Ang Balaan nga Espiritu nga Dulot ni Jehova

“Daw ano pa gid bala nga ang inyo Amay nga langitnon magahatag sing balaan nga espiritu sa mga nagapangayo sa iya!”—LUCAS 11:⁠13.

1, 2. (a) Ano ang ginsaad ni Jesus nahanungod sa balaan nga espiritu, kag ngaa makalipay gid ini? (b) Ano ang balaan nga espiritu?

SANG tigragas sang tuig 32 C.E. samtang ginabantala ni Jesus ang maayong balita sa Judea, nagpamulong sia sa iya mga disipulo nahanungod sa kaalwan ni Jehova. Naggamit sia sing pila ka epektibo nga mga ilustrasyon kag dayon naghatag sing matahom nga saad, nga nagasiling: “Kon kamo, nga malaut, makahibalo maghatag sing maayong mga dulot sa inyo mga anak, daw ano pa gid bala nga ang inyo Amay nga langitnon magahatag sing balaan nga espiritu sa mga nagapangayo sa iya!”—Lucas 11:13.

² Daw ano ka makalipay yadtong mga pulong! Samtang ginabatas naton ang kagamo sang katapusan nga mga adlaw sining kalibutan, ginaatubang ang kaawayon ni Satanas kag sang iya mga demonyo, kag nagapakig-away batok sa aton makasasala nga mga huyog, makalilipay mahibaluan nga palig-unon kita sang Dios paagi sa iya espiritu. Sa pagkamatuod, imposible ang matutom nga pagbatas kon wala ina nga pagsakdag. Naeksperiensiahan mo na bala ang gahom sining espiritu, nga amo ang aktibo nga puwersa sang Dios? Nahangpan mo bala kon daw ano ka daku ang mabulig sini sa imo? Ginagamit mo bala ini sing bug-os?

Ang Gahom sang Balaan nga Espiritu

3, 4. Iilustrar ang gahom sang balaan nga espiritu?

³ Binagbinaga anay ang gahom sang balaan nga espiritu. Dumduma ang tuig 1954. Amo ini ang tion sang ginpalupok ang bomba hidrohena sa Bikini Atoll sa Bagatnan Pasipiko. Sa gilayon gid sa tapos maglupok ang bomba, yadtong matahom nga isla ginlamon sang isa ka daku nga bola sang kalayo kag ginbayo sang isa ka lupok nga katumbas sa puwersa sang paglupok sang 15 milyones ka tonilada sang TNT. Sa diin naghalin ang subong sadto kabaskog nga puwersa sa paglaglag? Resulta yadto sang paghimo sa isa lamang ka diutay nga bahin sang uranium kag hidrohena nga amo ang sentro sang bomba nga mangin enerhiya. Apang, ano, kon baliskad sa natabo sa Bikini ang ginhimo sang mga sientipiko? Ibutang ta nga nabihag nila yadtong bug-os nga enerhiya kag ginhimo ini nga pila ka libra sang uranium kag hidrohena. Daw ano kuntani yadto ka daku nga katigayunan! Apang, may ginhimo si Jehova nga kaanggid sa sini, lamang sa mas daku nga kadakuon sang “sa ginsuguran gintuga [niya] ang mga langit kag ang duta.”—Genesis 1:1.

⁴ Si Jehova may daku nga reserba sang dinamiko nga enerhiya. (Isaias 40:26) Sa tion sang pagpanuga, mahimo gid nga gingamit niya ang pila sining enerhiya sang ginporma niya ang tanan nga materya nga nagahuman sa uniberso. Ano ang iya gingamit sa sining pagpanuga? Amo ang balaan nga espiritu. Aton mabasa: “Tungod sa pulong ni Jehova nahimo ang kalangitan, kag ang bug-os nga kasuldadusan nila paagi sa espiritu sang iya baba.” (Salmo 33:6) Kag ang kasaysayan sang pagpanuga sa Genesis mabasa: “Ang aktibo nga puwersa [balaan nga espiritu] sang Dios nagagiho sa nawong sang mga tubig.” (Genesis 1:2) Daw ano ka gamhanan nga kusog ang balaan nga espiritu!

