Sin-o ang Magasalbar sa Duta?

Madamo nga tawo ang nagakabalaka sa halit nga ginahimo sang iban nga tawo sa duta kag sa kabuhi nga nagadepende sa sini. Suno sa pila ka environmental expert, mas grabe na gid ang halit nga ginahimo sang tawo sa kabuhi sa duta amo nga may mga klase sang tanom kag sapat nga madali na lang maubos.

Maabot bala ang tion nga maguba sang tawo ang duta? Ukon posible bala nga magkabuhi sila sa duta nga wala nagahalit sini?

Magamadinalag-on bala ang mga tawo sa pagsalbar sa duta?

Nagapati ang madamo nga eksperto nga masarangan sang tawo nga atipanon ang duta, kag may mahimo sila para indi ini maguba bisan pa ginaistaran nila ini. Pero may mga researcher nga nagsiling nga para matabo ini, kinahanglan bag-uhon sang mga tawo ang pila ka butang sing dululungan. Nalakip sa sini nga mga pagbag-o ang masunod:

Dapat pauswagon ang paagi sa pagdumala sang duta, kagulangan, katunggan, kag kadagatan.
Paggamit sing sarisari nga pamaagi sa pagpanguma kag paggamit sing sarisari nga pamaagi sa pagsuplay sang enerhiya.
Pagbag-o sang sistema sa pagpatubas kag pagpanagtag sang pagkaon para maghaganhagan ang pagkonsumo sang karne kag isda, kag ang kalabanan nga kaunon sang mga tawo halin sa tanom. Dapat man bag-uhon ang sistema para mabuhinan ang konsumo kag ang usik sang mga tawo.
Pagbaton nga ang malipayon nga pagkabuhi wala nagadepende sa mas madamo nga materyal nga butang.

Ano sa banta mo? Mapaabot bala naton nga magakooperar ang mga gobierno, mga negosyante, kag mga indibiduwal para himuon ini nga mga pagbag-o nga wala pa gid matabo? Ukon nagapati ka bala nga indi gid ini posible kay may mga tawo nga grabe gid ka hakugan, kaugalingon lang nila ang ila ginapamensar, kag wala sila sing labot sa matabo sa palaabuton?—2 Timoteo 3:1-5.

Rason sa paglaum

Ginapasalig kita sang Biblia nga ang aton planeta indi maguba. Ginapaathag sini kon ngaa bisan ano ang himuon sang mga tawo indi nila masarangan nga salbaron ang duta, kag ginasugid sini kon ano gid nga pagbag-o ang dapat himuon. Ginasugid man sini kon paano matabo ini nga mga pagbag-o.

Kon ngaa bisan ano ang himuon sang mga tawo indi nila masarangan nga salbaron ang duta. Si Jehovaa nga Dios ang nagtuga sang duta, kag ginhatag niya sa mga tawo ang responsibilidad nga atipanon ini. (Genesis 1:28; 2:15) Mahimo lang nila ini nga responsibilidad kon magpagiya sila sa ila Manunuga kag magtuman sa iya mga instruksion. (Hulubaton 20:24) Pero wala sila magtuman kay Jehova kay gusto nila nga sila ang magdesisyon para sa ila kaugalingon. (Manugwali 7:29) Ang matuod, wala sing ikasarang ang mga tawo nga mag-atipan sa duta kon sila lang. Kag bisan ano pa ang ila himuon indi gid ini magmadinalag-on sing bug-os.—Hulubaton 21:30; Jeremias 10:23.

Ang pagbag-o nga dapat gid himuon. Katuyuan sang Dios nga pauntaton ang mga tawo sa pagguba sa duta. (Bugna 11:18) Indi niya pagkay-uhon ang mga gobierno kag ang mga organisasyon sang tawo nga nagahalit sa duta; islan niya ini. (Bugna 21:1) Amo kon ngaa nga si Jehova nagsiling: “Yari karon! Ginahimo ko nga bag-o ang tanan nga butang.”—Bugna 21:5.

Kon paano matabo ini nga pagbag-o. Islan ni Jehova ang mga gobierno sang tawo sing isa ka gobierno nga nagagahom sa langit nga ginatawag Ginharian sang Dios. Ini nga gobierno, nga ang hari si Jesucristo, amo dayon ang magagahom sa bilog nga duta.—Daniel 2:44; Mateo 6:10.

