“Ang Dios sang Paghidait” Nagaulikid sa mga Nasit-an
GINAATHAG sang Biblia nga pamilyar anay si David sa kasisit-an. Sa pila ka tuig nagkabuhi sia subong isa ka pugante, wala kaluoy nga ginlagas sang isa ka malauton kag batinggilan nga hari, nga determinado gid sa pagpatay sa iya. Sa sining tion sang kasisit-an, si David nanago sa nabaw-ing nga mga lugar. Apang may ginhimo pa sia. Hanuot niya nga ginpangamuyo kay Jehova ang tuhoy sa iya kalalat-an. “Sa akon tingog, nagatuaw ako sing bulig kay Jehova,” sulat niya sang ulihi tuhoy sa iya kahul-anan. “Ginaula ko ang akon yamo sa atubangan niya; ginapakita ko sa atubangan niya ang akon kalisdanan.”—Salmo 142:1, 2.
Karon, mahimo nga tiawtiawan sang iban ang pagsalig ni David sa Dios. Mahimo sila magsiling nga ang pangamuyo isa lamang ka paagi agod palinungon ang hunahuna kag sa praktikal nga mga paagi isa lamang ini ka pag-uyang sing tion. Apang, ang pagsalig ni David sa Dios nagakaigo, kay sang ulihi ang iya mga kaaway nalutos. Nagahinumdom sang iya inagihan, si David nagsulat: “Ining isa nga ginsit-an nagtuaw, kag ginpamatian sia ni Jehova. Kag sa tanan niya nga kalisdanan ginluwas Niya sia.” (Salmo 34:6) Ang matuod nga Dios nga gindangpan ni David gintawag man subong “ang Dios sang paghidait.” (Filipos 4:9; Hebreo 13:20) Magahatag bala sia sing kaumpawan gikan sa kasisit-an, nga nagaresulta sa paghidait para sa aton?
Si Jehova Nagaulikid sa Imo
Si Jehova nakahibalo sang mga kalisdanan sang iya katawhan. (Salmo 34:15) Matinatapon sia sa mga kinahanglanon indi lamang sang iya mga alagad subong isa ka grupo kundi sang tagsa man ka indibiduwal nga nahadlok sa iya. Sang gindedikar ang templo sa dumaan nga Jerusalem, si Solomon nakitluoy kay Jehova nga pamatian ang “bisan ano nga pangamuyo, ang bisan ano nga pag-ampo nga himuon sang bisan sin-o nga tawo ukon sang imo bug-os nga katawhan nga Israel, kay ang kada isa nakahibalo sang iya kaugalingon nga kalalat-an kag sang iya kaugalingon nga kasakit.” (2 Cronica 6:29) Subong sang ginbaton ni Solomon, ang tagsa ka indibiduwal may iya kaugalingon pinasahi nga kasisit-an nga dapat batason. Para sa isa ka tawo mahimo nga balatian ini sa lawas. Para sa iban naman, kasakit sa balatyagon. Ang pila mahimo nga ginalisdan bangod sa pagkapatay sang isa ka hinigugma. Ang pagkawalay palamugnan, kabudlayan sa pangabuhi, kag mga problema sa pamilya kinaandan man nga mga kasisit-an sa sining mabudlay nga mga tion.
Hunahunaa sa makadali ang tuhoy sa ‘imo kaugalingon nga kalalat-an kag sa imo kaugalingon nga kasakit.’ Kon kaisa ayhan nabatyagan mo ang balatyagon ni salmista David, nga nagsulat: “Padayon ako nga naglaum nga may isa nga magapakita sing kahanuklog, apang wala gid; kag sing mga manuglugpay, apang wala gid ako sing nakita.” Apang, makasalig ka nga ang Dios nabalaka sa imo kahimtangan, kay sang ulihi sa amo man nga salmo, si David nagsulat: “Si Jehova nagapamati sa mga imol, kag indi gid niya pagtamayon ang iya kaugalingon nga mga binilanggo.”—Salmo 69:20, 33.
Nagaaplikar sang pinamulong ni David sa masangkad nga kahulugan, makasalig gid kita nga ang Manunuga sang katawhan nagapamati sa mga pangamuyo sang mga nabilanggo, kon hambalon pa, sa ila mga kasisit-an. Labaw pa sa sina, nagahulag sia sa ila kahimtangan. Binagbinaga ang masunod nga mga pinamulong nga nagapakita sang kaluoy ni Jehova sa mga nasit-an.
