2023: Mga Rason sa Paglaum—Ano ang Ginasiling sang Biblia?

Sa pagsugod sang 2023, tanan kita nagalaum sang pinakamaayo para sa aton kag sa aton pamilya. Ngaa makasalig kita nga mangin maayo ang aton palaabuton?

Ang Biblia nagahatag sang paglaum

Ginasugid sang Biblia ang maayong balita nga temporaryo lang ang aton mga problema subong kag dali na lang ini matapos. Ang matuod, ang Biblia “ginsulat sa pagtudlo sa aton. Nagahatag ini sa aton sing paglaum bangod ining Kasulatan . . . nagapabakod sa aton.”—Roma 15:4.

• Para sa dugang nga impormasyon parte sa mga promisa sang Biblia, basaha ang artikulo nga “Makalaum Kita nga Mangin Maayo ang Aton Sitwasyon sa Palaabuton.”

Ang paglaum nga makabulig sa imo subong

Ang paglaum nga ginasugid sang Biblia daw pareho sang “angkla para sa aton kabuhi.” (Hebreo 6:19, footnote) Ini nga paglaum makapabakod sa aton. Makabulig ini sa aton nga masarangan ang mga problema, mangin positibo, kag padayon nga mangin malipayon. Halimbawa:

• Hibalua kon paano ang paglaum nga ginasugid sang Biblia nakabulig sa isa ka tawo nga mauntatan ang iya adiksion. Tan-awa ang video nga Ginakapoy Na Ako sa Akon Kabuhi.

• Tan-awa kon paano ang paglaum nga ginasugid sang Biblia makabulig sa aton kon mapatyan kita sang pinalangga. Tan-awa ang video nga Paumpaw Para sa mga Napatyan.

Pabakura ang imo paglaum

Madamo nga tawo ang nagalaum nga mangin maayo pa ang sitwasyon sa ulihi, galing indi sila sigurado kon matabo gid man ini. Pero sigurado gid nga matabo ang mga promisa sang Biblia. Ngaa? Bangod ang mga promisa sang Biblia halin kay Jehova nga Diosa mismo, “nga indi makabutig.” (Tito 1:2) Si Jehova lamang ang may gahom nga tumanon ang tanan niya nga promisa. Mahimo niya “ang tanan nga luyag niya.”—Salmo 135:5, 6.

Gusto namon nga makabenepisyo ka sa masaligan nga paglaum nga ginasugid sang Biblia. Mapabakod mo ang imo pagsalig sa sini paagi sa ‘pag-usisa sing maayo sang Kasulatan.’ (Binuhatan 17:11) Para mahibaluan mo kon paano, testingi ang amon libre nga pagtuon sa Biblia nga may instruktor. Sugdi ang 2023 nga nagalaum nga mangin maayo ang palaabuton!