Ano ang Ginasiling sang Biblia Parte sa Nuklear nga Inaway?

Ara gihapon ang posibilidad nga may matabo nga nuklear nga inaway sa aton kalibutan bangod ang gamhanan nga mga pungsod padayon nga nagatago kag nagapadamo sang nuklear nga ginagamit sa inaway. Gani, normal lang nga nabalaka ang mga tawo parte sa sini. Kay samtang nagadamo ang nuklear nga mga armas, mas daku ang posibilidad nga matabo ang nuklear nga inaway. Ginakahadlukan pa gani sang mga tawo nga kon ang isa ka pungsod maggamit sang bisan gamay lang nga nuklear nga bomba, mangin rason ini nga matabo ang mas daku nga inaway nga makaguba sang kalibutan. Ang Bulletin of the Atomic Scientists nagsiling nga sa aton tion subong, “wala gid nagakadula ang posibilidad nga may matabo nga nuklear nga inaway.”

Posible gid bala nga matabo ang nuklear nga inaway? Kon huo, maguba gid man bala ang aton planeta? Kag ano ang aton himuon kon nabalaka kita parte sa posible nga matabo nga nuklear nga inaway? Ano ang ginasiling sang Biblia?

Sa sini nga artikulo

Ginasugid bala sang Biblia nga may nuklear nga inaway nga matabo?

Wala sing mabasa sa Biblia parte sa nuklear nga inaway. Pero ang posibilidad nga matabo ini, resulta sang mga batasan kag hitabo nga gintagna sang Biblia.

Ikumparar ang ginasiling sa masunod nga mga bersikulo sa Biblia sa nagakatabo sa kalibutan subong:

Bersikulo sa Biblia: Ang mga disipulo ni Jesus namangkot: “Ano bala ang tanda sang imo presensia kag sang hingapusan sang sistema sang mga butang?” Si Jesus nagsabat: “Magailinaway ang mga pungsod kag subong man ang mga ginharian.”—Mateo 24:3, 7.

Ang mga nagakatabo sa kalibutan: Ang kalabanan sa mga pungsod nga nagahimo sang nuklear nga ginagamit sa inaway amo man sa masami ang nagasugod sang gamo ukon inaway.

“Ang mga tawo sa bilog nga kalibutan nangin mas mapintas na gid sining nagligad nga mga tuig: mas nagadamo na gid ang mga kinagamo.”—The Armed Conflict Location & Event Data Project.

Bersikulo sa Biblia: ‘Sa tion sang katapusan magadis-uganay ang hari sang aminhan kag ang hari sang bagatnan.’—Daniel 11:40.

Ang mga nagakatabo sa kalibutan: Ang mga nagakontrahanay nga mga pungsod kag ang ila mga kaalyado nagadis-uganay ukon nagakompetensiahanay sa paggahom pareho sa gintagna sang Biblia. Subong, bisan wala man direkta nga ginaatake sining gamhanan nga mga pungsod ang ila kontra, padayon nila nga ginapabaskog ang ila nuklear nga mga armas.

“Sang nagligad nga pulo ka tuig, mas nagdamo na gid ang nagailinaway nga mga pungsod. Dugang pa, nagaentra ang gamhanan nga mga pungsod kag may ginadampigan sila sa nagakontrahanay nga mga pungsod.”—The Uppsala Conflict Data Program.

Bersikulo sa Biblia: “Sa katapusan nga mga adlaw magaabot ang makahalanguyos nga mga tion nga mabudlay atubangon. Kay ang mga tawo mangin . . . indi magsugot sa bisan ano nga kasugtanan, mabinutangbutangon, wala sing pagpugong sa kaugalingon, mabangis.”—2 Timoteo 3:1-3.

Ang mga nagakatabo sa kalibutan: Pareho sa mga tawo subong, ang mga manuggahom sa kalibutan wala man nagaugyunay. Mas ginapili nila nga solbaron ang ila indi pag-intiendihanay paagi sa pagpamahog ukon paggamit sang puersa sangsa kay-uhon ini sa malinong ukon mahidaiton nga paagi. Bangod sini, mas nagadaku ang posibilidad nga matabo ang isa ka nuklear nga inaway.

“Kon indi pagtinguhaan sang isa kag isa nga mag-ugyunay, mas magalala pa gid ang kinagamo.”—S. Saran kag J. Harman, World Economic Forum.

Pasugtan bala sang Dios nga matabo ang nuklear nga inaway?