“Dili ninyo pagpiutan ang bisan sin-o nga balo nga babayi ukon ilo nga bata nga lalaki. Kon papiutan gid ninyo sila, nian kon magtuaw sila sa akon, sa pagkamatuod pamatian ko ang ila pagtuaw; kag magadabdab ang akon kasingkal.”—Exodo 22:22-24.
“Indi bala pahanabuon sang Dios nga mahatagan sing katarungan ang iya mga pinili nga nagatuaw sa iya sa adlaw kag gab-i, bisan pa nga sia mabinatason sa ila?”—Lucas 18:7.
“Luwason niya ang isa ka imol nga nagatuaw sing bulig, subong man ang isa ka nasit-an kag ang bisan sin-o nga wala sing manugtabang. Kaluuyan niya ang isa ka kubos kag ang isa ka imol, kag ang mga kalag sang mga imol luwason niya. Tubson niya ang ila kalag gikan sa pagpigos kag gikan sa kasingki, kag ang ila dugo mangin bilidhon sa iya mga mata.”—Salmo 72:12-14.
“Sia nga nagatandog sa inyo [mga katawhan sang Dios sa duta] nagatandog sang tawotawo sang akon mata.”—Zacarias 2:8.
Ining pila ka halimbawa nagailustrar sang tudok nga pag-ulikid sang aton Manunuga sa kaayuhan sang iya katawhan. Gani, may maayo gid kita nga rason nga sundon ang laygay ni apostol Pedro: ‘Ihaboy ninyo sa iya ang tanan ninyo nga kabalaka, kay sia nagaulikid sa inyo.’ (1 Pedro 5:7) Apang paano ang Dios makabulig sa aton sa mga tion sang kasisit-an?
Kon Paano Ginabuligan sang Dios ang mga Nasit-an
Subong sang nakita na naton, sang si David ginsit-an, hanuot sia nga nangamuyo sing panuytoy sa Dios. Sa amo man nga tion, naghimo sia sing paagi nga pakanayon ang kahimtangan, nangin lantip sa pagpalagyo sa mga nagalagas sa iya. Busa, ang pagsalig kay Jehova lakip na ang personal nga panikasog nakabulig kay David nga mabatas ang iya kalisdanan. Ano ang aton matun-an gikan sa sini?
Kon kita ginasit-an, indi gid malain para sa aton nga magmatumato nga malubad ang problema. Halimbawa, kon ang isa ka Cristiano nawad-an sing trabaho, indi bala sia manikasog nga mangita sing trabaho? Ukon kon nagamasakit sia, indi bala sia magpabulong? Huo, bisan si Jesus, nga may ikasarang sa pag-ayo sang tanan nga sahi sang balatian, nagbaton nga ‘ang nagamasakit nagakinahanglan sing manugbulong.’ (Mateo 9:12; ipaanggid ang 1 Timoteo 5:23.) Sa pagkamatuod, ang pila ka kalisdanan indi mahimo madula; dapat gid lang ini nga batason. Apang, wala ginatamod sang matuod nga Cristiano ang pag-antos subong isa mismo ka kinaiya, subong sang pagtamod sang iban. (Ipaanggid ang 1 Hari 18:28.) Sa baylo, ginahimo niya ang bisan anong tikang nga masarangan niya agod malandas ang iya kasisit-an.
Apang, sa amo man nga tion, makatarunganon nga ipangamuyo ini kay Jehova. Ngaa? Una, paagi sa pagsalig sa aton Manunuga, ginabuligan kita nga “pat-uron ang mas importante nga mga butang.” (Filipos 1:10) Halimbawa, kon nagapangita sing trabaho, ang mapangamuyuon nga pagsalig sa Dios magabulig sa aton nga indi pagbatunon ang trabaho nga nagasupak sa mga prinsipio sang Biblia. Likawan man naton nga ‘mapatalang gikan sa pagtuo’ sang gugma sa kuwarta. (1 Timoteo 6:10) Sa pagkamatuod, kon nagahimo sing mabug-at nga mga desisyon—nahanungod sa trabaho ukon sa bisan anong iban pa nga bahin sang kabuhi—dapat naton sundon ang laygay ni David: “Ihaboy ang imo lulan kay Jehova, kag sia magaalay-ay sa imo. Indi gid sia magtugot nga malingkang ang matarong.”—Salmo 55:22.
