Mga Reperensia Para sa Pagkabuhi kag Pagministeryo nga Workbook Para sa Miting
© 2022 Watch Tower Bible and Tract Society of Pennsylvania
MARSO 6-12
MGA BAHANDI SA PULONG SANG DIOS | 1 CRONICA 23-26
“Naorganisar sing Maayo ang Pagsimba sa Templo”
it-2-E 241
Levinhon
Sa tion sang paggahom ni David, naorganisar sing maayo ang hilikuton sang mga Levinhon kay nagtangdo sia sing mga manugdumala, opisyal, hukom, manugbantay sang gawang, kag tulugyanan sang mga bahandian. Nagtangdo man sia sing madamo nga manugbulig sang mga saserdote sa templo, sa luwang, kag sa mga kalan-an nga ginagamit may kaangtanan sa paghatag sing dulot, sa paghalad, sa pagpaputli, sa pagtakus sang kabug-aton kag kadamuon, kag sa iban pa nga obligasyon sa pagbantay. Pareho sa pagtunga sang mga saserdote, ang Levinhon nga mga musikero gin-organisar sa 24 ka grupo, kag nagabuslanay sila sa pag-alagad. Ang ila mga katungdanan ginadesisyunan paagi sa pagabutgabot. Kon parte sa pagpili kon diin naasayn ang mga grupo sang mga manugbantay sang gawang, ginapagabutgabutan man ini.—1Cr 23, 25, 26; 2Cr 35:3-5, 10.
it-2-E 686
Saserdote
Sa pag-alagad sa templo, ang mga saserdote gin-organisar sa idalom sang lainlain nga opisyal. Ang pag-asayn sang ila katungdanan paagi sa pagabutgabot. Ang kada grupo nagaalagad sing tag-isa ka semana, gani ang 24 ka grupo makaalagad sing duha ka beses sa isa ka tuig. Ginapakita nga ang tanan nga saserdote nagaalagad sa tion sang mga kapiestahan kay linibo ang dulot nga ginahalad sang katawhan, pareho man sa tion nga gindedikar ang templo. (1Cr 24:1-18, 31; 2Cr 5:11; ipaanggid ang 2Cr 29:31-35; 30:23-25; 35:10-19.) Ang isa ka saserdote puede mag-alagad sa iban nga tion basta wala lang ini nagatublag sa ginahimo sang mga saserdote nga nakaiskedyul nga mag-alagad. Suno sa rabiniko nga tradisyon, sang nagkabuhi si Jesus sa duta, madamo sing saserdote, gani ang katungdanan kada semana gintunga pa sa lainlain nga pamilya nga nagahuman sang isa ka grupo, amo nga ang kada pamilya makaalagad sing isa ka adlaw ukon sobra pa depende sa ila kadamuon.
it-2-E 451-452
Musika
May kaangtanan sa paghanda para sa templo ni Jehova, nagpili si David sing 4,000 ka Levinhon para magkanta kag magtokar sang musika. (1Cr 23:4, 5) Kag 288 sa ila ang “nahanas sa pag-amba kay Jehova, . . . kag sampaton sila tanan.” (1Cr 25:7) Ang tanan nga kahimusan ginadumalahan sang tatlo ka sampaton nga musikero nga sanday Asap, Heman, kag Jedutun (nga kilala man nga Etan). Bangod ang kada isa sa ila kaliwat sang tatlo ka anak ni Levi nga sanday Gersom, Kohat, kag Merari, ang tatlo ka panguna nga pamilya sang mga Levinhon may representante sa grupo sang mga musikero sa templo. (1Cr 6:16, 31-33, 39-44; 25:1-6) Ang mga anak nga lalaki sining tatlo 24 tanan, kag nalakip sila sa 288 nga sampaton nga musikero. Paagi sa pagabutgabot, ang kada anak nga lalaki gintangdo bilang pangulo sang kada grupo sang mga musikero. Sa iya grupo, kaupod niya ang 11 pa ka “sampaton” nga ginpili halin sa iya mga anak nga lalaki kag sa iban nga Levinhon. Gani ang 288 ([1 + 11] × 24 = 288) ka sampaton nga musikero nga Levinhon, pareho sa mga saserdote, gintunga sa 24 ka grupo. Kon tungaon ang nabilin nga 3,712 nga “nagatuon pa lang,” mga 155 pa ka lalaki ang madugang sa kada grupo. Buot silingon, sa kada “sampaton” may nakaasayn nga mga 13 ka Levinhon sa lainlain nga bahin sang pagtudlo kag paghanas sa musika. (1Cr 25:1-31) Bangod ang mga nagapatunog sang trumpeta mga saserdote, nagdugang pa gid sila sa Levinhon nga mga musikero.—2Cr 5:12; ipaanggid ang Nu 10:8.