Wala may ginasiling ang Biblia parte sa sini. Pero ginsambit sini ang parte sa “makahaladlok nga mga talan-awon,” ukon makapakulba nga mga hitabo, nga matabo sa aton tion subong. (Lucas 21:11) Ang isa ka halimbawa sini amo ang naglupok nga mga atomic bomb sang World War II. Ginapaathag man sang Biblia kon ngaa ginatugutan sang Dios ang mga inaway. Para sa dugang nga impormasyon, tan-awa ang video nga Ngaa Ginapasugtan sang Dios ang Pag-antos?

Maguba gid man bala ang aton planeta nga Duta?

Indi. Kay man, bisan pa maggamit liwat sang nuklear nga mga armas ang mga tawo, indi pagpasugtan sang Dios nga maguba ang bilog nga kalibutan. Ginasugid sang Biblia nga indi gid maguba ang aton planeta kag istaran ini sang mga tawo sa wala sing katapusan.

“Ang duta nagapabilin tubtob sa wala sing katubtuban.”—Manugwali 1:4.

‘Ang Dios, ang Manughimo sang duta, wala nagtuga sini sa wala sing pulos, kundi nagbuhat sini agod puy-an.’—Isaias 45:18.

Nagapati ang iban nga mga tawo nga sa palaabuton, diutay na lang nga tawo ang mabilin sa duta kag magaistar sa nagkalaguba nga lugar bangod sa nuklear nga inaway. Pero ginasiling sang Biblia nga kay-uhon ang tanan nga naguba sa duta bangod sa inaway.

“Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.”—Isaias 35:1.

Mga tawo nga malipayon nga nagaupdanay sa pag-obra sa paraiso nga duta. — Gusto sang Dios nga magkabuhi kita sing malipayon sa isa ka matahom nga duta

Ang aton duta gindesinyo sang aton Manunuga nga may ikasarang nga makay-o ang guba sini. Kag nabal-an ta man nga gamiton sang Dios ang iya gahom para kay-uhon ang duta. Mangin matahom gid ini nga puluy-an para sa tanan nga tawo sing wala katapusan.—Salmo 37:11, 29; Bugna 21:5.

Ano ang himuon mo kon nabalaka ka parte sa posible nga matabo nga nuklear nga inaway?

Ang iban nabalaka gid parte sa posible nga matabo nga nuklear nga inaway kag sa mangin resulta sini. Ang mga promisa kag laygay sa Biblia makabulig sa mga nagakabalaka para mabuhinan ang ila kahadlok. Paano?

Ginalaragway sang Biblia nga may manami nga palaabuton ang duta kag ang mga nagaistar sa sini. Ang pagtuon parte sa sini nga paglaum mangin kaangay sang “angkla para sa aton kabuhi,” kag makapahaganhagan sang aton kabalaka. (Hebreo 6:19, footnote) Para mabuhinan ang aton kabalaka, puede naton pensaron ang para lang sa subong nga adlaw. Kag untatan ang pagpamensar sang malain nga mga butang nga wala pa matabo. Pareho sa ginsiling ni Jesus, “ang tagsa ka adlaw may kaugalingon nga mga palaligban.”—Mateo 6:34.

Importante gid nga atipanon naton ang aton kaugalingon para makapamensar kita sing maayo kag makapabilin nga kalmado. Mahimo naton ini kon likawan naton ang pagbasa, pagtan-aw, kag pagpamati sang mga impormasyon nga makapabalaka sa aton. Halimbawa sini amo ang mga pagbinagbinag, prediksion, kag mga opinyon parte sa pinakabag-o nga mga balita parte sa nuklear nga inaway. Pero indi buot silingon sini nga ginalikawan naton ang mga nagakatabo sa realidad. Sa baylo, ginahimo naton ang mga butang nga makabulig sa aton para indi kita magpokus sa mga butang nga wala kita sing kontrol kag basi indi man matabo.

“Ang kabalaka sa tagipusuon sang tawo nagapabug-at sini, apang ang maayo nga pulong nagapasadya sa iya.”—Hulubaton 12:25.

Likawi ang malain nga mga balita paagi sa pagpokus sa positibo nga mga butang sa imo kabuhi.

“Kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya.”—Roma 15:13.

