Footnote
a Kon ikaw tago nga nag-eksperimento sa tabako, palihog mangayo ka sing bulig paagi sa pagsugid sa imo mga ginikanan sang imo problema. (Hulubaton 28:13) Mahimo nga maakig sila kon mahibal-an ang imo problema. Apang kon sila mga Cristiano, sa tapos magligad ang ila una nga pagkaakig, magakonsentrar sila sa pagbulig sa imo agod malikawan ang pagsulit sang sala nga nahimo. Ang mga manugtatap sang lokal nga kongregasyon sang mga Saksi ni Jehova makahatag man sing daku nga bulig kag pagpalig-on sa imo sa sini nga butang.—Santiago 5:14, 15.
Sa pagkamatuod, ano nga sahi sang mga abyan ang magasugyot sa imo nga maghaklo sing makamamatay nga sustansia? “Sia nga nagapakig-angot sa mga buangbuang magaantos,” paandam sang Hulubaton 13:20. Kon kinahanglanon, mangita sing bag-o nga mga abyan. Ti, ang pag-upod lamang sa mga nagapanigarilyo makatalagam sa lawas! Ang 15-anyos nga si Brenda nagsiling: “Wala sing isa sa mga abyan ko ang nagapanigarilyo. Gani wala ako sing problema tuhoy sa pag-ipit sang mga katubotubo.”
Apang, indi posible nga malikawan mo sing bug-os ang dicristiano nga mga pamatan-on. Mahimo dapat mo apinan ang imo mga pagpati kag maathag nga mangindi sa pagpanigarilyo! Indi buot silingon nga dapat mo sila sermonan tuhoy sa kalainan sang tabako. Ginpakita sang manunulat nga si Sharon Scott nga sa masami ang simple lamang nga “indi, salamat gid” tuman na. Kon indi ini epektibo, ginarekomendar niya nga ihambal mo ang imo pagpangindi sa mas matigdas nga mga pulong, “Siling ko INDI!”
Ang iban pa nga mga estratehiya amo ang paglakat, indi pagsapak sa tanyag, ukon pag-ilis sang topiko. Mahimo tilawan mo pa gani ang pag-ensayo sing abanse kon paano mo pamatukan ang pag-ipit nga manigarilyo. Kag kon ginapangabay ang detalyado nga paathag, dapat mangin handa ikaw. Subong ginasiling sang Biblia: ‘Mangin handa pirme sa paghimo sing pagpangapin sa bisan kay sin-o nga nagapangayo sing rason.’—1 Pedro 3:15.