1925​—Sang Nagligad nga Isa ka Gatos ka Tuig

WALA MATABO ANG ILA GINAPAABOT

Sang 1925, madamo nga Estudyante sang Biblia ang nagpaabot nga mangin Paraiso na liwat ang duta. Ngaa? Si Brother Albert Schroeder, nga nangin miembro sang ulihi sang Nagadumala nga Hubon, nagsiling: “Abi namon sadto, mapalangit na sang 1925 ang mga hinaplas nga ari pa sa duta. Kag abi namon banhawon na ang mga matutom sang una, pareho nanday Abraham kag David, bilang mga prinsipe. Dayon buslan nila ang gobierno sa duta bilang bahin sang ginharian sang Dios.” Bangod wala matabo ang ila ginapaabot, nasubuan ang pila ka kauturan.​—Hulu. 13:12.

Bisan pa nasubuan sila, nangin masako gihapon sa pagbantala ang kalabanan nga mga Estudyante sang Biblia. Narealisar nila nga amo ini ang ila pinakaimportante nga responsibilidad bilang mga Saksi ni Jehova. Hibaluon naton kon paano nila gingamit ang radyo para mabantalaan ang madamo nga tawo.

GINDUGANGAN SANG MGA SAKSI ANG ILA ESTASYON SANG RADYO

Sang 1924, madamo nga tawo ang nagpamati sa WBBR nga estasyon sang radyo. Gani sang 1925, naghimo ang mga Estudyante sang Biblia sang isa pa ka estasyon malapit sa Chicago, Illinois. Ang ngalan sining bag-o nga estasyon amo ang WORD. Si Ralph Leffler, nga nagbulig sa paghimo sini nga estasyon, nagsiling: “Kon gab-i sa tion sang tigtulugnaw, madamo nga tawo sa malayo nga mga lugar ang nagapamati sa sini.” Halimbawa, isa ka pamilya nga nagaistar sa Pilot Station, Alaska, nga sobra 5,000 ka kilometro ang kalayuon, ang nagpamati sa sini. Nagpadala ini nga pamilya sing sulat sa mga nagaobra sa estasyon para pasalamatan sila sa paghanda sing makapalig-on nga programa. Nagsiling sila nga nakabulig ini sa ila nga makatuon parte sa Dios kag sa Biblia.

Ari ang ginsiling sang The Watch Tower sang Disiembre 1, 1925, kon ngaa malab-ot sang estasyon sang radyo ang malayo nga mga lugar: “Ang WORD ang isa sa pinakamakusog nga estasyon sang radyo sa United States nga nagagamit sang 5,000 watts nga transmitter. Malab-ot sini ang tanan nga bahin sang United States, ang Cuba, kag bisan ang pinakaaminhan sang Alaska. Madamo nga tawo nga wala pa gid nakabati parte sa kamatuoran ang nangin interesado sa sini sang nabatian nila ini sa sini nga estasyon.”

Sadto nga tion, gusto man gamiton sang mga Estudyante sang Biblia ang estasyon sang radyo para ibantala ang maayong balita sa Canada. Sang 1924, ginhimo nila ang estasyon sang radyo nga CHUC sa Saskatoon, Saskatchewan. Isa ini sa pinakauna nga estasyon sang radyo sa Canada parte sa relihion. Sang 1925, ang Watch Tower Society na ang nagapanag-iya sini nga estasyon kag kinahanglan ini isaylo sa mas daku nga lugar. Gani, ginsaylo ini sa Regent Building. Isa ini ka daan nga teatro sa Saskatoon nga ginbakal kag ginkay-o sang organisasyon para himuon nga estasyon sang radyo.

Paagi sa sini nga estasyon, madamo nga tawo nga nagaistar sa mga banwa kag kaumhan sa Saskatchewan ang nakabati sang maayong balita sa pinakauna nga tion. Halimbawa, sa isa ka malayo nga banwa, nabatian ni Mrs. Graham ang programa sa sini nga estasyon. Gani nagsulat sia para magpangabay sang mga publikasyon nga nabase sa Biblia. Nagsiling si Brother George Naish nga mabatyagan nila sa iya pangabay nga gusto gid niya nga padal-an sia dayon sang mga publikasyon, gani ginpadal-an nila sia sang kompleto nga Studies in the Scriptures. Wala madugay pagkatapos sini, ginasugid na ni Mrs. Graham sa iban ang parte sa mensahe sang Ginharian sa mas malayo pa gid nga mga lugar.

