Mabuligan Kita ni Jehova nga Mangin Matuod nga Malipayon

1-2. (a) Ano ang ginabatyag sang madamo nga tawo subong? (b) Ano ang binagbinagon naton sa sini nga artikulo?

SUBONG, ginatestingan sang madamo nga tawo ang lainlain nga paagi para mangin malipayon sila. Pero, indi gihapon sila malipayon. Madamo nga tawo ang nasubuan gid kag nadulaan na sang paglaum. May mga tion nga amo man sini ang aton ginabatyag bisan pa katawhan kita ni Jehova. Nagakabuhi na kita “sa katapusan nga mga adlaw,” gani makaeksperiensia kita sang mga problema kag sitwasyon nga “mabudlay atubangon.”​—2 Tim. 3:1.

² Sa sini nga artikulo, binagbinagon naton ang mga butang nga makadula sang aton kalipay, kag kon ano ang puede naton himuon para mangin malipayon kita liwat. Pero, hibaluon anay naton kon sin-o ang ginahalinan sang matuod nga kalipay.

KON SIN-O ANG GINAHALINAN SANG MATUOD NGA KALIPAY

3. Ano ang matun-an naton sa mga tinuga ni Jehova parte sa iya? (Tan-awa man ang mga piktyur.)

³ Halin pa sang una, pirme gid malipayon si Jehova. Kag gusto niya nga mangin malipayon man kita. Makita naton sa mga tinuga ni Jehova nga malipayon gid sia. Ang halimbawa sa sini amo ang aton matahom nga planeta, ang sarisari nga mga kolor nga makita naton, ang paghampang sang mga sapat, kag ang manamit nga mga pagkaon. Palangga gid kita sang Dios kag gusto niya nga mangin malipayon kita.

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Ngaa malipayon gihapon si Jehova bisan pa kabalo sia nga nagaantos ang mga tawo? (b) Paano kita ginabuligan ni Jehova? (Salmo 16:11)

⁴ Kabalo si Jehova nga nagaantos ang mga tawo, kag nasubuan sia sa sini. Pero, ang Biblia nagasiling nga “malipayon [sia] nga Dios.” (1 Tim. 1:11) Ngaa malipayon gihapon si Jehova? Ang isa ka rason amo nga kabalo sia nga temporaryo lang ang pag-antos, kag may gintalana na sia nga tion kon san-o ini dulaon. Samtang mapinasensiahon nga ginahulat ni Jehova ina nga tion, naintiendihan niya ang aton ginabatyag kag ginabuligan niya kita. Paano niya kita ginabuligan? Ang isa ka paagi amo ang pagbulig sa aton nga mangin malipayon. (Basaha ang Salmo 16:11.) Binagbinagon naton kon paano ginbuligan ni Jehova si Jesus nga mangin malipayon.

5-6. Ngaa malipayon si Jesus?

⁵ Sa tanan nga tinuga ni Jehova, si Jesus ang pinakamalipayon. Ngaa? Binagbinaga ang duha ka rason nga pinasahi kay Jesus. (1) “Sia ang larawan sang indi makita nga Dios” kag perpekto niya nga gin-ilog ang personalidad sang iya Amay. (Col. 1:15; 1 Tim. 6:15) (2) Nakaupod ni Jesus ang iya Amay, nga ginahalinan sang matuod nga kalipay, sa sulod sang malawig gid nga tion.

⁶ Dugang pa sa sini, nangin malipayon man si Jesus bangod ginahimo gid niya pirme ang ginasugo sang iya Amay. (Hulu. 8:30, 31; Juan 8:29) Bangod nangin matutom si Jesus, nalipay gid sa iya si Jehova.​—Mat. 3:17.

7. Ano ang himuon naton para mangin malipayon kita?

⁷ Kon panikasugan man naton nga mangin suod kay Jehova nga ginahalinan sang matuod nga kalipay, mangin malipayon man kita. Kon mas madamo nga tion ang ginagamit naton para magtuon parte kay Jehova kag para ilugon sia, mangin mas malipayon pa gid kita. Mangin malipayon man kita kon himuon naton ang kabubut-on sang Dios kag kon kabalo kita nga nalipay sia sa aton.a (Sal. 33:12) Pero ano abi kon makabatyag kita sang kasubo sa sulod sang pila ka adlaw ukon sa sulod sang malawig nga tion? Ginapahangop bala sini nga wala nalipay sa aton si Jehova? Indi amo sina ang ginapahangop sini. Kabalo si Jehova nga indi kita perpekto, gani may mga tion nga nasakitan kita, nasubuan, kag na-depress. (Sal. 103:14) Binagbinagon naton ang mga butang nga makadula sang aton kalipay, kag kon ano ang puede naton himuon para mangin malipayon kita liwat.

