TALALUPANGDON NGA MGA HITABO SANG NAGLIGAD NGA TUIG

Legal nga Pagpakigbato

Ginpalig-on ni apostol Pablo ang mga Cristiano: “Dumduma ninyo ang mga yara sa mga gapos sang pagkabilanggo subong bala nga nagapos kamo kaupod nila.” (Heb. 13:3) Subong mga alagad ni Jehova, pirme naton ginadumdom ang aton matutom nga mga utod kag ginapangamuyo ang “tanan nga may mataas nga palangakuan; agod magkabuhi kita sing matawhay kag malinong nga may bug-os nga diosnon nga debosyon kag pagkaserioso.”—1 Tim. 2:1, 2; Efe. 6:18.

Masunod amo ang pila ka legal nga pagpakigbato sang mga Saksi ni Jehova sang nagligad nga tuig:

Ang aton mga kauturan sa Rusya “wala nagauntat sa pagpanudlo kag sa pagbantala sing maayong balita” bisan pa padayon ang paninguha sang Russian Orthodox Church kag pila ka opisyal sang gobierno nga pauntaton ang aton hilikuton. (Binu. 5:42) Ang Rusya may indi maathag nga kasuguan parte sa extremism para batuan ang terorismo, pero sayop ini nga ginapatuman batok sa aton mga kauturan kag mga publikasyon. Gani, ang halos 70 naton ka publikasyon gindeklarar sang mga korte sang Rusya nga nagaunod sing mga dinalan nga batok sa gobierno, kag ginlakip ini sang mga opisyal sang gobierno sa listahan sang ginadumilian nga mga publikasyon. Bangod sini, ginransak sang pila ka lokal nga awtoridad ang mga Kingdom Hall kag balay sang mga kauturan. Madamo nga Saksi nga nagapakigbahin sa ministeryo ang ginahunong sa estasyon sang pulis, ginapahog, kag ginakuhaan sing retrato kag fingerprint.

Sugod sang Mayo 2013, ang 16 naton ka utod sa siudad sang Taganrog ginbista bangod sa pag-organisar, pagtambong, kag pagpakigbahin sa Cristianong mga miting kag pagbantala. Sang nabungkag ang Unyon Sobyet, ini ang una nga tion nga ginpasakaan ang mga Saksi sing kriminal nga panumbungon bangod sa ila pagtuo. Ginapadihutan sang mga awtoridad sa bilog nga Rusya ang mga korte para ideklarar ang aton mga literatura bilang “extremist” kag kasuhan ang aton mga utod sa sala nga pagdumot sa iban nga relihion.

Wala gid nagbag-o ang kahimtangan sang aton mga utod sa Eritrea. Sining Hulyo 2013, may 52 kita ka utod nga ara sa prisuhan, lakip ang 8 ka brother nga mga 70 anyos na, kag 6 ka sister. Tatlo ka utod, nga sanday Paulos Eyassu, Isaac Mogos, kag Negede Teklemariam, ang napriso sugod pa sang Septiembre 24, 1994, bangod indi sila magserbisyo sa militar.

Sobra katunga sini nga mga priso ang ara sa Meiter, isa ka prisuhan sa desyerto sa aminhan sang kapital nga Asmara. Sugod sang Oktubre 2011 asta Agosto 2012, ginasilutan ang 25 naton ka utod paagi sa pagbutang sa ila sa prisuhan nga human sa sin nga ang katunga nalubong sa duta. Kon tig-ilinit, ginapagua sila sang mga guardia agod indi sila matam-an sa kainit sini. Pero kulang ang ila pagkaon kag tubig, gani masami sila nagamasakit. Makapasubo nga ang 68 anyos nga brother nga si Yohannes Haile napatay sang Agosto 2012 bangod sa pagmaltrato, pareho man sang natabo kay Brother Misghina Gebretinsae sang 2011.

Pagpangindi nga Magsoldado Bangod sa Konsiensia

Base sa Isaias 2:4 kag Juan 18:36.