it-1-E 898
Manugbantay sang Gawang
Sa Templo. Antes mapatay si Hari David, gin-organisar niya sing maayo ang mga Levinhon kag ang mga nagaalagad sa templo, lakip na ang mga manugbantay sang gawang nga may kadamuon nga 4,000. Ang kada grupo nagaalagad sing pito ka adlaw. Responsibilidad nila nga bantayan ang balay ni Jehova kag ginasigurado nga ang mga puertahan mabuksan kag masiraduhan sa insakto nga oras. (1Cr 9:23-27; 23:1-6) Magluwas sa pagbantay, sila man ang nagakolekta sang mga amot nga ginadala sang mga tawo para gamiton sa templo. (2Ha 12:9; 22:4) Sang ulihi, sang gintangdo sang mataas nga saserdote nga si Jehoiada si Jehoas nga mangin hari, may ginpili sia nga pinasahi nga mga guardia para magbantay sa mga gawang sang templo agod maproteksionan ang bata nga si Jehoas kay Rayna Atalia nga gusto mag-agaw sang trono. (2Ha 11:4-8) Sang ginpauntat ni Hari Josias ang pagsimba sa mga idolo, nagbulig ang mga manugbantay sang puertahan nga ipagua sa templo ang tanan nga kagamitan nga gingamit sa pagsimba kay Baal. Dayon ginsunog ini sa gua sang siudad.—2Ha 23:4.
Espirituwal nga mga Hiyas
Mangin Malipayon Pa Gid Kita sa Pagsimba kay Jehova
10 Ginasimba naton si Jehova paagi sa pagkanta kaupod sang aton mga kauturan. (Sal. 28:7) Para sa mga Israelinhon, ang pagkanta isa ka importante nga bahin sang ila pagsimba. Gintangdo ni Hari David ang 288 ka Levinhon nga mangin mga manug-amba sa templo. (1 Cron. 25:1, 6-8) Subong, mapabutyag naton sa aton Dios nga palangga naton sia paagi sa pagkanta sang mga ambahanon sang pagdayaw. Indi kinahanglan nga manami gid kita magkanta para mahimo naton ini. Binagbinaga ini nga pagpaanggid: “Kita tanan nagakasandad sing madamong beses” sa aton paghambal, pero wala kita nagauntat sa paghambal sa kongregasyon kag sa pagbantala. (Sant. 3:2) Indi man kita dapat mag-untat sa pagkanta sang pagdayaw kay Jehova, bisan pa indi kita manami magkanta.
MARSO 13-19
MGA BAHANDI SA PULONG SANG DIOS | 1 CRONICA 27-29
“Ang Mahigugmaon nga Laygay sang Amay sa Iya Anak”
Pagtipig sang Aton Cristianong Identidad
9 Mangin kumbinsido sang kamatuoran sa Biblia. Mahimo magluya ang aton identidad subong mga alagad ni Jehova kon wala ini napasad sing malig-on sa ihibalo sang Kasulatan. (Filipos 1:9, 10) Ang kada Cristiano—bata man ukon tigulang—dapat makapamatuod sa iya kaugalingon nga ang iya ginatuuhan amo gid ang kamatuoran nga masapwan sa Biblia. Ginpalig-on ni Pablo ang masigkatumuluo: “Pat-ura ninyo ang tanan nga butang; hupti sing malig-on ang maayo.” (1 Tesalonica 5:21) Dapat marealisar sang mga Cristianong pamatan-on nga nagdaku sa mahinadlukon-sa-Dios nga pamilya nga indi sila mangin matuod nga mga Cristiano bangod sang pagtuo sang ila mga ginikanan. Ang amay ni Solomon nga si David naglaygay sa iya nga ‘kilalahon niya ang Dios sang iya amay kag alagdon sia nga may himpit nga tagipusuon.’ (1 Cronica 28:9) Indi bastante nga saksihan lamang sang pamatan-on nga si Solomon kon paano ang iya amay nagtuo kay Jehova. Kinahanglan nga sia mismo ang magkilala kay Jehova, kag amo sini ang iya ginhimo. Nakitluoy sia sa Dios: “Hatagi ako karon sing kaalam kag ihibalo agod makagua kag makasulod sa atubangan sini nga katawhan.”—2 Cronica 1:10.
