gid namon malipatan ini nga okasyon.

Sadto nga mga tinuig, gin-asayn kami nga magbisita sa pungsod nga ginadumilian ang aton hilikuton. Nagdala kami sang pila naton ka publikasyon, nag-upod kami sa pagbantala, kag nagtambong kami sa gamay nga mga asembleya. May mga checkpoint bisan diin, kag armado nga mga soldado ang nagabantay. Pero wala kami nakulbaan bangod nagahalong kami sa amon pagsaylosaylo kag kaupod namon ang pila ka kauturan.

NAGBALIK KAMI SA AFRICA

Sang 2013, nakabaton kami sang pinasahi nga asaynment. Gin-asayn kami nga mag-alagad sa branch sa Kinshasa, Congo. Daku ini kag matahom nga pungsod. Pero nakaeksperiensia ini sang grabe nga kapigaduhon bangod sang inaway. Nagsiling pa kami sadto, “Nakaagi na kami asayn sa Africa, ti indi na kami mabudlayan mag-istar sa Congo.” Pero madamo pa kami sang dapat matun-an, ilabi na kon nagabiyahe kami sa mga lugar nga wala pa sing mga dalan kag mga taytay. Nagpokus kami sa madamo nga positibo nga butang. Halimbawa, nagpokus kami sa pagbatas kag kalipay sang mga kauturan bisan pa pigado sila, sa ila kapisan sa ministeryo, kag sa ila pagpanikasog nga makatambong sa mga miting kag mga asembleya. Nakita gid namon ang pag-uswag sang hilikuton bangod sa bulig kag pagpakamaayo ni Jehova. Ang amon pag-alagad sing bug-os tion sa Congo sa sulod sang mga tinuig nagtudlo sa amon sang importante nga mga leksion. Nakilala man namon ang amon madamo nga abyan nga ginakabig na namon nga pamilya.

Sa katapusan sang 2017, gin-asayn kami sa South Africa. Amo ini ang pinakadaku nga branch nga naalagaran namon. Dayon gin-asayn kami sa asaynment nga wala gid kami sing eksperiensia. Sa liwat, madamo pa kami sang dapat matun-an. Pero ang amon natun-an sa nagligad namon nga mga asaynment nakabulig gid sa amon. Palangga gid namon ang mga kauturan nga dinekada na nga nagabatas. Kag nagadayaw gid kami sa paghiusa sang pamilya Bethel bisan pa lainlain ang ila rasa kag kultura. Makita gid nga ginahatagan ni Jehova sing paghidait ang iya katawhan samtang ginapanikasugan nila nga isuksok ang bag-o nga personalidad kag ginaaplikar ang mga prinsipio sa Biblia.

Sa sulod sang mga tinuig, nakabaton kami ni Debbie sang lainlain nga mga asaynment, nag-adjust kami sa sarisari nga kultura, kag nagtuon sang bag-o nga mga lenguahe. Indi ini mahapos, pero pirme gid namon mabatyagan ang mainunungon nga gugma ni Jehova paagi sa iya organisasyon kag sa mga kauturan. (Sal. 144:2) Ang paghanas sa amon sa bug-os tion nga pag-alagad nakabulig sa amon nga mangin mas maayo nga mga alagad ni Jehova.

Nagapasalamat gid ako sa pagpadaku sa akon sang akon mga ginikanan, sa suporta sang akon pinalangga nga asawa nga si Debbie, kag sa maayo nga halimbawa sang aton mga kauturan sa bilog nga kalibutan. Samtang ginahulat namon ang masunod nga mga pagbag-o sa amon kabuhi, determinado kami ni Debbie nga padayon nga magpahanas sa aton Daku nga Instruktor.