Tahura ang Iban

1. Ngaa gusto sang mga tawo nga ginatahod sila? (Hulubaton 22:1)

GUSTO mo bala nga ginatahod ka sang iban? Sigurado gid nga gusto mo ini. Kay man, bilang mga tawo, kinahanglan naton mabatyagan nga ginatahod kita ukon ginarespeto. Kag nalipay kita kon ginatahod kita sang iban. Amo kon ngaa ang Biblia nagasiling nga “ang pagtahod mas maayo sangsa pilak kag bulawan.”​—Basaha ang Hulubaton 22:1.

2-3. Ngaa kon kaisa indi mahapos ipakita ang pagtahod sa iban, kag ano ang binagbinagon naton sa sini nga artikulo?

² Kon kaisa, indi mahapos ipakita ang pagtahod sa iban. Ang isa ka rason amo nga makita naton dayon ang diperensia sang iban nga tawo. Dugang pa, madamo nga tawo subong ang wala sing pagtahod sa iban. Pero, dapat lain kita sa ila. Ngaa? Bangod gusto ni Jehova nga padunggan naton, ukon tahuron, “ang tanan nga sahi sang tawo.”​—1 Ped. 2:17.

³ Binagbinagon naton sa sini nga artikulo kon ano ang buot silingon sang pagtahod sa iban kag kon paano naton ini ipakita sa (1) mga miembro sang aton pamilya, (2) mga kauturan, kag (3) mga indi Saksi. Tun-an naton kon paano naton ipakita ang pagtahod bisan pa sa mga tion nga mabudlay ini himuon.

ANO ANG BUOT SILINGON SANG PAGTAHOD SA IBAN?

4. Ano ang buot silingon sang pagtahod sa iban?

⁴ Para sa imo, ano ang buot silingon sang pagtahod? Sa pila ka lenguahe, halos pareho ang buot silingon sang mga tinaga nga “pagtahod” kag “pagpadungog.” Paano? Ang “pagtahod” nagapatuhoy sa kon paano naton ginatamod ang isa ka tawo. Kon ginatahod naton ang iban, ginatamod naton sila nga nagakadapat sila hatagan sang aton atension bangod sa ila mga kinaiya, hinimuan, ukon awtoridad. Ang “pagpadungog” naman nagapatuhoy sa kon paano naton ginatratar ang isa ka tawo. Kon ginapadunggan naton ang iban, ginatratar naton sila sa paagi nga mabatyagan nila nga ginapabaloran sila kag ginaapresyar. Siempre, para mangin tuodtuod gid ang aton pagpadungog sa iban, dapat halin gid ini sa aton tagipusuon.​—Mat. 15:8.

5. Ano ang makabulig para mapakita naton ang pagtahod sa iban?

⁵ Gusto ni Jehova nga pakitaan naton sang pagtahod ang iban. Halimbawa, ginasugo niya kita nga tahuron ang “mas mataas nga mga awtoridad.” (Roma 13:1, 7) Pero mahimo magsiling ang iban, “Wala gid sing problema sa akon nga tahuron ang isa ka tawo basta nagakabagay sia nga tahuron.” Husto bala ini nga panghunahuna? Indi. Kabalo kita nga dapat naton tahuron ang iban, kag wala ini nagadepende sa ila ginahimo. Sa baylo, ginatahod naton ang iban bangod palangga naton si Jehova kag gusto naton nga malipay sia.​—Jos. 4:14; 1 Ped. 3:15.