Hupti ang Himpit nga Tagipusuon kay Jehova
13 Maathag ang leksion. Ang pag-alagad kay Jehova sing bug-os tagipusuon wala lamang nagakahulugan sing regular nga pagtambong sa mga miting kag pagministeryo. (2 Cron. 25:1, 2, 27) Kon sa iya tagipusuon padayon nga ginahigugma sang isa ka Cristiano ang pila ka pamaagi sang pagkabuhi sang kalibutan, may katalagman sia nga madula ang iya maayo nga kaangtanan sa Dios. (Luc 17:32) Gani, agod maalagad naton sing bug-os ang Dios, dapat naton ‘kangil-aran ang malaut, kag magpanguyapot sing malig-on sa maayo.’ (Roma 12:9; Luc. 9:62) Kon amo, bisan pa nga ang pila ka butang sa kalibutan ni Satanas daw mapuslanon kag maayo, dapat naton pat-uron nga indi ini magpauntat sa aton pag-alagad sa Dios sing bug-os tagipusuon.—2 Cor. 11:14; basaha ang Filipos 3:13, 14.
“Magpakaisog . . . kag Himua” ang Imo Hilikuton
20 Ginpahanumdom ni Hari David si Solomon nga mangin kaupod niya si Jehova tubtob mahuman ang templo. (1 Cron. 28:20) Nagtudok sa hunahuna kag tagipusuon ni Solomon ang ginsiling sang iya amay, gani bisan bata pa sia kag wala pa sing eksperiensia, wala ini nakaupang sa iya. Nagpakita sia sing dalayawon nga kaisog kag ginsugdan ang proyekto. Sa bulig ni Jehova, natapos niya ang matahom gid nga templo sa sulod sang pito ka tuig kag tunga.
21 Pareho sang ginhimo ni Jehova kay Solomon, buligan man niya kita nga magpakaisog kag mahimo ang aton hilikuton sa aton pamilya kag sa kongregasyon. (Isa. 41:10, 13) Kon nagapakita kita sang kaisog sa aton pagsimba kay Jehova, makasalig kita sa iya pagpakamaayo subong kag sa palaabuton. Gani, “magpakaisog . . . kag himua” ang imo hilikuton.
Espirituwal nga mga Hiyas
Mangin Abyan Kon Nabutang sa Katalagman ang Pag-abyanay
May iban pa nga suod nga abyan si David nga nag-unong sa iya sa mabudlay nga mga kahimtangan. Ang isa sini amo si Husai, nga ginsambit sa Biblia nga “abyan ni David.” (2 Sam. 16:16; 1 Cron. 27:33) Mahimo nga isa sia ka opisyal sang palasyo kag suod nga abyan sang hari, kag kon kaisa sia ang ginasugo sang hari nga himuon ang kompidensial nga mga mando.
Sang gin-agaw ni Absalom nga anak ni David ang ginharian, madamo nga Israelinhon ang nagsuporta sa iya, pero wala mag-upod si Husai. Nag-upod sia kay David sa pagpalagyo. Nasakitan gid si David kay ginluiban sia sang iya anak kag sang iban pa nga ginasaligan gid niya. Pero gin-unungan sia ni Husai, nga handa magrisgo sang iya kabuhi para tapnaon ang pagrebelde. Wala lang ini ginhimo ni Husai bangod responsibilidad niya bilang opisyal sang palasyo kundi isa man sia ka matuod nga abyan.—2 Sam. 15:13-17, 32-37; 16:15–17:16.
MARSO 20-26
MGA BAHANDI SA PULONG SANG DIOS | 2 CRONICA 1-4
“Indi Maalamon ang Desisyon ni Hari Solomon”
it-1-E 174 ¶5
Hangaway
Sang naghari si Solomon, may bag-o nga rekord nga ginsulat sa kasaysayan sang hangaway sang Israel. May paghidait ang iya paggahom, pero nagtipon sia sing madamo nga kabayo kag kangga. (Tan-awa ang KANGGA.) Ang kalabanan nga mga kabayo ginbakal halin sa Egipto. Kinahanglan maghimo sing mga siudad sa ila teritoryo para mangin kampo sang bag-o nga mga soldado. (1Ha 4:26; 9:19; 10:26, 29; 2Cr 1:14-17) Pero wala ginpakamaayo ni Jehova ang ginhimo ni Solomon, kag sang napatay sia kag natunga ang iya ginharian nagluya ang hangaway sang Israel. Si Isaias nagsulat sang ulihi: “Makaluluoy ang mga nagadulhog sa Egipto sa pagpangayo sing bulig, nga nagasalig sa mga kabayo, ang mga nagasalig sa madamo nga kangga sa inaway, kag sa makusog nga mga kabayo. Apang wala sila magsalig sa Balaan sang Israel, kag wala nila ginpangita si Jehova.”—Isa 31:1.