Ang pangamuyo nagabulig man sa aton nga huptan ang aton pagkatimbang sa hunahuna, agod indi kita madaug sang aton kasisit-an. Si apostol Pablo nagsulat: “Sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay.” Upod ang anong resulta? “Ang paghidait sang Dios nga nagalabaw sa tanan nga panghunahuna magaamlig sang inyo tagipusuon kag sang inyo painuino paagi kay Cristo Jesus.” (Filipos 4:6, 7) Huo, ang paghidait, ang paghidait sang Dios. Ina nga paghidait “nagalabaw sa tanan nga panghunahuna,” gani magapalig-on ini sa aton kon ginabug-atan kita sing malisod nga mga emosyon. ‘Magaamlig ini sang aton tagipusuon kag painuino,’ busa nagabulig sa aton nga likawan ang padasudaso kag dimaalamon nga buhat, nga makadugang sa aton kasisit-an.—Manugwali 7:7.
Madamo pa ang mahimo sang pangamuyo. Daku ang mabulig sini sa kon ano ang madangatan sang isa ka kahimtangan. Binagbinaga ang isa ka halimbawa sa Biblia. Sang si apostol Pablo ginbilanggo sa Roma, ginpalig-on niya ang mga masigka-Cristiano nga ipangamuyo sia. Ngaa? “Nagalaygay ako sa inyo sing labi pa gid sa paghimo sini,” sulat niya sa ila, “agod nga mapabalik ako sa inyo sa labing madali.” (Hebreo 13:19) Nahibaluan ni Pablo nga ang dalayon nga mga pangamuyo sang iya mga masigkatumuluo may epekto sa kon san-o sia buy-an.—Filemon 22.
Mabag-o bala sang pangamuyo ang resulta sang imo kasisit-an? Siguro. Apang, dapat naton mahangpan nga wala pirme ginasabat ni Jehova ang aton mga pangamuyo sa paagi nga ayhan ginapaabot naton. Halimbawa, sulit-sulit nga ginpangamuyo ni Pablo ang tuhoy sa iya “ungon sa unod”—ayhan isa ka pisikal nga problema may kaangtanan sa iya panan-aw. Sa baylo nga dulaon ang kasisit-an, ang Dios nagsiling kay Pablo: “Ang akon di-bagay nga kaluoy tuman na sa imo; kay ang akon gahom ginahimpit sa kaluyahon.”—2 Corinto 12:7-9.
Gani kon kaisa ang aton mga kasisit-an indi pagadulaon. Sa baylo, may kahigayunan kita nga pamatud-an ang aton pagsalig sa aton Manunuga. (Binuhatan 14:22) Dugang pa, makasalig kita nga bisan pa wala ginadula ni Jehova ang kasisit-an, “magahatag [sia] sing lulutsan agod nga makasarang [kita] sa pagbatas.” (1 Corinto 10:13) Huo, may maayo gid nga rason nga si Jehova ginatawag nga “Dios sang tanan nga lugpay, nga nagalugpay sa aton sa tanan naton nga kapipit-an.” (2 Corinto 1:3, 4) Ginahatag niya sa aton kon ano ang kinahanglan naton agod makabatas nga may tumalagsahon nga paghidait.
Sa Dili Madugay—Isa ka Kalibutan nga Wala sing Kasisit-an!
Ang Manunuga nagasaad nga paagi sa iya Ginharian, dulaon niya sa dili madugay ang mga kasisit-an sang tawo. Paano niya ini himuon? Paagi sa pagdula kay Satanas nga Yawa, ang pangulo nga manugsugyot sang kasisit-an kag ang pangunang kaaway sang paghidait, nga ginapakilala sang Biblia subong “ang dios sining sistema sang mga butang.” (2 Corinto 4:4) Apang sa dili madugay ang iya pagkontrol sa katawhan tapuson. Ang pagdula sa iya magabukas sang dalan para sa dimaisip nga mga pagpakamaayo sa mga nagakahadlok sa Dios. Ang Biblia nagasaad nga “pahiran [ni Jehova] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”—Bugna 21:1-4.
