Matuod Gid Bala nga Tawo si Juan nga Manugbawtismo?
Mabasa sa Biblia nga may isa ka tawo nga ginatawag Juan nga Manugbawtismo nga nagbantala sa Judea parte sa Ginharian sang Dios. May pamatuod bala nga husto ang ginasiling sang Biblia parte sa sini nga tawo? Binagbinaga ini:
Ang Biblia nagasiling: “Si Juan nga Manugbawtismo nagbantala sa kamingawan sang Judea, nga nagasiling: ‘Maghinulsol kamo, kay ang Ginharian sang langit malapit na.’” (Mateo 3:1, 2) May iban pa bala nga reperensia nga makapamatuod sa sini? Huo.
Ang isa ka manunulat sang kasaysayan sang unang siglo nga si Flavius Josephus nagsulat parte sa isa ka tawo nga si “Juan, nga ginatawag Manugbawtismo.” Nagsiling sia nga ini nga tawo “nagpalig-on sa mga Judiyo nga magkabuhi sing matarong,” “magsimba sa Dios,” kag “magpabawtismo.”—Jewish Antiquities, Book XVIII.
Ang Biblia nagasiling nga ginsaway ni Juan si Herodes Antipas, nga manugdumala sang distrito sang Galilea kag Perea. Ginakabig ni Herodes ang iya kaugalingon nga isa ka Judiyo nga nagatuman sang Kasuguan. Ginhambalan ni Juan si Herodes nga sala ang iya ginhimo kay ginpangasawa niya si Herodias nga asawa sang iya utod. (Marcos 6:18) Ini nga rekord ginapamatud-an man sang iban pa nga reperensia magluwas sa Biblia.
Si Josephus nagsiling nga si Antipas “naluyag kay Herodias” kag “wala sing huya nga ginhagad niya sia nga magpakasal.” Nagpasugot si Herodias kag ginbiyaan niya ang iya bana para magpakasal kay Antipas.
Ang Biblia nagasiling nga “ang katawhan sang Jerusalem kag sang bug-os nga Judea kag sang tanan nga lugar sa palibot sang Jordan nagkadto [kay Juan], . . . kag ginbawtismuhan niya sila sa Suba Jordan.”—Mateo 3:5, 6.
Ginapamatud-an man ni Josephus ini nga rekord. Nagsulat sia nga “madamo nga tawo” ang nagkadto kay Juan kag “napalig-on gid sila sa iya mga panudlo.”
Maathag nga ang manunulat sang kasaysayan sang unang siglo nga si Josephus nagapati nga matuod gid nga tawo si Juan nga Manugbawtismo. Makapati man kita nga matuod gid nga tawo si Juan nga Manugbawtismo.