Ano ang Pinakamaayo nga Reaksion sa Inhustisya?

1-2. Ano ang reaksion sang madamo nga tawo sa inhustisya, kag ano ang posible nga ginapaligban naton?

MADAMO nga tawo subong ang nagaantos bangod sa inhustisya. Ginapintasan sila bangod sa estado sang ila kabuhi, sa ila rasa, hitsura, kag iban pa nga mga rason. Madamo man ang nagaantos bangod sa ginahimo sang nagapamentaha nga mga negosyante kag korap nga mga opisyal. Posible gid nga maapektuhan kita ukon ang aton mga kilala sang sini nga mga inhustisya.

² Gani, wala na kita natingala nga madamo nga tawo subong ang akig sa inhustisya. Kay man, gusto naton nga patas ang pagtratar sa tanan nga tawo kag mangin malinong ang aton kabuhi. May pila gani nga nagatinguha gid nga bag-uhon ang sitwasyon sa ila lugar. Nagaprotesta sila sa gobierno, kag ginasuportahan nila ang mga pulitiko nga nagapromisa nga dulaon nila ang inhustisya. Pero bilang mga Cristiano, gintudluan kita nga ‘indi kita dapat mangin bahin sang kalibutan’ kag hulaton naton ang Ginharian sang Dios nga amo ang magadula sang tanan nga inhustisya. (Juan 17:16) Siempre, nasubuan gihapon kita kon makakita kita sang inhustisya. May mga tion pa gani nga nagabatyag kita sing kaakig. Gani, posible nagapalibog kita: ‘Ano dapat ang akon reaksion sa inhustisya? Ano ang puede ko himuon subong sa nagakatabo nga inhustisya?’ Para masabat ini nga mga pamangkot, binagbinagon naton kon ano ang ginabatyag ni Jehova kag ni Jesus parte sa inhustisya.

GINADUMTAN NI JEHOVA KAG NI JESUS ANG INHUSTISYA

3. Ngaa normal lang nga makabatyag kita sing kaakig sa nagakatabo nga inhustisya? (Isaias 5:7)

³ Ginapaathag sang Biblia kon ngaa nagalalain kita sa nagakatabo nga inhustisya. Nagsiling ini nga gintuga kita ni Jehova suno sa iya larawan, kag “ginahigugma niya ang pagkamatarong kag katarungan.” (Sal. 33:5; Gen. 1:26) Wala gid sing inhustisya sa tanan nga ginahimo ni Jehova, kag gusto niya nga amo man sini ang himuon sang tanan nga tawo. (Deut. 32:3, 4; Miq. 6:8; Zac. 7:9) Halimbawa, sang tion ni manalagna Isaias, nabatian ni Jehova ang “hibi sang kalisod” sang madamo nga Israelinhon bangod sang indi maayo nga pagtratar sa ila sang iban nga mga Israelinhon. (Basaha ang Isaias 5:7.) Ginsilutan sila ni Jehova bangod sulitsulit nila nga ginlapas ang iya Kasuguan kag indi maayo ang pagtratar nila sa iban.​—Isa. 5:5, 13.

4. Base sa isa ka hitabo nga mabasa sa mga Ebanghelyo, ano ang pagtamod ni Jesus sa inhustisya? (Tan-awa man ang piktyur.)

⁴ Pareho kay Jehova, ginahigugma man ni Jesus ang katarungan kag ginadumtan niya ang inhustisya. Isa ka bes sang ari si Jesus sa duta, nakita niya ang isa ka tawo nga naitus ang kamot. Naluoy si Jesus sa tawo, gani gin-ayo niya sia. Pero naakig ang mga lider sang relihion sa ginhimo ni Jesus. Nagsiling sila nga ginlapas kuno ni Jesus ang kasuguan parte sa Adlaw nga Inugpahuway. Mas importante pa ini sa ila sangsa buligan ang nagaantos nga tawo. Ano ang ginbatyag ni Jesus sa ila reaksion? “Nasubuan gid sia sa katig-a sang ila tagipusuon.”​—Mar. 3:1-6.

5. Kon naakig kita bangod sa inhustisya, ano ang dapat naton dumdumon?

⁵ Naakig si Jehova kag si Jesus sa inhustisya, gani indi sala kon makabatyag man kita sing kaakig sa sini. (Efe. 4:26) Pero dapat naton kontrolon ang aton kaakig, kag dumdumon naton nga indi masolbar sang aton kaakig ang inhustisya. Kon indi naton pagdulaon ukon pagkontrolon ang aton kaakig, posible magmasakit kita ukon ma-depress. (Sal. 37:1, 8; Sant. 1:20) Ti, ano ang dapat naton himuon kon makaeksperiensia kita ukon ang iban sang inhustisya? May matun-an kita sa halimbawa ni Jesus.

