Isa ka Gamay nga Box nga May Unod nga Espirituwal nga Pagkaon

Ang kalabanan subong nga espirituwal nga pagkaon sang mga Saksi ni Jehova paagi na sa digital nga mga pormat. Pero sa madamo nga bahin sang kalibutan, ang aton mga kauturan pigado katama kag wala sila sing inuggasto para sa Internet. Ang iban naman ara sa lugar nga pirme lang wala sing kuryente, mahinay kaayo ang Internet, ukon wala gid signal ang Internet.

Pero ma-download gihapon sang aton mga kauturan ang aton mga publikasyon kag mga video bisan wala sila sing Internet. Paano nila ina nahimo?

Paagi sa JW Box. Isa ini ka gamay nga box nga ginapadala sa mga kongregasyon sa mga lugar nga mahinay kaayo ang Internet. May built-in ini nga router nga ginbakal sa iban nga kompanya, may software nga ginhimo sang Computer Department sa Bethel, kag mga publikasyon kag video nga halin sa jw.org. Ini nga box nagabili sing mga $75 U.S.

Sa Kingdom Hall, gina-download sang mga kauturan sa ila mga gadyet ang mga publikasyon kag mga video halin sa JW Box. Bisan ang daan na ukon baratuhon nga mga gadyet puede maka-download halin sa sini. Pero kon wala sing Internet ang kongregasyon, paano nila matigayon ang bag-o nga mga publikasyon? Regular nga nagapadala ang branch sang mga USB nga ang kada isa nagabili sing mga $4 U.S. May unod ini nga bag-o nga mga publikasyon kag mga video halin sa jw.org nga ginakopya sa JW Box.

Ano ang nabulig sang JW Box sa aton mga kauturan? Si Nathan Adruandra, nga isa ka amay kag nagaistar sa Democratic Republic of Congo, nagsiling: “Dugay ko na gid gusto nga maka-download sang drama nga “O Jehova, . . . sa Imo Nagasalig Ako” kag Dumduma ang Asawa ni Lot. Pero indi gid ako ka-download gani nasubuan ako. Subong, ma-download ko na ini nga mga video sa akon cellphone, kag nakabulig ini sa amon bilang mga ginikanan para matudluan namon sing mas maayo ang amon kabataan.”

Ang isa ka brother nga nagbulig sa pag-set up sang mga JW Box sa Nigeria, nagsiling: “Para sa mga kauturan, ang JW Box isa ka espesyal nga regalo halin kay Jehova. Nalipay gid sila nga mahapos na nila nga ma-download ang mga publikasyon kag mga video halin sa Teaching Toolbox.”

Sobra 1,700 ka box na ang napadala sa aton mga kauturan sa Africa, Oceania, kag South America, kag may mga plano na nga ginahimo para mapadala ini sa mas madamo pa nga mga kongregasyon. Diin nagahalin ang kuarta nga gingasto para sa sini nga proyekto? Sa mga donasyon para sa bilog kalibutan nga hilikuton paagi sa donate.jw.org. Salamat gid sa imo maalwan nga bulig.