6. Posible gid bala nga tahuron mo ang isa ka tawo nga wala nagatahod sa imo? Ipaathag. (Tan-awa man ang piktyur.)

⁶ Mahimo magsiling ang iban, ‘Posible gid bala nga tahuron ko ang isa ka tawo nga wala nagatahod sa akon?’ Huo. Binagbinaga ang pila ka halimbawa. Sa bahin ni Jonatan, ginpakahuy-an sia sang iya amay nga si Hari Saul sa atubangan sang iban. (1 Sam. 20:30-34) Pero, gintahod gihapon ni Jonatan ang iya amay kag gin-updan niya sia sa mga inaway asta sa tion nga napatay ang iya amay. (Ex. 20:12; 2 Sam. 1:23) Sa bahin ni Hana, nasal-an sia sang mataas nga saserdote nga si Eli nga nagapahubog. (1 Sam. 1:12-14) Pero, matinahuron gihapon ang pagsabat ni Hana kay Eli. Ginhimo niya ini bisan pa kabalo sia kag ang bilog nga Israel nga wala ginsaway ni Eli ang iya malain nga mga anak, nga katungdanan niya kuntani bilang isa ka amay kag mataas nga saserdote. (1 Sam. 1:15-18; 2:22-24) Kag sa bahin naman ni Pablo, gin-insulto sia sang mga taga-Atenas kag gintawag sia nga “babaan.” (Binu. 17:18) Pero, matinahuron gihapon ang pag-istorya niya sa ila. (Binu. 17:22) Ginapakita sini nga mga halimbawa nga mapalig-on kita nga tahuron ang iban kon palangga gid naton si Jehova kag indi naton gusto nga masubuan sia. Mapalig-on man kita sini nga tahuron ang iban bisan pa sa mga tion nga mabudlay ini himuon. Binagbinagon naman naton kon sin-o ang dapat naton tahuron kag ngaa.

TAHURON NATON ANG MGA MIEMBRO SANG ATON PAMILYA

7. Ngaa mabudlay kon kaisa ipakita ang pagtahod sa mga miembro sang aton pamilya?

⁷ Kon ngaa mabudlay ini himuon. Pirme naton kaupod ang aton pamilya. Gani, kabalo kita sang ila mga ikasarang kag diperensia. Posible may balatian ukon may depresyon ang pila sa ila, kag nabudlayan kita sa pag-atipan sa ila. Posible man nga may nahambal ukon nahimo ang pila sa aton pamilya nga nakasakit sa aton. Kag imbes nga magbuligay para mangin malinong ang pamilya, may pila nga wala nagapakita sang pagtahod sa isa kag isa nga nagaresulta sa kagamo. Binagbinaga ini nga ilustrasyon: Kon may artraytis ang isa ka tawo, apektado ang bilog niya nga lawas kag nabudlayan sia maghulag. Sing kaanggid, kon wala nagapakita sang pagtahod ang mga miembro sang pamilya, mabudlayan sila nga maghiusa. Pero indi pareho sa artraytis nga indi naton masarangan bulngon kon kita lang, puede naton tun-an kon paano ipakita ang pagtahod sa mga miembro sang aton pamilya.

8. Ngaa importante nga tahuron naton ang mga miembro sang aton pamilya? (1 Timoteo 5:4, 8)

⁸ Ngaa dapat kita magpakita sang pagtahod? (Basaha ang 1 Timoteo 5:4, 8.) Sa una nga sulat ni Pablo kay Timoteo, ginbinagbinag niya kon paano dapat atipanon sang mga miembro sang pamilya ang isa kag isa. Ginpaathag niya nga dapat naton padunggan ang mga miembro sang aton pamilya, indi bangod obligasyon naton ini, kundi bangod sa aton “diosnon nga debosyon.” Ini nga ekspresyon nagapatuhoy sa aton mainunungon nga pagsimba kag pag-alagad sa Dios. Si Jehova ang naghimo sang pamilya. (Efe. 3:14, 15) Gani kon ginapadunggan naton ang mga miembro sang aton pamilya, si Jehova ang aton ginapadunggan. Importante gid ini nga rason para tahuron naton ang mga miembro sang aton pamilya.

