Mapalangit Bala ang mga Sapat?

Ang sabat sang Biblia?

Ang Biblia nagatudlo nga sa tanan nga tinuga sa duta, limitado lang ang kadamuon sang mga tawo nga mapalangit. (Bugna 14:1, 3) Mapalangit sila para mangin hari kag saserdote kaupod ni Jesus. (Lucas 22:28-30; Bugna 5:9, 10) Ang kalabanan nga tawo banhawon para magkabuhi sa paraiso nga duta.—Salmo 37:11, 29.

Indi mabasa sa Biblia nga mapalangit ang mga sapat ukon mga ido, kag nagakaigo lang ini. Indi mahimo sang mga sapat ang mga kinahanglanon para mabaton nila ang “langitnon nga pagtawag.” (Hebreo 3:1) Lakip sa sini nga mga kinahanglanon amo ang pagkuha sing ihibalo, pagtuo, kag pagtuman sa mga sugo sang Dios. (Mateo 19:17; Juan 3:16; 17:3) Ang mga tawo lamang ang gintuga nga may paglaum nga mabuhi sing wala katapusan.—Genesis 2:16, 17; 3:22, 23.

Para makapalangit, dapat mabanhaw ang mga tinuga sa duta. (1 Corinto 15:42) Mabasa sa Biblia ang pila ka istorya parte sa pagkabanhaw. (1 Hari 17:17-24; 2 Hari 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Binuhatan 9:36-42; 20:7-12) Pero tanan nga ginbanhaw mga tawo, indi mga sapat.

May kalag bala ang mga sapat?

Wala. Ang Biblia nagasiling nga ang mga sapat kag mga tawo mga kalag. (Numeros 31:28) Sang gintuga ang una nga tawo nga si Adan, wala sia ginhatagan sing kalag kundi sia “nangin isa ka buhi nga kalag.” (Genesis 2:7, footnote) Ang kalag ginahuman sang duha ka butang: ang “yab-ok sang duta” kag ang “ginhawa sang kabuhi.”

Mapatay bala ang mga kalag?

Huo. Ang Biblia nagatudlo nga ang kalag mapatay. (Levitico 21:11, footnote; Ezequiel 18:20) Kon mapatay ang mga sapat kag mga tawo, mabalik sila sa yab-ok sang duta. (Manugwali 3:19, 20) Buot silingon, indi na sila magluntad.a

May sala bala ang mga sapat?

Wala. Makasala ang isa kon ang iya ginapensar, ginabatyag, ukon ginahimo nagakontra sa mga talaksan sang Dios. Makasala man ang isa ka tinuga kon may ikasarang sia sa paghimo sang husto nga desisyon kag wala niya ini ginhimo. Pero wala sini nga ikasarang ang mga sapat. Nagahulag sila suno sa ila instinct sa ila malip-ot nga pagkabuhi. (2 Pedro 2:12) Kon matapos na ang kalawigon sang ila pagkabuhi, mapatay sila, bisan pa wala sila sing sala.

Husto bala nga pintasan ang mga sapat?

Indi. Ginhatagan sang Dios ang mga tawo sing awtoridad sa mga sapat, pero indi para sakiton sila. (Genesis 1:28; Salmo 8:6-8) Nagaulikid ang Dios sa kaayuhan sang kada sapat—lakip ang gagmay nga mga pispis. (Jonas 4:11; Mateo 10:29) Ginsugo niya ang iya mga sumilimba nga atipanon sing maayo ang mga sapat.—Exodo 23:12; Deuteronomio 25:4; Hulubaton 12:10.

Mga bersikulo sa Biblia parte sa mga sapat

Genesis 1:28: “Ginpakamaayo . . . sang Dios [ang una nga mga tawo], kag nagsiling ang Dios sa ila: ‘Magpanganak kamo kag magdamo, pun-a ninyo ang duta kag dumalahan ini, kag gamhan ninyo ang mga isda sa dagat kag ang mga pispis kag ang tanan nga buhi nga mga sapat nga nagakamang sa duta.’”

Ang buot silingon: Ginhatagan sang Dios ang mga tawo sing awtoridad sa mga sapat.

Numeros 31:28: “Bilang buhis . . . , magkuha ka halin sa parte sang mga soldado nga nagkadto sa inaway sing isa ka kalag sa kada 500, sa mga tawo, sa mga baka, sa mga asno, kag sa mga karnero.”

Ang buot silingon: Ang mga sapat kag ang mga tawo mga kalag.

Hulubaton 12:10: “Ang matarong nagaatipan sing maayo sang iya mga sapat.”

Ang buot silingon: Ginaatipan gid sang maayo nga mga tawo ang mga sapat, lakip ang ila mga hinuptanan.

Mateo 10:29: “Indi bala ang duha ka maya ginabaligya sa isa ka sensilyo nga diutay sing balor? Apang, wala sing isa sa ila nga mahulog sa duta nga indi mahibaluan sang inyo Amay.”

Ang buot silingon: Makita sang Dios ang nagakatabo sa mga sapat kag nagaulikid sia sa ila, lakip ang gagmay nga mga pispis.

a Para sa dugang nga impormasyon, tan-awa ang kapitulo 6 sang libro nga Ano ang Ginatudlo sang Biblia sa Aton?