Milagruso nga mga Buhat

5. Sa anong dungganon nga mga paagi nagapanghikot ang balaan nga espiritu?

⁵ Ang balaan nga espiritu nagapanghikot gihapon sa dungganon gid nga mga paagi. Ginagiyahan sini kag ginatuytuyan ang langitnon nga organisasyon ni Jehova. (Ezequiel 1:20, 21) Kaangay sang enerhiya nga ginpaguwa sang bomba hidrohena, sarang ini magamit sing malaglagon sa paghukom batok sa mga kaaway ni Jehova, apang nagpanghikot man ini sa iban nga mga paagi nga nagapadayaw sa aton.—Isaias 11:15; 30:27, 28; 40:7,8; 2 Tesalonica 2:8.

6. Paano ginsakdag sang balaan nga espiritu si Moises kag ang mga anak sang Israel sa ila mga pagpakig-angot sa Egipto?

⁶ Halimbawa, sang mga 1513 B.C.E., ginpadala ni Jehova si Moises sa atubangan ni Paraon sang Egipto agod pangayuon ang kahilwayan para sa mga anak sang Israel. Sa sulod sang 40 ka tuig antes sini, si Moises isa ka manugbantay sang karnero sa Midian, gani ngaa pamatian ni Paraon ang isa ka manugbantay sang karnero? Bangod nagkari si Moises sa ngalan sang lamang matuod nga Dios, si Jehova. Agod pamatud-an ini, ginhatagan sia ni Jehova sing gahom sa paghimo sing mga milagro. Makadalayaw gid ining mga milagro nga bisan gani ang Egiptohanon nga mga saserdote napilitan sa pagbaton: “Tudlo sang Dios ini!”a (Exodo 8:19) Nagpadala si Jehova sing napulo ka kalalat-an sa Egipto, ang hingapusan sini nagpilit kay Paraon nga tugutan ang katawhan sang Dios nga maghalin sa Egipto. Sang may pagkabatinggilan nga ginlagas sila ni Paraon upod sa iya hangaway, ang mga Israelinhon naluwas sang ang isa ka dalan milagruso nga ginbuksan paagi sa Dagat nga Mapula. Ginsundan sila sang Egiptohanon nga hangaway kag nalunod sila sa dagat.—Isaias 63:11-14; Hageo 2:4, 5.

7. (a) Ano ang pila ka rason kon ngaa ang balaan nga espiritu naghimo sing mga milagro? (b) Bisan pa wala na sing mga milagro nga ginapahanabo sang balaan nga espiritu, ngaa ang rekord tuhoy sa sini sa Biblia makalipay?

⁷ Huo, naghimo si Jehova paagi sa iya espiritu sing gamhanan nga milagro para sa mga Israelinhon sang panahon ni Moises, kag sa iban man nga tion. Ano ang katuyuan sadtong mga milagro? Ginsakdag sini ang mga katuyuan ni Jehova, ginpakilala ang iya ngalan, kag ginpasundayag ang iya gahom. Kag kon kaisa, subong sang natabo kay Moises, nagpamatuod ini nga ang isa ka indibiduwal ginsakdag ni Jehova. (Exodo 4:1-9; 9:14-16) Apang, ang mga milagro nga ginpahanabo sang balaan nga espiritu malaka lamang sa bug-os nga maragtas.b Mahimo gid, nga ang kalabanan sang mga indibiduwal nga nagkabuhi sang panahon sang Biblia wala gid makasaksi bisan sing isa lang, kag karon wala na ini nagakatabo. Walay sapayan, samtang kita sa karon nagapanikasog batok sa mga problema nga daw indi malandas, indi bala makalipay mahibaluan nga kon mangayo kita kay Jehova sa pagtuo, hatagan niya kita sing pareho nga espiritu nga nagsakdag kay Moises sa atubangan ni Paraon kag nagbukas sang dalan agod ang mga Israelinhon makatabok sa Dagat nga Mapula?—Mateo 17:20.

