Kon Paano Atubangon ang Hinali nga Pagbalatian

Gulpi ka lang bala nagbalatian? Ti, nabal-an mo na kon daw ano ini kabudlay—sa mental, emosyonal, kag sa pinansial. Ano ang imo himuon sa sini? Paano mo buligan ang miembro sang imo pamilya ukon abyan nga nagabalatian? Bisan pa nga ang Biblia indi libro parte sa medisina, may praktikal ini nga mga prinsipio nga makabulig sa imo nga maatubang sing maayo ang bisan ano nga kabudlayan.

Mga tip nga makabulig sa imo kon may balatian ka

Magpadoktor

Ang ginasiling sang Biblia: “Ang mga mapagros wala nagakinahanglan sing manugbulong, kundi ang mga masakiton.”—Mateo 9:12.

Kon paano ini iaplikar: Magpadoktor kon kinahanglanon.

Tilawi ini: Kon posible, magpakonsulta sa pinakamaayo nga doktor ukon ospital. Kon kaisa, makabulig man kon indi lang isa ka doktor ang imo pakonsultahan. (Hulubaton 14:15) Makig-istorya sing maayo sa imo mga doktor. Isugid ang tanantanan mo nga ginabatyag sa ila para masigurado mo nga nahangpan nila ang imo sitwasyon, kag siguraduha man nga naintiendihan mo sila. (Hulubaton 15:22) Tun-i ang imo balatian, pati ang tanan nga paagi sang pagbulong nga puede himuon. Kon nabal-an mo kon ano ang posible nga matabo, mahanda mo na ang imo kaugalingon kag makahimo ka sing maayo nga desisyon parte sa imo pagpabulong.
Himua ang makapapagros nga mga batasan

Ang ginasiling sang Biblia: “May pulos ang pag-ihersisyo sang aton lawas.”—1 Timoteo 4:8, Ang Pulong sang Dios.

Kon paano ini iaplikar: Makabenepisyo ka kon may ara ka makapapagros nga batasan pareho sang regular nga pag-exercise.

Tilawi ini: Mag-exercise sing regular, magkaon sing masustansia nga mga pagkaon, kag magtulog sing bastante. Bisan pa nga naga-adjust ka sa imo balatian, nagaugyon ang mga eksperto nga kon padayunon mo ang makapapagros nga mga batasan, may maayo gid ini nga epekto sa imo. Siempre, siguruhon mo man nga ang imo ginahimo indi makapalala sang imo balatian kag indi kontra sa imo bulong.
Mangayo sing bulig sa iban

Ang ginasiling sang Biblia: “Ang matuod nga abyan nagahigugma sa tanan nga tion, kag isa ka utod nga masaligan sa tion sang kalisdanan.”—Hulubaton 17:17.

Kon paano ini iaplikar: Puede ka mabuligan sang imo mga abyan nga mabatas ang mabudlay nga mga kahimtangan.

Tilawi ini: Isugid sa imo ginasaligan nga abyan ang imo ginabatyag. Makabulig ini para maghaganhagan ang imo ginabatyag nga stress bangod sang imo balatian. Mahimo nga ang imo mga abyan kag pamilya gusto magbulig sa imo pero indi nila mahibaluan kon ano ang ila himuon. Gani ihambal sa ila kon ano ang gusto mo nga himuon nila para mabuligan ka. Indi magpaabot sing sobra, kundi pasalamati pirme ang bisan ano nga bulig halin sa ila. Mahimo kinahanglan mo man magbutang sing mga iskedyul kon san-o kag kon daw ano kalawig mo gusto bisitahan, kay basi masobrahan ka kakapoy kon kadtuan ka pirme sang imo mga abyan.
Mangin positibo

Ang ginasiling sang Biblia: “Ang tagipusuon nga malipayon maayo nga bulong, apang ang nadugmok nga espiritu nagaubos sang kusog.”—Hulubaton 17:22.

Kon paano ini iaplikar: Ang positibo nga panimuot makabulig sa imo nga indi maluyahan sing buot para maatubang mo sing mas maayo ang balatian.