9. Paano mapakita sang bana kag asawa nga ginatahod nila ang isa kag isa? (Tan-awa man ang mga piktyur.)

⁹ Kon paano naton mapakita ang pagtahod. Kon ginapadunggan sang isa ka bana ang iya asawa, ginapakita niya sa iya asawa nga hamili sia sa iya. Ginahimo niya ini kon sila lang nga duha kag kon may iban nga tawo. (Hulu. 31:28; 1 Ped. 3:7) Wala niya sia ginasakit, ginapakahuy-an, ukon ginapabatyag nga wala sia sing pulos. Si Ariela nga taga-Argentina nagsiling: “Bangod sa balatian sang akon asawa, may mahambal sia kon kaisa nga makasakit sa akon. Pero ginapamensar ko dayon nga lain ang iya ginabatyag sangsa iya ginahambal. Kag ginadumdom ko ang 1 Corinto 13:5. Nagabulig ini sa akon nga istoryahon sia sa matinahuron nga paagi imbes nga akigan sia.” (Hulu. 19:11) Sa bahin naman sang asawa, ginapadunggan niya ang iya bana kon ang maayo nga mga kinaiya sang iya bana ang ginaistorya niya sa iban. (Efe. 5:33) Wala niya sia ginapakalain, ginapakahuy-an, kag ginainsulto. Kabalo sia nga kon himuon niya ini, maguba gid ang ila pag-asawahay pareho sa tuktok nga nagaut-ot sa salsalon. (Hulu. 14:1) Binagbinaga ang isa ka sister nga taga-Italy. Pirme lang nagakabalaka sing sobra ang iya bana. Nagsiling sia: “Kon kaisa, pamatyag ko daw wala na sa lugar ang kabalaka sang akon bana. Sang una, bal-anon sa akon ginahambal kag hitsura nga wala ko sia ginatahod. Pero narealisar ko nga kon pirme ako nagapakig-upod sa mga tawo nga wala nagapakalain sa iban, mas ginapanikasugan ko man nga tahuron ang akon bana.”

10. Paano mapakita sang mga kabataan nga ginatahod nila ang ila mga ginikanan?

¹⁰ Mga kabataan, tumana ang mga kasuguan nga ginapatuman sang inyo mga ginikanan. (Efe. 6:1-3) Mangin matinahuron kon ginaistorya ninyo sila. (Ex. 21:17) Samtang nagaedad sila, mahimo nga kinahanglan ninyo sila buligan. Gani, atipana sila sing maayo. Binagbinaga ang halimbawa ni María. Sang nagbalatian ang iya amay nga indi Saksi, pirme lang sia ginahambalan sing masakit sang iya amay. Gani nabudlayan si María nga atipanon sia. Nagsiling si María: “Nangamuyo ako kay Jehova nga buligan niya ako nga mapakita ko sa akon amay nga ginatahod ko sia. Si Jehova ang nagasugo sa akon nga padunggan ko ang akon mga ginikanan, gani kumbinsido ako nga buligan gid niya ako nga mahimo ini. Sang ulihi, narealisar ko nga dapat ko tahuron ang akon amay bisan pa indi sia magbag-o.” Kon ginapadunggan naton ang mga miembro sang aton pamilya bisan pa sa mga tion nga mabudlay ini himuon, ginapakita naton nga ginatahod naton si Jehova nga naghimo sang pamilya.

TAHURON NATON ANG ATON MGA KAUTURAN

11. Ngaa mabudlay kon kaisa ipakita ang pagtahod sa aton mga kauturan?

¹¹ Kon ngaa mabudlay ini himuon. Ginapanikasugan gid sang aton mga kauturan nga iaplikar ang mga ginatudlo sang Biblia. Pero kon kaisa, may mahimo sila ukon mahambal sa aton nga indi maayo, malain ang ila ginahunahuna parte sa aton, ukon maugot kita sa ila. Kon may ginhimo sa aton ang isa ka utod kag ‘may rason kita nga magreklamo,’ mabudlayan kita nga tahuron sia. (Col. 3:13) Ano ang himuon naton para padayon naton sia nga tahuron?

