Ang Gugma sang Dios Wala sing Katapusan

1-2. Ano ang ginabatyag sang madamo nga alagad ni Jehova kon may mabudlay sila nga problema?

IMADYINA ang isa ka sakayan nga ginahampak sang dalagku nga mga balod bangod sa mabaskog nga bagyo. Kon indi maggamit sang angkla, kaluluoy gid ini sa mga balod. Ang angkla amo ang makabulig para indi ini maanod.

² Kon may mabudlay ka nga problema, posible magabatyag ka nga daw pareho ka sa sini nga sakayan. Kay man, gulpi lang nagabag-obag-o ang imo emosyon. May mga tion nga kumbinsido ka nga palangga ka ni Jehova kag buligan ka niya. Pero, may mga tion naman nga nagaduhaduha ka kon bala nakita gid man niya nga nabudlayan ka. (Sal. 10:1; 13:1) Posible may abyan ka nga magapalig-on sa imo, gani maumpawan ka. (Hulu. 17:17; 25:11) Pero pagligad sang tion, nagabalik naman ang imo pagduhaduha. Posible mahunahuna mo pa gani nga indi ka na palangga ni Jehova. Ano ang himuon mo para indi ka maanod sang imo problema? Ukon, ano ang himuon mo para mangin kumbinsido ka pirme nga palangga ka ni Jehova kag buligan ka niya?

3. (a) Ano ang buot silingon sang “mainunungon nga gugma” sa Salmo 31:7 kag 136:1? (b) Ngaa masiling naton nga si Jehova ang pinakamaayo nga halimbawa sa pagpakita sini? (Tan-awa man ang piktyur.)

³ Ang isa ka paagi para indi ka maanod sang imo problema amo ang pagdumdom sa mainunungon nga gugma ni Jehova. (Basaha ang Salmo 31:7; 136:1.) Ang ekspresyon nga “mainunungon nga gugma” nagapatuhoy sa mabakod nga gugma sang isa ka persona sa isa pa ka persona kag indi gid niya sia pagbayaan. Si Jehova ang pinakamaayo nga halimbawa sa pagpakita sang mainunungon nga gugma. Suno sa Biblia, “bugana [sia] sa mainunungon nga gugma.” (Ex. 34:6, 7) Nagsiling pa gid ini: “Bugana [ka] sa mainunungon nga gugma para sa tanan nga nagapanawag sa imo.” (Sal. 86:5) Hunahunaa ang buot silingon sini nga mga teksto: Wala gid ginapabay-an ni Jehova ang iya matutom nga mga alagad. Kon dumdumon mo nga mainunungon si Jehova, indi ka maanod sang imo problema.​—Sal. 23:4.

ANG GUGMA NI JEHOVA ISA KA PANGUNA NGA PANUDLO SANG BIBLIA

4. Maghatag sing halimbawa sang panguna nga mga panudlo sang Biblia, kag ipaathag kon ngaa nagapati ka gid sa sini.

⁴ Ang isa pa ka paagi para indi ka maanod sang imo problema amo ang pagdumdom nga ang gugma ni Jehova isa ka panguna nga panudlo sang Biblia. Ano ang ginahunahuna mo kon mabatian mo ang ekspresyon nga “panguna nga panudlo sang Biblia”? Posible ginahunahuna mo ang mga kamatuoran nga natun-an mo sa Pulong sang Dios. Halimbawa, natun-an mo nga Jehova ang ngalan sang Dios, nga si Jesus ang bugtong nga Anak sang Dios, nga ang mga patay wala gid sing nahibaluan, kag mangin paraiso ang duta nga pagaistaran sang mga tawo asta sa wala sing katapusan. (Sal. 83:18; Man. 9:5; Juan 3:16; Bug. 21:3, 4) Sang nakumbinsi ka nga matuod ini nga mga panudlo, wala na sing makapabag-o sa imo pagpati sa sini. Ngaa? Bangod nahangpan mo nga nabase ini sa kamatuoran. Kon dumdumon mo nga ang gugma ni Jehova isa ka panguna nga panudlo sang Biblia, mabuligan ka sini nga indi magduhaduha nga kabalo sia sang imo sitwasyon kag nagaulikid gid sia sa imo. Binagbinagon naton kon paano ini makabulig sa aton.

