Footnote
a Talupangda ang Efeso 5:3, 4, diin ang konteksto nagahatag sa “binuang nga hinambal” kag “malaw-ay nga linahog” sing seksuwal nga kahulugan. Gani, ang malaw-ay nga pulong kag lahog nga may kahilabtanan sa sekso indi para sa mga Cristiano.
Tagudilii ang Pagkamapasipalahon!
Ang matuod nga gugma sa Dios magapahulag sa isa ka Cristiano sa paghimo kon ano ang nagapahamuot sa Iya. (1 Juan 5:3) Subong nga ang Dios nagapakita sing kabalaka sa tanan nga tawo, ang Cristiano maluyag man magpakita sina nga balatyagon sa iya panimuot sa iban, busa nagatuman sang duha ka pinakadaku nga sugo, nga amo, ang gugma sa Dios kag sa isigkatawo. (Mateo 22:37-39) Busa, “ang tagsa sa aton magpahamuot sa iya isigkatawo sa maayo sa pagpalig-on sa iya.” (Roma 15:2) Gani pamangkuta ang imo kaugalingon, ‘Ang akon bala pinili nga pulong nagapaakig ukon nagapalig-on?’
Huo, ang pagtinlo sang hambal sang isa indi mahapos kon ang pagkamapasipalahon madugay na nga batasan. Apang, posible ini—paagi sa bulig. Ang espiritu sang Dios makabulig sa isa nga maislan ang panghambal. Apang, dapat anay ang isa mangin handa sa pagtipon sing bokabularyo nga puno sing maayo nga mga tinaga kag nian tayuyon nga—gamiton ini.—Roma 12:2.
“Ang dila nga nagahimalaut utdon,” paandam sang maalam nga si Hari Solomon. Gani indi pagtuguti ang higko sang pagkamapasipalahon nga magdagta sang imo hambal. Sa baylo, tinguhai nga mangin isa ka tawo nga nakahibalo sang matinlo nga butang nga isiling kag nagasiling sini sing mainayuhon!—Hulubaton 10:31, 32, Today’s English Version; Colosas 4:6.