it-1-E 427
Kangga
Sa pungsod sang Israel, sang tion na ni Solomon nga nagdamo ang kangga para sa inaway. Bangod ini sa paandam sang Dios nga indi magpadamo ang hari sing kabayo, kay basi diri na magsalig ang pungsod para sa ila seguridad. Amo ini ang rason kon ngaa diutay lang sang una ang mga kangga, kay kinahanglan ang mga kabayo para magamit ini. (Deu 17:16) Sang ginpaandaman ni Samuel ang katawhan sa posible nga resulta sang paggahom sang mga hari, ginsilingan niya sila: “Kuhaon niya ang inyo mga anak nga lalaki kag gamiton sila sa iya mga kangga.” (1Sa 8:11) Sang gintinguhaan nga agawon ni Absalom kag ni Adonias ang pagkahari, nagpahimo sing kangga ang kada isa sa ila kag may 50 ka lalaki nga nagadalagan sa unahan sini. (2Sa 15:1; 1Ha 1:5) Sang napierde ni David ang hari sang Zoba, ginkuha niya ang 100 ka kabayo nga nagaguyod sang kangga.—2Sa 8:3, 4; 10:18.
Sang ginpabakod ni Hari Solomon ang hangaway sang Israel, ginpadamo niya ang kangga nga naglab-ot sa 1,400. (1Ha 10:26, 29; 2Cr 1:14, 17) Magluwas sa Jerusalem, may iban pa nga banwa nga ginatawag nga siudad nga ginapunduhan sang kangga. May mga pasilidad ini sa pagmentinar sang mga kangga.—1Ha 9:19, 22; 2Cr 8:6, 9; 9:25.
Espirituwal nga mga Hiyas
Talalupangdon nga mga Punto Gikan sa Tulun-an sang Ikaduhang mga Cronica
1:11, 12. Ginpakita sang pangabay ni Solomon kay Jehova nga ang pagtigayon sing kaalam kag ihibalo amo gid ang yara sa tagipusuon sang hari. Sa pagkamatuod, ang aton mga pangamuyo sa Dios nagapakita kon ano gid ang yara sa aton tagipusuon. Maalamon nga binagbinagon naton kon ano ang aton ginapangamuyo.
MARSO 27–ABRIL 2
MGA BAHANDI SA PULONG SANG DIOS | 2 CRONICA 5-7
“Atipanon Ko Ini sa Tanan nga Tion”
Indi Mag-untat sa Pagtipon sing Tingob
Sang ulihi, sang nangin hari si David sa Jerusalem, ginpabutyag niya ang daku nga handum nga magpatindog sing isa ka permanente nga balay para sa himaya ni Jehova. Apang, bangod si David isa ka mangangaway, si Jehova nagsiling sa iya: “Indi ka magpatindog sing balay para sa akon ngalan.” Sa baylo, ginpili Niya ang anak nga lalaki ni David nga si Solomon nga amo ang magtukod sang templo. (1 Cronica 22:6-10) Gintukod ang templo sa sulod sang pito ka tuig kag tunga, kag gin-inagurahan ini ni Solomon sang 1026 B.C.E. Ginkahamut-an ni Jehova ining templo, nga nagsiling: “Ginpakabalaan ko ini nga balay nga imo gintukod paagi sa pagbutang didto sang akon ngalan tubtob sa tion nga walay latid; kag ang akon mga mata kag ang akon tagipusuon pat-od nga didto pirme.” (1 Hari 9:3) Tubtob nga matutom ang mga Israelinhon, magapabilin ang kahamuot ni Jehova sa sini nga balay. Apang, kon magliso sila gikan sa kon ano ang matarong, kuhaon ni Jehova ang iya kahamuot gikan sa sina nga duog, kag ‘ang balay mangin mga tinumpok sang mga kagulub-an.’—1 Hari 9:4-9; 2 Cronica 7:16, 19, 20.
it-2-E 1077-1078
Templo
Kasaysayan. Ini nga templo ginlaglag sang 607 B.C.E., sang ginguba ini sang hangaway sang Babilonia sa paggahom ni Hari Nabocodonosor. (2Ha 25:9; 2Cr 36:19; Jer 52:13) Bangod ang Israel nagsimba sa butig nga mga dios, gintugutan sang Dios ang mga pungsod nga salakayon ang Juda kag Jerusalem, kag may mga tion pa gani nga ginpanguha ang mga bahandi sa templo. May mga panahon man nga napabay-an ang templo. Ginpanguha ni Hari Sisak sang Egipto ang mga bahandi sini (993 B.C.E.) sang tion sang paghari si Rehoboam nga anak ni Solomon, nga mga 33 ka tuig pa lang pagkatapos nga gin-inagurahan ini. (1Ha 14:25, 26; 2Cr 12:9) Importante kay Hari Asa (977-937 B.C.E.) ang balay ni Jehova, pero para amligan ang Jerusalem ginbayaran niya si Hari Ben-hadad I sang Siria sang pilak kag bulawan halin sa bahandi sang templo agod bugtuon sini ang iya kasugtanan kay Baasa nga hari sang Israel. Kabuangan gid ang iya ginhimo.—1Ha 15:18, 19; 2Cr 15:17, 18; 16:2, 3.
