“Ang Akon Gugma kay Jehova Amo ang Nagsakdag sa Akon”

Isa ako ka Komunista sadto, gani paano ako nangin bahin sang isa ka relihion nga ginapatihan nga kontra sa gobierno? Kag paano nakabulig sa akon ang gugma kag paghanas ni Jehova para mabag-o ko ang akon personalidad sa mga tinuig nga gintapok ako kag ginbutang sa labor camp?

Pagpangita sang Hustisya kag Kalinong sang Hunahuna

Natawo ako sang 1930, sa Tabani, isa ka pigado nga baryo sa northern Moldova. Ang akon mga ginikanan nagpangabudlay gid sa pagsagod sang mga sapat para mapakaon kami nga anom ka kabataan. Pigado gid kami katama. Si Nanay miembro sang Russian Orthodox Church, kag si Tatay Katoliko. Pirme lang sila nagabaisay parte sa makahuluya nga mga butang nga ginapanghimo sang mga pari.

Sang 18 anyos ako, nakatapos ako sa pag-eskwela. Nag-entra ako sa Komsomol, isa ka organisasyon sang mga pamatan-on nga nagapalapnag sang panudlo sang mga Komunista. Ang katuyuan sini amo nga ihanda ang mga pamatan-on para mangin miembro sa ulihi sang Communist Party. Ginpili ako nga mangin sekretaryo sang amon grupo. Ginatudluan kami nga ang tanan nga tawo mag-ulutod kag dapat trataron sing palareho, kag kanami gid sini pamatian. Pero sang nakita ko ang inhustisya kag korapsion sa palibot ko, naluyahan gid ako.

Bilang aktibo nga miembro sang Komsomol, dapat ko suportahan ang tanan nga ginamando sang gobierno sang Soviet Union,a pati ang mando nga ipasira ang mga simbahan kag dulaon ang mga relihion. May pila ka Saksi ni Jehova sa amon baryo. Bisan pa natalupangdan ko nga honest sila kag mahidaiton, para sa akon mga panatiko sila. Wala gid ’ko kabalo, nga sa bulig sang isa sa ila, masabat ang madamo ko nga pamangkot.

Ang akon tiyo nga si Dimitriy, nga isa sa mga Saksi ni Jehova, nagaistar man sa amon baryo. Isa ka adlaw sang Mayo 1952, ginpamangkot niya ako, “Georgiy, ano ang himuon mo sa imo kabuhi?” Sia lang gid ang nagpamangkot sa akon sina. Ang matuod, madamo sing pamangkot nga wala masabat sa akon hunahuna. Halimbawa, pirme ko ginapaligban, ‘Kon may Dios, ngaa ginapasugtan niya nga matabo ang grabe nga pag-antos?’ Sa sulod sang walo ka adlaw, gingamit ni Tiyoy Dimitriy ang Biblia para masabat ang akon mga pamangkot. Kon kaisa, ginaistoryahan namon ang parte sa Dios asta sa alas tres sang kaagahon!

Pagkatapos sang amon pag-istoryahanay, nagdesisyon ako nga tun-an ang Biblia. Natun-an ko nga may Amay ako sa langit nga nagapalangga gid sa akon. (Salmo 27:10) Bisan diutay pa lang ang akon nabal-an sa Biblia, palangga ko na si Jehova kag nakabulig ini sa akon nga makahimo sing dalagku nga mga desisyon. Naghalin ako sa Communist Party bisan ginapahog ako sang amon chairman. Pagkatapos sang apat lang ka bulan nga pagtuon sa Biblia, sang Septiembre 1952, gindedikar ko ang akon kabuhi kay Jehova kag nagpabawtismo.