5. Ipaathag kon ano ang makabulig sa isa ka tawo para indi na niya pagpatihan ang butig nga mga panudlo.

⁵ Sang nagtuon ka sang Biblia, ano ang ginhimo mo nga nakabulig sa imo nga indi na pagpatihan ang butig nga mga panudlo? Posible nga ginkumparar mo ang ginatudlo sang imo relihion sa ginatudlo sang Biblia. Binagbinaga ining isa ka halimbawa: Posible nagapati ka sang una nga si Jesus ang Labing Gamhanan nga Dios. Pero sang nagtuon ka sang Biblia, ginpamangkot mo ang imo kaugalingon, ‘Matuod gid bala ang akon ginapatihan?’ Sang gin-usisa mo ang ginatudlo sang Biblia, natun-an mo nga indi si Jesus ang Dios. Gani, ang kamatuoran sa Biblia amo na ang imo ginpatihan imbes nga ang butig nga panudlo. Nagapati ka na nga si Jesus “ang panganay sa tanan nga tinuga” kag ang “bugtong nga Anak sang Dios.” (Col. 1:15; Juan 3:18) Siempre, may butig nga mga panudlo nga mabudlay tumbahon kay ‘natukod ini sing malig-on.’ (2 Cor. 10:4, 5) Pero sang ginpatihan mo na ang kamatuoran, wala mo na ginbalikan ang mga doktrina nga ginapatihan mo sang una.​—Fil. 3:13.

6. Ngaa makasalig ka nga ‘ang mainunungon nga gugma ni Jehova wala sing katapusan’?

⁶ Kon parte sa gugma ni Jehova, puede mo man ikumparar ang ginatudlo sang Biblia sa imo ginabatyag. Halimbawa, kon nagaduhaduha ka kon bala palangga ka ni Jehova bangod sa imo problema, pamangkuta ang imo kaugalingon, ‘Husto bala ang akon ginahunahuna?’ Binagbinaga ang ginasiling sang Salmo 136:1 nga ginbasihan sini nga artikulo, kag ikumparar ini sa imo pagduhaduha sa gugma ni Jehova. Ngaa nagsiling si Jehova nga “mainunungon” ang iya gugma? Ngaa 26 ka beses nga ginsulitsulit sa sini nga salmo ang ekspresyon nga “ang iya mainunungon nga gugma wala sing katapusan”? Ginbinagbinag naton nga ang mainunungon nga gugma ni Jehova sa iya katawhan isa ka panguna nga panudlo sang Biblia. Kag pareho sa iban pa nga panudlo sang Biblia, ginpatihan mo ini. Kon parte sa panudlo nga indi ka palangga ni Jehova ukon wala ka sing pulos sa iya, indi ina matuod. Indi pagpatihi ina nga panudlo, pareho sa ginhimo mo sa iban pa nga butig nga mga panudlo.

7. Maghatag sing halimbawa sang mga teksto nga nagapamatuod nga palangga ka ni Jehova.

⁷ Madamo nga teksto ang nagapamatuod nga palangga ka ni Jehova. Halimbawa, ginsilingan ni Jesus ang iya mga disipulo: “Mas importante pa kamo sangsa madamo nga maya.” (Mat. 10:31) Kag si Jehova mismo ang nagsiling sa iya katawhan: “Pabaskugon ko ikaw, huo, buligan ko ikaw, uyatan ko ikaw sang akon tuo nga kamot sang pagkamatarong.” (Isa. 41:10) Maathag gid ang ginasiling sini nga mga teksto. Wala nagsiling si Jesus nga ‘Basi mas importante pa kamo,’ kag wala nagsiling si Jehova nga ‘Basi buligan ko ikaw.’ Sa baylo, nagsiling sila: “Mas importante pa kamo” kag “Buligan ko ikaw.” Kon nagaduhaduha ka kon bala palangga ka ni Jehova bangod sa imo problema, buligan ka sini nga mga teksto nga mabatyagan nga palangga ka niya. Pero may mabulig pa gid ini sa imo. Buligan ka man sini nga makumbinsi nga palangga ka ni Jehova. Nabase sa kamatuoran ini nga mga teksto. Gani kon ipangamuyo mo kay Jehova ang imo pagduhaduha kag pamalandungan mo ini nga mga teksto, masiling mo man ang ginasiling sang 1 Juan 4:16: “Kita mismo nakahibalo kag nagapati sa gugma sang Dios para sa aton.”a

8. Ano ang himuon mo kon nagaduhaduha ka gihapon kon kaisa kon bala palangga ka ni Jehova?

⁸ Pero, ano abi kon nagaduhaduha ka gihapon kon kaisa kon bala palangga ka ni Jehova? Ikumparar ang imo ginabatyag sa imo nahibaluan. Nagabag-obag-o ang aton ginabatyag, pero ang kamatuoran wala. Palangga kita ni Jehova, kag isa ini ka kamatuoran nga ginatudlo sa aton sang Biblia. Kon indi kita magpati nga palangga kita ni Jehova, ginabalewala naton ang iya pinakaimportante nga kinaiya nga amo ang gugma.​—1 Juan 4:8.