Espirituwal nga mga Hiyas
Nakilala Niya ang “Tagiposoon sang mga Anak sang mga Tawo”
Malugpayan kita sang pangamuyo ni Solomon. Mahimo nga indi bug-os nga maintiendihan sang mga tawo kon ano gid ang aton ginabatyag—ang aton “kalalat-an” kag “kalisud.” (Hulubaton 14:10) Pero naintiendihan gid kita ni Jehova, kag nagaulikid sia sa aton. Kon ipangamuyo naton ang aton mga ginabatyag, mas masarangan naton ang aton mga problema. “[Itugyan] ninyo sa iya ang tanan ninyo nga kabalaka,” siling sang Biblia, “bangod nagaulikid sia sa inyo.”—1 Pedro 5:7.
ABRIL 10-16
MGA BAHANDI SA PULONG SANG DIOS | 2 CRONICA 8-9
“Importante sa Iya ang Kaalam”
Kon Bugana ang Kaalwan
Sa pagkamatuod, ang reyna sang Sheba nagsakripisyo man sing daku nga tion kag panikasog sa pagduaw kay Solomon. Mahimo nga ang Sheba yara sa duog sang Republika sang Yemen karon; busa ang reyna kag ang iya katay sang mga kamelyo naglakbay sing kapin sa 1,600 ka kilometro pa Jerusalem. Subong sang ginsiling ni Jesus, “naghalin sia sa kaukbungan sang duta.” Ngaa ang reyna sang Sheba nagpangabudlay gid? Nagkari sia agod “mamati sa kaalam ni Solomon.”—Lucas 11:31.
Isa ka Pagduaw nga Ginpadyaan sing Bugana
Kon ano gid man, nag-abot ang reyna sa Jerusalem “upod ang tama ka daku nga katay, nga may mga kamelyo nga nagadala sing lana sang balsamo kag tama kadamo nga bulawan kag mga bato nga bilidhon.” (1 Hari 10:2a) Ang iban nagasiling nga ang “daku nga katay” nagalakip sang soldado nga tagpangapin. Halangpunon ini bangod ang reyna isa ka gamhanan nga persona kag nagalakbay nga may malahalon nga mga butang nga indi makalkula ang bili.
Apang, talupangda nga nabatian sang reyna ang kabantugan ni Solomon “may kaangtanan sa ngalan ni Jehova.” Sa amo indi lamang ini isa ka paglakbay sa negosyo. Maathag nga nagkari ang reyna, una sa tanan, agod makapamati sang kaalam ni Solomon—ayhan agod makatuon pa gani nahanungod sa iya Dios, si Jehova. Sanglit mahimo nga kaliwat sia ni Sem ukon ni Ham, nga mga sumilimba anay ni Jehova, mahimo nga interesado sia sa relihion sang iya mga katigulangan.
Isa ka Pagduaw nga Ginpadyaan sing Bugana
Nagdayaw gid ang reyna sang Seba sa kaalam ni Solomon kag sa kahamungaya sang iya ginharian sa bagay nga “nahalawhaw sia.” (1 Hari 10:4, 5) Ginhangop sang iban ini nga prase nga ang reyna “naurungan.” Ang isa ka iskolar nagapanugda pa gani nga nalipong sia! Kon ano gid man ang natabo, nahayanghag ang reyna sa iya nakita kag nabatian. Gintawag niya nga malipayon ang mga alagad ni Solomon bangod nakabati sining kaalam sang hari, kag ginpakamaayo niya si Jehova tungod sang pagpalingkod kay Solomon sa trono. Nian ginhatagan niya ang hari sing malahalon nga mga dulot, nga ang bulawan lamang nagabili, suno sa karon nga bili, sing mga $40,000,000. Naghatag man si Solomon sing mga dulot, nagahatag sa reyna sang “tanan nga iya naluyagan nga iya pangayuon.”—1 Hari 10:6-13.
it-2-E 990-991
Solomon
Pagkatapos man makita sang rayna ang katahom sang templo kag balay ni Solomon, ang pag-alagad sang iya mga serbidor sang pagkaon kag ilimnon kag ang ila nga bayo, kag ang mga halad nga sinunog nga ginahimo sa templo, “nahalawhaw gid sia.” Gani nagsiling sia, “Wala pa gali sa katunga ang nasugid sa akon. Ang imo kaalam kag kahamungayaan labaw pa sangsa akon nabalitaan.” Dayon nagsiling sia nga malipayon ang mga alagad nga nagaalagad sa amo sina nga klase sang hari. Bangod sini, gindayaw niya si Jehova nga Dios, nga nagpakita sang gugma sa Israel paagi sa pagtangdo kay Solomon nga hari para magpadapat sang hustisya kag pagkamatarong.—1Ha 10:4-9; 2Cr 9:3-8.