MAY PUEDE KA HIMUON PARA INDI MADULA ANG IMO KALIPAY

8. Ano ang posible mabatyagan naton kon may mga problema kita?

⁸ Una nga butang nga makadula sang aton kalipay: Mga problema sa kabuhi. Ginahingabot ka bala bangod alagad ka ni Jehova? Nagaantos ka bala bangod sa kalamidad, kapigaduhon, balatian, ukon katigulangon? Posible gid makadula sang aton kalipay ini nga mga problema, ilabi na kon wala kita sing mahimo sa aton sitwasyon. Ang Biblia nagasiling nga “ang nagasakit nga tagipusuon nagadugmok sang espiritu.” (Hulu. 15:13) Binagbinaga ang isa ka gulang nga si Babis. Sa sulod sang apat ka tuig, napatay ang iya magulang nga lalaki, ang iya iloy, kag ang iya amay. Nagsiling sia: “Grabe gid ang akon kasubo, kag pamatyag ko nagaisahanon na lang ako. Nagalalain man ako kay wala ko nahatagan sang tion ang akon mga ginikanan kag utod antes sila napatay bangod masako ako.” Ginapakita sini nga kon may problema kita, posible kapuyon kita kag maluyahan sang buot.

9. Ano ang makabulig sa aton para mangin malipayon kita liwat? (Jeremias 29:4-7, 10)

⁹ Ano ang makabulig sa aton para mangin malipayon kita liwat? Dapat naton untatan ang pagkabalaka sa mga butang nga wala kita sing mahimo, kag apresyahon naton ang mga butang nga ara sa aton. Gusto kita papatihon sang kalibutan nga mangin malipayon lang kita kon wala kita sang problema. Pero indi ina matuod. Halimbawa, ginsilingan ni Jehova ang mga Judiyo sa Babilonia nga batunon nila ang ila mabudlay nga sitwasyon bilang mga bihag. Dayon himuon nila ang ila bug-os nga masarangan para mangin malipayon sila didto. (Basaha ang Jeremias 29:4-7, 10.) Ano ang matun-an naton sa sini? Panikasugi nga batuna ang imo sitwasyon, kag apresyaha ang maayo nga mga butang sa imo kabuhi. Tandai nga buligan ka ni Jehova. (Sal. 63:7; 146:5) Binagbinaga ang isa ka sister nga si Effie. Naaksidente sia kag indi na sia makalakat. Nagsiling sia: “Ginbuligan ako kag ginpalig-on ni Jehova, sang akon pamilya, kag sang mga kauturan. Gusto ko sila pasalamatan sa ginahimo nila para sa akon, gani ginapanikasugan ko gid nga ipakita sa ila nga malipayon ako bisan pa sa akon sitwasyon.”

10. Ngaa puede gihapon kita mangin malipayon bisan pa may mga problema kita?

¹⁰ Bisan pa may mga problema kita ukon bisan pa may malain nga natabo sa aton ukon sa aton pamilya, puede gihapon kita mangin malipayon.b (Sal. 126:5) Ngaa? Bangod ang aton kalipay wala nagadepende sa aton kahimtangan. Si Maria, nga isa ka payunir, nagsiling: “Kon malipayon gihapon kita bisan pa may mga problema kita, indi buot silingon sini nga ginatago ta lang ang aton ginabatyag. Sa baylo, ginapakita naton nga wala naton nalimtan ang mga promisa ni Jehova. Buligan gid kita sang aton Amay para indi madula ang aton kalipay.” Dumduma nga bisan ano pa kabudlay sang aton problema, temporaryo lang ini. Daw pareho ini sang agi sang aton mga tiil sa higad sang baybay. Wala ini nagadugay kay nagakadula ini kon malab-ot sang balod.