Tudluan sang Ginharian sang Dios ang mga tawo nga magkabuhi base sa matarong nga mga pagsulundan sang Dios. Kon kilalahon na sang mga tawo ang ila Manunuga kag sundon ang iya mga sugo, mangin maayo sila nga pumuluyo sang duta kag indi na nila paggub-on ini. (Isaias 11:9) Ginasugid sang Biblia kon ano ang himuon sang gobierno sang Dios para mangin malipayon ang pagkabuhi sang mga pumuluyo sini. Isa ini ka sahi sang pagkabuhi nga indi na maghalit sa duta. Himuon sini ang masunod:

Magaaman ini sing pagkaon para sa tanan.—Salmo 72:16.
Ibalik sini ang duna nga manggad sang duta.—Isaias 35:1, 2, 6, 7.
Ibalik sini ang maayo nga kaangtanan sang tawo kag sang sapat.—Isaias 11:6-8; Oseas 2:18.
Dulaon sini ang mga kalamidad.—Marcos 4:37-41.

Makasalig ka nga dali na lang himuon sang Ginharian sang Dios ini nga mga pagbag-o. Para sa dugang nga impormasyon, basaha ang artikulo nga “San-o Magagahom sa Duta ang Ginharian sang Dios?”

a Si Jehova ang ngalan sang Dios.—Salmo 83:18.

Ano ang puede naton mahimo subong para mapakita naton nga ginarespeto naton ang aton duta?

Samtang ginahulat naton nga kay-uhon sang Ginharian sang Dios ang tanan nga halit sa palibot, may mahimo kita subong para ipakita nga ginarespeto naton ang duta. Halimbawa, likawan naton nga magpinataka haboy, kag sundon naton ang kasuguan sang gobierno parte sa pag-recycle.—Juan 6:12, 13; Roma 13:1, 5.

Si Brett isa ka retirado nga environmental consultant. Ang iya nabal-an sa ecology nakabulig sa iya nga marealisar nga may isa ka Manunuga nga magasalbar sa duta. Basaha ang iya istorya.
Ang isa ka paagi nga ginapakita sang mga Saksi ni Jehova ang ila respeto sa ila Manunuga amo ang paggamit sang eco-friendly nga mga teknik nga praktikal sa ila dalagku nga mga construction project. Para makita kon ano ang ila ginhimo, tan-awa ang video nga Eco-Friendly Design Brings Honor to Jehovah.

Mga teksto sa Biblia parte sa duta

Genesis 2:15: “Ginpaistar ni Jehova nga Dios ang tawo sa hardin sang Eden sa pagpanguma kag sa pag-atipan sini.”

Buot silingon: Ginhatag sang Dios sa mga tawo ang responsibilidad nga atipanon ang ila puluy-an nga duta.

Genesis 1:28: “Ginpakamaayo sila sang Dios, kag nagsiling ang Dios sa ila: ‘Magpanganak kamo kag magdamo, pun-a ninyo ang duta kag dumalahan ini, kag gamhan ninyo ang mga isda sa dagat kag ang mga pispis kag ang tanan nga buhi nga mga sapat nga nagakamang sa duta.’”

Buot silingon: Ginhatagan sing responsibilidad ang mga tawo nga atipanon ang mga sapat.

Isaias 45:18: “Amo ini ang ginasiling ni Jehova, ang Manunuga sang langit, ang matuod nga Dios, ang Manughimo sang duta, ang nagtukod sini nga malig-on, nga wala nagtuga sini sa wala sing pulos, kundi nagbuhat sini agod puy-an: ‘Ako si Jehova, kag wala na sing iban pa.’”

Buot silingon: Wala nagbag-o ang katuyuan sang Dios para sa duta. Istaran ini sang mga tawo nga magahimo sang iya orihinal nga katuyuan.

Salmo 37:29: “Ang mga matarong magapanubli sang duta, kag magapuyo sila sa sini sa wala sing katubtuban.”

Buot silingon: Ang mga nagasunod sa matarong nga pagsulundan sang Dios magaistar sa duta sing wala katapusan.

Salmo 98:6-8: “Magsinggit sa kadalag-an sa atubangan ni Jehova nga aton Hari. Magdaguhob ang dagat kag ang tanan nga yara sa sini, ang duta kag ang mga nagaistar sa sini. Magpamalakpak ang mga suba; maghugyaw sa kalipay ang tanan nga kabukiran.”

Buot silingon: Sa paggahom sang Dios magaayo ang kahimtangan sa palibot.