Ang isa bala ka kalibutan nga wala sing kasisit-an daw indi mapatihan? Naanad na kita magkabuhi nga may kalisdanan sa bagay nga nabudlayan kita sa paghunahuna nga madula ini. Apang ang pagdula sa kahadlok, paghimud-os, kag kalamidad amo gid ang gintuyo sang Dios sa katawhan sa pagpanuga, kag ang iya katuyuan magamadinalag-on.—Isaias 55:10, 11.
Amo ini ang paglaum nga nakita nanday Sonia, Fabiana, kag Ana, nga ginhinambitan sa naunang artikulo. Si Sonia, nga ang iya duha ka anak nga lalaki napatay bangod sa AIDS, nakaagom sing daku nga paghidait gikan sa paglaum nga ginahatag sang Biblia—ang pagkabanhaw sang matarong kag dimatarong. (Binuhatan 24:15) “Isa ka butang ang pat-od,” siling niya, “ang amon paglaum nagalabaw sa bisan ano man nga kasakit.”
Samtang nagapuyo pa sa balay-alaypan, si Ana ginduaw sang isa sang mga Saksi ni Jehova. “Ginpakita niya sa akon ang ngalan ni Jehova sa Biblia,” siling ni Ana, “kag naghibi ako sa kalipay. Kinahanglan ko gid ang bulig, kag natun-an ko nga may isa ka Dios gali nga nagaulikid sa aton.” Sa tapos makahalin sa balay-alaypan, ginbaton ni Ana ang isa ka pagtuon sa Biblia kag nagtuon sing dugang pa tuhoy sa mga saad ni Jehova. Nian gindedikar niya ang iya kabuhi kay Jehova kag ginsimbuluhan ini paagi sa bawtismo. “Sugod sadto padayon ako nga nagsalig kay Jehova paagi sa pangamuyo, kag nalugpayan ako bangod sa pagsalig nga buligan niya ako.”
Si Fabiana man nakasapo sing daku nga lugpay kag kalinong sa hunahuna sa iya kasisit-an paagi sa pagtuon tuhoy sa mga saad sang Dios para sa palaabuton. “Ang pagtuon sa kamatuoran gikan sa Biblia kaangay sa paghalin sa tuman kadulom kag mamingaw nga duog kag sa pagsulod sa mahawan, masanag, kag matahom nga duog.”—Ipaanggid ang Salmo 118:5.
Apang paano kag san-o matigayon ang literal nga paghidait sa bug-os nga globo? Tan-awon naton sa masunod nga mga artikulo.
[Kahon sa pahina 6]
Ang Madamo nga Bahin sang Kasisit-an
▪ Halos ikaapat nga bahin sang populasyon sang kalibutan ang nagakabuhi sa daku nga kaimulon, kag minilyon pa ang nagapuyo sa manubo katama nga kahimtangan nga nagabutang sa katalagman sang ila kabuhi.
▪ Kapin sa 200 milyones ka bata ang kulang sing masustansia nga kalan-on.
▪ Kada tuig mga tatlo ka milyon ka bata nga kubos sa singko anyos ang edad ang nagakapatay bangod sa lupot.
▪ Ang makalalaton nga balatian nagpatay sa mga 16.5 milyones ka tawo sang 1993 lamang. Bangod lainlain ang pagklase sang pila ka pungsod sa mga balatian, ang matuod nga kadamuon mahimo nga mas mataas.
▪ Mga 500 milyones ka tawo ang naapektuhan sang pila ka sahi sang problema sa hunahuna.
▪ Ang kadamuon sang paghikog nagadugang sing mas madasig sa tunga sang mga pamatan-on sangsa bisan anong iban pa nga pangidaron.
▪ “Ang gutom kag pagkawalay palamugnan nangin mga dagta sa kalibutan,” siling sang The Unesco Courier. “May yara 35 milyones nga wala sing trabaho sa pito ka pinakamanggaranon nga pungsod sa kalibutan, kag sa Brazil lamang may yara 20 milyones ka mamumugon nga para sa ila ang pagtigayon sing obra wala gani nagakahulugan nga makakaon sila sing nagakaigo.”
[Kapsion sa pahina 7]
Ang pangamuyo magabulig sa aton sa pagkonsentrar sa saad sang Dios tuhoy sa isa ka kalibutan nga wala sing kasisit-an