ISA KA IMPORTANTE NGA KAMATUORAN

Mabasa sa Marso 1, 1925, nga The Watch Tower ang isa ka artikulo nga “Birth of the Nation.” Ngaa importante gid ini nga artikulo? Madugay na nga nabal-an sang mga Estudyante sang Biblia nga may organisasyon si Satanas. Sia ang nagakontrol sa mga demonyo, butig nga mga relihion, mga gobierno, kag mga negosyo sa duta. Pero paagi sa sini nga artikulo, ginpaathag sang “matutom kag mainandamon nga ulipon” nga may organisasyon man si Jehova. (Mat. 24:45) Lain gid ini sa organisasyon ni Satanas, kag ginapamatukan sini ang organisasyon sang Yawa. Ginpaathag man sang ulipon nga nagsugod sa paggahom ang Ginharian sang Dios sang 1914. Kag sadto man nga tuig, may ‘inaway nga nagdabdab sa langit.’ Sa sini nga inaway, ginpahalin si Satanas kag ang iya mga demonyo sa langit kag gintagbong sila sa duta.​—Bug. 12:7-9.

May pila nga nabudlayan nga batunon ining bag-o nga paghangop. Gani, ang artikulo nagsiling: “Para sa mga nagabasa sang Watch Tower nga wala nagaugyon sa sini nga paathag, ginapanugda namon nga magpabilin kamo nga kalmado kag magsalig kamo sa Ginuo samtang padayon kamo nga nagaalagad sa iya sing matutom.”

Pero, ari ang ginsiling ni Tom Eyre, nga isa ka colporteur (ginatawag subong nga payunir) sa Britain, parte sa nabatyagan sang kalabanan nga Estudyante sang Biblia sa sini nga artikulo: “Nalipay gid ang mga kauturan sa paathag parte sa Bugna 12. Sang narealisar namon nga natukod na ang Ginharian sa langit, excited gid kami nga isugid sa iban ining maayo nga balita. Nagpalig-on ini sa amon nga dugangan ang amon ginahimo sa pagbantala, kag nagbulig ini sa amon nga makita nga may himuon si Jehova nga dalayawon nga mga butang sa palaabuton.”

DAPAT MAGPANAKSI PARTE KAY JEHOVA

Subong, pirme ginabinagbinag sang mga Saksi ni Jehova ang parte sa Isaias 43:10, nga nagasiling: “‘Kamo ang akon mga saksi,’ siling ni Jehova, ‘Ang akon alagad nga ginpili ko.’” Antes sang 1925, talagsa lang ginabinagbinag ini nga teksto sa aton mga publikasyon. Pero talalupangdon nga sang 1925, ginbinagbinag ang Isaias 43:10 kag 12 sa 11 ka isyu sang The Watch Tower.

Sang Agosto 1925, nagtipon ang mga Estudyante sang Biblia sa isa ka kombension sa Indianapolis, Indiana. Mabasa sa programa sang kombension ang mensahe ni Joseph F. Rutherford para abiabihon ang mga tumalambong. Ini nagasiling: “Nagtambong kita sa sini nga kombension kay gusto naton nga pabakuron kita sang Ginuo nga mangin makugi pa gid sa pagbantala bilang iya mga saksi.” Sa bilog nga walo ka adlaw nga kombension, ginpalig-on ang mga tumalambong nga magpanaksi parte kay Jehova sa tanan nga kahigayunan.