11. Paano ka napalig-on sa halimbawa ni apostol Pablo?

¹¹ May mga tion nga posible mahunahuna naton nga may mga problema kita kay wala nalipay sa aton si Jehova. Ano ang makabulig sa aton? Pamalandungan naton ang matutom nga mga alagad ni Jehova nga nakaeksperiensia sang mabudlay gid nga mga sitwasyon. Binagbinaga si apostol Pablo. Ginpili sia ni Jesus para ibantala ang maayong balita “sa mga pungsod, subong man sa mga hari kag sa mga anak ni Israel.” (Binu. 9:15) Isa gid ini ka daku nga pribilehiyo. Pero, madamo gihapon sing problema si Pablo. (2 Cor. 11:23-27) Madamo bala sia sing problema kay wala nalipay sa iya si Jehova? Indi amo sina ang buot silingon sini. Sa baylo, ginpakamaayo sia ni Jehova kay nabatas niya ang iya mga problema. (Roma 5:3-5) Binagbinaga naman ang imo sitwasyon. Bisan pa may mga problema ka, padayon ka nga nagabatas kag nagaalagad sing matutom kay Jehova. Pamatuod ini nga ginabuligan ka niya kag nalipay sia sa imo.

12. Kon indi na naton mahimo ang mga gusto naton himuon, paano ini makadula sang aton kalipay?

¹² Ikaduha nga butang nga makadula sang aton kalipay: Indi na naton mahimo ang mga gusto naton himuon. (Hulu. 13:12) Bangod palangga naton si Jehova kag gusto naton sia pasalamatan, nagahimo kita sang mga tulumuron para mahatag naton sa iya ang aton pinakamaayo. Pero kon indi na naton malab-ot ang aton mga tulumuron bangod sa aton sitwasyon, posible maluyahan kita sang buot. (Hulu. 17:22) Ang isa ka payunir nga si Holly nagsiling: “Gusto ko mag-eskwela sa School for Kingdom Evangelizers, mag-alagad sa iban nga pungsod, ukon magboluntaryo sa konstruksion sa Ramapo. Pero nagbag-o ang akon kahimtangan, gani indi ko na malab-ot ini nga mga tulumuron. Nasubuan gid ako. Kon indi mo na mahimo ang mga gusto mo kuntani himuon, maluyahan ka gid.” Madamo nga alagad ni Jehova ang nagabatyag man sini.

13. Kon limitado na ang imo mahimo bangod sa imo sitwasyon, ano ang pila ka tulumuron nga puede mo pa mahimo?

¹³ Ano ang makabulig sa aton para mangin malipayon kita liwat? Dumduma nga wala ginapahimo sa aton ni Jehova ang indi naton masarangan. Wala man niya ginabase sa aton masarangan himuon ang aton balor sa iya. Gusto ni Jehova nga mangin maugdang kita kag matutom. (Miq. 6:8; 1 Cor. 4:2) Bisan pa indi na naton mahimo ang mga gusto naton himuon, mas importante kay Jehova ang aton mga ginahunahuna, ginahandum, kag kinaiya. Indi naton paghunahunaon nga dapat gid naton himuon ang sobra sa aton masarangan kay wala kita ginaobligar ni Jehova nga himuon ini.c Gani kon limitado na ang imo mahimo sa pag-alagad kay Jehova bangod sa imo sitwasyon, magpokus sa kon ano lang ang imo masarangan. Halimbawa, puede mo hanason ang mga pamatan-on ukon buligan ang mga tigulang. Puede mo man palig-unon ang iban paagi sa pagbisita, pagtawag, ukon pag-text sa ila. Malipay gid si Jehova kon panikasugan mo ang mga tulumuron nga masarangan mo himuon, kag pakamaayuhon ka niya paagi sa pagbulig sa imo nga mangin malipayon. Kag dumduma nga sa bag-ong kalibutan, mas madamo kita sang kahigayunan nga maalagad si Jehova sa paagi nga sobra pa sa aton mahunahuna. Si Holly, nga ginsambit kaina, nagsiling: “Kon naluyahan ako, ginadumdom ko nga sa ulihi magakabuhi na ako sing wala sing katapusan. Kag sa bulig ni Jehova, mahimo ko na sa bag-ong kalibutan ang pila sa mga gusto ko himuon.”