PAMALANDUNGI ANG GUGMA NI JEHOVA SA IMO

9-10. Parte sa ano ang topiko ni Jesus sang nagsiling sia “Ginahigugma kamo sang Amay” nga mabasa sa Juan 16:26, 27? (Tan-awa man ang piktyur.)

⁹ May matun-an pa gid kita parte sa gugma ni Jehova kon binagbinagon naton ang ginsiling ni Jesus sa iya mga disipulo: “Ginahigugma kamo sang Amay.” (Basaha ang Juan 16:26, 27.) Wala ini ginsiling ni Jesus para lang paumpawan ang iya mga disipulo. Kay man, kon basahon naton ang mga bersikulo antes sini, indi parte sa ginabatyag sang iya mga disipulo ang iya topiko sadto nga tion. Sa baylo, parte sa pangamuyo ang iya topiko.

¹⁰ Bag-o lang sadto ginsilingan ni Jesus ang iya mga disipulo nga dapat sila mangamuyo indi sa iya kundi paagi sa iya. (Juan 16:23, 24) Importante gid nga mahibaluan nila ini. Kay man, pagkatapos ginbanhaw si Jesus, posible nahunahuna nila nga makapangamuyo sila sa iya bangod abyan nila sia. Posible nahunahuna nila nga bangod palangga sila ni Jesus, pamatian niya ang ila mga pangabay kag isugid niya ini sa iya Amay. Pero, ginsilingan sila ni Jesus nga indi dapat amo sini ang ila panghunahuna. Ngaa? Bangod “ginahigugma kamo sang Amay,” siling niya sa ila. Ginapakita sini nga ginatudluan sila ni Jesus nga gusto gid ni Jehova pamatian ang ila mga pangamuyo. Isa ini ka panguna nga panudlo sang Biblia parte sa pangamuyo. Binagbinaga kon ano ang matun-an mo sa sini: Paagi sa pagtuon sang Biblia, nakilala mo si Jesus kag ginpalangga mo sia. (Juan 14:21) Pero pareho sa mga disipulo sang unang siglo, makapangamuyo ka sa Dios nga may pagsalig kay kabalo ka nga “ginahigugma” ka niya. Sa kada tion nga nagapangamuyo ka kay Jehova, ginapakita mo nga nagapati ka sa sini.​—1 Juan 5:14.

HIBALUA KON NGAA NAGADUHADUHA KA

11. Ngaa malipay si Satanas kon magduhaduha kita kon bala palangga kita ni Jehova?

¹¹ Ngaa nagaduhaduha kita kon bala palangga kita ni Jehova? Posible magsiling ka nga si Satanas ang rason sa sini, kag masiling naton nga husto man ini. Kay man, gusto sang Yawa nga ‘tukbon’ kita, kag malipay gid sia kon duhaduhaan naton ang gugma ni Jehova. (1 Ped. 5:8) Palangga kita ni Jehova, gani gin-aman niya ang gawad. Pero gusto ni Satanas nga hunahunaon naton nga indi kita takus gawaron. (Heb. 2:9) Pero sin-o ang malipay kon magduhaduha kita kon bala palangga kita ni Jehova? Si Satanas. Kag sin-o ang malipay kon mag-untat kita sa pag-alagad kay Jehova bangod sa mga problema? Si Satanas. Gusto ni Satanas nga duhaduhaan naton ang gugma ni Jehova. Pero ang matuod, sia ang indi palangga ni Jehova. Gusto niya nga hunahunaon naton nga kita ang indi palangga ni Jehova kag ginsikway kita ni Jehova. Isa ini sa ‘pinakatuso nga pahito’ ni Satanas. (Efe. 6:11) Kon kabalo kita sang gusto himuon sang aton kaaway, mangin mas malig-on pa gid kita nga ‘pamatukan ang Yawa.’—Sant. 4:7.