Inspirado nga mga Sinulatan

8. Ano ang papel sang balaan nga espiritu sa paghatag sing Napulo ka Sugo?

⁸ Sa tapos sang ila kahilwayan gikan sa Egipto, ginpangunahan ni Moises ang mga Israelinhon padulong sa Bukid sang Sinai, nga sa diin si Jehova naghinakop sing katipan upod sa ila kag ginhatagan sila sang iya Kasuguan. Ang labing importante nga bahin sadtong Kasuguan nga ginhatag kay Moises amo ang Napulo ka Sugo, kag ang orihinal nga mga kopya sini gintigib sa mga tapitapi nga bato. Paano? Paagi sa balaan nga espiritu. Ang Biblia nagasiling: “Kag sang nakatapos sia [Jehova] sa pagpakighambal sa iya sa Bukid sang Sinai, ginhatag niya kay Moises ang duha ka tapitapi sang Pagpamatuod, mga tapitapi nga bato nga nasulatan sang tudlo sang Dios.”—Exodo 31:18; 34:1.

9, 10. Paano ang balaan nga espiritu nangin aktibo sa pagsulat sang Hebreong Kasulatan, kag paano ini dayag gikan sa mga ekspresyon nga gingamit sang mga disipulo ni Jesus?

⁹ Dugang sa Napulo ka Sugo, naghatag si Jehova sa Israel paagi sa iya espiritu sing ginatos ka kasuguan kag mga regulasyon sa pagtuytoy sa kabuhi sang matutom nga mga lalaki kag mga babayi. Kag may dugang pa nga nag-abot. Mga siglo sa tapos sang adlaw ni Moises, nagpamatuod si Nehemias sa isa ka dayag nga pangamuyo kay Jehova: “Nag-antos ka sa ila [mga Israelinhon] sa madamo nga tuig kag nagpamatuod batok sa ila tungod sa imo espiritu paagi sa imo mga manalagna.” (Nehemias 9:30) Madamo sang inspirado nga tagna nga ginbungat sadtong mga manalagna ang ginrekord. Dugang pa, ang balaan nga espiritu nagpahulag sa matutom nga mga lalaki nga isulat ang balaan nga mga maragtas kag tinagipusuon nga mga ambahanon sang pagdayaw.

¹⁰ Si Pablo nagapamulong sining tanan nga sinulatan sang magsiling sia: “Ang bug-os nga Kasulatan gin-inspirar sang Dios.” (2 Timoteo 3:16; 2 Samuel 23:2; 2 Pedro 1:20, 21) Sa pagkamatuod, sang ginabalikwat ining mga kasulatan, ang mga disipulo ni Jesus sang unang siglo masami nga naggamit sing mga ekspresyon nga subong sang “ginpamulong anay sang balaan nga espiritu paagi sa baba ni David,” “igo gid ang ginpamulong sang balaan nga espiritu . . . paagi kay Isaias,” ukon subong lamang “ang balaan nga espiritu nagasiling.” (Binuhatan 1:16; 4:25; 28:25, 26; Hebreo 3:7) Daw ano nga pagpakamaayo nga ang balaan nga espiritu nga nag-impluwensia sang pagsulat sa Balaan nga Kasulatan amo man ang nagtipig sini agod makatuytoy ini kag makalipay sa aton karon!—1 Pedro 1:25.

Pagsandig sa Balaan nga Espiritu

11. Ano nga pagpanghikot sang balaan nga espiritu ang nakita may kaangtanan sa pagpatindog sing taberna­kulo?

¹¹ Samtang nagakampo ang mga Israelinhon sa tiilan sang Bukid sang Sinai, ginsugo sila ni Jehova nga magtukod sing isa ka tabernakulo subong sentro para sa matuod nga pagsimba. Paano nila nahimo ini? “Si Moises nagsiling sa mga anak sang Israel: ‘Tan-awa, si Jehova nagtawag sa ngalan kay Bezalel nga anak ni Uri, ang anak ni Hur, sang tribo ni Juda. Kag ginpuno niya sia sing espiritu sang Dios sa kaalam, sa paghangop kag sa ihibalo kag sa tanan nga bagay sang buluhaton.’ ” (Exodo 35:30, 31) Ginpauswag sang balaan nga espiritu ang kinaugali nga kalantip ni Bezalel, kag madinalag-on nga nadumalahan niya ang pagpatindog sadtong talalupangdon nga tinukod.