12. Ngaa importante nga tahuron naton ang aton mga kauturan? (2 Pedro 2:9-12)

¹² Ngaa dapat kita magpakita sang pagtahod? (Basaha ang 2 Pedro 2:9-12.) Sa ikaduha nga sulat ni Pedro, nagsiling sia nga may pila sa kongregasyon sang unang siglo nga nagapakalain sa “mga mahimayaon,” ukon sa mga gulang. Ano ang reaksion sang mga anghel sa sini? “Tungod sa ila pagtahod kay Jehova,” wala gid sila sing may ginhambal nga malain sa sini nga mga tawo. Hunahunaa ini: Perpekto ang mga anghel, pero wala gid nila ginpakalain ining bugalon nga mga tawo. Sa baylo, gintugyan nila kay Jehova ang paghukom kag pagsaway sa ila. (Roma 14:10-12; ipaanggid ang Judas 9.) May matun-an kita sa mga anghel. Kon dapat naton tahuron ang mga nagapamatok sa aton, indi bala nga mas dapat naton tahuron ang aton mga kauturan? Dapat pa gani kita “manguna” sa pagpadungog sa ila. (Roma 12:10) Kon himuon naton ini, ginapakita naton nga ginatahod naton si Jehova.

13-14. Paano naton mapakita ang pagtahod sa aton mga kauturan? Maghatag sing halimbawa. (Tan-awa man ang mga piktyur.)

¹³ Kon paano naton mapakita ang pagtahod. Mga gulang, panikasugi gid ninyo nga tudluan ang iban sa mahigugmaon nga paagi. (Filem. 8, 9) Kon kinahanglan ninyo laygayan ang isa ka utod, himua ini sa mainayuhon nga paagi kag indi sa tion nga nagaugtas kamo. Mga sister, daku ang inyo mabulig para mapakita sang mga kauturan ang pagtahod sa isa kag isa. Mahimo ninyo ini kon indi ninyo pag-ikutsokutso ukon paghimuhimuan istorya ang iban. (Tito 2:3-5) Mapakita naton nga ginatahod naton ang mga gulang paagi sa pagtuman sa ila kag pagpasalamat sa ila. Pasalamatan naton sila sa ila pagpanikasog nga dumalahan ang mga miting, pangunahan ang pagbantala, kag buligan ang mga nakahimo sang “sayop nga tikang.”​—Gal. 6:1; 1 Tim. 5:17.

¹⁴ Binagbinaga ang isa ka sister nga si Rocío. Nabudlayan sia nga tahuron ang isa ka gulang nga naglaygay sa iya. Nagsiling sia: “Nasakitan ako kay daw ginpatam-an gid niya ako sa iya laygay. Sa amon balay, indi maayo ang mga ginasiling ko parte sa iya. Ginduhaduhaan ko ang iya motibo kag ginbalewala ko ang iya laygay, pero wala ko lang ini ginapakita.” Ano ang nakabulig kay Rocío? Nagsiling sia: “Sa akon iskedyul sa pagbasa sang Biblia, nabasa ko ang 1 Tesalonica 5:12, 13. Sang narealisar ko nga wala ko na gali ginatahod ang amon gulang, ginkonsiensia ako. Gani nangamuyo ako kay Jehova kag nag-research ako sa aton mga publikasyon. Nangita ako sang mga impormasyon nga makabulig sa akon nga bag-uhon ang akon panimuot. Nakabulig ini sa akon nga marealisar nga indi ang amon gulang ang problema, kundi ang akon bugal. Naintiendihan ko na subong nga dapat ako mangin mapainubuson para mapakita ko ang pagtahod sa iban. May mga kinahanglan pa ako pauswagon. Pero kabalo ako nga nalipay si Jehova kon ginapanikasugan ko nga tahuron ang iban.”