Espirituwal nga mga Hiyas
it-2-E 1097
Trono
Sa mga manuggahom sang Israel, ang trono lang gid nga ginhimo ni Solomon ang detalyado nga ginlaragway. (1Ha 10:18-20; 2Cr 9:17-19) Ginapakita nga ara ini sa “Portiko sang Trono,” nga isa sa mga tinukod sa Bukid Moria sa Jerusalem. (1Ha 7:7) ‘Daku ini nga trono nga tiposo kag ginhaklapan ini sing puro nga bulawan kag may tipulon ini nga atop-atop kag mga halambuyan.’ Bisan pa mahimo nga tiposo ang kalabanan nga materyal nga gingamit sa sini nga trono, ang paagi sang paghimo nga masami nga ginasunod sa templo nagapakita nga human ini sa kahoy, ginhaklapan ini sang puro nga bulawan kag gindekorasyunan sang mga panel nga human sa tiposo. Kon tan-awon ini nga trono, daw human ini sa puro nga tiposo kag bulawan. Pagkatapos masambit ang anom ka halintang pakadto sa trono, ang rekord nagasiling: “May duha ka estatwa sang leon nga nagatindog sa tupad sang mga halambuyan. May 12 ka estatwa sang leon nga nagatindog sa anom ka halintang, isa ka estatwa sang leon sa magtimbang nga punta sang kada halintang.” (2Cr 9:17-19) Nagakaigo gid nga ang leon nagasimbulo sa paggahom kag awtoridad. (Ge 49:9, 10; Bug 5:5) Ginapakita nga ang 12 ka leon nagarepresentar sa 12 ka tribo sang Israel, nga posible nagasimbulo sang ila pagpasakop kag pagsuporta sa nagapungko sa sini nga trono. Naangot man sa trono ang bulawan nga palatungan sang tiil. Base sa paglaragway sining tiposo kag bulawan nga trono—nga mataas, may atop-atop kag may dalagku nga mga leon sa atubangan—amo ini ang pinakamanami nga trono sadto nga tion, nadiskobrehan man ini sang mga arkeologo, makita sa mga monumento, ukon ginlaragway sa mga tinigib. Ang nagsulat sini nga kasaysayan nagsiling: “Wala gid sing ginharian nga may pareho sini.”—2Cr 9:19.
ABRIL 17-23
MGA BAHANDI SA PULONG SANG DIOS | 2 CRONICA 10-12
“Sunda ang Maalamon nga Laygay”
Natigayon Kuntani Niya ang Kahamuot sang Dios
Nabudlayan gid si Rehoboam! Kon sundon niya ang luyag sang katawhan, dapat buhinan niya ang badyet sang iya pamilya kag sang mga nagaistar sa palasyo kag pamag-anon ang trabaho sang katawhan. Pero kon mangindi sia, mahimo magrebelde ang mga tawo. Ano ang iya himuon? Gin-istorya niya anay ang mga tigulang nga nagbulig sa iya amay. Pero nangayo man sia sang panugda sang mga kaedad niya. Ginsunod ni Rehoboam ang ila laygay kag namat-od sia nga pintasan ang katawhan. Sia nagsabat: “Pabug-aton ko pa ang inyo lulan, kag dugangan ko pa gid ini. Kon ginlatigo kamo sang akon amay, latiguhon ko kamo sing latigo nga may matalom nga mga metal.”—2 Cron. 10:6-14.
Kon Paano Ikaw Makahimo sing Maalamon nga mga Desisyon
Nagaaman man si Jehova sang mga hamtong sa kongregasyon nga masugiran naton sang aton mga desisyon. (Efeso 4:11, 12) Apang, sa pagkonsulta sa iban, indi naton dapat sundon ang ginahimo sang mga nagapalapit sa nagkalainlain nga mga tawo tubtob sa ulihi makakita sila sing isa nga magasiling kon ano ang luyag nila mabatian. Nian ginasunod nila ang iya laygay. Dapat man naton dumdumon ang nagapaandam nga halimbawa ni Rehoboam. Sang magahimo sia sing isa ka serioso nga desisyon, nakabaton sia sing maayo nga laygay gikan sa tigulang nga mga lalaki nga nakapangalagad upod sa iya amay. Apang, sa baylo nga sundon ang ila laygay, nagkonsulta sia sa lamharon nga mga lalaki nga mga katubotubo niya. Sa pagsunod sang ila laygay, nakahimo sia sing isa ka di-maalamon nga desisyon kag subong resulta nadula niya ang isa ka daku nga bahin sang iya ginharian.—1 Hari 12:1-17.
