Marcos 1:15—“Ang Ginharian sang Dios Malapit Na”

“Nag-abot na ang gintalana nga tion, kag malapit na ang Ginharian sang Dios. Maghinulsol kamo, kag magtuo sa maayong balita.”—Marcos 1:15, Bag-ong Kalibutan nga Badbad.

“Ang tion natuman na, kag ang ginharian sang Dios malapit na; hinulsol kamo, kag magtuo sa maayong balita.”—Marcos 1:15, Ang Biblia sang Philippine Bible Society.

Kahulugan sang Marcos 1:15

Si Jesucristo nagsiling sa mga nagapamati sa iya nga ang Ginharian sang Diosa “malapit na,” bangod sia, nga mangin Hari sina nga Ginharian, kaupod nila sina nga tion.

Indi buot silingon ni Jesus nga nagsugod na sa paggahom ang Ginharian. Kay man, ginsilingan niya sang ulihi ang iya mga disipulo nga ang Ginharian sa palaabuton pa magaabot. (Binuhatan 1:6, 7) Pero nag-abot sia sa gintalana nga tion, sa tuig nga gintagna sang Biblia nga magaabot sia bilang palaabuton nga Hari.b Gani si Jesus makasiling: “Nag-abot na ang gintalana nga tion”—ang tion para sugdan niya ang iya pagbantala sang ebanghelyo, ukon maayong balita, parte sa Ginharian.—Lucas 4:16-21, 43.

Para makabenepisyo ang mga tawo sa maayong balita sang Ginharian, dapat sila maghinulsol, ukon ang pagbatyag sing kasubo sa mga sala nga nahimo kag pagsunod sa mga ginapatuman sang Dios. Ginpakita sang mga naghinulsol nga may pagtuo sila sa maayong balita parte sa palaabuton nga Ginharian.

Kaingod nga mga Teksto sang Marcos 1:15

Ginsiling ini ni Jesus sang ginsugdan niya ang iya pagbantala sa Galilea. “Sugod sadto,” siling sang kaanggid nga teksto sa Mateo 4:17, si Jesus nagbantala parte sa Ginharian sang Dios. Ang tema sang iya pagbantala amo ang Ginharian. Ang matuod, ang Ginharian ginsambit sing sobra 100 ka beses sa apat ka Ebanghelyoc, kag ang kalabanan sini ginsiling mismo ni Jesus. Sa Biblia, mas madamo sang ginhambal si Jesus parte sa Ginharian sang Dios sangsa iban nga topiko.