San-o Gintuga sang Dios ang Uniberso?
Ang sabat sang Biblia
Wala sing ginsiling ang Biblia kon san-o gintuga sang Dios ang uniberso ukon kon daw ano kadugay natapos ini. Nagsiling lang ini: “Sa ginsuguran gintuga sang Dios ang langit kag ang duta.” (Genesis 1:1) Wala sing ginsiling ang Biblia kon san-o gid natabo ang “ginsuguran.” Pero, ginapahangop sang Genesis nga natabo ini antes ang anom ka “adlaw” nga pagpanuga.
Ang kada adlaw bala sang pagpanuga literal nga 24 oras?
Indi. Depende sa konteksto, ang tinaga nga “adlaw” sa Biblia nagapatuhoy sa indi palareho nga kalawigon sang tion. Halimbawa, may isa ka bahin sang Biblia nga nagsiling nga ang bug-os nga pagpanuga naglawig sang isa ka adlaw lang.—Genesis 2:4.
Ano ang natabo sa sulod sang anom ka adlaw nga pagpanuga?
Ginhimo sang Dios ang “wala sing porma kag mahawan” nga duta nga mapuy-an nga planeta. (Genesis 1:2) Dayon ginhimo niya ang mga tinuga nga may kabuhi sa duta. Ginrekord sang Biblia ang natabo sa sulod sang anom ka adlaw nga pagpanuga:
Una nga adlaw: Ginpalab-ot sang Dios ang kapawa sa duta, dayon may adlaw kag gab-i sa duta.—Genesis 1:3-5.
Ikaduha nga adlaw: Ginpaluntad sang Dios ang kahawaan ukon ulot sa katubigan sang duta kag sa katubigan sang kahawaan.—Genesis 1:6-8.
Ikatlo nga adlaw: Ginpaluntad sang Dios ang mamala nga duta. Gintuga man niya ang mga pananom.—Genesis 1:9-13.
Ikap-at nga adlaw: Ginhimo sang Dios nga makita sa duta ang kasanag sang adlaw, bulan, kag mga bituon.—Genesis 1:14-19.
Ikalima nga adlaw: Gintuga sang Dios ang mga tinuga sa katubigan kag ang mga kapispisan.—Genesis 1:20-23.
Ikaanom nga adlaw: Gintuga sang Dios ang mga kasapatan kag ang mga tawo.—Genesis 1:24-31.
Pagkatapos sang ikaanom nga adlaw, nagpahuway ukon nag-untat sa pagpanuga ang Dios.—Genesis 2:1, 2.
Ang rekord bala sang Genesis sibu sa siensia?
Wala nagsiling ang Biblia nga pareho ini ka detalyado sa siensia sang ginrekord sini ang parte sa pagtuga sang duta. Pero ginpasunod sini ang paglaragway sang pagpanuga sa paagi nga maintiendihan sang mga bumalasa bisan pa sang una nga panahon, kag nahisuno man ini sa mga napamatud-an sang siensia. Ang isa ka eksperto sa siensia, si Robert Jastrow nagsiling: “Indi gid man pareho ang tanan nga detalye, pero pareho ang napamatud-an sang siensia sa ginasiling sang Genesis sa Biblia parte sa ginsuguran sang kabuhi; ang pagpasunod sang mga hitabo tubtob sa pagluntad sang tawo nahanabo sing hinali sa isa ka espesipiko nga tion.”
San-o gintuga ang adlaw, bulan, kag mga bituon?
Ang adlaw, bulan, kag mga bituon nalakip sa pagtuga sa “langit” sang “ginsuguran.” (Genesis 1:1) Pero ang kasanag sini indi pa makalapos sa duta bangod sang madamol nga atmospera sang duta. (Genesis 1:2) Gani bisan may kasanag sa nahauna nga adlaw, ang ginahalinan sini nga kasanag indi pa makita sa duta. Sang ikap-at nga adlaw, nagsinaw ang atmospera. Ang Biblia nagsiling nga ang adlaw, bulan, kag mga bituon naghatag sing “kasanag sa duta,” ginalaragway sini ang makita sang tawo kon magtulok sia sa langit.—Genesis 1:17.
Daw ano na kadugay ang duta suno sa Biblia?
Wala sing ginsiling ang Biblia kon daw ano na kadugay ang duta. Ang Genesis 1:1 nagsiling lang nga ang uniberso, lakip ang aton ginapuy-an nga duta, may ginsuguran. Wala ini nagakontra sa napamatud-an nga mga prinsipio sang siensia ukon sa ginabulubanta sini nga kadugayon sang duta.