Kon nagapangayo sing laygay, pangayua ini sa mga eksperiensiado na sa kabuhi kag may madamo nga ihibalo sa Kasulatan kag tudok nga pagtahod sa husto nga mga prinsipio. (Hulubaton 1:5; 11:14; 13:20) Kon posible, maghinguyang sing tion sa pagpamalandong sa mga prinsipio nga nadalahig kag sa tanan nga impormasyon nga imo ginpanalawsaw. Samtang ginatan-aw mo ang mga butang sa kapawa sang Pulong ni Jehova, ang husto nga desisyon mahimo nga mangin mas maathag.—Filipos 4:6, 7.
it-2-E 768 ¶1
Rehoboam
Bangod sa pagkamatinaastaason kag kapintas ni Rehoboam, nagpahilayo pa gid ang katawhan. Ang mga tribo nga nagsuporta sa panimalay ni David amo lang ang tribo ni Juda kag ni Benjamin, samtang ang mga saserdote kag mga Levinhon sa duha ka ginharian, lakip na ang mga naglapta nga indibiduwal sang pulo ka tribo, nagsuporta man.—1Ha 12:16, 17; 2Cr 10:16, 17; 11:13, 14, 16.
Espirituwal nga mga Hiyas
it-1-E 966-967
Daw Kanding nga mga Demonyo
Ang ginsiling ni Josue sa Josue 24:14 nagapakita nga naimpluwensiahan ang mga Israelinhon sang butig nga pagsimba sang didto sila sa Egipto, samtang suno kay Ezequiel padayon nila nga ginahimo ang pagano nga mga buhat bisan pa madugay na nga tion ang nagligad. (Eze 23:8, 21) Bangod sini, nagapati ang pila ka iskolar nga ang sugo sang Dios sa kamingawan nga nagadumili sa mga Israelinhon nga “maghalad sa daw kanding nga mga demonyo” (Le 17:1-7) kag ang pagtangdo ni Jeroboam sing mga saserdote “para sa sagrado nga mataas nga mga duog agod mag-alagad sa daw kanding nga mga demonyo kag sa mga estatwa sang tinday nga baka nga ginpahimo niya” (2Cr 11:15) nagapakita nga may mga Israelinhon gihapon nga nagasimba sa kanding pareho sa ginahimo sa Egipto, ilabi na sa manubo nga bahin sang Egipto. Nagsiling si Herodotus (II, 46) nga sa sini nga pagsimba sang mga Egiptohanon naghalin ang pagpati sang mga Griego kay Pan kag sa mga satyr, sa maulag nga mga dios sang kagulangan, nga sang ulihi ginlaragway nga may mga sungay, kag may ikog kag mga tiil sang kanding. Ang pila nagsiling nga ini nga pagano nga mga dios, nga ang katunga sapat kag ang katunga tawo, amo ang ginhalinan sang paglaragway kay Satanas nga may ikog, may sungay, kag may biyak ang mga tiil, ang pagpati nga lapnag sa nagapangangkon nga mga Cristiano sang Madulom nga Panag-on.
Pero wala ginasugid kon ano gid ang ginapatuhuyan sang “mga mabalahibo” (seʽi·rimʹ). Bisan pa ang pila nagasiling nga literal ini nga mga kanding ukon mga diosdios nga ang porma pareho sa kanding, posible nga indi man amo sini ang ginapatuhuyan; kag wala man ini ginapamatud-an sang iban nga kasulatan. Ang termino nga gingamit mahimo nagapakita nga sa hunahuna sang mga nagasimba sa sini, ining butig nga mga dios daw kanding ang hitsura ukon mabalahibuon. Ukon, ang paggamit sang termino nga “mga kanding” sa ginsambit nga mga teksto mahimo isa ka paagi para ipakita ang pagpakamalaut sa tanan nga pagsimba sa idolo, bisan ang gingamit nga tinaga para sa mga diosdios sa madamo nga teksto naghalin sa termino nga ang orihinal nga kahulugan “bilogbilog nga ipot sang sapat,” pero wala ini nagapahangop nga ang mga diosdios literal nga human sa ipot sang sapat.—Le 26:30; Deu 29:17.
ABRIL 24-30
MGA BAHANDI SA PULONG SANG DIOS | 2 CRONICA 13-16
“Magsalig Pirme kay Jehova”
Mga Pamatan-on nga Lalaki, Ano ang Dapat Ninyo Himuon Para Saligan Kamo?