Sang Sabado, Agosto 29, nagpamulongpulong si Brother Rutherford sa tema nga “A Call to Action.” Sa iya pamulongpulong, ginpadaku niya nga importante gid ang pagbantala. Nagsiling sia: “Ginasilingan ni Jehova ang iya katawhan . . . : ‘Kamo ang akon mga saksi . . . kag ako ang matuod nga Dios.’ Dayon prangka niya nga ginsiling ini nga sugo: ‘Ibayaw ninyo ang palatandaan bilang sinyales para sa katawhan.’ Wala na sing iban pa nga katawhan sa duta nga makapanaksi parte kay Jehova magluwas sa iya katawhan nga ginagiyahan niya sang iya espiritu.”​—Isa. 43:12; 62:10.

Pagkatapos sang pamulongpulong ni Brother Rutherford, ginbasa niya ang resolusyon nga ginatawag “Message of Hope.” Nagsiling ini nga ang Ginharian sang Dios lang ang makahatag “sang paghidait, kabuganaan, maayo nga panglawas, kabuhi nga wala sing katapusan, kahilwayan, kag dayon nga kalipay.” Nag-ugyon ang tanan nga tumalambong sa sini nga resolusyon. Sang ulihi, gin-translate ini nga resolusyon sa pila ka lenguahe kag gin-imprinta ini para gamiton sa pagbantala. Mga 40 ka milyon ka kopya sini ang napanagtag sa mga tawo.

Nagligad pa ang pila ka tuig sang gin-islan sang mga Estudyante sang Biblia ang ila ngalan, kag gintawag sila nga mga Saksi ni Jehova. Pero sadto nga tion, amat-amat na nila nga nahangpan ang ila responsibilidad bilang iya mga saksi.

GINSUGDAN ANG PAGBALIK LIWAT SA MGA INTERESADO

Samtang nagadamo ang mga Estudyante sang Biblia sa bilog nga kalibutan, ginpalig-on sang organisasyon ang mga kauturan nga balikan nila ang mga naistorya nila nga interesado sa maayong balita. Pagkatapos sang kampanya sa pagpanagtag sang tract nga Message of Hope, ang Bulletina nagsiling: “Baliki ninyo ang mga tawo nga nagbaton sang tract nga Message of Hope.”

Ginsambit sa Enero 1925 nga isyu sang Bulletin ining isa ka report sang Estudyante sang Biblia halin sa Plano, Texas: “Kanami gid sang resulta sang amon pagbalik sa mga lugar nga nabantalaan na namon. Mas maayo ini sangsa pagbantala sa bag-o nga mga teritoryo. May isa ka gamay nga banwa sa amon teritoryo nga lima ka beses namon nga nabalikan sang nagligad nga pulo ka tuig. . . . Sining karon lang, nagbalik didto si Sister Hendrix kag ang akon iloy kag madamo gid nga libro ang ila natanyag.”

Sa pungsod sang Panama, may isa ka colporteur nga nagsulat: “Madamo nga tawo ang indi interesado sang ginbantalaan ko sila sa una nga tion. Pero sa akon ikaduha ukon ikatlo nga pagbalik sa ila, namati na sila. Sini nga tuig, nagpokus ako sa pagbalik sa mga nabantalaan ko na. Madamo gid ako sing manami nga eksperiensia.”

MADAMO PA ANG DAPAT HIMUON

Kada tuig, ginasulatan ni Brother Rutherford ang mga colporteur. Sa iya sulat sa katapusan sang 1925, ginsambit niya kon ano ang ila nahimo sadto nga tuig kag kon ano ang dapat nila himuon sa masunod nga tuig. Nagsiling sia: “Sini nga tuig, ginpaumpawan ninyo ang madamo nga tawo sa inyo teritoryo. Nalipay gid kamo sa inyo ginhimo . . . Sa masunod nga tuig, madamo pa gid kamo sang kahigayunan nga magpanaksi parte sa Dios kag sa iya ginharian kag ipakita kon sin-o gid ang iya katawhan. . . . Gani gamiton naton tanan ang aton tingog sa pagdayaw sa aton Dios kag aton Hari.”

Sa katapusan sang 1925, naghimo sang plano ang mga kauturan nga dugangan ang mga pasilidad sa Bethel sa Brooklyn. Sang 1926, ginsugdan nila ang pinakadaku nga proyekto sa konstruksion nga ginhimo sang organisasyon.