Ngaa Gintawag si Jesus nga Anak sang Dios?
Ang sabat sang Biblia
Masami nga ginatawag sang Biblia si Jesus nga “Anak sang Dios.” (Juan 1:49) Ang ekspresyon nga “Anak sang Dios” nagapakita nga ang Dios ang Manunuga, ukon Tuburan, sang tanan nga kabuhi, lakip na ang kay Jesus. (Salmo 36:9; Bugna 4:11) Wala ginatudlo sang Biblia nga ang Dios nangin literal nga amay, kay indi sia pareho sa mga tawo nga nagabun-ag sang anak.
Ginatawag man sang Biblia ang mga anghel nga “mga anak sang matuod nga Dios.” (Job 1:6) Kag ang Biblia nagsiling nga ang una nga tawo, si Adan, “anak sang Dios” sadto. (Lucas 3:38) Pero bangod si Jesus ang una kag ang lamang nga direkta nga gintuga sang Dios, ginalaragway sia sang Biblia nga panguna nga Anak sang Dios.
Nagkabuhi bala si Jesus sa langit antes sia natawo sa duta?
Huo. Si Jesus isa ka espiritu nga tinuga sa langit antes sia nabun-ag bilang tawo sa duta. Si Jesus mismo nagsiling: “Nagpanaug ako halin sa langit.”—Juan 6:38; 8:23.
Si Jesus ang una nga gintuga sang Dios antes ang iban pa nga butang. Parte kay Jesus, ang Biblia nagasiling:
“Sia ang . . . panganay sa tanan nga tinuga.”—Colosas 1:15.
Sia “ang nahauna sa mga tinuga sang Dios.”—Bugna 3:14.
Natuman kay Jesus ang tagna parte sa isa nga “ang iya ginhalinan halin pa sang una, halin pa sang madugay na nga panahon.”—Miqueas 5:2; Mateo 2:4-6.
Ano ang ginhimo ni Jesus antes sia nagkari sa duta?
May mataas sia nga posisyon sa langit. Amo ini ang posisyon nga ginatumod ni Jesus sang nangamuyo sia: “Amay, himayaa ako . . . kaangay sang himaya nga yara sa akon sadto upod sa imo sang wala pa ang kalibutan.”—Juan 17:5.
Kabulig sia sang iya Amay sa pagtuga sang tanan iban pa nga butang. Kaupod sang Dios si Jesus “subong batid nga manugpangabudlay.” (Hulubaton 8:30) Parte kay Jesus, ang Biblia nagasiling: “Paagi sa iya gintuga ang tanan iban pa nga butang sa langit kag sa duta.”—Colosas 1:16.
Paagi kay Jesus gintuga sang Dios ang tanan iban pa nga butang. Lakip sa mga gintuga ang tanan nga anghel kag ang aton uniberso. (Bugna 5:11) Ang pagbuligay sang Dios kag ni Jesus daw pareho sa pagbuligay sang arkitekto kag panday. Ang arkitekto ang nagahimo sang desinyo, kag ang panday ang nagapatindog sang bilding base sa desinyo.
Sia ang Pulong. Antes nangin tawo si Jesus, gintawag sia sang Biblia nga “ang Pulong.” (Juan 1:1) Buot silingon, gingamit sang Dios si Jesus para ipalab-ot ang impormasyon kag mga instruksion sa iban nga espiritu nga tinuga.
Si Jesus mahimo nangin Humalambal sang Dios para sa mga tawo sa duta. Mahimo ang Dios naghambal paagi kay Jesus, bilang ang Pulong, sang naghatag sia sing instruksion kay Adan kag Eva sa hardin sang Eden. (Genesis 2:16, 17) Mahimo si Jesus ang anghel nga naggiya sa mga Israelinhon sang una sa kamingawan kag ang iya tingog ang dapat nila tumanon.—Exodo 23:20-23.a
a Indi lang paagi sa anghel nga ginatawag Pulong nga nakighambal ang Dios. Halimbawa, naggamit sia sang mga anghel magluwas sa Panganay para ihatag ang Kasuguan sa mga Israelinhon sang una.—Binuhatan 7:53; Galacia 3:19; Hebreo 2:2, 3.