12 Sang pamatan-on si Hari Asa, mapainubuson sia kag maisog. Halimbawa, sang ginbuslan niya ang iya amay nga si Abias, ginpanikasugan niya nga dulaon ang pagsimba sa mga diosdios. “Ginsilingan man niya ang Juda nga pangitaon nila si Jehova nga Dios sang ila mga katigulangan kag tumanon nila ang Kasuguan kag ang sugo.” (2 Cron. 14:1-7) Kag sang ginsalakay ni Zera nga Etiopianhon upod ang 1,000,000 ka soldado ang Juda, maayo gid ang ginhimo ni Asa kay nangamuyo sia kay Jehova nga buligan sia. Nagsiling sia: “O Jehova, indi problema sa imo kon bala ang ginabuligan mo madamo ukon indi gamhanan. Buligi kami, O Jehova nga amon Dios, kay nagasalig kami sa imo.” Mabatyagan naton sa ginsiling ni Asa nga nagatuo gid sia nga luwason sia ni Jehova kag ang iya katawhan. Bangod nagsalig si Asa sa iya Amay sa langit, ‘ginbuligan ni Jehova si Asa nga mapierde ang mga Etiopianhon.’—2 Cron. 14:8-12.
Mga Pamatan-on nga Lalaki, Ano ang Dapat Ninyo Himuon Para Saligan Kamo?
13 Sigurado gid nga ginkulbaan si Asa sang ginsalakay sila sang 1,000,000 ka soldado. Pero bangod nagsalig si Asa kay Jehova, napierde niya sila. Pero sang nakaeksperiensia si Asa sang indi pareho sini kadaku nga problema, wala sia nagpabulig kay Jehova. Sang ginsalakay sia sang malain nga hari sang Israel nga si Baasa, nagpabulig si Asa sa hari sang Siria. Indi gid maayo ang resulta sang iya desisyon. Paagi sa manalagna nga si Hanani, ginsilingan ni Jehova si Asa: “Bangod nagsalig ka sa hari sang Siria kag wala ka magsalig kay Jehova nga imo Dios, nakapalagyo sa imo ang mga soldado sang hari sang Siria.” Sugod sadto, pirme lang may nagapakig-away kay Asa. (2 Cron. 16:7, 9; 1 Hari 15:32) Ano ang matun-an ninyo sa sini?
Mga Pamatan-on nga Lalaki, Ano ang Dapat Ninyo Himuon Para Saligan Kamo?
14 Mangin mapainubuson pirme kag padayon nga magsalig kay Jehova. Sang ginbawtismuhan ka, ginpakita mo nga nagatuo ka gid kag nagasalig kay Jehova. Kag nalipay gid si Jehova nga batunon ka sa iya pamilya. Ang dapat mo himuon subong amo ang padayon nga magsalig kay Jehova. Mahimo nga nagapabulig ka dayon kay Jehova kon kinahanglan mo maghimo sang importante gid nga mga desisyon, pero ano ang ginahimo mo sa iban nga mga sitwasyon? Importante gid nga magsalig ka kay Jehova kon nagahimo sang desisyon. Nalakip sa sini ang pagpili sang kalingawan, sang trabaho, kag sang gusto mo nga himuon sa imo kabuhi. Indi magsalig sa imo kaalam. Sa baylo, mangita sang mga prinsipio sa Biblia nga makabulig sa imo sitwasyon kag iaplikar ini. (Hulu. 3:5, 6) Kon himuon mo ini, malipay gid si Jehova sa imo kag respetuhon ka sang mga kauturan sa kongregasyon.—Basaha ang 1 Timoteo 4:12.
Espirituwal nga mga Hiyas
Mag-alagad kay Jehova sing Bug-os Tagipusuon!
7 Mahimo usisaon naton ang aton tagipusuon kon bala bug-os ang aton debosyon sa Dios. Pamangkuta ang imo kaugalingon, ‘Determinado bala ako nga pahamut-an si Jehova, pangapinan ang matuod nga pagsimba, kag amligan ang iya katawhan sa malain nga impluwensia?’ Dapat gid nga mangin maisog si Asa para mabatuan niya si Maaca, nga rayna sang Juda! Mahimo nga wala ka sing nakilala nga nagagawi pareho kay Maaca, pero basi may mga kahimtangan nga mahimo mo mailog ang kakugi ni Asa. Halimbawa, ano abi kon makasala ang isa ka miembro sang imo pamilya ukon ang isa mo ka suod nga abyan, kag ma-disfellowship sia kay wala maghinulsol? Mauntat ka bala sa pagpakig-upod sa iya? Ano ang imo himuon?