Natestingan ang Akon Gugma kay Jehova

Sa sina nga mga tion, gina-ban ang hilikuton sang mga Saksi ni Jehova. Pero gusto ko gid ipakita ang akon pagpalangga kay Jehova amo nga nag-volunteer ako nga magdeliber sang mga literatura sa Biblia sa pareho ko nga mga Saksi sa mga baryo. Delikado gid ini kay mahimo ka suspetsuhan sang mga tawo kag i-report sa mga awtoridad. Bisan gani ang iban nga mga Saksi, nagasuspetso man sa akon kay basi isa ako sa madamo nga sekreta (secret police agent) nga nagpakunokuno kag nakasulod sa kongregasyon. Pero wala madugay, nangin maathag nga indi ako espiya. Duha ka bulan lang sa tapos sang akon bawtismo, gin-aresto ako kag ginsentensiahan bangod sa pagdeliber sang ginadilian nga literatura.

Samtang ara ako sa pretrial detention, nga naglawig sing halos isa ka tuig, pirme ako ginainterogar sang mga agent kag ginatinguhaan gid nila nga himuon ang tanan para magkompromiso ako. Pero mabakod gid ang akon gugma kay Jehova nga Dios. Sang ulihi, may gin-iskedyul nga hearing sa siudad sang Odessa, Ukraine. Ang akon mga ginikanan kag mga utod nga indi mga Saksi ni Jehova, ginpatawag sang korte.

Gin-hearing ako bilang isa ka tawo nga natiplang kag nag-entra sa isa ka makatalagam nga sekta. Gusto sang mga awtoridad nga papatihon ang akon mga ginikanan kag mga utod nga nagbuang ako. Hinadlukan ang akon mga ginikanan. Naghibi sila kag ginsilingan ako nga talikdan ang pagka-Saksi. Pero nangin kalmado lang ako. Ginsilingan ko ang akon iloy: “Indi ka magkabalaka. Wala ako natiplang. Nakita ko ang madugay ko na ginapangita, kag indi ko gid ini pagbiyaan.” (Hulubaton 23:23) Diutay pa lang ang nahibaluan ko sa Biblia, pero bastante na ini para mangin mainunungon ako kay Jehova. Mga anom ka tuig sang ulihi, narealisar sang akon mga ginikanan nga ang akon ginapatihan amo ang kamatuoran, kag nangin Saksi ni Jehova man sila.

Ginsentensiahan ako nga mapriso sing 15 ka tuig sa labor camp kag ginpasakay ako sa tren nga nagdala sa akon sa Kolyma region, nga amo ang sentro sang madamo nga mga labor camp sa Siberia. Para makontrol sang mga guardia kag mga opisyal ang mga priso, ginakastigo nila kami kag ginapagutman. Sang primero, nagpalibog ako kon ano ang matabo sa akon.

Naeksperiensiahan Ko ang Mahigugmaon nga Pag-atipan kag Paghanas sang Dios

Pag-abot ko sa labor camp, ang pila sa 34 ka Saksi nga napriso na didto, mahalungon nga nagpamangkot sa akon: “May mga Jonadab bala sa inyo grupo?” Nakilal-an ko dayon nga mga Saksi man sila. Sila lang ang nagagamit sina nga termino sa Biblia! Gintudluan ako sining eksperiensiado nga mga kauturan kon paano sundon ang mga prinsipio sa Biblia sa mabudlay nga mga sitwasyon. Gintudluan man nila ako kon paano ipakita ang Cristiano nga mga kinaiya pareho sang paghangop kon ano nga mga butang ang maayo ukon indi.

Nag-obra ako bilang machinist sa labor camp. Isa ka adlaw, ang kaupod ko sa trabaho nga si Matphey nagatikal nga saulado niya ang 50 ka ngalan sang mga santos. Insulto ang sabat ko sa iya gani diutayan niya lang ako gintapungol pero nakadalagan ako. Sang ulihi, naglain gid ang akon buot sang nakita ko nga ginakadlawan ako sang mga kauturan. Ginpamangkot ko sila: “Ngaa nagakadlaw kamo? Naga-preaching man lang ’ko!” Mainayuhon nila ako nga ginpahanumdom nga dapat gid man naton isugid ang maayong balita pero indi naton pagpaakigon ang mga tawo. (1 Pedro 3:15) Bisan pa si Matphey wala nagarespeto sa gobierno, nagdayaw gid sia sa pagrespeto sang mga Saksi sa mga guardia kag sa mga awtoridad. Sang ulihi, nangin interesado sia sa mensahe sang Biblia. Indi ko gid malipatan ang gab-i nga sekreto sia nga ginbawtismuhan sa isa ka dram sang matugnaw nga tubig.