KON ANO ANG GINHIMO NI JESUS SANG NAKITA NIYA ANG INHUSTISYA

6. Sang ari si Jesus sa duta, ano nga mga inhustisya ang nagakatabo? (Tan-awa man ang piktyur.)

⁶ Sang ari si Jesus sa duta, madamo nga inhustisya ang nakita niya. Nakita niya nga ginapabudlayan sang mga lider sang relihion ang ordinaryo nga mga tawo. (Mat. 23:2-4) Kabalo man sia nga ginapigos sang mga opisyal sang Roma ang mga tawo. Gani madamo nga Judiyo ang gusto mangin hilway sa paggahom sang Roma. Nagpakigbato pa gani sa mga Romano ang pila sa ila, pareho sang mga Zealot. Pero, wala gid nag-entra si Jesus sa bisan ano nga grupo nga nagtinguha nga islan ang nagagahom sa ila. Sang nabal-an ni Jesus nga gusto sang mga tawo nga himuon sia nga hari, nagpalayo sia sa ila.​—Juan 6:15.

7-8. Ngaa wala gindula ni Jesus ang inhustisya sang ari sia sa duta? (Juan 18:36)

⁷ Sang ari si Jesus sa duta, wala sia nag-entra sa pulitika para dulaon ang inhustisya. Ngaa? Kabalo sia nga wala sing kinamatarong ukon ikasarang ang mga tawo nga gamhan ang ila kaugalingon. (Sal. 146:3; Jer. 10:23) Indi man nila masarangan nga dulaon ang panguna nga rason sang inhustisya, nga amo si Satanas kag ang aton indi perpekto nga kahimtangan. Si Satanas nga Yawa ang nagagahom sa kalibutan. Mapintas sia, kag ginaimpluwensiahan niya ang mga tawo nga ilugon sia. (Juan 8:44; Efe. 2:2) Kag bangod indi perpekto ang mga tawo, may mga tion gid nga indi patas sa tanan ang ila ginahimo. Bangod sini, indi masolbar bisan sang maayo nga mga tawo ang mga problema sang kalibutan.​—Man. 7:20.

⁸ Kabalo si Jesus nga ang Ginharian sang Dios lang gid ang makadula sang panguna nga rason sang inhustisya. Gani, gingamit gid niya ang iya tion kag kusog sa ‘pagbantala sing maayong balita sang Ginharian sang Dios.’ (Luc. 8:1) Ginpasalig niya “ang mga ginagutom kag ginauhaw sa pagkamatarong” nga maabot gid ang tion nga wala na sang korapsion kag inhustisya. (Mat. 5:6; Luc. 18:7, 8) Pero indi gobierno sang tawo ang makahimo sini nga pagbag-o. Ang Ginharian sang Dios lang gid sa langit nga “indi bahin sini nga kalibutan” ang makahimo sini.​—Basaha ang Juan 18:36.

ILUGA SI JESUS KON MAY MAKITA KA NGA INHUSTISYA

9. Ngaa kumbinsido ka nga ang Ginharian sang Dios lang gid ang makadula sang inhustisya?

⁹ Subong, mas madamo nga inhustisya ang nagakatabo sangsa tion nga ara si Jesus sa duta. Pero pareho sa tion ni Jesus, si Satanas kag ang malain nga mga tawo nga naimpluwensiahan niya amo gihapon ang rason sang inhustisya. (2 Tim. 3:1-5, 13; Bug. 12:12) Pareho kay Jesus, kabalo kita nga ang Ginharian sang Dios lang gid ang makadula sang panguna nga rason sang inhustisya. Bangod ginasuportahan naton ang Ginharian, wala kita nagaentra sa mga protesta. Kabalo man kita nga indi madula sang mga gobierno ang inhustisya. Binagbinaga ang eksperiensia sang isa ka sister nga si Stacy.a Antes sia nangin Saksi, pirme sia nagaentra sa mga protesta kontra sa inhustisya. Pero sang ulihi, indi na sia sigurado kon bala makabulig gid man sa mga tawo ang ila mga ginahimo. Nagsiling sia: “Kon ara ako sadto sa mga protesta, may mga tion nga ginahunahuna ko kon bala husto gid man ang akon ginapakigbato. Pero subong, ang Ginharian sang Dios na ang akon ginasuportahan kag sigurado ako nga husto ang akon ginadampigan. Kabalo ako nga pangapinan ni Jehova ang tanan nga biktima sang inhustisya, kag wala ako sing ikasarang nga himuon ini.”​—Sal. 72:1, 4.