TAHURON NATON ANG MGA INDI SAKSI

15. Ngaa mabudlay kon kaisa ipakita ang pagtahod sa mga indi Saksi?

¹⁵ Kon ngaa mabudlay ini himuon. Sa aton pagbantala, may maistorya kita nga mga tawo nga indi gid interesado sa Dios ukon sa Biblia. (Efe. 4:18) May iban gani nga indi gid mamati sa aton bangod amo ina ang gintudlo sa ila halin sang bata pa sila. Kon nagaobra kita ukon nagaeskwela, posible nga wala kita ginaapresyar sang aton boss ukon sang aton mga maestro kag maestra. Posible nga may mga upod kita sa ulubrahan ukon mga schoolmate nga mabudlay pakigbagayan. Kon amo sini ang aton sitwasyon, posible madula ang aton pagtahod sa ila kag indi na naton sila pagpakitaan sang kaayo.

16. Ngaa importante nga tahuron naton ang mga wala pa nagaalagad kay Jehova? (1 Pedro 2:12; 3:15)

¹⁶ Ngaa dapat kita magpakita sang pagtahod? Tandaan naton nga ginatan-aw kita ni Jehova kon paano naton ginatratar ang mga wala pa nagaalagad sa iya. Ginpahanumdom ni apostol Pedro ang mga Cristiano nga kon makita sang iban ang ila maayo nga paggawi, posible nga “himayaon nila ang Dios.” Gani, ginlaygayan niya sila nga ipaathag ang ila mga ginapatihan nga “may kalulo kag tudok nga pagtahod.” (Basaha ang 1 Pedro 2:12; 3:15.) Ara man sila sa korte ukon nagaistorya sila sa iban para pangapinan ang ila pagtuo, dapat tahuron sang mga Cristiano ang mga indi alagad ni Jehova. Kay man, ginatan-aw kita ni Jehova kag ginapamatian niya kon ano ang aton mga ginahambal kag kon paano naton ini ginahambal. Isa gid ini ka importante nga rason para tahuron naton ang mga indi Saksi.

17. Paano naton mapakita ang pagtahod sa mga indi Saksi?

¹⁷ Kon paano naton mapakita ang pagtahod. Kon nagabantala kita, wala naton ginapabatyag sa iban nga mas maalam kita sangsa ila kay madamo kita sing nabal-an sa Biblia. Sa baylo, ginadumdom naton nga importante sila sa Dios kag mas labaw sila sangsa aton. (Hag. 2:7; Fil. 2:3) Gani kon insultuhon ka sang isa ka tawo bangod sa imo mga ginapatihan, indi magbalos. Likawan mo nga maghambal sang bisan ano nga makasakit sang iya balatyagon bisan pa lahog lang ini. (1 Ped. 2:23) Kon may nahambal ka nga indi maayo, mangayo dayon sing pasaylo. Paano mo naman mapakita ang pagtahod sa mga upod mo sa ulubrahan? Mangin mapisan sa imo obra, kag panikasugi nga makita ang ila maayo nga mga kinaiya. (Tito 2:9, 10) Kon honest ka kag mapisan sa imo obra, posible nga malipay sa imo ang mga upod mo sa ulubrahan ukon posible man nga indi. Pero, sigurado gid nga malipay sa imo ang Dios.​—Col. 3:22, 23.

18. Ngaa importante gid nga tahuron naton ang iban?

¹⁸ Madamo gid kita sang rason nga tahuron ang iban. Natun-an naton nga kon ginatahod naton ang mga miembro sang aton pamilya, ginapadunggan naton ang Ulo sang aton pamilya nga si Jehova. Kon ginatahod naton ang aton mga kauturan, ginapadunggan naton ang aton Amay sa langit. Kag kon ginatahod naton ang mga indi Saksi, ginahatagan naton sila sang tsansa nga himayaon, ukon padunggan, ang aton Dios. Bisan pa wala kita ginatahod sang iban, importante gid nga tahuron naton sila. Ngaa? Bangod pakamaayuhon kita ni Jehova. Nagpromisa sia: “Padunggan ko ang mga nagapadungog sa akon.”​—1 Sam. 2:30.