ARMENIA

Ang European Court of Human Rights (ECHR) nagpagua sing paborable nga desisyon sa kaso nga Khachatryan and Others v. Armenia sang Nobiembre 27, 2012. Supak sa kasuguan nga ginbista ang 17 ka Saksi bangod nangindi sila nga maghimo sing serbisyo nga tal-us sa pagsoldado nga ginadumalahan sang militar. Ang Armenia nagbayad sing danyos kag gin-ulian ang gasto sa kaso sang mga biktima.

Walay sapayan sang paborable nga desisyon sa Khachatryan kag sa bantog nga kaso nga Bayatyan v. Armenia, subong man sang mga desisyon sang ECHR pagkatapos sini, padayon gihapon nga ginakasuhan kag ginapriso sang gobierno sang Armenia ang mga pamatan-on nga Saksi nga nangindi sa pagsoldado bangod sa konsiensia. Pero, sang Hunyo 8, 2013, ang gobierno nagpasar sing amienda sa Alternative Service Law, kag paagi sini mahimo indi na militar ang magadumala sa serbisyo nga tal-us sa pagsoldado. Ang tanan nga nabilanggo nga Saksi nga nangindi sa pagsoldado ginpagua sang Nobiembre 12, 2013, kag ang aplikasyon para sa serbisyo nga tal-us sa pagsoldado sang pamatan-on nga mga Saksi gin-aprobahan.

SOUTH KOREA

Sining Oktubre 31, 2013, may 602 kita ka utod sa prisuhan. Sugod sang 1950, ang awtoridad sang South Korea nagpamatbat sa 17,605 ka Saksi ni Jehova sing kabug-usan nga 34,184 ka tuig sa prisuhan bangod indi sila magserbisyo sa militar.

Halin sang una, madamo sa mga Saksi ang ginapriso upod sa mga kriminal, bisan sa mga nakahimo sing mabug-at nga sala. Gani, ang grupo sang mga brother nagkadto sa hepe sang Korea Correctional Service kag nangabay nga iseparar sang tagdumalahan sang prisuhan ang aton mga utod sa iban nga mga priso. Ginpasugtan ini nga pangabay kag ginseparar ang kalabanan naton nga utod sa mga kriminal. Gani sang Abril 2013, mga 75 porsiento sang aton napriso nga kauturan ang ululupod na kag gintunga sila sa tig-apat ukon tig-lima sa kada selda. Ano ang epekto sini sa ila?

“Nalikawan namon ang malain nga impluwensia pareho sang imoralidad kag pagpamuyayaw,” siling sang isa ka brother. “Mapalig-on na namon karon ang isa kag isa kag makahiwat na kami sing lima ka miting kada semana,” siling naman sang isa.

Sa pihak nga bahin, 56 ka lalaki nga ginpahalin sa serbisyo-militar kag ginhimo nga mga reserba ang nangin mga Saksi sang ulihi. Kon ipatawag sila para hanason, nagapangindi sila amo nga sulitsulit sila nga ginabista, ginamultahan, kag ginahunong. Makapila ka beses ini nagakatabo sa isa ka tuig, nga magalawig pa sing walo ka tuig. Gani kinahanglan gid nila batason ini nga inhustisya.

SINGAPORE

Bisan pa sa sulitsulit nga pangabay nga magserbisyo bilang tal-us sa pagsoldado, ginsentensiahan gihapon sing tig-39 ka bulan nga pagkapriso sa Armed Forces Detention Barracks ang 12 naton ka brother. Ang isa pa ka brother napriso na sing isa ka tuig bangod nangindi sia nga mangin reserba sang militar.

TURKMENISTAN

Siam ka brother nga nangindi sa pagsoldado bangod sa konsiensia ang napriso kag napamatbatan sing 18 ka bulan asta 2 ka tuig nga pagkabilanggo kag masami wala kaluoy nga ginakastigo sang mga guardia kag mga soldado. Sang ginpagua sila, sa masami ginademanda naman sila subong “naglapas liwat sang kasuguan” kag ginabutang sa mas estrikto nga prisuhan. Ang mga nagapangapin sa napulo naton ka kauturan nagpasaka sing reklamo sa United Nations Human Rights Committee.