12. Paano ginpalig-on sang espiritu ang mga indibiduwal sa tumalagsahon nga mga paagi sa tapos sang panahon ni Moises?

¹² Sa isa pa ka tion sang ulihi, ang espiritu ni Jehova nagpanghikot kay Samson, kag naghatag sa iya sing labaw sa kinaugali nga kusog amo kon ngaa naluwas niya ang Israel gikan sa mga Filistinhon. (Hukom 14:5-7, 9; 15:14-16; 16:28-30) Sang ulihi pa gid, si Solomon ginhatagan sing pinasahi nga kaalam subong hari sang pinili nga katawhan sang Dios. (2 Cronica 1:12, 13) Sa idalom niya, ang Israel nagbugana sing kapin pa sa bisan ano nga tion, kag ang malipayon nga kahimtangan sini nangin sulundan sang mga pagpakamaayo nga agumon sang katawhan sang Dios sa idalom sang Milenyo nga Paggahom ni Cristo Jesus, ang Daku Pa nga Solomon.—1 Hari 4:20, 25, 29-34; Isaias 2:3,4; 11:1,2; Mateo 12:42.

13. Paano ang rekord tuhoy sa pagpalig-on sang espiritu kay Bezalel, Samson, kag Solomon nagapalig-on sa aton karon?

¹³ Daw ano nga pagpakamaayo nga ini gihapon nga espiritu ginahatag man sa aton ni Jehova! Kon ginabatyag naton nga indi kita sangkol sa paghimo sang isa ka tulumanon ukon sa pagbantala, sarang naton mapangabay si Jehova nga hatagan kita sing espiritu nga pareho sa ginhatag niya kay Bezalel. Kon nagaantos kita sing balatian ukon nagabatas sing paghingabot, ang espiritu nga naghatag kay Samson sing tumalagsahon nga kusog magapabakod man sa aton​—⁠apang, sa pagkamatuod, indi sing milagruso. Kag kon nagaatubang kita sing mabudlay nga mga problema ukon dapat maghimo sing importante nga mga desisyon, sarang naton mapangabay si Jehova, nga naghatag kay Solomon sing tumalagsahon nga kaalam, nga buligan kita sa paghikot sing maalamon. Nian, kaangay ni Pablo, kita magasiling: “May kusog ako para sa tanan nga butang bangod sa iya nga nagapabakod sa akon.” (Filipos 4:13) Kag ang saad ni Santiago maaplikar sa aton: “Kon may yara sa inyo nga nakulangan sing kaalam, papangayua sia sa Dios, kay nagahatag sia sing maalwan sa tanan nga tawo kag wala nagabasol; kag hatagan sia sini.”—Santiago 1:5.

14. Sin-o, sang dumaan nga panahon kag sa karon, ang ginsakdag sang balaan nga espiritu?

¹⁴ Ang espiritu ni Jehova yara man kay Moises sa iya hilikuton sa paghukom sa pungsod. Sang may iban nga gintangdo sa pagbulig kay Moises, si Jehova nagsiling: “Magakuha ako sing espiritu nga yara sa imo kag ibutang ini sa ila, kag magadala sila kaupod nimo sang lulan sang katawhan agod nga indi ikaw lamang ang magdala sini.” (Numeros 11:17) Sa amo, yadtong mga lalaki wala magpanghikot sa ila kaugalingon nga kusog. Ginsakdag sila sang balaan nga espiritu. Mabasa naton nga sang ulihi pa nga mga okasyon, ang espiritu ni Jehova yara man sa iban pa nga mga indibiduwal. (Hukom 3:10, 11; 11:29) Sang ginhaplas ni Samuel si David subong palaabuton nga hari sang Israel, ang rekord nagasiling: “Ginkuha ni Samuel ang sungay nga may lana kag ginhaplas sia sa tunga sang iya mga utod. Kag ang espiritu ni Jehova nagpanghikot kay David kutob sadtong adlaw padayon.” (1 Samuel 16:13) Sila karon nga may mabug-at nga mga salabton—sa pamilya, sa kongregasyon, ukon sa organisasyon—mapalig-on sa paghibalo nga ang espiritu sang Dios nagasakdag gihapon sa iya mga alagad samtang ginatuman nila ang ila mga obligasyon.

15. Sa anong paagi ginpalig-on sang balaan nga espiritu ang organisasyon ni Jehova (a) sang mga adlaw nanday Hageo kag Zacarias? kag (b) sa karon?