Wala madugay nga nakaabot kami sa labor camp, ako kag ang duha ka brother gin-agda nga mag-attend sa mga miting parte sa pulitika. Sang primero, wala kami nag-attend sa sini nga mga miting. Kay abi namon, kon mag-attend kami indi na kami neutral sa pulitika. (Juan 17:16) Gani bilang silot, ginbartolina kami sa sulod sang duha ka semana. Sang ginpagua kami, ginpaathag sa amon sang mga kauturan nga indi namon malapas ang amon neutralidad paagi lang sa pag-attend sina nga mga miting. Puede pa gani namon ini himuon nga kahigayunan para masugid sa iban ang amon pagpati. Ginbuligan gid kami sining mahigugmaon nga mga kauturan kon paano sundon ang mga prinsipio sang Biblia kon nagadesisyon.

Ang ila pagpasensia sa paghanas sa akon ebidensia gid nga palangga ako ni Jehova. Halimbawa, may isa ka pari nga napriso didto kag gin-asayn sia bilang chief accountant sa prisuhan. Kon magkitaay kami kada tigkalaon, ginabugno niya ako nga, “’Musta na, anak sang Yawa!” Gintudluan ako sang isa ka priso nga sabton ang pari sing, “OK lang ’Tay!” Makapasubo nga gintuman ko ang iya ginsiling gani nakastiguhan ako. Sang nabalitaan sang iban nga kauturan didto ang natabo, ginpaintiende nila sa akon nga sala ang akon ginhimo. (Hulubaton 29:11) Gani nangayo ako sing pasensia sa pari.

Antes ako gindala sa labor camp, naga-attend ako sing sekreto sa Cristianong mga miting kon gab-i ukon kon kaagahon. Pero sa labor camp, wala kami sing panaguan. Gani kada adlaw, bisan nagatan-aw ang mga guardia, kami sang mga kauturan nagatindog sing pabilog samtang ginabinagbinag namon ang pila ka teksto nga amon na nga daan ginsulat sa diutay nga papel. Gusto namon nga masaulo ang madamo nga teksto para madumduman namon ini pirme. Kon may guardia nga magpalapit sa amon, ginatulon namon dayon ining diutay nga mga papel.

Gintapok Pero Malab-ot Gihapon sang Gugma sang Dios

Pagkatapos nga makagua sa labor camp sang 1959, ginpadala ako sa rehiyon sang Karaganda sa Kazakhstan. Bisan pa nga ara ako sa probation, nangabay ako sa mga awtoridad nga mag-leave sing 20 ka adlaw kay mangasawa ako. Nagbiyahe ako pakadto sa rehiyon sang Tomsk sa Russia, kay may nakilala ako didto nga matutom kag matahom nga sister nga si Maria. Kay batasan ko na nga wala nagapaligoyligoy, ginsilingan ko sia: “Maria, wala na ako sing tion para mangaluyag. Pakasli na lang ’ko!” Nagpasugot sia, kag nagpakasal kami dayon sa isa lang ka simple nga seremonya. Bilib gid si Maria sa akon kay madamo ako sing ginbatas nga mga pagtilaw, kag gusto niya nga buligan ako nga magpadayon sa pag-alagad kay Jehova.—Hulubaton 19:14.

Sang mga dekada 60, indi kami makapamalaybalay, pero basta may kahigayunan, ginasugid namon sa iban ang amon mga pagpati. Kon may mag-agda sa amon nga magkadto sa ila balay ukon bisan nagabakasyon kami, ginasugid gid namon ang amon paglaum nga kabuhi nga wala sing katapusan sa duta. Ginahingalitan gid namon ang tanan nga kahigayunan nga makapanaksi. Halimbawa, nagakadto kami sa mga balay nga ginabaligya kag ginapanaksihan namon ang mga tag-iya. Bangod sini, may anom kami ka natudluan sa Biblia kag nangin Saksi ni Jehova sila.