14. Ano pa ang makadula sang aton kalipay?

¹⁴ Ikatlo nga butang nga makadula sang aton kalipay: Gusto naton nga pagustuhan ang aton kaugalingon. Ginagamit sang iban ang social media para ipakita nga malipayon kuno sila kag kontento kay ginpagustuhan nila ang ila kaugalingon. Ginapapati nila ang mga tawo nga kon himuon nila ang mga butang nga nanamian nila, kon baklon nila ang ila gusto, kag kon pirme sila maglagaw, mangin malipayon gid sila. Indi malain ini nga mga butang. Kay man, gintuga kita ni Jehova nga may ikasarang nga apresyahon ang matahom nga mga butang. Pero narealisar sang madamo nga tawo nga kon pagustuhan lang nila ang ila kaugalingon, makadula pa gani ini sang ila kalipay. Si Eva, nga isa ka payunir, nagsiling, “Kon ang ginapamensar mo lang pirme amo ang pagustuhan ang imo kaugalingon, indi ka gid mangin kontento.” Gani kon pagustuhan lang naton ang aton kaugalingon, masubuan lang kita kag maluyahan.

15. Ano ang matun-an naton sa eksperiensia ni Hari Solomon?

¹⁵ Kon pagustuhan lang naton ang aton kaugalingon, masubo gid ang resulta sini. May matun-an kita sa eksperiensia ni Hari Solomon. Gintestingan niya ang madamo nga butang nga ginhunahuna niya nga makahatag sang kalipay. Halimbawa, nagkaon sia sang manamit nga mga pagkaon, namati sia sang matahom nga mga musika, kag nagbakal sia sang malahalon nga mga butang. Pero, wala ini nakahatag sa iya sang kalipay. Nagsiling sia: “Ang mata indi maayawan sa pagtan-aw; kag ang dulunggan indi matak-an sa pagpamati.” (Man. 1:8; 2:1-11) Makumparar sa peke nga kuarta ang ginasiling sang kalibutan nga makapalipay sa aton. Daw may balor ini kon tulukon, pero indi sini mahatag ang imo gusto.

16. Ngaa mangin malipayon kita liwat kon nagabulig kita sa iban? (Tan-awa man ang mga piktyur.)

¹⁶ Ano ang makabulig sa aton para mangin malipayon kita liwat? Gintudluan kita ni Jesus nga “mas malipayon ang nagahatag sangsa nagabaton.” (Binu. 20:35) Ang isa ka gulang nga si Alekos nagsiling: “Ginatinguhaan ko nga magbulig sa iban bisan sa simple lang nga paagi. Kon pirme ako nagabulig, wala na ako nagapokus sa akon kaugalingon. Gani, malipayon ako.” Ano ang puede mo himuon para sa iban? Kon may kilala ka nga nasubuan, panikasugi nga palig-una sia. Posible nga indi mo masolbar ang iya mga problema, pero mapaumpawan mo sia paagi sa pagpamati sa iya sing maayo, pag-intiende sa iya ginabatyag, kag pagpahanumdom sa iya nga itugyan niya kay Jehova ang iya mga ginakabalak-an. (Sal. 55:22; 68:19) Ipahanumdom man sa iya nga wala sia ginbiyaan ni Jehova. (Sal. 37:28; Isa. 59:1) Puede mo man sia lutuan sing pagkaon ukon updan sa paglagawlagaw. Kag puede mo sia hagaron sa pagbantala kay makapahaganhagan ini sa iya ginabatyag. Tuguti si Jehova nga gamiton ka para palig-unon ang iban. Kon nagapokus kita sa pagbulig sa iban imbes nga sa aton kaugalingon, makabatyag kita sang matuod nga kalipay.​—Hulu. 11:25.

17. Ano ang dapat naton himuon para makabatyag kita sang matuod nga kalipay? (Salmo 43:4)

¹⁷ Makabatyag kita sang matuod nga kalipay kon panikasugan naton nga mangin suod sa aton Amay sa langit. Nagapromisa ang Biblia nga mabuligan kita ni Jehova nga mangin matuod nga malipayon. (Basaha ang Salmo 43:4.) Gani bisan pa may mga problema kita, indi kita dapat mabalaka ukon mahadlukan. Sa baylo, padayon kita nga magpokus kay Jehova kay sia ang makabulig sa aton nga mangin malipayon asta sa wala sing katapusan.​—Sal. 144:15.