10. Base sa gintudlo ni Jesus sa Mateo 5:43-48, ngaa masiling naton nga lain gid ang ginahimo sang mga nagaprotesta? (Tan-awa man ang piktyur.)

¹⁰ Madamo nga tawo subong ang nagaentra sa mga grupo nga gusto bag-uhon ang gobierno. Pero, madamo sa ila ang grabe kon mangakig, ginalapas nila ang mga kasuguan, kag ginahalitan nila ang iban. Lain gid ini sa gintudlo ni Jesus sa aton. (Efe. 4:31) Ang isa ka brother nga si Jeffrey nagsiling: “Sa umpisa, daw wala man nagapanggamo ang mga nagaprotesta. Pero kabalo ako nga gulpi lang nagabag-o ang sitwasyon. Ginaguba nila kag ginakawat ang mga pagkabutang sang iban, kag nagapanakit pa gani sila.” Pero, ginatudluan kita ni Jesus nga dapat naton palanggaon ang tanan nga tawo, bisan pa ang mga wala nagaugyon sa aton ukon ang mga nagahingabot sa aton. (Basaha ang Mateo 5:43-48.) Bilang mga Cristiano, ginapanikasugan gid naton nga tumanon kag ilugon si Jesus.

11. Ngaa posible mabudlayan kita kon kaisa nga ilugon si Jesus?

¹¹ Kabalo kita nga dulaon sang Ginharian sang Dios ang inhustisya. Pero kon makaeksperiensia kita sang inhustisya, posible nga mabudlayan kita nga ilugon si Jesus. Binagbinaga ang isa ka sister nga si Janiya nga nakaeksperiensia sang diskriminasyon bangod sa iya rasa. Nagsiling sia: “Nasakitan gid ako sa ginasiling sang mga tawo parte sa akon. Naakig man ako kag gusto ko nga silutan sila. Dayon napamensaran ko nga suportahan ang grupo nga nagaprotesta kontra sa diskriminasyon. Nahunahuna ko nga kon himuon ko ini, mapautwas ko ang akon kaakig.” Pero sang ulihi, narealisar ni Janiya nga dapat niya bag-uhon ang iya panghunahuna. Nagsiling sia: “Narealisar ko nga imbes nga magsalig kay Jehova, ginatugutan ko ang iban nga impluwensiahan ang akon panghunahuna kag magsalig sa mga tawo. Gani, nagdesisyon ako nga untatan ang pagpakig-upod sa sini nga grupo.” Ano ang himuon naton kon maakig kita bangod sa inhustisya nga ginhimo sa aton ukon sa iban? Dapat naton kontrolon ang aton kaakig para makapabilin kita nga neutral sa mga isyu sa sini nga kalibutan.​—Juan 15:19.

12. Ngaa dapat naton pilion sing maayo kon ano ang aton ginabasa, ginapamatian, kag ginatan-aw?

¹² Ano ang makabulig para makontrol naton ang aton kaakig sa nagakatabo nga inhustisya? Dapat naton pilion sing maayo kon ano ang aton ginabasa, ginapamatian, kag ginatan-aw. Ginapasobrahan sang iban ang pila ka istorya sa social media para mangin interesado ang mga tawo sa inhustisya kag para maakig sila sa gobierno. Sa masami, may ginadampigan ang balita sang mga reporter. Ibutang ta nga husto man ang nabatian naton ukon natan-aw nga balita parte sa inhustisya. Pero, masolbar bala naton ini kon sundan gid naton ini nga balita? Kon pirme kita nagabasa ukon nagatan-aw sang amo sini nga klase sang mga balita, magalalain lang kita ukon masubuan. (Hulu. 24:10) Posible nga malipatan pa gani naton nga ang Ginharian sang Dios lang gid ang makadula sang inhustisya.

13. Paano makabulig ang pagbasa sang Biblia adlaw-adlaw para mangin husto ang aton pagtamod sa nagakatabo nga inhustisya?

¹³ Para mangin husto ang aton pagtamod sa nagakatabo nga inhustisya, dapat naton basahon ang Biblia adlaw-adlaw kag pamalandungan ini. Binagbinaga ang isa ka sister nga si Alia. Nagalalain gid sia kon may inhustisya nga nagakatabo sa ila lugar. Naakig sia kay daw wala ginasilutan ang mga nagahimo sang malain. Nagsiling sia: “Ginpamangkot ko ang akon kaugalingon kon bala nagapati gid ako nga solbaron ni Jehova ini nga mga problema. Sadto nga tion, ginbasa ko ang Job 34:22-29. Ginpahanumdom sini sa akon nga makita ni Jehova ang tanan. Sia lang ang makahukom sing patas, kag sia lang ang makasolbar sang tanan nga problema.” Pero samtang ginahulat naton ang tion nga dulaon na sang Ginharian sang Dios ang inhustisya, ano ang puede naton himuon subong?