Pagpangindi nga Makigbahin sa Patriotismo Bangod sa Konsiensia

Base sa Daniel 3:16-18.

Tanzania: Matapos nga mahatagan sing hustisya, ining mga pamatan-on nga Saksi nakabalik sa pag-eskwela

TANZANIA

Ang pinakamataas nga korte sa Tanzania, ang Court of Appeal sa Dar es Salaam, nag-ugyon nga indi nagakaigo ang ginhimo sang tagdumalahan sang eskwelahan nga pagpahalin sa 5 ka estudyante kag pagsuspende pa gid sa 122 bangod indi sila magkanta sang pungsudnon nga ambahanon. Sa ginpagua nga desisyon nga ginbalhag sang Hulyo 12, 2013, nakita sang korte nga matuod gid ang pagtuo sang mga estudyante nga Saksi kag base sa konstitusyon, may kinamatarong sila nga sundon ang ila konsiensia kag relihion. Bangod sa ila katutom, natigayon nila ang kadalag-an nga nagresulta sa kadayawan sang ngalan ni Jehova kag kahilwayan sa aton pagsimba sa Tanzania.

Kahilwayan sa Paghambal

Base sa Binuhatan 4:19, 20.

KAZAKHSTAN

Ang “eksperto nga pagtuon” sang Regional Department of Religious Affairs nagdeklarar nga “extremist” ang pila naton ka publikasyon. Ginapabahinbahin kuno sini ang mga tawo kag relihion. Sang Abril 6, 2013, ilegal nga gin-raid sang mga pulis sang Karabalyk ang pribado nga balay nga ginahiwatan sang miting kag ginkumpiskar ang mga literatura. Sang Hulyo 3, 2013, ginsakdag sang Astana Economic Court ang desisyon nga dumilian ang napulo naton ka publikasyon, gani padayon nga ginainspeksion kag ginakontrol ang pagpasulod sa pungsod sang aton mga literatura. Dugang pa, sang Disiembre 2012, sunodsunod nga gin-aresto kag ginpriso sang mga opisyal sang pungsod ang aton mga kauturan bangod ilegal kuno ang ila mga hilikuton. Sang Marso 28, 2013, ginmanduan sang Agency for Religious Affairs ang Regional Religious Center of Jehovah’s Witnesses nga hambalan ang tanan nga Saksi ni Jehova sa Kazakhstan nga ilegal ang pagbantala sa gua sang ila narehistro nga tilipunan sa pagsimba. Sining Hulyo 2013, ginpasakaan sing kaso ang 21 naton ka kauturan.

Kahilwayan sa Pagtipon kag Pagpakig-upod

Base sa Hebreo 10:24, 25.

AZERBAIJAN

Sang Enero 2010, ang State Committee for Work with Religious Associations wala nagpasugot nga irehistro liwat ang Religious Community of Jehovah’s Witnesses bangod may teknikal kuno nga sala sa ila aplikasyon. Makapila ka beses nga gintadlong sang mga Saksi ni Jehova ang ginasiling nila nga sala, pero wala gihapon ini ginbaton. Sang Hulyo 31, 2012, ginpasaka sang aton mga utod ini nga kaso sa ECHR, nga nagasiling nga ginlapas sang gobierno ang aton kahilwayan sa relihion sang nangindi sila nga iparehistro liwat ang aton relihioso nga asosasyon nga wala man sila sing legal nga basihan. Kon indi makaparehistro ang aton mga utod, wala sila sing bug-os nga kahilwayan sa pagsimba.

Kahilwayan kag Seguridad sang Tawo kag Propiedad

Base sa Filipos 1:7.

UKRAINE

Bisan pa may kahilwayan sa pagsimba ang mga Saksi sa Ukraine, naeksperiensiahan gihapon nila ang pagpanakit, pagpanunog, kag pagpangguba sang mga Kingdom Hall. Wala sing ginahimo nga aksion ang awtoridad, gani nagaabusar ang mga manugpamatok. Nagdamo pa gid ang krimen nga naeksperiensiahan sang aton mga utod sang 2012 kag 2013. Ang 5 ka ginreport nga kaso sang pagpangguba kag pagpanunog sang 2010 nangin 15 sang 2011, 50 sang 2012, kag may 23 na sa una nga lima ka bulan sang 2013. Ginpasaka na sang sanga talatapan ini nga mga kaso sa United Nations Human Rights Committee.

