Ngaa Nagakapatay ang mga Tawo?

Ang sabat sang Biblia

Natural lang nga mamangkot kon ngaa nagakapatay ang mga tawo, ilabi na kon napatyan kita sang pinalangga gid naton. Ang Biblia nagasiling: “Ang sudlot nga nagaresulta sa kamatayon amo ang sala.”​—1 Corinto 15:56.

Ngaa ang tanan nga tawo nakasala kag nagakapatay?

Ang una nga mga tawo nga sanday Adan kag Eva napatay bangod nagpakasala sila sa Dios. (Genesis 3:17-19) Ang kamatayon ang resulta sang ila pagrebelde sa Dios, kay sia “ang tuburan sang kabuhi.”​—Salmo 36:9; Genesis 2:17.

Ginpapanubli ni Adan ang sala sa tanan niya nga kaliwatan. Ang Biblia nagasiling: “Paagi sa isa ka tawo nagsulod ang sala sa kalibutan kag ang kamatayon paagi sa sala, kag gani ang kamatayon naglapnag sa tanan nga tawo bangod sila tanan nakasala.” (Roma 5:12) Gani, ang tanan nga tawo nagakapatay bangod tanan sila nakasala.​—Roma 3:23.

Kon paano dulaon ang kamatayon

Nagpromisa ang Dios nga maabot ang tion nga ‘lamunon niya sing dayon ang kamatayon.’ (Isaias 25:8) Para madula ang kamatayon, dapat niya dulaon ang sala nga amo ang kabangdanan sini. Himuon ini sang Dios paagi kay Jesucristo, nga “nagakuha sang sala sang kalibutan.”​—Juan 1:29; 1 Juan 1:7.