Dedikasyon sang Sanga

“GRABE gid ang akon kalipay,” siling sang isa ka utod nga babayi sa programa sang dedikasyon sa sanga sa Madagascar, nga ginhiwat sang Sabado, Enero 24, 2015. Sia kag ang 583 ka bisita nalipay gid nga makita ang bag-ong 19 ka kuarto sa residensia, subong man ang ginpadak-an nga hulot kalan-an kag ginkay-o nga kusina. Ginpadak-an ang opisina sang Service, Accounting, kag Local/Design Construction. Dugang pa, may bag-o nga mga estudyo ang Audio/Video kag Sign Language, kag ginporma ang Braille Transcription Department. Sa tapos mabatian ang kasaysayan sang pagbantala sa Madagascar, nakabenepisyo ang mga bisita sa pamulongpulong sa dedikasyon nga ginhatag ni Mark Sanderson sang Nagadumala nga Hubon.

Ang katawhan ni Jehova sa Jakarta, Indonesia, naumpawan gid sang naghubas ang baha sa siudad sa tion sang dedikasyon sang bag-o nga pasilidad sang sanga sang Pebrero 14, 2015. Ang sanga nahamtang karon sa isa ka panalgan sang 42 ka panalgan nga bilding kag sa 12 ka panalgan sa apartment nga malapit diri. Ang pila ka departamento sa Bethel nahamtang sa mas gamay nga mga bilding sa kaingod. Si Anthony Morris sang Nagadumala nga Hubon amo ang namulongpulong para sa dedikasyon, kag pagkasunod nga adlaw, 15,257 ang nagtipon sa istadyum sang soccer agod mamati sa iya pamulongpulong nga “Magpadayon sa Maayo nga Buluhaton.” Ang programa nabenepisyuhan man sang 11,189 sa 41 ka lokasyon paagi sa Internet, kag amo ini ang pinakadaku nga pagtilipon sang katawhan ni Jehova sa Indonesia. Si Ronald Jacka, isa sa una nga misyonero sa Indonesia, nagsiling: “Sang nag-abot ako sang 1951, ang manugbantala sa bilog nga pungsod 26 lang. Apang karon, sobra sa 26,000 ang nagtambong sa sining pinasahi nga programa. Ginpakamaayo gid ni Jehova ang iya katawhan sa Indonesia!”