Ukraine: Ang aton mga utod nagahanda sa pagpatindog liwat sini nga Kingdom Hall nga ginguba kag ginsunog

Kinamatarong sa Pagdesisyon Para sa Kaugalingon

Base sa Binuhatan 5:29 kag 15:28, 29.

ARGENTINA

Sang tigpamulak sang 2012, si Pablo Albarracini nasalabat sang may nagtiniruhay bangod sa wala madayon nga pagpangawat. Madamo sia sing igo kag wala sia sing animo sang ginhingagaw sa ospital. May durable power of attorney sia nga nagapakita nga indi sia magpabulong nga nagagamit sing dugo. Ang ospital handa magtuman sang iya desisyon. Pero ang isa ka miembro sang iya pamilya nga indi Saksi nanikasog nga magkuha sing court order para matughungan si Brother Albarracini, kay amo lamang kuno ini ang makasalbar sa iya. Pero ang Korte Suprema sang Argentina nagdesisyon pabor kay Brother Albarracini, nga ginatahod ang iya kinamatarong sa pagdesisyon sa iya pagpabulong bisan pa wala sia sing animo. Wala sia gintughungan sing dugo kag madasig nga nag-ayo. Nagapasalamat gid sia sa bulig ni Jehova kay nakahupot sia sing integridad sa sining importante nga isyu.

Mga Biktima sang Diskriminasyon sa Relihion

Base on Lucas 21:12-17.

KYRGYZSTAN

Sang Abril 16, 2013, nagdesisyon ang korte pabor sa aton mga kauturan sa Toktogul, nga ang Kingdom Hall makaduha nga ginguba sang mga pumuluyo. Ginpriso kag ginpabayad sang korte ang mga naghimo sini kag padayon nga ginabista ang mga responsable sa una nga insidente. Nagalaum ang mga kauturan nga mauntat na ini nga problema. Pero samtang wala pa, kay-uhon nila anay ang Kingdom Hall.

Talalupangdon nga mga Kadalag-an sa Korte

Isyu: Dapat bala mangayo sing permiso ang isa ka relihioso nga grupo kon maghiwat sing kombension kag miting sang kongregasyon?

Desisyon: Sang Disiembre 5, 2012, ginkompirmar sang Constitutional Court of the Russian Federation nga ginagarantiyahan sang Russian Constitution ang kahilwayan sa relihion kag ang aton kauturan makahiwat sing relihioso nga mga miting bisan indi na sila mangayo sing permiso sa mga awtoridad.
Isyu: May kinamatarong bala ang isa ka pumuluyo nga huptan nga kompidensial ang iya rekord sa pagpabulong? Ginhalinan sang isyu: Sang 2007, ginmanduan sang piskal sang siudad sa St. Petersburg, Rusya, ang tanan nga ospital sa siudad nga dal-on sa iya opisina ang tanan nga rekord sang mga Saksi ni Jehova nga nangindi magpatughong sing dugo bisan wala sing pahanugot halin sa pasyente. Sang mapaslawan ang mga korte sa Rusya nga pangapinan ang kinamatarong sang mga pasyente, nag-apelar ang mga utod sa European Court of Human Rights (ECHR).

Desisyon: Sang Hunyo 6, 2013, nagdesisyon ang ECHR nga ginlapas sang piskal ang kinamatarong nga huptan nga kompidensial ang personal nga mga rekord kag ginkompirmar nga wala sing “nagakaigo ukon bastante nga mga rason” para ibuyagyag ang pribado nga impormasyon sa mga opisyal sang publiko. Pinal na ang desisyon sang Oktubre 7, sang ginpangindian sang Grand Chamber sang ECHR ang pangabay sang Rusya nga repasuhon ang kaso.—Avilkina and Others v. Russia.