¹⁵ Mga pila ka libo ka tuig sa tapos sang adlaw ni Moises, ang mga matutom gikan sa mga anak sang Israel nagbalik sa Jerusalem halin sa Babilonia upod ang tulumanon nga patindugon liwat ang templo. (Esdras 1:1-4; Jeremias 25:12; 29:14) Apang, may mabudlay nga mga sablag nga nag-utwas, kag nagluya ang ila buot sa madamo nga tuig. Sang ulihi, ginbangon ni Jehova ang mga manalagna nga sanday Hageo kag Zacarias agod palig-unon ang mga Judiyo nga indi magsandig sa ila kaugalingon nga kusog. Apang paano mahimo ini nga hilikuton? “ ‘Indi sa kusog, ukon sa gahom, kundi sa akon espiritu,’ siling ni Jehova sang kasuldadusan.” (Zacarias 4:6) Kag paagi sa pagsakdag sang espiritu sang Dios, ang templo natukod. Daku man ang nahimo sang katawhan sang Dios karon. Ang pagbantala sing maayong balita nagsangkad sa bilog nga duta. Minilyon ka indibiduwal ang ginatudluan sa kamatuoran kag pagkamatarong. May mga kombension nga ginaorganisar. May mga Kingdom Hall kag mga sanga talatapan nga ginapatindog. Ang kalabanan sini nahimo walay sapayan sang mabaskog nga pagpamatok. Apang wala nagaluya ang buot sang mga Saksi ni Jehova, kay nahibaluan nila nga ang tanan nga butang nahimo nila, indi paagi sa militar nga kusog, ukon sa kusog sang tawo, kundi paagi sa espiritu sang Dios.

Ang Espiritu sang Dios sang Unang Siglo

16. Ano ang naeksperiensiahan sang mga alagad ni Jehova sa wala pa ang Cristianong panahon tuhoy sa pagpanghikot sang espiritu sang Dios?

¹⁶ Subong nakita na naton, ang mga alagad sang Dios sa wala pa ang Cristianong panahon nakahibalo gid tuhoy sa gahom sang espiritu sang Dios. Nagsandig sila sa sini sa pagbulig sa ila nga tumanon ang mabug-at nga mga obligasyon kag ang kabubut-on sang Dios. Nahibaluan man nila nga ang Kasuguan kag ang iban pa balaan nga mga sinulatan gin-inspirar, ginsulat sa idalom sang impluwensia sang espiritu ni Jehova, kag sa amo ‘Pulong sang Dios’ ini. (Salmo 119:105) Apang, ano ang masiling tuhoy sa Cristianong dag-on?

17, 18. Ano ang pila sang milagruso nga mga pagpahayag sang espiritu sang Cristianong dag-on, kag ano nga katuyuan ang natuman sini?

¹⁷ Ang unang siglo sang aton Komon nga Dag-on nakakita man sang dalayawon nga mga pagpanghikot sang espiritu sang Dios. May yara gin-inspirar sang espiritu nga pagpanagna. (1 Corinto 14:1,3) Bilang katumanan sang saad ni Jesus nga ang balaan nga espiritu magapahanumdom sa iya mga disipulo sang tanan nga butang nga ginsiling niya kag magatudlo sa ila sing dugang pa nga mga bahin sang kamatuoran, madamo nga tulun-an ang ginsulat sa idalom sang impluwensia sang balaan nga espiritu. (Juan 14:26; 15:26, 27; 16:12, 13) Kag may yara mga milagro, nga ipaathag sing kapin ka bug-os sa amon masunod nga artikulo. Sa pagkamatuod, ang unang siglo ginsugdan paagi sa isa ka talalupangdon nga milagro. Mga tuig 2 B.C.E., natawo ang isa ka pinasahi nga lapsag, kag subong tanda, ang iya lamharon nga iloy isa ka ulay. Paano ini natabo? Paagi sa balaan nga espiritu. Ang rekord nagasiling: “Ang pagkatawo ni Jesucristo subong sini nga bagay. Sang kalaslon ang iya iloy nga si Maria kay Jose, sa wala pa sila maghiusa nasapwan nga nagpanamkon sia tungod sa balaan nga espiritu.”—Mateo 1:18; Lucas 1:35, 36.