Kon kaisa, nakapanaksi kami bisan eleksion. Isa ka adlaw, may mga sekreta nga nagkadto sa pabrika nga ginaubrahan ko upod sa pila ka brother. Sa atubang sang mga 1,000 ka upod namon sa obra, ginpamangkot nila kami kon ngaa ang mga Saksi ni Jehova wala nagaentra sa pulitika. Ginpangapinan kami sang chief engineer kag sang iban pa namon nga upod. Ginsilingan nila ang mga sekreta nga responsable kami kag mapisan nga mga trabahador. Bangod sa ila ginsiling, nangisog man kami nga ipaathag ang amon pagpati kag nagsambit pa kami sang mga teksto nga madumduman namon. Nakapanaksi kami, kag apat ka upod namon ang nangin interesado sa Biblia kag wala pa isa ka tuig, nabawtismuhan na sila.

Sang mga dekada 70, madamo nga mga interesado ang nangin Saksi ni Jehova sa Kazakhstan, gani dapat namon i-organisar ang una nga asembleya. Pero ano ang dapat namon himuon para indi kami matalupangdan sang mga awtoridad? Nagdesisyon kami nga maghiwat sang isa ka adlaw nga asembleya dungan sa isa ka kasal. Himuon ini sa isa ka baryo malapit sa siudad sang Almaty. Sa sini nga asembleya, may ginkasal gid man, kag masobra 300 ang bisita sang ginkasal! Ang akon asawa kag ang pila ka sister naghanda sang manamit nga pagkaon kag naghimo man sila sing mga dekorasyon. Nanamian gid sa sini ang mga bisita, pero mas nalipay gid sila sa mga pamulongpulong sa Biblia nga ginhatag sang mga 12 ka speaker. Sa una nga tion, namulongpulong ako base sa Biblia sa atubang sang madamo nga tawo.

Ang Gugma sang Dios Amo ang Nagsakdag sa Amon sa Tanan nga Kabudlayan

Ang akon pinalangga nga asawa nga si Maria nangin mainunungon gid sa akon sa bilog niya nga kabuhi. Mabuot sia kag pirme gid nagapasakop, kag ginauna gid niya pirme ang mga hilikuton sang Ginharian. Bisan pa nga mapagros sia nga babayi, gulpi lang sia nagmasakit sang malala nga osteoporosis amo nga na-bedridden sia sing mga 16 ka tuig. Ginbuligan ako sang amon bata nga si Lyudmila sa pag-atipan kay Maria asta nga napatay sia sang 2014.

Sang nagaantos ang akon pinalangga nga si Maria, wala gid ako sing mahimo. Pero asta sa katapusan niya nga adlaw, nagabasa kami sang Biblia kag sang makapalig-on nga mga artikulo. Pirme man namon ginaistoryahan ang parte sa bag-ong kalibutan. Kon kaisa, nagahibi ako sa tupad niya nga indi niya mabatian. Pero sa kada basa namon sang makalilipay nga mga promisa ni Jehova, nagarelaks kami kag may kusog naman kami nga magpadayon sa pagbatas.—Salmo 37:18; 41:3.

Sugod sang una nga adlaw nga nabatyagan ko ang gugma ni Jehova, pirme gid niya ako ginabuligan kag ginaatipan. (Salmo 34:19) Sang hoben pa ako kag kulang pa sing eksperiensia, nabatyagan ko ang iya pagpalangga paagi sa mga kauturan nga may pasensia gid kag sigesige nga nagbulig sa akon para mabag-o ko ang akon personalidad. Sang gintapok ako kag ginbutang sa labor camp, nabatyagan ko ang bulig ni Jehova paagi sa iya Pulong. Ginhatagan man niya ako sing kusog para maatipan ko ang akon pinalangga nga asawa nga si Maria asta nga mapatay sia. Gani makasiling gid ako nga ang akon gugma kay Jehova amo ang nagsakdag sa akon sa bilog ko nga kabuhi.