ANG PUEDE NATON HIMUON SUBONG SA NAGAKATABO NGA INHUSTISYA

14. Ano ang puede naton himuon para indi kita makahimo sang inhustisya? (Colosas 3:10, 11)

¹⁴ Wala kita sang kontrol kon maghimo ang iban sang indi maayo, pero makontrol naton ang aton ginahimo. Suno sa nabinagbinag naton, ginailog naton si Jesus kon nagapakita kita sang gugma. Gani ginapanikasugan gid naton nga respetuhon ang tanan, bisan ang mga nagahingabot sa aton. (Mat. 7:12; Roma 12:17) Nalipay gid si Jehova kon ginapakitaan naton sang kaayo ang tanan kag patas ang pagtrato naton sa ila.​—Basaha ang Colosas 3:10, 11.

15. Paano naton ginabuligan ang mga tawo paagi sa pagsugid sa ila sang mga kamatuoran sa Biblia?

¹⁵ Ang pinakamaayo nga mahimo naton subong amo ang pagsugid sa iban sang mga kamatuoran sa Biblia. Ngaa masiling naton ina? Bangod mapabag-o sang “ihibalo tuhoy kay Jehova” ang isa ka mapintas nga tawo nga mangin mabuot kag mapinalanggaon. (Isa. 11:6, 7, 9) Binagbinaga ang isa ka brother nga si Jemal. Antes sia nangin Saksi, nag-entra sia sa grupo sang mga rebelde nga gusto bag-uhon ang gobierno sa ila pungsod. Para sa iya, indi maayo ang paggahom sang ila gobierno. Nagsiling sia: “Indi mo mapabag-o ang mga tawo paagi sa pagpakig-away sa ila. Pero kon matun-an nila ang kamatuoran sa Biblia, mapabag-o sila sini. Amo ini ang nagpabag-o sa akon.” Bangod sa mga natun-an ni Jemal, nag-untat sia sa pagpakig-away. Gani kon ginatudluan naton ang mga tawo sang mga kamatuoran sa Biblia, ginabuligan naton sila nga untatan ang paghimo sing malain sa iban.

16. Ngaa gusto mo gid isugid sa iban ang parte sa himuon sang Ginharian sang Dios?

¹⁶ Pareho kay Jesus, gusto gid naton isugid sa mga tawo nga ang Ginharian sang Dios lang gid ang makadula sang inhustisya. Ina nga paglaum makapaumpaw gid sa mga biktima sang inhustisya. (Jer. 29:11) Si Stacy, nga ginsambit kaina, nagsiling: “Bangod natun-an ko nga dulaon ni Jehova ang inhustisya, kalmado lang ako kon makaeksperiensia ako ukon ang iban sang inhustisya. Ginapaumpawan kita ni Jehova paagi sa Biblia.” Gani dapat mangin handa kita pirme nga isugid sa iban ang makapaumpaw nga mensahe sang Biblia nga dulaon sa ulihi ang inhustisya. Kon tun-an naton sing maayo ang ginasiling sang Biblia parte sa topiko nga ginbinagbinag sa sini nga artikulo, mas mangin kumbinsido pa gid kita sa sini. Gani ara man kita sa eskwelahan ukon sa ulubrahan, mas mangin handa kita nga isugid ini sa iban.b

17. Paano kita ginabuligan ni Jehova subong kon makaeksperiensia kita sang inhustisya?

¹⁷ Kabalo kita nga indi madula ang inhustisya samtang si Satanas pa “ang manuggahom sini nga kalibutan.” Pero samtang ginahulat naton ang tion nga “tabugon” sia, nagpromisa si Jehova nga buligan niya kita kag ginhatagan niya kita sang paglaum. (Juan 12:31) Paagi sa Biblia, ginasugiran kita ni Jehova kon ngaa madamo sang inhustisya kag kon ano ang iya ginabatyag sa mga biktima sini. (Sal. 34:17-19) Paagi sa iya Anak, ginatudluan kita ni Jehova kon ano dapat ang aton reaksion sa inhustisya kag kon paano dulaon sang iya Ginharian ang inhustisya. (2 Ped. 3:13) Kabay nga padayon kita nga mangin mapisan sa pagbantala sang maayong balita sang Ginharian samtang ginahulat naton ang tion nga may ara na sing “katarungan kag pagkamatarong” sa bilog nga duta.​—Isa. 9:7.