12-13. Paano naapektuhan sang aton makasasala nga kahimtangan ang aton pagtamod sa gugma ni Jehova?

¹² May iban pa nga rason kon ngaa nagaduhaduha kita kon bala palangga kita ni Jehova. Ano ini? Ang aton makasasala nga kahimtangan nga napanubli naton. (Sal. 51:5; Roma 5:12) Bangod sa sala, naguba ang kaangtanan sang mga tawo sa ila Manunuga. Naapektuhan man sini ang ila paagi sa paghunahuna, balatyagon, kag panglawas.

¹³ Bangod sa sala, naapektuhan ang aton emosyon. Gani ginakonsiensia kita, nabalaka, nagabatyag nga wala sing pulos, kag nahuya. Mabatyagan naton ini kon makahimo kita sang sala. Pero, mahimo mabatyagan man naton ini bangod indi kita perpekto. Kay man, indi amo sini ang kahimtangan sang mga tawo sang gintuga sila sang Dios. (Roma 8:20, 21) Binagbinaga ini nga ilustrasyon. Kon kupos ang goma sang salakyan, indi sini malab-ot ang kadasigon nga masarangan kuntani sini. Sing kaanggid, bangod indi kita perpekto, indi naton mahimo ang aton bug-os nga masarangan base sa pagkadesinyo sa aton. Gani, indi kita matingala nga may mga tion gid nga nagaduhaduha kita kon bala palangga kita ni Jehova. Kon mabatyagan naton ini, dapat naton dumdumon nga si Jehova “ang gamhanan kag makahalawhaw nga Dios, nga nagatuman sang iya katipan kag nagapakita sing mainunungon nga gugma sa mga nagahigugma kag nagatuman sang iya mga sugo.”​—Neh. 1:5.

14. Paano makabulig ang pagpamalandong parte sa gawad para indi kita magduhaduha nga palangga kita ni Jehova? (Roma 5:8) (Tan-awa man ang kahon nga “Mag-andam ‘sa Madaya nga Gahom sang Sala.’”)

¹⁴ Kon kaisa, nagabatyag kita nga indi kita nagakabagay palanggaon ni Jehova. Ang matuod, indi gid man kita nagakabagay sa iya pagpalangga. Gani, masiling naton nga dalayawon gid ang iya gugma. Palangga kita ni Jehova indi bangod may ginhimo kita para sa iya. Pero bangod sa iya gugma, gin-aman niya ang gawad para mapatawad niya ang aton mga sala. (1 Juan 4:10) Dumduma man nga nagkadto si Jesus sa duta para luwason ang mga makasasala, indi ang perpekto nga mga tawo. (Basaha ang Roma 5:8.) Indi kita tanan perpekto, gani kabalo si Jehova nga makasala gid kita. Bangod sang aton makasasala nga kahimtangan, may mga tion nga nagaduhaduha kita kon bala palangga kita ni Jehova. Bangod naintiendihan naton ini, himuon gid naton ang aton bug-os nga masarangan para indi kita magduhaduha.​—Roma 7:24, 25.

MAGPABILIN NGA MAINUNUNGON

15-16. Ano ang masigurado naton kon magpabilin kita nga mainunungon kay Jehova, kag ngaa? (2 Samuel 22:26)

¹⁵ Gusto ni Jehova nga himuon naton ang husto nga desisyon paagi sa “pag-unong sa iya.” (Deut. 30:19, 20) Kon himuon naton ini, makasigurado kita nga magapabilin sia nga mainunungon sa aton. (Basaha ang 2 Samuel 22:26.) Kon magpabilin kita nga mainunungon kay Jehova, makasalig kita nga buligan niya kita nga mabatas ang bisan ano nga sitwasyon sa aton kabuhi.

¹⁶ Suno sa nabinagbinag naton, madamo sang rason para indi kita maanod sa aton mga problema. Kabalo kita nga palangga kita ni Jehova kag buligan niya kita. Isa ini ka kamatuoran nga ginatudlo sa aton sang Biblia. Kon nagaduhaduha kita kon bala palangga niya kita, pamalandungan naton ang nahibaluan naton nga kamatuoran imbes nga ang aton ginabatyag. Indi gid kita dapat magduhaduha sa ginasiling sang Biblia nga ang mainunungon nga gugma ni Jehova wala sing katapusan.