¹⁸ Sang magdaku si Jesus, gintabog niya ang mga demonyo, gin-ayo niya ang mga nagbalatian kag ginbanhaw pa gani niya ang mga patay paagi sa gahom sang balaan nga espiritu. Ang iban sang iya mga sumulunod naghimo man sing mga milagro kag gamhanan nga mga buhat. Ining pinasahi nga mga abilidad mga dulot sang espiritu. Ano ang katuyuan sini? Subong sang nahimo anay sang nauna nga mga milagro, ginpauswag sini ang mga katuyuan sang Dios kag ginpahayag ang iya gahom. Dugang pa, ginpakita sini ang pagkamatuod sang ginsiling ni Jesus nga sia ginpadala sang Dios; kag sang ulihi, nagpamatuod ini nga ang unang-siglo nga Cristianong kongregasyon amo ang pinili nga pungsod sang Dios.—Mateo 11:2-6; Juan 16:8; Binuhatan 2:22; 1 Corinto 12:4-11; Hebreo 2:4; 1 Pedro 2:9.

19. Paano ang aton pagtuo napalig-on sang kasaysayan sang Biblia tuhoy sa mga milagro ni Jesus kag sang iya mga apostoles?

¹⁹ Apang, nagsiling si apostol Pablo nga yadtong milagruso nga mga pagpahayag sang espiritu para lamang sa una nga mga adlaw sang kongregasyon kag magataliwan, gani indi naton karon makita ina nga mga milagro sang balaan nga espiritu. (1 Corinto 13:8-11) Sa gihapon, ang mga milagro nga ginhimo ni Jesus kag sang iya mga apostoles indi lamang isa ka makawiwili nga maragtas. Ginapalig-on sini ang aton pagtuo sa saad sang Dios nga ang balatian kag kamatayon wala sing duog sa idalom sang paggahom ni Jesus sa bag-ong kalibutan.—Isaias 25:6-8; 33:24; 65:20-24.

Benepisyo Gikan sa Balaan nga Espiritu sang Dios

20, 21. Paano kita makatigayon sing balaan nga espi­ritu?

²⁰ Daw ano ka gamhanan nga puwersa ining espiritu! Apang paano ini matigayon sang mga Cristiano karon? Una, nagsiling si Jesus nga dapat kita mangayo sini, gani ngaa indi himuon ina gid? Mangamuyo kay Jehova nga hatagan ikaw sining dalayawon nga dulot indi lamang sa tion sang kahuol kundi sa tagsa ka okasyon. Dugang pa, basaha ang Biblia agod nga ang balaan nga espiritu makapakighambal sa imo. (Ipaanggid ang Hebreo 3:7.) Magpamalandong sa imo ginabasa kag iaplikar ini agod nga ang balaan nga espiritu mangin isa ka impluwensia sa imo kabuhi. (Salmo 1:1-3) Dugang pa, makig-upod—sa indibiduwal, sa mga kongregasyon, kag sa mga asambleya—upod sa iban nga nagasandig sa espiritu sang Dios. Daw ano ka bugana nga ginapabakod sang balaan nga espiritu ang mga tawo nga nagabulahan sa ila Dios “sa mga katilingban”!—Salmo 68:26.

²¹ Indi bala isa ka maalwan nga Dios si Jehova? Nagasiling sia nga mangayo lamang kita sing balaan nga espiritu kag ihatag niya ini sa aton. Daw ano ka binuang nga magsandig kita sa aton kaugalingon nga kaalam kag kusog samtang sarang naton mabaton ining gamhanan nga bulig! Apang, may yara iban nga mga butang tuhoy sa espiritu sang Dios nga nagaapektar sa aton subong mga Cristiano, kag ipaathag ini sa masunod nga artikulo.

[Mga footnote]

Masabat Mo Bala ang Masunod nga mga Pamangkot?

◻ Paano gintuga ni Jehova ang tanan nga materya sa uniberso?

◻ Ano ang pila ka paagi nga sa diin ang balaan nga espiritu nagpanghikot sang wala pa ang Cristianong panahon?

◻ Paano nagalipay sa aton karon ang paghibalo sang kon ano ang nahimo sang balaan nga espiritu sang dumaan nga panahon?

◻ Paano kita makatigayon sing balaan nga espiritu?

[Laragway sa pahina 10]

Ang espiritu nga naghatag kay Samson sing labaw sa kinaugali nga kusog makahatag sa aton sing gahom para sa tanan nga butang