Mga piktyur: Lalaki nga positibo nga nagatulok sa unhan. 1. Sa likod niya, makita ang inaway kag may eroplano sang militar, mga nuclear missile, kag nagatimbuok nga aso nga ang korte daw uhong. 2. Sa atubang niya may matinlo kag malinong nga duta kag may mga bukid, kapatagan nga madamo sing tanom, nagailig nga suba, kag mga pispis. — Ginasugid sang Biblia nga sigurado gid ang aton paglaum kag maayo nga palaabuton

Ang pagtuon sing dugang pa parte sa mga promisa sang Dios makahatag sa imo sing paglaum, kalipay, kag kalinong.

Gintagna bala sang Biblia ang parte sa nuklear nga Armageddon?

Ang iban nagapati nga ang Armageddon isa ka nuklear nga inaway nga matabo sa bilog nga kalibutan. Amo kon ngaa ginapamensar nila nga magkalaguba ang duta bangod sina nga inaway.

Pero sa Biblia, ang tinaga nga “Armageddon” nagapatuhoy sa inaway “sang mga hari sa bug-os nga duta,” ukon mga gobierno sang tawo, kag sang Dios.a (Bugna 16:14, 16) Ang Armageddon indi lang palagpat nga inaway. Wala sini ginapatay ang mga tawo kag ginaguba ang duta pareho sa epekto sang paglupok sang nuklear nga bomba. Sa baylo, sa Armageddon laglagon sang Dios ang malain nga mga tawo. Gani, may matuod na nga paghidait kag seguridad.—Salmo 37:9, 10; Isaias 32:17, 18; Mateo 6:10.

Ano ang ginasugid sang Biblia nga solusyon sa inaway?

“Ginapauntat niya ang mga inaway sa bug-os nga duta. Ginabali niya ang pana kag ginautod ang bangkaw; ginasunog niya ang mga kangga sang mga hangaway.”—Salmo 46:9.

Ipakita ni Jehovab nga Dios ang iya gahom sa nagailinaway nga mga pungsod paagi sa pagpauntat sang ila kinagamo kag pagguba sang ila kagamitan sa inaway. Himuon niya ini paagi sa iya Ginharian, nga isa ka gobierno sa langit nga magagahom sa bilog nga duta.—Daniel 2:44.

Tudluan sang Ginharian sang Dios ang mga tawo kon paano magkabuhi nga may kalinong kag paghiusa. Bangod isa na lang ang gobierno nga magagahom sa bilog nga kalibutan, wala na sing mga pungsod nga magailinaway kag indi na man magtuon ang mga tawo sa pagpakig-away! (Miqueas 4:1-3) Bilang resulta, “ang tagsatagsa magapuyo sa paghidait sa luyo sang iya katamnan sing ubas kag mga kahoy nga higera, kag wala sia sing dapat kahadlukan.”—Miqueas 4:4, Maayong Balita nga Biblia.

a Basaha ang artikulo nga “Ano ang Inaway sa Armageddon?”

b Si Jehova ang personal nga ngalan sang Dios. (Salmo 83:18) Basaha ang artikulo nga “Sin-o si Jehova?”

Mabasa bala sa libro sang Bugna sa Biblia ang parte sa nuklear nga inaway?

Pamatyag sang iban, ang libro sang Bugna nagapatuhoy sa pagkaguba sang duta bangod sang nuklear nga inaway. (Bugna 6:14; 8:7-12; 16:1-21) Halimbawa, nagasiling ini nga ‘nagpanaug ang kalayo sa duta halin sa langit.’ (Bugna 13:11-13) Naintiendihan sang mga Saksi ni Jehova nga wala ini nagapatuhoy sa nuklear nga inaway sa bilog nga duta kundi sa paggamit sang mga atomic bomb sang World War II.

Bisan pa ginapatuhuyan sa libro sang Bugna ang parte sa nuklear nga mga inaway, indi katuyuan sini nga isugid ang detalyado nga impormasyon para makulbaan ang mga nagabasa. Kon ginabasa mo ang libro sang Bugna, dumduma:

Ini nga libro nagagamit sang mga tanda ukon mga simbulo, amo nga indi naton dapat ini hangpon sing literal.—Bugna 1:1.
Indi intension sini nga libro nga pahugon ang mga nagabasa sini. Kundi, nagahatag ini sang kalipay sa mga nakaintiende kag nagaaplikar sang mensahe sini.—Bugna 1:3.

Para sa dugang nga impormasyon, basaha ang artikulo nga “Ang Libro sang Bugna—Ano ang Kahulugan Sini?”