Tilawi ini: Samtang naga-adjust ka sa imo bag-o nga sitwasyon, magpokus sa kon ano ang imo mahimo, indi sa mga butang nga indi mo mahimo. Indi pag-ikumparar ang imo kaugalingon sa iban, ukon sa kon ano ka sadto antes ka magbalatian. (Galacia 6:4) Makapabilin ka nga positibo kon magpahamtang ka sing mga goal ukon tulumuron nga masarangan mo lab-uton. (Hulubaton 24:10) Magbulig sa iban kon masarangan mo. Kon himuon mo ini, mangin mas malipayon ka kag makabulig ini sa imo nga indi magpokus sa imo balatian.—Binuhatan 20:35.

Buligan ka bala sang Dios nga maatubang ang balatian?

Ginapakita sang Biblia nga si Jehova nga Diosa makabulig sa isa nga nagabalatian. Bisan pa indi naton mapaabot nga ang Dios magahimo sing milagro kag ayuhon kita, ginabuligan niya ang iya mga sumilimba paagi sa masunod:

Paghidait. Si Jehova makahatag sang “paghidait sang Dios nga labaw sa tanan nga paghangop.” (Filipos 4:6, 7) Ini nga paghidait ukon kalinong sang panghunahuna makabulig sa isa nga indi matam-an sang sobra nga pagkabalaka. Ginahatagan sang Dios sina nga paghidait ang mga nagapangamuyo sa iya kag nagasugid sa iya sang ila mga ginakabalak-an.—1 Pedro 5:7.

Kaalam. Si Jehova makahatag sing kaalam para makahimo ang isa sing maalamon nga mga desisyon. (Santiago 1:5) Matigayon sang isa ini nga kaalam kon tun-an niya kag iaplikar ang wala nagabag-o nga mga prinsipio sa Biblia.

Makalilipay nga paglaum sa palaabuton. Nagapromisa si Jehova nga sa palaabuton “wala sing pumuluyo nga magasiling: ‘Nagamasakit ako.’” (Isaias 33:24) Ini nga paglaum nakabulig sa madamo nga mangin positibo bisan pa nakaeksperiensia sila sing malala nga mga balatian.—Jeremias 29:11, 12.

a Si Jehova ang ngalan sang Dios sa Biblia.—Salmo 83:18.

Kon paano buligan ang isa ka abyan nga may balatian

Mamati sing maayo. Ang isa sa pinakamaayo nga paagi nga mabuligan mo ang imo abyan amo ang pagpamati sa iya kon gusto niya mag-istorya. Indi kinahanglan nga may isabat ka gid sa tanan niya nga ginahambal. Ang importante nagapamati ka. Palabaa ang imo pasensia kag indi sia pag-akigi. Indi pagpensara nga nabal-an mo gid ang iya ginabatyag labi na gid kon indi hilmunon ang iya balatian.—Hulubaton 11:2.

Mangin positibo sa imo ginahambal. Basi indi ka kabalo kon ano ang imo ihambal, pero ang paghambal bisan sang pila lang ka positibo nga mga tinaga mas maayo sangsa maghipos lang. Kon nabudlayan ka sang imo ihambal, tinguhai nga ihambal ang simple pero sinsero nga mga tinaga, pareho sang “Indi ’ko kabalo sang ihambal ko, pero gusto ko mabal-an mo nga palangga ta ka.” Likawi ang pagsiling sing “Mas malala pa ’da ang iya sang iban” ukon “Maayo lang kay wala ka natam-an sang. . . .”

Mapakita mo nga nagaulikid ka kon mag-research ka parte sa balatian sang imo abyan. Mahimo malipay sia sa pagtinguha mo nga maintiendihan ang iya sitwasyon, kag mas nga makabulig ang imo ihambal sa iya. (Hulubaton 18:13) Pero, maghalong nga indi sia pagtudlui sang dapat niya himuon kon wala sia nagapangayo sing panugda sa imo.

Maghatag sing praktikal nga bulig. Sa baylo nga magmatumato kon paano sia buligan, pamangkuta sia kon ano ang gusto niya nga himuon mo. Pero dumduma nga basi indi gusto magpabulig sang imo abyan kay indi niya gusto nga magpabug-at sa iban. Kon matabo ina, magtanyag sing praktikal nga mga bulig pareho sang pagpanindahan, pagpaninlo, ukon iban pa nga hilikuton.—Galacia 6:2.

Indi matak-an. Samtang nagabalatian ang imo abyan, mahimo may mga tion nga indi niya pagdayunon ang inyo mga plano ukon indi niya gusto nga mag-istorya sa imo. Mangin mapinasensiahon kag intiendiha sia. Indi ka dapat matak-an sa pagbulig sa iya.—Hulubaton 18:24.